ILM YO'LI. Majburiy tayyorlov.bepul bir yillik ta'lim tayyorlov guruh tarbiyachilari

Qanday yaxshi

Oyimga ham, Dadamga ham,
Doim kulib boqaman.
Oyimga ham, Dadamga ham,
Juda-juda yoqaman.
Ko'chamizdan o'tganlarga,
Salom beraman kulib.
Qani, hamma shunday qilsa,
Yurmasa qovoq uyib.
Odamlar ham bir-biriga
Doim kulib qarashsa.
Qanday yaxshi, kimdir-kimga,
Shodligini ulashsa.

https://t.me/bolajonim_mening

MTT TARBIYACHI. MTT tarbiyachilari uchun eng zo'r  kanal.

Dono yigit

O’tgan zamonda bir donishmand chol yashagan ekan. Uning uch o’g’li bo’lgan ekan. O’g’illari voyaga yetgach, chol ularga shunday debdi:
— Bolalarim, men sizni yeyish-ichishdan kamsitmay o’stirdim. Endi otlaninglar, turli shaharlarga borib, qo’rg’on solib kelinglar!
To’ng’ich o’g’li otasi topgan oltin-kumushlardan olibdi. Farg’ona vodiysining hamma shaharlariga boribdi. U yerlarga bittadan kattakon uy solibdi. O’rtancha o’g’il bo’lsa, Buxoro, Samarqand tomonlarga borib, qo’rg’onlar qurdiribdi. Kenja o’g’il oqil, dono ekan. U o’zicha : «Dadam turli shaharlarda qo’rg’on solinglar, deyish bilan har bir shahardan do’st, yor-birodar orttiringlar, demoqchi. Men boshqa shaharlarga borib, uy solib yurmayman! » debdi. Kenja o’g’il safarga chiqib ketipdi.
U qayerga borsa, u yerda eng yaxshi, vafodor kishilarni topib, ular bilan do’stlashibdi. U o’z safari davomida o’rtoqlari orasida mashhur bo’lib ketipdi. U akalaridan avval uyga qaytibdi.

Chol bir kuni:
— Qani, kim qaysi shaharga qanday qo’rg’on qurdi? Yuringlar, bir aylanib ko’rib kelamiz, — debdi.
U o’g’illari bilan birga katta o’g’li qurgan qo’rg’onga boribdi. Qarasa, uy-joyning o’zi so’ppayib odamsiz turgan emish. Chol indamapti. So’ngra o’rtancha o’g’ilning qilgan ishini ko’zdan kechiribdi. Uniki ham xuddi akasiniga o’xshar ekan.
— Bu qo’rg’onlarning odamlari qani? — deb so’rabdi chol. To’ng’ich va o’rtancha o’g’il unga javob bera olmabdi. Hammalari kenja o’g’ilning yor-birodarlari yashaydigan joylarga borishibdi. Ularni kenja o’g’ilning yor-u do’stlari izzat-hurmat bilan kutib olibdilar, ketma-ket ziyofatdan bo’shamay qolibdilar, shunda chol o’g’illariga qarab bunday debdi:
— Har bir shahardan orttirilgan do’st u yerga bir qo’rg’on qurish bilan teng. Mening maqsadimni faqat kenja o’g’lim tushunibdi. Mening ismim, bilim-tajribam unga meros bo’lib qolsin.


https://t.me/bolajonim_mening

MTT TARBIYACHI. MTT tarbiyachilari uchun eng zo'r  kanal.

Odob haqida

*
Odobsiz til,
Juda yomon, bil.

*
Odosiz betga chopar.

*
Odob va fazilatning boshi -til.

*
Odoblilik belgisi - eshilib salom bergani,
Yaqinlilik belgisi - kelib-ketib turgani.

***
Kattaga hurmatda bo'l,
Kichikka izzatda bo'l.

https://t.me/bolajonim_mening

MTT TARBIYACHI. MTT tarbiyachilari uchun eng zo'r  kanal.

