Kino ekrani

#kinotaqriz
Quyoncha Jojo (Jojo Rabbit, 2019)
IMDb: 7.9
Kino ekrani: 10

10 yoshli Jojo Betzler yosh fashistlarni tayyorlovchi lagerga yuborildi. U namunali fashist bo'lib yetishishni hamda vataniga xizmat qilishni maqsad qilgan. Lagerda uning ishlari unchalik ham yurishmayabdi, qanchalik harakat qilmasin vahshiy askarga aylana olmayabdi. Hayoliy do'sti Adolf unga yordam berishga doim tayyor. Uyida yashiringan qizni ko'rib qolgach hamma ishlar orqaga keta boshlaydi.....

1994-yildan keyin, 2019-yil eng zo'r kino yillaridan biri sifatida ko'riladi. 2019-yil ham bizga muhtasham kartinalarni taqdim eta olgan. Rejissyor Tayka Vaytitining ushbu filmi nafaqat o'sha yili reliz qilingan, balki butun kinematografiya ichida ajralib turadigan san'at asaridir. Film drama va komediya chorrahasida joylashgan. Urushning atmosferasini bolalar nigohida, yengil, hazm qilishga oson hikoya bilan pishirib bergan.

Tayka Vaytiti 2010-yilda onasinig tavsiyasidan so'ng Kristina Leunens yozgan "Caging Skies" romanini o'qib ko'radi. U urush haqidagi odatiy filmlardan ancha zerikkan, asarni o'qigach o'z versiyasini suratga olishga qaror qilgan. Shuningdek u bu filmni barcha onalarga bag'ishlagan. Tayka ssenariyni yozdi, o'zi suratga oldi, fyurerni rolini ham o'ynab qo'ya qoldi. Tarantino, Skorsezelar quruq qo'l bilan qaytgan marosimda eng yaxshi moslashtirilgan ssenariy nominatsiyasida oskarni qo'lga kiritdi.

Kimnidir sevib qolganingda, oshqozoningda kapalaklar uchib yurganini his qilasan ta'rifi bor. Sevgini bundan zo'r ta'rifi bo'lishi mumkin emas. Vaytiti esa ushbu "kimyoviy" hodisani o'z filmida go'zal tarzda namoyish eta olgan. Ko'p narsa yozish shart emas, shunchaki hamma ko'rishi kerak bo'lgan film degan tamg'a bosib qo'yaman.

Ham kuldiradigan, ham yig'latadigan film !

Pastda speyler bo'lishi mumkin. Filmni ko'rmagan bo'lsangiz, o'qimaslikni tavsiya qilaman:

Filmni ko'rib o'tiribman, vizual, dialoglar, syujet jihatidan qalbim tubiga kirishni boshladi. Lekin bir sahna: Jojo yahudiy qizga soxta xat o'qib xafa qilgandan so'ng, darrov borib boshqa xat yozib, kelib o'qib beradi. Bu epizoddan keyin ikki qo'limni tepaga ko'tardim,10 yulduz. Endi buyog'iga nima chiqsa ham meni bu fikrdan qaytara olmaydi dedim.

@kinoekrani

Oskar-2025

Eng yaxshi aktyor:
Edrian Brodi (Brutalist)

Eng yaxshi aktrisa:
Mayki Medison (Anora)

2-plandagi eng yaxshi aktyor:
Kiran Kalkin (Haqiqiy og'riq)

2-plandagi eng yaxshi aktrisa:
Zoe Saldana (Emilia Perez)

Eng yaxshi rejissyor:
Shon Beyker (Anora)

Eng yaxshi film:
Anora

Bundan tashqari

Eng yaxshi original ssenariy:
Shon Beyker (Anora)

Eng yaxshi montaj ishi:
Anora

Umumiy hisobda Shon Beyker 4 ta haykalchani qo'lga kiritdi. Oldin ham ta'kidlab o'tganimdek Anora go'zal kartina. Kommentlarda Anora overreyted deganlar, o'zinglar bilib bitta-bitta chiqinglar.

