Kecha shaxsiy rivojlanishda ingliz tili ahamiyati haqida post yozgan edim. Obunachilarimdan biri mana bunday comment qoldirdi.
”Men 45 yoshimda ingliz tilini o'rganishni boshladim. 1 yilda 0 dan gapira olish darajasiga yetdim. Bu egallangan har bir bosqich menga yanada kuch va g'ayrat bahsh qilmoqda.”Bu inson nega 45 yoshda til o’rganishni boshlagani sababini men sizlarga aytaman.
Bu insonni men yaxshi taniyman. Bu inson 4 ta farzand onasi, oila boshqaruvchisi, katta oilada, katta hovlida, qishloqda kelinlik vazifasini qanchalik qiyin bo’lmasin zo’r uddasidan chiqayotgan inson. Bu inson aslida yaxshi bilimli shifokor, o’ta kamtar inson. Oilaviy sharoit tufayli uzoq yillar shifokor bo’lib ishlay olmadi. Farzandlarini katta qildi. Hozirda tibbiyot institutida o’qituvchilik qiladi. Juda yaxshi eslayman, bir necha yillar avval oilasiga moddiy ko’maklashish maqsadida uyda o’tirgan kelin holatida paypoq to’qib sotgan inson bu.
Bu inson nega 45 yoshida ingliz tili o’rganishni boshladi? Avvalroq buni tushunib yetmagan edimi? Aslo unday emas. Til muhim ekanligini allaqachon tushunib yetgan. Faqat shu paytgacha oilasidan ortib o’rgana olmadi. Bu inson oxirgi 25 yilda 4 ta farzandni katta qildi, birinchi uchtasi qizlar. Bu inson o’zini ingliz tili o’rganishidan ko’ra farzandlarini ingliz tili o’rganishini ta’minladi. Hamma qizlari ingliz tilida ravon gaplasha oladi. Qizlarini chet elda o’qishini ta’minladi va ta’minlamoqda. Katta qizi hozir Norvegiyada IT sohasida xalqaro kompaniyada ishlaydi. 16 yoshdagi qizi esa yaqinda IELTS dan 7 oldi, hozir SAT o’qiyapti. Kelajagi katta. Aslida bu inson ingliz tili muhim ekanligini ancha oldin tushunib yetgan, lekin o’zbek kelini, cheklovlari ko’p.
Biror narsaga erishish uchun ko’p motivatsiya qidiramiz, internetdagi 6 ta post qo’ygan, 4 ta video qilgan insonni ko’r-ko’rona ustoz deb bilamiz. Motivatsion videolar ko’ramiz. Aslidachi? Aslida juda ko’p holatlarda motivatsiya ko’z oldimizda bo’ladi. Biz faqat uni ko’rmaymiz. Bunday kuchli insonlar atrofimizda juda ko’p. Ularni ko’rish uchun bir ozga to’xtab tafakkur qilishimiz kerak xolos.
Agar qishloqdagi kelin, 4 ta farzand onasi, hamma vazifalaridan ortib, 45 yoshida ingliz tili o’rganishni boshlab, bir yil davomida unda gaplasha oladigan darajaga yetgan bo’lsa, kitob o’qiyman desangiz hech kim tegmaydigan, ovqatingiz tayyor, kiyimingiz yuvilgan, cho’ntagingizga pul berilgan, qo’lingizda internet bo’lgan, kerak bo’lsa ingliz tili kursingiz ham to’lab qo’yilgan 20 yoshli sizda ingliz tili o’rganmaslik uchun qanday bahona bor?!
Bu insonni men yaxshi taniyman. Bu inson meni katta qilgan inson, meni opam bo’ladilar.
Endi bu insonni katta qilgan onasi qanchalik kuchli ekanligini tasavvur qilishni sizning ixtiyoringizga qoldiraman 😊
Bek Olimjon