To‘rt sehrgar

Bor edi to‘rt og‘ayni,
Yetilgan payti ayni.
Bular to‘rt so‘z-ibora,
Zo‘r ma’nodan iborat.
Yaxshilarning dilidan,
Chiqar shirni tilidan.
Ta’mi o‘xshar qaymoqqa,
Juda oson aytmoqqa.
Chin insonlar ichida
Obro‘ topgandir juda.
Bir yumalab, aytganday,
Bamisoli ertakday
Libos kiyib ustiga
Kirgan odam tusiga.
Mag‘zin chaqsangiz agar,
To‘rttovi — to‘rt sehrgar.
Birin nomi — KO‘P RAHMAT,
Ikkinchisi — MARHAMAT.
Uchinchisi — ASSALOM.
Saqlar hurmat — ehtirom.
Ochilganday dil guling.
To‘rtinchisi — SOG‘ BO‘LING.
KO‘P RAHMAT
Va MARHAMAT
Birga ekan hamma vaqt.
Kim kimga bersa ko‘mak
Erib ketarkan yurak:
Deydilarkan:
KO‘P RAHMAT!
Dil javobi:
MARHAMAT.
Bir kun ular birlashib,
Fikrlashib. sirlashib,
Ochishibdi bir maktab,
Ta’lim, odobga atab.
Xabar berib har tomon,
Yozishibdi ko‘p e’lon.
Bu e’lonni eshitib
Keliptilar yetishib.
Bo‘lsa kim ochiq ko‘ngil,
Ularga tekin-bepul.
Dars boshlabdi to‘rt sinf,
Hamma kepti sevinib
Ta’lim darsi o‘tishar,
Odob darsi o‘qishar.
Har bir bola yuz kunda
Tuzalar ekan unda.
Bunda to‘rt o‘qituvchi.
Dilga mehr o‘rnatish.
Odob, ta’lim o‘rgatish
Ekan asosiy burchi.
O‘zlari ekan o‘rnak.
Eng samimiy, sof yurak.
Talabadan ertalab
Qilinar shunday talab;
Badan tarbiya qilish,
Chopish, sakrash, bukilish
Tozalamoq og‘iz, tish
—Sanalar eng muhim ish.
Yuvinib salom bermoq
Oddiy gap ekan, biroq,
Yotar chog‘ «xayrli tun»
Deyish ekan chin qonun.
Bir-biriga yo‘l berish,
Ta’zim bilan qo‘l berish
Yomon so‘z bilan so‘kish,
Hattoki turtish, nuqish
Xiyolgina baqirish,
Otin aytmay chaqirish
Hammasi taqiqlanmish,
Isbotlab tasdiqlanmish,
Dangasalar ayniqsa
Sozdir bitirib chiqsa.
O‘tar ishchan safiga,
Kulgu qo‘nar labiga.
Soz bo‘lsa kimning hulqi.
Tugamas baxt-u mulki.
Inson insonni izzat
—Qilish-chi, oliy xizmat.
Kuyib-pishgan bir xola
Boshlab kelmish bir bola.
Shishib ketgan qulog‘i,
Xip bo‘g‘ilgan tomog‘i,
Kiyinib olgan chala,
Chala egni dabdala.
Suv berishsa to‘karmish,
Ko‘ringanni so‘karmish.
Judayam emish tajang,
Boshlashga tayyormish jang.
Ko‘nmay hech qanaqaga,
Kelmabdi epaqaga.
«Sog‘ BO‘LING» va «ASSALOM»,
Holdan ketmishlar tamom.
«MARHAMAT»
Va «KO‘P RAHMAT»
Rosa chekmishlar zahmat.
Ko‘pchilik ekan kuchlik.
Ko‘rsatib axir ta’sir.
Eshitib ta’na-gina
O‘zgaribdi salgina.
Xoh kunduz-u, saharlar
Urinmish sehrgarlar.
So‘ng yengibdi yaxshilik,
Ko‘rsatolmay qarshilik.
Yuz kuncha o‘tgandan so‘ng
Bolakay qarabdi o‘ng.
Oxiri tuzalibdi,
Keyin-chi, qizaribdi.
Endi olaytirmas ko‘z.
Bo‘pti mayin, shirinso‘z.
Sehrgarlar maktabin
Sirli ekan talabi.
Bu yerda o‘qib chiqqan.
Odobli ekan chindan.
Har yerda bilinarkan,
Zab hurmat qilinarkan.
To‘rt sehrgar — muallim,
Hammaga ekan ma’lum.
«KO‘P RAHMAT»
Va «MARHAMAT»
«SOG‘ BO‘LING» va «ASSALOM»
Ularga ming ehtirom!
Shu bilan ertak tamom.

https://t.me/bolajonim_mening

MTT TARBIYACHI. MTT tarbiyachilari uchun eng zo'r  kanal.

O'ZINGIZDAN O'RGANAR

Tinchlik g'unchalarining
Sohibkor bog'bonisiz,
Kelajak chamanzorin
Ishongan posbonisiz.

Jajji qalblar nur olar
Mehringiz ziyosidan,
Tiniqib, poklanadi
Ilm, odob dunyosidan.