P.s: Eng yaxshi rejissyor uchun mukofotni Shon Beykerga Tarantino topshirdi. Shon Beyker esa "Kventin senga rahmat, agar Bir zamonlar Gollivudda filmida Mayki Medison chiqmaganida, Anora bo'lmasdi" deb minnatdorchilik bildirib qo'ydi.

P.s: Zoe Saldana bo'lsa Marveldan ketib oskar olgan navbatdagi aktrisaga aylanmoqda. Sebastian Stenga ham ozgina yetmay qoldi.

@kinoekrani

#kinotaqriz
Toshkent 94 (2024)
Kinopoisk: 7.3
Kino ekrani: 8.0

1994-yillar, Toshkent. Zokir o'zining aktyorlik karyerasini qurish istagida yashaydi. Lekin unga teatrda katta rol berishmaydi. Kunlarning birida unga shahardan qo'ng'iroq bo'ladi va katta filmda bosh rolni ijro etishi kerakligini aytishadi. Birinchi suratga olish kunida Zokir atrofidagi ishlar unchalik ham kinoga o'xshamayotganini sezadi......

Serialdagi musiqalar top. Yaxshi rejissyor zo'r kartina suratga oladi, lekin buyuk rejissyor filmiga yaxshi musiqa tanlay oladi deb bejizga aytishmagan. Zohirshoh Jo'rayevning "Jonidan" qo'shig'i serialning rasmiy sauntreki hisoblanadi, serial introsi bilan judayam mos tushgan. Tohir Sodiqovning retro xitlari va Nuriddin Xaydarovning "Do'lana Do'lana" taronalarini ham serialni ko'rish davomida tinglashingiz mumkin.

Serialni ko'rish oson, dialoglar, shevalar va jargon so'zlar bilan boyitilgan. Televideniya seriallari kabi qolipda gapirishmaydi. Voqealar rivoji ham sekin emas, tomoshabinni ensasi qotib ketmaydi. Menimcha serialda eng ko'p ishlatilgan so'z bu "блядь" bo'lsa kerak.

Maksimum darajada o'sha davr atmosferasini hosil qilishgan. Mashinalar, televizorlar, kiyimlar, telefonlar va eng muhimi lokatsiyalar. SalomTV birinchilardan bo'lib bunday yo'nalishda serial ishlab chiqishga jazm etdi, to'g'ri Breaking Bad emas lekin start uchun zo'r. Bitta gap bilan aytsam, vaqt ajratib tomosha qilishingizga arziydigan serial !

@kinoekrani

#kinotaqriz
Baster Skraggsning balladasi (The Ballad of Buster Scruggs, 2018)
IMDb: 7.2
Kino ekrani: 8.0

Amerika, 19-asr, hammamizga ma'lum va mashhur yovvoyi g'arb. Quvnoq va abjir lekin qonun tomonidan jinoyatchi degan tamg'a bosilgan, ayni paytda qidiruvda bo'lgan Baster Skraggs. Cho'lning o'rtasida huvillab yotgan bankni o'marmoqchi bo'lgan kovboy qismati. Shekspir asarlarini yoddan biladigan nogiron artist. Oltin vasvasasida ertayu-kech tinim bilmay yer qaziydigan qariya. Chorvadorga turmushga chiqishga rozi bo'lgan qiz. Bitta izvoshda yig'ilgan begonalar.

Aka-uka Koenlar kecha paydo bo'lib qolgan nom emas. O'z filmlari va uslublari orqali Gollivudda anchagina nom qozonishga ulgurishgan. Ular doim birga ishlashadi. Itan va Joel ssenariyni birga yozishadi, filmga birgalikda prodyuserlik qilishadi va o'zlari suratga olishadi.

Film 6 xil hikoyalardan iborat antologiyadir. Netfliks Koenlar bilan shartnoma tuzgan. Unga asosan aka-ukalar platforma uchun Baster Skraggsning balladasi nomli mini-serial ishlashlari kerak edi. Lekin suratga olish ishlari tugagach bitta to'liq metrajli film qilib yuborishdi. Menimcha eng to'g'ri qaror bo'lgan. Odatda yovvoyi g'arb haqidagi filmlar sal zeriktirib qo'yadi, Koenlarni filmida esa 6 kichkina film bor.

