Jurabek Ismailov

O’rganasan

O’zing o’rganishni istamasang hayotni o’zi o’rgatib qo’yadi.

Faqat zarbasiga chidab bersang bo’lgani.

Futbolda ajoyib gap bor. Sen urmasang senga urishadi.

Yoshligingda kerakli bilimlarni o’rganmasang,yoshing o’tganda qilingan afsus foyda bermaydi.

Hamma qilayotgan ishni qilar ekansan, hamma bilan bir xil natijaga erishasan.

Boshqacha natija, boshqacha harakat talab qiladi.

O’zingni boshqarishni bilmasang,boshqalarni boshqarish qiyin bo’ladi.

O’zingni o’zgartirmasang, dunyoni o’zgartirishga yo’l bo’lsin.

Biz tashqaridan ichkariga emas, ichkaridan tashqariga qarab rivojlanamiz.

@jurabek_vlog

Xatolardan>tajribalar

Hayotda eng tez o'rgatib qo'yadigan ustoz bu-xatolar.
Xatodan o'rganish juda ham tez bo'ladi. Boshingiz bir devorga urilsa, kelasi safar o'sha yerda ehtiyot bo'lish lozimligini bilasiz.Ortiqcha urinishsiz amalga oshadi. Buning uchun boshni asrash haqida kitob o'qish shart emas.

Biror bir narsaga qaror qilishda shoshilib xato qilsangiz, kelasi safar shoshilmaslik kerakligini bilib olasiz. U qaror sizga qimmatga tushishi mumkin. Ammo kelasi safargi qimmatroq qarorda shoshilmaslik kerakligini o'rganib olasiz.

Aziz Rahimov maqolasida o'qigan edim. Biz katta qarorlarda adashmaymiz. Chunki biz ularni o'sha paytdagi dunyoqarash va bilimlarimiz asosida o'ylab eng aqlli qarorni qabul qilamiz. Vaqtlar o'tib adashganlimiz ma'lum bo'lsa bu juda yaxshi. Demak biz o'syabmiz.

17-18 yoshimda Tarix sohasida o'qishga qaror qildim. O'qishni boshlaganimdan biroz o'tib, bu xato bo'lganini angladim. Lekin bu menga ko'p narsa o'rgatdi. Ingliz tilini o'rganishimga turtki bo'lgan narsa ham shu aslida. Balki kelajagi porloqroq soha bo'lganda, unda qolib ingliz tili o'rganishga ehtiyojim bo'lmasligi ham mumkin edi.

Universitetdagi 4 yil esa menga turli xil narsalarni boshdan o'tkazishimga va o'zimni topishimga yo'l ochib berdi. Aniq yo'limni topdim deb aytolmayman. Lekin aynan 4 yil menga ko'plab kitoblar o'qish va til o'rganishimga sharoit yaratib berdi.

Ba'zilar so'rashi mumkin. Nega 4 yil tarix o'qiding va hozir sohang bo'yicha ishlamaysan? Men savol bilan javob beraman. Tarix sohasida ishlashga majburmanmi? Nima uchun xohlamasam ham davom ettirishim kerak? Soha o'zgartirish shunchalik qo'rqinchlimi? Menimcha, yo'q. Balki bu fikrlarim kelajakda o'zgarar.

Universitetdagi umrim bekorga ketdimi unda? Yo'q, aslo. Tanishlar orttirdim. Ularning ba'zilari fikrlashimga ijobiy ta'sir qildi. Ko'p narsalar o'rgandim. Agar universitet menga o'sha qimmatli 4 yilni bermaganida, hammasi mutlaqo boshqacha bo'lishi mumkin edi.

Bu davr mobaynida ko'plab xatolar qildim. Xatolar qilishni hozir ham davom etmoqdaman. Rostini aytsam, ularning hammasidan ham kerakli xulosalar chiqara olmaganman. Ammo bir xil xatoni qaytarmaslikka harakat qilyabman.