Vatanga sadoqatni,
Xalqqa mehribonlikni,
Halollik, bag'ri kenglik,
Do'stga mehri konlikni.

Har bitta darsingizda
Aytilgan so'zingizdan,
O'rgandik insonlikni
Muallim o'zingizdan!

https://t.me/bolajonim_mening

MTT TARBIYACHI. MTT tarbiyachilari uchun eng zo'r  kanal.

MUSTAQILLIK AHILLIKDAN

Mustaqillik deganin,
Bilib qo'y ne ekanin.
Eng avval mustaqillik -
Bo'lmoq puxta ahillik.

Bu xil sifat insonda,
Fazilatdir har onda.
Tanib ol haq-huquqing,
Saqlagil odob-xulqing.

Sevgil ona yurtingni,
Ketkazma lafz-burdingni.
Mag'rur tutgil boshingni,
Oldirmagil oshingni.

Mustaqillik -- dadillik,
Tenglik ila ahillik.
Ochiq gap, ko'pdir sharti:
Bo'l eng avval el mardi!

https://t.me/bolajonim_mening

MTT TARBIYACHI. MTT tarbiyachilari uchun eng zo'r  kanal.

Kitob o‘qigan bola

O‘rganar avval odob
Kitob o‘qigan bola.
Yuzi bo‘ladi oftob
Kitob o‘qigan bola.
Hurmat qilar kattani,
Kichiklar jon-u tani,
Bajaradi va’dani —
Kitob o‘qigan bola.
Suhbati xo‘p serma’no,
Yurish-turishi a’lo.
Olar faqat “besh” baho
Kitob o‘qigan bola.

https://t.me/bolajonim_mening

MTT TARBIYACHI. MTT tarbiyachilari uchun eng zo'r  kanal.

Oftob va odob
Oftob yaxshimi?
Odob yaxshimi?
Oftob berar nur,
Odob-chi huzur.
Lolalar uchun
Oftob yaxshidir.
Bolalar uchun
Odob yaxshidir.
Oftob bo‘lmasa,
Qorong’u tushar.
Odob bo‘lmasa,
G‘am-qayg‘u tushar.
Oftob ko‘rinar
Tog‘-tepalikda.
Odob ko‘rinar
Salom-alikda.
#sher

https://t.me/bolajonim_mening

MTT TARBIYACHI. MTT tarbiyachilari uchun eng zo'r  kanal.

Jamoatchilik va xudbinlik haqida maqollar

Ayrilganni ayiq yer,
Bo'linganni bo'ri yer.

Ayrilgan yo'lda qolar,
Bo'lingan — do'lda.

Baliqning kuni ko'l bilan,
Botirning kuni el bilan.

Baraka — ko'pchilikda.

Beshning boshi bo'lgancha,
Oltining oyog'i bo'l.

Bizniki — xaltada,
Sizniki — o'rtada.

Bilganingni eldan ayama.

Bir kalla — kalla,
Ikki kalla — tilla.

Bir kishi ming kishi uchun,
Ming kishi bir kishi uchun.

Bir tovushni ko'p tovush yo'q qilar.

Bir ko'zlilar eliga borsang,
Bir ko'zingni qisib yur.

Bir tupursa, ne bo'lar,
El tupursa, ko'l bo'lar.

Bir o'zing dono bo'lguncha,
Ko'p bilan ahil inoq bo'l.

Bir qarg'a bilan qish kelmas.

Birdan ikki yaxshi,
Ikkidan uch yaxshi.

Birikkan kuch — kuch,
Birikmagan kuch — puch.

Birikmagan birlashmas.

Birlashgan daryo bo'lar,
Tarqalgan irmoq bo'lar.

Birlashgan yovni qaytarar.

Birlashgan kuch yengilmas.

Birlashgan — o'zar,
Birlashmagan — to'zar.

Birlik bor — tiriklik bor.

Birlikda baraka bor.

Birlikli uy — barakatli,
G'ovg'ali uy — halokatli.

Birliksiz kuch bo'lmas.

Doshqozonda pishgan osh xom bo'lmas.

Yettovdan birov — shayton.

https://t.me/bolajonim_mening

MTT TARBIYACHI. MTT tarbiyachilari uchun eng zo'r  kanal.

Yaxshi bola

Yaxshi bola maktabda
O'qir doim a'loga
Yomon bola o'qimay
Qolar boshi baloga.
Shuning uchun o'rtoqjon,
Mehring bergin kitobga,
Chunki kitob o'rgatar,
Seni ilm-u odobga.

https://t.me/bolajonim_mening

MTT TARBIYACHI. MTT tarbiyachilari uchun eng zo'r  kanal.