Ikkita hikoya: Toza oltin vodiy va Sarson qiz adaptatsiya qilingan. Qolgan to'rtta hikoyani Koenlarning o'zlari yozishgan. Aktyor Jeyms Frankoning mashhur "First time ?" memi ham aynan shu filmdan olingan.

@kinoekrani

#bir_ijodkor_haqida

Bir ijodkor haqida: Zulfiqor Musoqov.

Zulfiqor Musoqovni tanishtirishning keragi yo'q, hamma uni taniydi. Deyarli hamma o'zbek kamida uning bitta filmini tomosha qilgan. "Abdullajon", "Vatan", "Oyijon", "Osmondagi bolalar", "Kichkina tabib", "Qo'rg'oshin", "Novda", "Yaratganga shukr", xullas bu ro'yhat tugamaydi. O'zbek kinosini uning filmlarisiz tasavvur qilib bo'lmaydi.

Musoqov maktabda o'qib yurgan paytlarida, qo'shni mahallada kino suratga olishayotgan bo'lishgan. Rejissyor yordamchisi uni ko'rib qolib, "Bolakay kinoda suratga tushishni xohlaysanmi ?" deb so'ragan. U darrov rozi bo'lgan va kichik epizodda, kameradan 150 metrcha uzoqdan yugurib o'tib ketgan. Keyin 1 hafta suratga olish ishlariga qatnab yurgan. O'shandan so'ng uning kinoga mehri tushib qolgan.

Maktabni tamomlab san'at oliygohiga topshirgan, o'zbek tilini bilmasligi ko'p pand bergan, lekin o'qishga kirgan. Aktyorlik fakultetida Farhod Abdullayev bilan birga tahsil olgan. Kurs rahbari uning o'qishlarini ko'rib "Sendan aktyor chiqmaydi, yaxshisi rejissyorlikka o'qigin" deb maslahat bergan. Uning tavsiyasi bilan Zulfiqor Musoqov qaytadan o'qishga topshirib rejissyorlik fakultetiga kiradi, hamma 5 yil institutda o'qigan bo'lsa, u 6 yil o'qigan.

Kurs ishiga o'z cho'ntagidan pul ajratib film suratga oladi, nomi "Sud kuni", 10 daqiqalik film. Bu film Moskvada o'tkazilgan festivalda gran-prini yutadi. Zulfiqor Musoqovga Ssenariynavislar oliy maktabida o'qish taklifi beriladi. O'ylab o'tirmay taklifni qabul qiladi va Moskvaga jo'nab ketadi.

1989-yilda “Bir qadam o‘ngga, bir qadam so‘lga” nomli ssenariysini sotadi. Tiynni-tiynga ulab yurgan odam uchun bir olam quvonch edi bu. (Tarantinonida ham shunga o'xshash holat edi) Puliga mebel sotib oladi, o'sha mebeldan hali ham foydalanar ekan.

Berlin-Oqqo'rg'on filmini ssenariysini badiiy kengashga topshirganida juda ko'p tandiqlar ostida qolgan. Mashhur arboblardan biri "Bu ishi uchun Musoqovni qamash kerak" deb ham aytgan. Oldin Vatan filmni ssenariysi bilan ham shunday ish bo'lgan.

Aqltoylar juda ko‘p, agar ularning gapiga quloq solsangiz o‘ziga xosligingiz yo‘qoladi

Shuncha kino suratga olgan bo'lsa ham haligacha oddiy "dom"da yashaydi. Hovli olishga pul yig'olmagan. Mana shunday inson u. Bolaligida enasini ko'rgani qishloqqa ko'p borardi, filmlaridagi deyarli barcha obrazlar ana o'sha qishloq odamlaridan olingan.

@kinoekrani

#kinotaqriz
Alhazar: Kulba, 2022 -
Kino ekrani: 7.0

Yosh er-xotin shahardan arzon pulga uy xarid qilishadi. Avvaliga bu uyning arzonligini o'z omadlaridan deb o'ylashadi. Keyinchalik ular bilan g'alati hodisalar sodir bo'la boshlaydi.