Chunki biror ishni xatoligini bilib, uni qayta qilishdan ma'no yo'q. Ammo xatoligini bilmasdan qilgan narsalarimiz hech bo'lmasa qimmatbaho tajribalar beradi.

@jurabek_vlog

Saboq

Biz yashar ekanmiz, doimiy o’rganamiz. O’zimiz xohlab, yoki ongsiz holatda.

Lekin bir narsa aniqki biz boshimizdan nima o’tsa ham undan saboq chiqarishimiz lozim.

2019-yil Toshkentda 3 oy ofitsant bo’lib ishlaganman. Shunda turli xil odamlarni va munosabatlarni ko’rganman.

Ba’zilari juda yaxshi munosabatda bo’lishsa, boshqalari ofitsantlarni odam o’rnida ko’rishmasdi(Yaxshiyamki unaqalar juda ko’p emas).

Bunaqa munosabat hech kimni xursand qilmasa kerak. Lekin bundan kerakli saboq chiqarish mumkin.

Demak, sendan quyiroqda bo’lgan insonga yaxshi munosabatda bo’lish lozim. U sendan zaifroq degani unga kuchingni ko’rsatishing kerak degani emas.

Aslida buday odamlar foydasi tegmaydiganlarni mensimaydi, foydasi tegadiganlarni esa boshiga ko’tarib yuradi. Bularni nima deb atashni o’zingiz bilasiz.

Do’stingizni kimligini bilmoqchisiz, uni o’zidan mansabi jihatidan pastroq odamlar bilan muomalasiga qarang. Ko’p narsa oydinlashadi. Yaxshi inson yanada yaxshiligi ortadi, yomon bo’lsa sizga bilganingiz foyda.

Har xil tajribalar, yaxshimi yoki yomon, o’zidan hech bo’lmasa saboq qoldiradi. Uni o’ylab xulosa olish bizning vazifamiz.

@jurabek_vlog

Hayot yo’llarim….

2020-yilda o’qishga kirgan paytimda juda katta yutuqqa erishdim deb o’ylaganman. Darhaqiqat, bu o’sha paytdagi men uchun katta muvaffaqqiyat bo’lgan.

Biroz o’qiganimdan keyin fikrlarim o’zgarishni boshlagan. Bunda ba’zi tashqi va ichki omillar bo’lgan albatta.

Biroz deya oradan bir yilni o’tkazib yuborganman. Faqatgina foydali qilgan ishimiz kitoblar o’qishni boshlash bo’lgan.

Bundan tashqari tarix bo’yicha o’qituvchilik uchun ish izlaganman va bir nechta joylarda ishlaganman.

2021-yilda 1-kursni tamomlab yozgi ta’tilga chiqqanman. Bu yozgi ta’til menga katta saboq bo’lgan. Chunki ta’tilda Toshkentga borganman va qurilishda bir necha oy ishlaganman.

Aynan o’shandagi qiyinchilik meni harakatga undagan. Ertalab soat 5 da uyg’onib kechki payt soat 7-8 gacha, ba’zida 11-12 gacha ishlash va 5-6- qavatdagi bir lahzada pastga tushib ketish xavfi ko’zlarimni ochgan.

Yoz tugadi, ishlagan, halol ishlab topgan pulimizni olish juda ham qiyin kechdi. Shunisiga ham shukur. Bular meni chet tilini o’rgana boshlashimga turtki bo’lgan.

Ingliz tili deb o’ylashingiz mumkin. Yo’q men koreys tilini o’rgana boshlaganman. Bu jarayon oktabr oylaridan dekabr oylari oxirigacha davom etgan.

Negadir koreys tiliga tushib keta olmaganman yoki noto’g’ri joyda o’qiganman. So’ngra koreys tilini to’xtatib, o’zimda avvaldan o’rganishga mehrim bo’lgan ingliz tilini o’rganishni boshladim.

