Biz hech bir ishimizni sovrin uchun qilmaymiz. Biror ishimiz qandaydir mukofotga loyiq topilsa xursandmiz — bu jamoamiz bilan bir birimizni quchoqlab, tabriklab qo'yish uchun yana bir imkoniyat.
Yevgeniy Primachenkoning podkastda aytgan shu so'zlari esimga tushdi. Bejizga emas, o'tgan kuni butun 605 yig'ilib o'tgan yilni sarhisob qildik, oldimizga yangi maqsadlar qo'ydik.
Uchrashuv so'ngida rahbarimiz Otabek aka:
Biz sovrinlar uchun ishlamaymiz. Dunyodagi hamma festivallarni yutdim deb hisoblayveringlar. Eng kattasi — O'zbekistondan hali hech qaysi agentlik qo'lga kiritmagan Kann festivalining “Oltin sher”lari bo'lsa, uni ham qoʻlga kiritdim deb hisoblayveringlar,
deb jamoadan sakkiztamizga kutilmagan sovg'a — yuqorida rasmda ko'rib turganingiz Kann sherlari va sertifikatlarini topshirdi va shuni ta'kidlab qo'ydi:
Sizda endi Kann sheri bor. Endi yangi kreativ gʻoyalar ustida bemalol ishlashda davom etsangiz bo'ladi.
Shunday qilib, kreatorlar yig'ilishi shunaqa kreativ yakunlandi.
Xulosa va prinsip o'sha-o'sha:
Sovrinlar uchun emas, insonlar uchun ishlash kerak.
Eng katta sovrin ichkaridan keladi, tashqaridan emas.
Eng katta zavq — bu jarayondan maza qilish.
Eng zo'r sovg'a — bu hech bo'lmasa bir insonning hayotiga pozitiv (o'zgarish) olib kirish.
Eng muhim brend — bu insonlar.
Eng zo'r mukofot — ularga xizmat qilish.
605 sizga xizmat qilishda davom etadi!