Oxirgi paytlarda ko'p shunaqa seriallarni ko'ryabman. Tan olish kerak ko'p hollarda dabdala syujet, ssenariy va aktyorlik mahoratining guvohi bo'lyabman. Lekin bu yaxshi tomonini aytmaslik kerak degani emas. MilliyTV ushbu horror janrli seriali bilan har bir qismda alohida voqeani hikoya qiladi. Har bir hikoyaning ostida albatta — bu yomon illat bilan shug'ullanmang degan messej yotadi.

Alhazarni bir necha qismlarini ko'rdim. Nomlarini o'zi odamni ensasini qotiradi. Eshshak miyyasini yegan kelin, Odamxo'r kelin, Itday o'lim topgan kelin va yana bir qancha g'alati kelinlar. Aroqxo'r go'rkov, Qabrdan o'g'irlangan qo'g'irchoq, xullas nomlar odamni ensasini qotiradigan darajada g'alati.

Lekin Alhazarning 1-qismi Kulba menga yoqdi. Saspensdan yaxshi foydalanishgan. Tomoshabinni (meni) yaxshigina qo'rqita oldi. Aktyorlar ham o'z rollarini yaxshi ijro etishgan. To'g'ri hikoyada ba'zi kichik xatoliklarga duch kelish mumkin, lekin serialdagi horror atmosferasi u xatolar haqida o'ylashingizga yo'l qo'ymaydi.

Men sizga hammasi ko'ring demayman, shunchaki shu birinchi qismni o'zini tomosha qiling. Ishonchim komil sizga ham yoqib qoladi.

YouTubeda tomosha qilish

@kinoekrani

Kinematografiyaning yozilmagan qoidasi: Qahramoningiz yolg'iz, odamlardan uzilgan va hayotida ma'no yo'q insonmi ? Unda unga mana shu kurtkani kiydiring.

1. Taksi Haydovchisi, 1976
2. Mashaqqatlar Sari, 2008-2013
3. El Camino, 2019
4. G'aroyib o'rgimchak odam, 2013
5. Run All Night
6. Rembo: Birinchi qon, 1982
7. Yovvoyi nok, 2018

@kinoekrani

#kinotaqriz
Yovvoyi nok (Ahlat Ağacı, 2018)
IMDb: 8.0
Kino ekrani: 9.5

Sinan o'qishini tamomlab o'z qishlog'iga qaytadi. O'zi nafratlanadigan odamlar, uylar va ko'chalarga. Uni ishsizlik qiynayabdi, nima ish qilishni bilmaydi, sohasi bo'yicha muallimlik qilishga hushi yo'q. Hayotidan maqsadi yo'q, butunlay hammadan uzilishni istaydigan odam. Yagona xohishi o'zi yozgan kitobini nashrdan chiqarish.

Filmni yigirma daqiqacha ko'rgach undagi bir jihat — soddalik juda ham tanish ko'rindi. Darrov eng sevimli platformam letteboksga kirib filmni rejissyorini tekshirdim. Jeylan ekan. Rejissyor Nuri Bilge Jeylanning boshqa (Uzoq, 2002) filmiga ham taqriz yozgan edim. Uning filmlarini oson ajratib olish mumkin, u shunchaki kamerani yoqadi va suratga oladi. Unga pavilyonlar, chiroqlar yoki maxsus effektlar kerak emas. U hayotni tasvirlaydi. Agar men kino olsam Jeylanni filmlariga o'xshash bo'lardi.

Ushbu film endigina universitetni tamomlab hayotdagi yo'lini yo'qotib qo'ygan yigit haqida hikoya qiladi. Psixologiyada o'rta yosh inqirozi atamasi mavjud. Hammamiz uni boshdan kechiramiz. Qahramonimiz bilan ham shunday hodisa ro'y bermoqda. U hammani yomon ko'radi, undan tashqari dunyodagi hamma odam ahmoq. Bir vaqt, hamma narsa qilgisi keladi, boshqa payt esa aksincha. Oilasi bilan munosabatlari yaxshi emas, u hechkimni yaxshi ko'rmaydi. Shunday bo'lsada hayotidan ma'no topishga urinmoqda.