Ingliz tilini o’rganish oson bo’ldi deb o’ylaysizmi. Yo’q. Kerakli mahorat va qobiliyatlarni shakllantirish har doim qattiq mehnat va vaqt talab qiladi. Men hozir bir vaqtning o’zida ingliz tili o’rgatmoqdaman va o’rganmoqdaman.

O’rganishning eng oson yo’llaridan biri ham bu o’rgatishdir. O’sha sohadagi bilimingiz siz o’rgatayotgan inson bilmidan biroz yuqori bo’lsa bo’lgani.(Albatta hamma narsada emas faqat kichik mavzularda)

Demak 2022-yilning yanvar oyidan ingliz tili o’rganishga kirishdim. Undan oldin o’qiganmanmi?
Ha. Bir nechta darslarga qatnashib to’xtatib qo’ygan holatlarim bo’lgan.

Bugungi postimiz shu joyda yakunlanadi. Negadir yozgim keldi.

Davomi bor…

@jurabek_vlog

Manzil o'zi ko'rinadi

Ba'zida manzilning aniq bo’lmasligi bizni yo’lga chiqishdan yoki yo’lni davom ettirishdan to’sishi mumkin. Lekin aynan hozir biz uchun to’g’ri bo’lgan ishlarni qilib borish bizni manzilga tomon boshlaydi.

Bizdan talab qilinadigani bu davom etish va to’xtab qolmaslik. Bugun qilingan bitta fodali ish u qanchalik kichik bo’lsa ham uzoq muddatda katta muvaffaqqiyatga boshlashi mumkin.

Xuddi shunday, bugun qilingan kichik va foydasiz ish kelajakda katta omadsizlikga olib borishi mumkin.

Aslida ular bir marta bajarilib keyin to’xtab qolmaydi. Balki doimiy tarzda takrorlanib turadi va katta ta’sir ko’rsatadi.

Biz shuning uchun har bir kichik odatlarimizda ehtiyotkor bo’lishimiz lozim.

Hozir bajarayotgan ishlarimiz 10 yildan keyingi bizni quradi. Agar g'isht qiyshiq qo'yilsa uy ham to'g'ri bo'lmasligi aniq.

@jurabek_vlog

Haqiqatga tik boq


Hayot qo’rquvni yengib, haqiqatga tik qaraganingda boshlanadi deb bekorga aytishmaydi.

Biz juda ko’p kamchiliklarimizni bilamiz va ular haqida o’ylashdan qochamiz. Aslida insonning eng yaxshisi-xulqi chiroylisi ediku.

Men xulqim chiroyli deb davo qilmayabman. Men shunday inson bo’lish yo’lining boshlang’ich nuqtasidagi odamman.

Agar biz boshqalardan ham o’rganishni boshlamasak, qandey rivojlanamiz. Kitoblar o’qiyabmiz lekin qachon ularga amal qilamiz.

Biz o’z xatolarimizni ko’rishimiz oson emas. Lekin yaqinlarimizga bu yaxshiroq ko’rinadi. Balki yaqinlarimizdan so’rarmiz biz qilgan qarorlarning yoki o’zimizni tutishimizning kamchiligi bor yoki yo’qligini.

Shu jumladan kimgadir kamchiligini aytishda uning o’ziga alohida aytgan ma’qulroq. Chunki u haqiqatni qabul qilishda nafsi bilan birgalikda yetarlicha qiynaladi. Boshqa odamlar bo’lishi uni ko’proq qiynaydi.

Shu jumladan, mening xatolarimni ham menga aytib qo’ying. Bunyodkor tanqidlarga doimo ochiqman.

Biz katta qarorlar qabul qilishda adashmas ekanmiz. Kichkina qarorlarda eng ko’p xato qilarkanmiz.

Kichkina qarorlar bu dars qilish yoki telefon ko’rish, ozgina ko’proq uxlash yoki yugurishga chiqish kabilar.

Katta qarorlar esa qayerda o’qishni tanlash, kim bilan ishlash, kimga uylanish/ turmushga chiqish, chet mamlakatga ketish kabilar.

