Kitob nuri

#Kitobdan

✨ Uzun va ushalmas orzu

Tuban, beaql kimsalar Xoliqu Roziq bo‘lgan buyuk Zotni, hech sherigi bo‘lmagan yolg‘iz Allohni haqorat qiladilar-u, men, sen, biz xatokor bandalar ulardan nimani kutishimiz mumkin?! Modomiki, sen xayru saxovat, bunyodkorlik, fidokorlik sifatlari bilan ko‘zga ko‘rinar, gullab-yashnar ekansan, shubhasiz, achchiq bo‘htonlarga, hech tinchimaydigan tish-tirnoqli to‘qnashuvlarga duch kelaverasan. Toki yerga kirib ketadigan biron teshik yoki osmonga chiqib ketadigan bir narvon topib, qochib ketmaguningcha, ular senga tinchlik berishmaydi. Bas, sen o‘shalar orasida yashar ekansan, senga yomonlik qilishlariga, ko‘zingdan qonli yoshlar oqizishlariga, yotog‘ingda ham tinch qo‘ymasliklariga ko‘z tutavergin.
     Yerda o‘tirgan odam yiqilmaydi, o‘lik itga tegmaydilar. Lekin sen ularning g‘azabini qo‘zg‘aysan. Chunki sen yo ilmda, yoki odobda, yoxud mol-dunyoda ulardan yuqorisan. Shunday ekan, sen ularning nazdida toki bu xislatlaringdan, Allohning senga bergan ne’matlaridan, maqtovga loyiq sifatlaringdan ajrab, ular kabi ahmoq, nodon, ichidan yemirilgan noshud, tugagan “mirquruq”lar qatoriga tushib qolmaguningcha kechirilmas gunohkorsan go‘yo. Ular aniq shuni xohlaydilar. Bas, sen ularning har xil so‘z va tanqidlariga, bo‘hton va haqoratlariga misoli Uhud tog‘idek sabotli bo‘lgin. O‘zining mavjudligini, boqiy qudratini isbotlash uchun har qanday do‘l-dovul ostida mardona turadigan haybatli xarsang tosh kabi bo‘l.
      Agar sen ularning gapiga quloq tutsang, undan ta’sirlanadigan bo‘lsang, ularning hayotingni loyqalatish, umringni g‘amga botirishdek buzuq orzularini ro‘yobga chiqargan bo‘lasan. Balki sen ularni chiroyli tarzda kechir, ulardan yuz o‘gir, makr-hiylalariga siqilma. Chunki ularning tuban tanqidlari sening tarjimai holingda hurmatga loyiq sahifa bo‘lib qolajak.
      Sen ularning og‘zini yopishga, tilini tiyib qo‘yishga qodir emassan. Biroq ularning tanqidini yo‘qlik bag‘riga ko‘mishga, uzoqlashish bilan ularni jazolashga, ahmoqona ishlariga beparvo bo‘lishga, so‘zlarini tinglamaslikka qodirsan.
       “Shu adovatlaring bilan o‘lib ketinglar!” deb ayting! (Oli Imron surasi, 119-oyat).
     Sen o‘z fazilatlaringni yana oshirish, yanada o‘zingni to‘g‘ri tutish bilan ularning og‘izlariga qalampir urug‘ini solib qo‘ya olasan. Demak, sen barchaga birdek maqbul va mahbub bo‘lishni, aybsiz ko‘rinishni xohlasang, uzun va ushalmas narsani umid qilibsan.

✍️ Doktor Oiz Qarniyning “Mahzun bo‘lma” kitobidan

📚 @kitob_nuri

#Audiokitob
💿 "Muslima ayol Yevropada"
✍ Amina Shenliko‘g‘li

"Muslima ayol Yevropada" romanini mutolaa qilar ekansiz, Islom olamidagi ayollarning butun dunyo ahliga nechog‘li o‘rnak bo‘la olganligiga o‘zingiz guvoh bo‘lasiz.
Mazkur asarning bosh qahramonlari nafaqat yozuvchining shaxsi hamda u tasvirlagan muslima ayollar, balki mutolaa jarayonida siz ham asar qahramonlaridan biriga aylanasiz. Yozuvchi bilan birgalikda Belgiya, Gollandiya, Germaniyaga yo‘lga chiqasiz.
Mazkur yozuvchini necha yillardan buyon G‘arb dunyosida musulmonlarga noto‘g‘ri baho berilayotgani, ularning Sharq haqidagi noxolis fikrlari qiynab kelar edi. Shu sababli yozuvchi adolat qalamini qo‘lga olishga majbur bo‘ldi.
Islom olamidagi ayollar, haqiqatan ham, zulm ko‘radilarmi? Ularga bunday tamg‘a bosishdan kimlar manfaatdor?
Shu va shu kabi savollarga asarni o‘qish davomida javob topasiz.

• Audiokitob 16 ta qismdan iborat.
• Matnni Sardor Ahmad o‘qigan

📚 @kitob_nuri