Sport vaziri Adkham Ikramov “Yoshlar forumi-2024” doirasida O‘zbekiston davlat jismoniy tarbiya va sport universitetida o'tkazilgan “Vazir va yoshlar” uchrashuvida ishtirok etdi

Uchrashuv davomida Sport vaziri yoshlarning bilim olishi, o‘z irodasi, kuchi va imkoniyatlariga bo‘lgan ishonchni mustahkamlash, mardlik va vatanparvarlik, ona Vatanga sadoqat tuyg‘ularini kamol toptirish borasida fikr-mulohazalarini bildirib, Davlatimiz Rahbari tashabbusi bilan yurtimizda jismoniy tarbiya va ommaviy sportni yanada rivojlantirish borasida amalga oshirilayotgan keng ko‘lamli ishlar haqida batafsil ma'lumot berdi.

Shu bilan birga mamlakatimiz sportchilarining Olimpiya va Paralimpiya o‘yinlari, Jahon chempionatlari, Osiyo o‘yinlari hamda xalqaro musobaqalarda yuksak natijalarga erishayotgani, dunyoda O‘zbekistonning obro‘-e’tibori va sport salohiyati yanada oshayotgani, respublikamiz hududlarida jahon andozalariga mos muhtasham sport inshootlari barpo etilayotgani, o‘quvchi va talaba yoshlar o‘rtasida “Universiada”, “Besh tashabbus olimpiadasi” kabi sport musobaqalarining muntazam o‘tkazilib, kelinayotgani va buning natijasida sport bilan shug‘ullanayotgan yoshlar soni yildan-yilga ortib borayotgani alohida ta’kidlandi.

Yoshlar bilan samimiy muloqot ruhida bo‘lib o‘tgan uchrashuv davomida vazir universitet talabalari tomonidan berilgan savollarga javob berib, yoshlar tomonidan bildirilgan takliflarni tingladi.

Uchrashuv yakunida Vazir tomonidan ilmiy-tadqiqot ishlarini muvaffaqiyatli himoya qilgan universitetning bir guruh yosh professor-o‘qituvchilari va ilmiy izlanuvchlariga tantanali tarzda diplomlar topshirildi.

Shuningdek, vazir A.Ikramov yangidan barpo etilayotgan eshkak eshish bazasining qurilish jarayonlari bilan tanishib, para pauerlifting sport turi bo‘yicha Markaziy Osiyo ochiq chempionati hamda O‘zbekiston kubogi musobaqasi jarayonlarini kuzatdi.

Web-Sayt | Telegram | Facebook | Instagram | Youtube