Chunki katta qarorlarni biz juda ko’p o’ylab keyin qabul qilamiz. Shuning uchun ular o’sha paytdagi bilimimiz va tushunchamizga ko’ra eng yaxshi tanlov hisoblanadi.

Kichik qarorlar ustida esa ko’p o’ylanmaydi. Sekundlar soatlarga. Soatlar kunlarga, kunlar yillarga ulanib ketaveradi.

Qilayotgan ishlarimiz haqida ko’proq o’ylashimiz lozim. Hozir meva bermaydigan lekin uzoq muddatda ko’p meva berishni boshlaydigan ishlarni qilishga odatlanishimiz zarur. Masalan, til o’rganish, qo’chimcha kasb o’rganish, IT ni tushunish kabilar.

@jurabek_vlog

Baxt…

Baxtli bo’lish ham mahorat. Baxtni ham sekinlik bilan shakllantirish mumkin.

Baxtli bo’lish uchun baxtsiz qiladigan vositalardan voz kechish talab etiladi. Masalan, ijtimoiy tarmoq, ekranga aloqador mashg’ulotlar va baxtsiz insonlar.

Va baxtli qiluvchilarga yaqinlashmoq lozim. Masalan, doimiy xursand insonlar, sport mashg’ulotlari, aqliy mashqlar va hokazo.

Baxtli bo’lish bu tanlov. Ya’ni bizga nima bo’lishi emas, balki bizga nisbatan sodir bo’lgan voqeaga qanaqa reaksiya ko’rsatishimiz muhimroq.

Istalgan vaziyat uchun bizda 3 ta tanlov bor: o’zgartiramiz,qabul qilamiz yoki tark etamiz.

O’zgartirish bu bizning xohishimiz va bu juda qiyin. Bu kerakli narsani o’zgartirmaguncha baxtli bo’la olmaslikka olib keladi.

Tark etib ketish oson emas. Chunki biz ijtimoiy mavjudotlarmiz.

Eng ma’qul variant vaziyatni, shaxslarni boricha qabul qilish. To’g’ri bu ham oson emas. Lekin sekinlik bilan bir necha bosqichlarda amalga oshirsa bo’ladi.

Avval qabul qilmasdan kelib chiqqan muammolarni eslash mumkin. Yoki bu holatning ijobiy tomonlarini o’ylab ko’rish foyda berishi mumkin.

Biz qabul qilishni o’rgansak, sekinlik bilan vaziyatlarga moslashish ham osonlashib boradi.

@jurabek_vlog

Bugundan boshla…

Yangi odat boshlamoqchi bo’lib 1-yanvarni kutib, bir nechta 1-yanvarlar o’tsada hali ham odat shakllantirmaganlar oramizda ko’p.

Maqsadlar qo’yamiz. Ertalabdan yugurishga chiqaman, oilamga va do’stlarimga ko’proq vaqt ajrataman, sog’lom ovqatlanaman.

Bu maqsadlar barchasi ajoyib. Ammo bitta muammo bor.

Bir yilda atigi bittagina 1-yanvar bor. Agar boshlamoqchi bo’lgan odat o’sha kunda boshlanmasa, siz imkoniyatni o’tkazib yuborasiz va yana maxsus kunni kutishga kirishasiz.

Har oyning birinchi sanasidan boshlamoqchi bo’lganlar yaxshiroq. Chunki ularda 12 ta urinish imkoniyati bor. Birinchisi o’xshamasa boshqalari foyda berishi mumkin.

Dushanbichilar esa yana ham omadliroq. Chunki bir yilda 50 ta dan ziyod dushanba bor. Imkoniyatlar soni ko’proq.

Lekin har kunni imkoniyat qilib olish-eng ma’qul yo’l. Agar yangi odat uchun maxsus kun kutilsa u qiyinlashib boradi. Ammo har bir kun boshlash uchun imkoniyat.