Rejissyor tomoshabin his-tuyg'ulari bilan ham yaxshigina o'ynashgan. Agar sizga Nuri Bilge Jeylanning avvalgi filmi yoqqan bo'lsa bunisi ham yoqishi aniq. Lekin o'zingizni unchalik ham qiynamang bo'lmasa ushbu 3 soatlik kino sizni qiynab qo'yadi.

@kinoekrani — is back

1. Jahongir Otajonov — Happy Birthday
rejissyor: Sardor Fakhriddinov

2. Jinoiy Asar
rejissyor: Kventin Tarantino

@kinoekrani

#1000fakt
1000 ta fakt: 24-fakt

Aktyor Bob Odenkyork(Soul Gudman) Breaking Bad serialining 2-mavsumida jami 4 ta epizodda chiqishi kerak edi. Lekin biz uni uchta qismda ko'ramiz. Chunki aktyor How I met your mother sitkomining suratga olish ishlari bilan band bo'lgan. Shunda Vins Gilligan serialdagi eng sovuqqon personaj Mayk Ermantrouni o'ylab topadi.

@kinoekrani

#kinotaqriz
Moskva ko'z yoshlarga ishonmaydi ( Москва слезам не верит, 1980)
IMDb: 8.0
Kino ekrani: 10

1958-yil, uch dugonalar Lyudmila, Antonina va Keterina Moskva shahrining ishchilar yotoqxonasida yashashadi. Ular bu ulkan shaharda o'z baxtlarini topishga ishonishadi, shunga harakat qilishadi. Antonina mehnatkash bir erkakka turmushga chiqadi, Lyudmila esa mashhur xokkeychi bilan o'z baxtini topadi. Biroq Katerina chaqalog'i bilan yolg'iz qoladi......

Rossiya kinematografiyasi tarixidagi eng yaxshi film.

QIZIQ FAKTLAR
1981-yilgi Akademiya taqdirlash marosimida, eng yaxshi xorijiy tildagi film nominatsiyasi g'olibi bo'ldi, oskar yutdi. Ruslarni ko'rishga ko'zi yo'q amerikaliklar eng oliy mukofotni ularga topshirishgan. Vladimir Menshov o'z filmi bilan ularni shunga majbur qila olgan. AQShning 40-prezidenti Ronald Reygan Mixail Gorbachyov bilan uchrashishdan oldin ushbu filmni bir necha marta tomosha qilgan. Shu orqali ruslar qalbini tushunmoqchi bo'lgan.

MENI QILGAN XATONI QAYTARMANG
Birinchi o'zbek tilida ko'rmoqchi bo'ldim. Dublyaj sifati zo'r, mazza qiladi odam. Kinoteatr telekanalida berilgan versiyasini ko'rdim. Kino umumiy 1s - 47d ekan. Ko'rib bo'lib syujetda ko'p kamchilik bordek tuyuldi. Qarasam originali 2s - 28d ekan. Qaytadan originalini ko'rdim. Keyin mukammal syujet yasaldi. Keyin filmdagi ba'zi argumentlar ma'no kasb qila boshladi.

VIZUAL
Filmdagi tungi Moskva manzaralari yoqdi. Lekin eng ko'p yoqqan sahnalar: dugonalar yig'ilib banka yopgach qorong'uda o'tirib suhbatlashgan va Gosha o'rmonda kabob pishirib bergani bo'ldi. Qanday go'zal sahnalar. Bu xuddi Jeylanni qorli Istanbuli, Skorsezening tungi Nyu-Yorki, Nolanning koinoti yoki Tarantinoning Gollivudiga o'xshaydi. Undagi go'zallik, undagi vizual shunchaki tabiiylikda, oddiylikda. Rejissyor shunchaki hayotni ekranga ko'chirgan. Nima bo'lsa shuni boricha plyonkaga muhrlagan.

Moskva ko'z yoshlarga ishonmaydi, o'z aravangni o'zing tortishing kerak.

@kinoekrani