🇺🇿 LASSETI COBALT BOZORI 🇺🇿

​​UzAuto Motors янгиланган Lacetti Redline автомобилини тақдим этди. Машина ойналари заводдан «тонировка» билан чиқарилади

UzAuto Motors Lacetti’нинг янги Redline моделини ишлаб чиқаришни бошлайди. Бу ҳақда компания бўлими бошлиғи Мақсуд Абдуҳакимов «Дарё» мухбирига берган интервьюсида маълум қилди.

Лойиҳаларни бошқариш бўлими бошлиғининг маълум қилишича, Lacetti Redline дискалари қорайтирилган ҳолда чиқарилади. Ойналарнинг туси ҳам ўзгартирилган («тонировка») бўлади.

Машина интерьерида ҳам ўзгаришлар бўлган. Чехол заводдан қўйилади. Интерьер ранглари ҳам қора ва қизил (Redline) аралашмасида бўлади.

Шунингдек, автомобиль завод томонидан камера билан жиҳозланган. Орқага ҳаракатланиш вақтида орқа камера ёқилади. Бар ҳам олдинроққа чиқарилган. Фаралар ҳам янгича услубда ишланган.

UzAuto Motors директори вазифасини вақтинча бажарувчи Рустам Ражабовнинг айтишича, ушбу хизматлар учун қўшимча ҳақ олинади. Ҳозирча ушбу хизматларнинг қиймати аниқ эмас. Моделларни ишлаб чиқариш 6 ойдан сўнг (августда) йўлга қўйилади.

Бундан аввал Ўзбекистонда Spark, Nexia, Cobalt ва Lacetti хариди учун шартнома бериш 3 мартдан қайта тикланиши, Ўзбекистонда Chevrolet Onix 9-12 минг доллар атрофида сотилиши кутилаётгани ҳамда Ўзбекистонда ҳар 100 та уй хўжалигига қанча автомобиль тўғри келиши маълум қилингани ҳақида хабар берилганди.

@LassetiBozor_CobaltBozor

​​«Equinox ва Tahoe’ларнинг юқори нархи орқали Spark ва Nexia каби арзон машиналарни ишлаб чиқаришдаги зарар қопланмоқда» — «Ўзавтосаноат»

UzAuto Motors компанияси 2020 йилда Nexia ва Spark автомобилларини ишлаб чиқаришдан 550 миллиард сўм миқдорида соф зарар кўрган. Бу ҳақда «Ўзавтосаноат» бошқаруви раиси ўринбосари Азизбек Шукуров 2 март куни Асакадаги автозаводда журналистлар билан бўлиб ўтган учрашувда маълум қилди, дея хабар бермоқда «Дарё» мухбири Мусулмонбек Иброҳимов.

2020 йил ноябрида UzAuto Motors АҚШ компаниясидан 8750 дона Chevrolet Equinox сотиб олиш учун қиймати 199,9 миллион долларлик шартнома имзолагани маълум бўлган эди. Бунда бир дона автомобиль 22 845 доллардан тушган; худди шу вақтда UzAuto Motors ушбу моделдаги автомобилни Ўзбекистонда 349 миллион сўмдан (33 минг доллардан ортиқ) сотаётган эди. Бу автомобилнинг импорт нархидан салкам 11 минг долларга кўп эди.

Азизбек Шукуровнинг таъкидлашича, UzAuto Motors томонидан бир йилда нечта автомобиль ишлаб чиқарилди-ю, нечта машина импорт қилинди деган савол қўйилса, мамлакатга олиб кирилган қиммат машиналар улуши 5 фоиздан ошмаслигини кўриш мумкин. «Яъни, биз сотаётган машиналаримизнинг фақат 5 фоизини импорт қиляпмиз, қолган 95 фоизини ишлаб чиқаряпмиз», — деди Шукуров.

«Ўзавтосаноат» вакили импорт қилинаётган автомобиллар юқори даромадли харидорларга мўлжалланганини тан олди. UzAuto томонидан 2020 йилда ишлаб чиқарилган 280 мингта автомобиль эса бюджет моделлари ҳисобланади — Шукуров Damas ва Spark’нинг нархи 7 минг доллардан, Nexia ва Cobalt каби седанларнинг баҳоси эса 8—10 минг доллардан эканини эслатиб ўтди.

«Сизларга бир тижорий сирни очяпман — Spark ёки Nexia каби машиналарни ишлаб чиқаришда даромад умуман йўқ, нафақат даромад йўқ, балки йўқотиш ҳам бор. Оммага арзон машинани кўпроқ етказиш имкониятини яратиш учун кам миқдорда олиб кирилаётган қиммат машиналарнинг даромадини баланд қилиб қўямиз. Қиммат машинани сотиш ҳисобидан олаётган даромадимиз билан арзон машина сабаб йўқотилаётган пул ўрнини тўлдирамиз», — деди у.

Азизбек Шукуровнинг таъкидлашича, UzAuto Motors 2020 йилда Spark ва Nexia автомобилларини ишлаб чиқаришдан 550 миллиард сўм пул йўқотган, Equinox, Malibu, Traverse, Tahoe каби «катта машиналар»дан 500 миллиард сўм фойда кўрган. «Нима қилган яхши — Equinox, Malibu, Traverse’ларнинг нархини тушириб, Spark ва Nexia’ларнинг нархини кўтариб қўйган яхшими ёки ҳозирги бизнес-моделни давом эттирганми?», — деб савол қўйди «Ўзавтосаноат» вакили.

@LassetiBozor_CobaltBozor