Bugun boshlang. Sizda kamida 365 ta imkoniyat bor. Ana shunda bajarish ehtimolimiz ham ortib ketadi.

Agar ertaga reja o’xshamasa, undan keyin boshla. 1-yanvarni kutishga xojat yo’q.

@jurabek_vlog

Yozish muhim…

Yozish shunchaki ko’ringanidan ko’ra ancha muhimroq.

-Zamonaviy jamiyatda, barchasi AI tomonidan amalga oshirilishi mumkin bo’lgan bir paytda ham yozish o’z ahamiyatini yo’qotmaydimi?

Ha, albatta yo’qotmaydi.

Yozish bu shunchaki yozishdan iborat emas. Yozish kishi tushunmasdan gapirayotgan mavzusini tushunish jarayoni.

Paul Graham aytganidek, yaxshi yozuvchi shunchaki o’ylaganini yozish bilan chegaralanmaydi. Yaxshi yozuvchi yozish jarayonida ko’plab yangi narsalarni kashf qiladi.

Yozish bu ma’lumotlarning hajmini kamaytirishni ham talab qiladi. Agar u yomon qisqartirilsa asosiy tushunchalar tushib qoladi, aksincha esa muhimlari qolib keraksizlaridan voz kechiladi.

Yozuv faqatgina yozuvchiga bog’liq emas. O’quvchiga ham bog’liq. O’rtacha yozuvchi o’zi nimani xohlasa shu bilan boshlaydi. Yaxshi yozuvchi esa o’quvchining talabidan kelib chiqib yondashadi.

Texnika davrida ko’plab ishlar uskuna va yordamchi jihozlar yordamida bajarilishi mumkin. Ammo ular kishiga tiniq fikrlashni o’rganishga yoki bilimni chuqur anglab yetishga yordam bera olmaydi.

Yozish insonga eng muhim bo’lgan fikrlash qobiliyatini beradi. Yozilmas ekan, fikrlash uchun fursat bo’lmaydi. Kun davomida hamkasblar bilan, boshqa paytda oila davrasida yoki do’stlar bilan bo’lish yaxshi.

Lekin yolg’iz qolib fikrlash, o’rganmoqchi bo’lgan narsalari haqida yozish—fikrni tartiblaydi va tiniqlashtiradi. Yozish tafakkur qilishga undaydi.

Dastlab o’zingiz haqingizda yozishdan boshlab, so’ngra turli narsalarga o’tasiz va o’sib borasiz. Qancha ko’p o’qisak, shuncha yozishimiz osonlashadi va ko’proq narsa o’rganamiz.

@jurabek_vlog

Tezroq o’rganish
(Accelerated learning) bo’yicha maqola tarjimasi.

O’qib chiqing foydali bo’lishi mumkin.

@jurabek_vlog

Yozish uchun o’qish

Yozish bu shunchaki inson o’z fikrlarini bildirishi emas. Agar shunaqa bo’lganda bizda juda tez fikrlar tugab qolardi.

Yozish bu mavzuni chuqurroq tushunish va o’rganish ham. Chunki yoza boshlash uchun miyada xom g’oya bo’ladi. Keyin u haqida o’rganilib, so’ngra yozishga kirishiladi.

Yozayotgan narsamiz haqida o’rganmasdan yozsak, u zerikarli bo’la boshlaydi. Uni hechkim o’qimaydi.

Yozish nafaqat fikrlarni ifodalash balki ularga ega bo’lishni ham bildiradi.

Fikrlar bo’lmas ekan, biz ularni ifodalay olmaymiz.

Fikrlar esa yaxshi kitoblarni va maqolalarni o’qish orqali olinadi va avvalgi fikrlar bilan kombinatsiya hosil qiladi. Bu orqali bizdagi shaxsiy fikr vujudga keladi.

Shaxsiy fikrlarni yozish esa, ularni yanada yaxshilash imkonini beradi.

Masalan men, qachonki kam yozsam, demak men kam o’qiyabman yoki umuman o’qimayabman.

