ШЫПАКЕРЛЕР – БҮГИННИҢ ҚАҲАРМАНЛАРЫ
Тарийхқа нәзер салсақ, инсаният қаншадан-қанша қыйын дәўирлерди басып өткергенлигиниң гүўасы боламыз. Атап айтқанда, кеселликлердиң тарқалыўы, дүнья жүзилик урыслар ҳәм тәбийий апатлардың жүз бериўи сыяқлы аўыр дәўирлер болған.
Соның менен бирге, мине, усындай сынаўлы дәўирлердиң өзине тән қаҳарманлары болғанлығы да ҳақыйқат.
Коронавирус инфекциясы себепли бүгинги күни де инсаният, мине, усындай аўыр сынаўлы күнлерди басынан өткермекте. Сол қатары, журтымызда да бул иллеттиң тәсири күшейгени инсанды қапа қылмай қоймайды.
Мине, усындай аўыр демлерде өзлериниң пидайы хызметлери менен медицина тараўы ўәкиллери көзге көринбес жаў менен күни-түни гүресип келмекте. Олардың, мине, усы хызметлерин көрип, шыпакерлер, мийирбийкелер, тез жәрдемде хызмет көрсетиўши шыпакер ҳәм айдаўшылар, санитария хызметкерлери, қулласы, усы тараўдың бәрше ўәкиллери бүгинги күнниң ҳақыйқый қаҳарманлары, десек асыра айтқан болмаймыз.
Өйткени, саламатлық ҳаққында сөз болғанда, сөзсиз шыпакерлер ҳәм мийирбийкелер көз алдымызға келеди. Өйткени, инсан саламатлығын сақлаўда олардың хызмети уллы. Бүгинги сынаўлы күнлерде буның тиккелей гүўасы болып атырмыз.
Ҳақыйқатында да, шыпакерлер өзлериниң бар күш ҳәм ғайратын аямастан, наўқаслардың саламатлығы ушын пидайы хызмет етпекте. Сондай-ақ, тез жәрдемде тақ турған шыпакерлер ҳәм айдаўшылар да кеселликке тик барып, өз жәрдемин көрсетип келмекте.
Санитария хызметкерлери жаздың ыссы күнлеринде әтирапымызды вирус ҳәм бактериялардан тазалап, кеселликтиң ен жайыўының алдын алмақта.
Әзизлер! Гейде социаллық тармақларда медицина тараўы хызметкерлерине қарата унамсыз пикирлер билдирилген материаллардың гүўасы болып қаламыз. Әлбетте, бул нашүкирлик ҳәм үлкен гүна болып есапланады. Бул – пикирлеў қәбилети толық қәлиплеспеген адамлардың ямаса халық арасында алаўызлық пайда етиўди қәлеген душпанлардың гәпи. Сонлықтан, бундай тийкарсыз нәрселерге итибар берместен, керисинше, бул пандемия менен гүрес алып барып атырған тараў хызметкерлерине күш-қуўат бағышлап, қайырлы дуўалар жоллаўымыз мақсетке муўапық болады.
Ҳүрметли шыпакерлер, мийирбийкелер ҳәм бәрше денсаўлықты сақлаў хызметкерлери! Биз сизлерге исенемиз. Сиз таңлаған кәсип үлкен саўаплар алып келиўши муқаддес кәсип екени сөзсиз. Динимизде де ким бир инсанның жанын сақлап қалса, пүткил дүнья халқының жанын сақлап қалғандай сый-саўапларға ийе болады, делинеди. Биз билемиз, бүгин сиз жүзлеп, мыңлап адамлардың жанын сақлап қалмақтасыз.
Бизден бул иллеттен узақ болыўымызды сорап, үйимизде қалыўымызды илтимас қыласыз, ал өзлериңиз саламатлығыңызды қәўетерге қойып, бул көзге көринбес жаў менен урыс майданындасыз.
Бирақ, биз билемиз, сиз бул жаўды жеңип шығасыз. Мине, усы күнге шекем қаншадан-қанша наўқасларды емлеп, шаңарақларына саў-саламат қайтыўына себепши болдыңыз. Олардың қуўаныш толы жүзлери сизлерге және де күш-қуўат берери сөзсиз. Олардың сизлерден разы болған ҳалында қылған дуўаларының шарапаты, әлбетте, сиз әзизлердиң ҳәм қыяметке шекемги әўладларыңыздың еки дүньяда да бахытлы болыўына себеп болады, иншаалаҳ!
Бул хызметлериңиз тарийх бетлерине алтын сыялар менен жазылады. Сизлердиң бул теңсиз қаҳарманлығыңыз дүньяда ҳәр қандай сыйлыққа, ҳәр қандай мақтаўға ылайық. Келешек әўладлар сизлердиң бул хызметлериңизди мақтаныш пенен еслейди, балалар сизлерге уқсап мәрт ҳәм пидайы шыпакер болыўды арзыў етеди.
Гүллән халқымыз бенен бирге сиз – қаҳарманлардың ҳақына қайырлы дуўалар қылыў биз ушын ҳәм қарыз ҳәм парыз. Аллаҳ таала сиз – шыпакерлер, мийирбийкелер, санитария хызметкерлериниң қылып атырған саўаплы ислериңизде Өзи қолласын, еки дүньяңызды абат етип, бул сынаўлы күнлерден саў-саламат өтип, узақ ҳәм мазмунлы өмир сүриўди миясар етсин. Жуўапкершиликли, аўыр, соның менен бирге, сый-саўапларға бай болған кәсибиңиздиң жемисин көрип, ел-халқымыздың ардағында, ҳүрмет-иззетинде болыўды Аллаҳ таала несип етсин!