@jurabek_vlog

Turtki….

Ba’zida kichik bir turtki, bizni uzoqlarga yetishimizga sabab bo’ladi.

Ya’ni siz o’zingiz qilishni xohlagansiz lekin uning ustida o’tirib fikr yuritib ko’rmagansiz va shu paytda sizni kimnidir o’sha mashg’ulotni qilishga taklif qiladi.

Siz bu mashg’ulotga shu qadar kirishib ketasizki, o’zingizdan nega avval hech o’ylab ko’rmagan ekanman-a degan savolni so’raysiz.

Menga bundan 2,5- 3 yil avval bir do’stim taklif bergan. Men u bergan bu taklifga amal qilib o’sha paytdan boshlab hozirgacha bajarib kelyabman.

Lekin bu hamma takliflar uchun ham emas. Berilgan taklifni eshitasiz, mulohaza qilasiz. Agar u sizga foydali bo’lsa, hech kimga zarari tegmasa va dinimizda yaxshi ko’rilsa albatta uni bajarish yaxshi.

Lekin bu savollarga javobni bilmasak, taklif berayotgan kishiga qaraymiz. Agar bu kishi yaxshi va ilmi hamda amali bor kishi bulsa uning taklifida ham yomonlik bo’lmaydi.

Katta masofalarga yo’l ham kichik qadamdan boshlanadi.

@ieltsjourneeey

Yetuklikka yetaklovchi vosita…

Tog’ri savol berish- javobning qanchalik yaxshi bo’lishini belgilab beradi.

Biz yoshligimizdan boshlab–savol berish orqali atrofimizdagi dunyoni o’rganganmiz.

Lekin ozgina o’sganimizdan keyin, savol berish, qiziqishlarimizga to’siqlar ko’payib boradi.

So’ngra biz avtomatik tarzda, savol berishdan va rivojlanishdan to’xtaymiz.

Savol berish foydali. Misol keltiraman, bitta fanni o’rganayotgan ikta talaba bor. Ularning biri ko’proq savol beradi va javobni bilishga qiziqadi.

Ikkinchisi esa ko’p savol bermaydi va savol berish unga hech narsani bilmaslik belgisidek ko’rinadi.

Birinchi talaba hech narsani bilmaydigan tolibdek savol berib biluvchiga aylanadi, ikkinchisi esa biluvchi bo’lib ko’rinishga harakat qilib bilmasvoyga aylanadi.

To’g’ri noo’rin savollardan qochish kerak. Lekin savolning noo’rinligini farqlay olish uchun ko’proq savollar berib ko’rish kerak.

Savollarni kimga beramiz?

Agar siz til o’rganayotgan bo’lsangiz- o’qtuvchingizga,

Fanlar bo’yicha-tegishli fan bo’yicha ustozingizga,

Kompyuter, amaliy skillar bo’yicha savollar, mavhum mavzular bo’yicha savollarga esa- internet, sun’iy ong(Chat GPT) orqali bemalol javob ola olasiz.

Internet va Chat GPT bizning deyarli barcha savollarimizga javob bera oladi.

Faqat savolni yaxshiroq so’ray olish bizdan qilinadigan asosiy talabga aylandi.

Yana shunaqa savollar borki, ularni biz o’zimizdan so’raymiz!

- men nima uchun yashayabman?

-tog’ri va halol yashayabmanmi yoki pul topayabmanmi?

-mening suyansa bo’ladigan do’stlarim bormi? Menga kimlardir suyana oladimi?

- yaxshi farzand, uka, aka, yoki boshliq bo’la olyabmanmi?

- to’g’ri maqsadlar ortidan boryabmanmi?

- yaxshiroq bo’lish uchun nima qilsam bo’ladi?

Bular biz so’rashimiz mumkin va kerak bo’lgan oddiy savollar.

@jurabek_vlog

O’zing bo’l

Internet shu qadar kuchayib ketganki siz xohlagan inson bilan virtual musobaqalashish imkoniga egasiz.

Aslini olganda biz allaqachon musobaqalashishni boshlab yuborganmiz.

Bu musobaqadan qo’chishning bir yo’li bor.
Undan haqiqiylik ya’ni reallik bilan uzoqlashish.

Chunki boshqalar bilan musobaqalashar ekanmiz, albatta ulardan nusxa olishga harakat qilamiz va o’z realligimizni yo’qotib qo’yish ehtimoli ortib ketadi.

Lekin har bir inson-boshqacha(different). Boshqalar qilgan ishni ko’chirishga urinma.

Biz qila oladigan eng zo’r ish bu aynan haqiqiy o’zimiz bo’lish. Biz o’zimiz bo’lishni qoyilmaqom darajada bajara olamiz.


@jurabek_vlog

Qanday boy bo’lish haqida.

Haqiqiy boylik qidir, pul yoki status (obro) emas. Status- bu bizning jamiyatdagi o’rnimiz.

Boylikni yaratish mumkinligiga ishon. Agar sen undan yashirincha nafratlansang, u sendan qochadi.

Status uchun harakat qilayotgan odamlardan voz kech.

Shuningdek senda fidokorlik bo’lishi kerak, agar sen moliyaviy erkin bo’lishni xohlasang.

Sen jamiyatga u nimani xohlasa o’shani berish orqali boy bo’lishing mumkin. Lekin bu haqiqiy boylik emas.

Sen tanlagan biznes sheriklaring idrokli, energiyali va adolatli bo’lishi kerak. Tanlovda adashma.

Xudbinlar va pessimistlar bilan sherik bo’lma chunki ular faqat o’zlarini qoniqtirishni xohlashadi.

Sotishni va qurishni o’rgansang, seni to’xtatib bo’lmay qoladi.

O’zingni maxsus bilim(specific knowledge), javobgarlik va quvvat bilan qurollantir.

Specific knowledge- bu shunaqa bilimki sen unga o’rgatilmaysan. Agar jamiyat seni unga o’rgata oladigan bo’lsa, u boshqasiga ham shuni o’rgatib seni o’rningga qo’yishi mumkin.

Bu sening qiziqishlaringdan o’rganiladi. Bu sen uchun ish emas balki o’yin dek tuyiladiki, sen undan charchamaysan. U shogir tushish orqali o’rgatilishi mumkin lekin maktablardan emas.

Ko’proq bizness risklar qil. Jamiyat seni bu uchun mukofotlaydi.

(from The almanack of Naval Ravikant)

@jurabek_vlog

Foydalanishimiz lozim

Turli vaziyatlardan o’zimizga kerakli xulosalarni olamiz va natijada bu vaziyatlarda boshqa xato qilmaymiz.

Kimdir bizga maslahat bersa ham, boshqalarga maslahat qilayotgan bo’lsa ham,ularni bizga qaratilgan deb qabul qilib tahlil qilishimiz va maslahat yaxshi bo’lsa unga amal qilishimiz lozim.

Hayotning og’ir va yengil tajribalari, agar ular tahlil qilinsa, juda ko’p narsa o’rgatishga qodir.

Yangilikni yaxshi qarshilash undan biz bilmagan narsani o’rganish, hech bo’lmasa yangi hayotiy tajriba olish imkonini beradi.

Yangi odamlar bilan tanishish ham ko’p narsa o’rgatadi. Agar u inson yaxshi bo’lsa undan o’rganasan, yomon bo’lsa o’rnak olib u qilgan ishni takrorlamaysan.

Yolg’iz yurish ham ajoyib vaqt- hayoting haqida, o’zgalar bilan munosabatlaring , xatolaring va to’g’ri qilgan ishlaringni o’ylab, tahlil qilish uchun.


@jurabek_vlog

Tark et…

Senga muhiti to’g’ri kelmayotgan joyda bo’lsang, iloji boricha tark et.

Maqsadi senikiga o’xshash bo’lganlarni topishga harakat qil. Birga rivojlanish osonroq bo’ladi.

Bir xil tomonga ketayotgan jamiyatga qo’shil. Boshqa jamiyat ortidan ketayotganiga emas.

Atrofga qara, ko’pchilik nima qilyabdi. Ko’pchilik vaqtini bekorga sarflayabdi, ko’pchilik soatlab instagramda va youtubeda reels(qisqa videolar) tomosha qilyabdi.

Ko’pchilik o’z shaxsiyati ustida ishlamayabdi, ko’pchiligimiz bizga tegishmasa bo’ldi tariqasida ish ko’ramiz.

Ko’pchilik kitoblar o’rniga telefonlarni afzal ko’ryabdi. Qog’oz kitoblar o’rniga, e-book larni tanlashyabdi, pdf lardan o’qishni xohlashyabdi.

Sen ularning teskarisini qil. Vaqtingga e’tiborli bo’l va uni foydali ishlarga sarfla.

Instagramdagi va boshqa xohlangan qisqa foydasiz videolar o’rniga uzunroqlarini ko’r, podkastlar eshit.

Shaxs sifatida rivojlanishga e’tibor qarat.
Ruhiyati kuchli shaxslar–kelajak talabi.

Kitoblarni tanla, qog’oz kitoblardan ilm ol. Pdflardan emas, o’zing sotib olib o’qi–ko’proq o’rganasan. Shaxsiy kutubxonang ham shakllanadi.

Qiladigan ishlar ko’p. Boshlash uchun 1-yanvarni kutish shart emas.


@jurabek_vlog

To’xtama.

Hozirgi davrda to’xtash xato. Tog’ri bir qarashda bizga hammasi yetarli. (Aslida bu tuyg’uni hech birimiz his qilmaymiz)

Tengdoshlaring sendan oldinda bo’lishi aslida yaxshi. Chunki senda ulardan oldinga o’tishga bo’lgan turtki paydo bo’ladi.

Tengdoshlaring sendan ortda ekanligi aslida yomon bo’lishi mumkin.
Negaki, sen raqobat uchun faqatgina atrofingga qaraysan va rivojlanishdan to’xtaysan.

Aslida-chi, biz raqobatchilarimizni birinchi navbatda yon-atrofimizdan, unda bo’lmasa yashab turgan shahrimizdan, butun mamlakatdan, agarda undan yuqoriga chiqsak butun dunyo bo’ylab topa olamiz.

Bu bizga to’xtashga bo’lgan xoxishni yo’qotishimizga yordam beradi.

Biz juda ham dangasamiz. Bir nuqtaga yetamiz va o’sha nuqtada qotib qolamiz. Undan keyingi hayotimizni ko’ra olmaymiz.

Mas’uliyat bo’lishi,maqsad bo’lishi, dard bo’lishi muhim. Eng kamida bittasiga ega bo’lsak biz juda ham ilgrilab ketamiz.


@jurabek_vlog

To’xtashni bil!

Noqonuniy biznes bilan shug’ullangan odam tez boylikka erishishi mumkin va pulga bog’lanishi uni hech narsasiz qolishga yetaklaydi. Chunki u o’zini vaqtida to’xtata olmaydi.

Hech narsaga qattiq bog’lanib qolma, vaqtida to’xtashni bil.

O’zingda bor va senga kerak bo’lgan narsani o’zingda bo’lmagan va senga kerakmas narsalar uchun xatarga qo’yma.

Qiymatli narsalarni hech qachon risk qilma.

Obro- qadrli va qiymatli.

Oila va do’stlar - qiymatli.

Erkinlik, ozodlik- qiymatli.

Seni sevishini istagan insonlarning seni ardoqlashi - qiymatli.

Baxt va xursandchilik qiymatli.

Obro’ni risk qilsang u bir marta yo’qolsa qayta tiklay olmaysan.

Halovatingni risk qilma, u yo’qolsa hech narsa tatimaydi.

@jurabek_vlog