Judo Uz

🇺🇿🥋Murabbiylarimiz IJF akademiyasi dasturi boʻyicha oʻqitiladi

Maʼlumki, terma jamoalarimizning murabbiylar shtabi sportchilik faoliyatini yaqindagina yakunlagan dzyudochilar evaziga boyigandi.

Ular orasida Rio-2016 Olimpiadasi sovrindori Diyorbek Oʻrazboyev, Parij-2024 Olimpiadasidan keyin sportchilik faoliyatini yakunlagan Gulnoza Matniyazova singari isteʼdodlarimiz bor. Ularning har ikkisi ham bugungi kunda terma jamoalarimizda murabbiylik faoliyatini olib borishyapti.

Oʻzbekiston dzyudo federatsiyasi murabbiylarimizning salohiyati, malakasi va xalqaro tajribasini oshirish boʻyicha oʻz islohotlarini davom ettiradi. Terma jamoa murabbiylari IJF akademiyasi dasturi boʻyicha oʻqitiladi.

Shuningdek, bugungi murabbiylar shtabi yigʻilishida yaqinda Denov va Urganchda oʻtkazilgan yoshlar terma jamoamizning oʻquv-mashgʻulot yigʻinlari ham muhokama qilindi. Kamchiliklarni bartaraf etish boʻyicha koʻrsatmalar berildi.

✍️O‘zbekiston dzyudo federatsiyasi matbuot xizmati

Obuna bo`ling👉 Telegram

🇺🇿🥋✅Oʻzbekiston dzyudo federatsiyasi Andijon viloyati boʻlimiga yangi rahbar saylandi

Oʻzbekiston dzyudo federatsiyasi Andijon viloyati boʻlimining navbatdan tashqari hisobot-saylov konferensiyasi boʻlib oʻtdi.

ZOOM platformasida oʻtgan tadbirda Oʻzbekiston dzyudo federatsiyasi Bosh kotibi Aziz Sobirov, federatsiya raisi maslahatchisi Kseniya Gulyamova, federatsiya mutasaddilari hamda Andijon dzyudosi faollari ishtirok etdi. Dastavval, Andijon viloyati dzyudosining bugungi kuni, kamchiliklari, yechimini kutayotgan muammolari, istiqbolli rejalari xususida fikr almashildi.

Maʼlumot uchun, bugungi kunda Andijon viloyatida dzyudo bilan shugʻullanayotganlarning umumiy soni 748 nafarni tashkil qilmoqda. Shundan 81 nafari qiz bolalar. Jami 45 nafar (31 nafari oliy maʼlumotli) murabbiy yoshlarga dzyudo sir-asrorlarini oʻrgatyapti. Andijonlik hakamlar soni 3 nafar.

Ochigʻini aytish kerak, soʻnggi yillarda Andijon viloyati dzyudosida keskin pasayish kuzatilmoqda. Fikrimizni natijalar ham tasdiqlaydi. Uzoqqa bormaylik, oʻtgan yilning 8-10-noyabr kunlari Fargʻona shahri mezbonligida oʻtgan kichik oʻsmirlar oʻrtasidagi Oʻzbekiston birinchiligida andijonliklar 1 tagina bronza medalini qoʻlga kiritib, 1 ta beshinchi va 5 ta yettinchi oʻrindan joy olishdi. Aynan noyabr oyida Jizzaxda oʻtgan kattalar oʻrtasidagi Oʻzbekiston chempionatida Andijon viloyati terma jamoasi dzyudochilari bironta ham oʻrinni egallay olmay, 14 mintaqa ishtirokchilari orasida soʻnggi pogʻonani band etishdi. Dekabr oyida Termiz shahri mezbonlik qilgan yoshlar oʻrtasidagi mamlakat chempionatida ham xuddi shu holat takrorlandi.

Umumiy olganda, 2024-yilda turli yosh toifasidagi Oʻzbekiston chempionati hamda Kubogi bahslarida Andijon viloyati dzyudochilari 3 ta oltin, 5 ta kumush, 3 ta bronza, jami 11 ta medal qoʻlga kiritishdi. Xalqaro musobaqalarda esa sovrinli oʻrinlarsiz qolishdi.

Bunday holatda vaziyatni ijobiy tomonga oʻzgartirish uchun talabchan, dzyudoni yaxshi koʻradigan rahbarga ehtiyoj sezilayotgandi. Tavsiya etilganlar orasida Humoyunbek Alijonovning nomzodi maʼqullandi. U Oʻzbekiston dzyudo federatsiyasi Andijon viloyat boʻlimiga rais etib saylandi. Yigʻilish ishtirokchilari, xususan ijroiya qoʻmitasi aʼzolari Humoyunbek Alijonov nomzodini bir ovozdan maʼqullashdi.

Soʻz olganlar Andijon viloyati dzyudosini yangi bosqichga koʻtarish uchun saʼy-harakatlar boshlangani, birinchi navbatda moddiy-texnik bazani yaxshilash, dzyudochilarga yaxshi sharoitlarni yaratish, viloyatda seleksiya jarayonini kuchaytirish, ichki musobaqalarni koʻproq oʻtkazish masalalariga eʼtibor qaratilishini taʼkidlashdi.

Yigʻilish soʻnggida Oʻzbekiston dzyudo federatsiyasi Bosh kotibi Aziz Sobirov masʼuliyatli vazifaga kirishayotgan Humoyunbek Alijonovga omad tiladi.

✍️O‘zbekiston dzyudo federatsiyasi matbuot xizmati

Obuna bo`ling👉 Telegram

🎁🎂Xalqaro toifadagi referi Soib Qurbonovni tabriklaymiz!

🇺🇿🥋Bugun xalqaro toifadagi referi, iste’dodli hakam va murabbiy Soib Qurbonov ham o‘z tavallud kunini nishonlamoqda.

Soib Qurbonov 1988 yil 3 fevral kuni Qashqadaryo viloyatida dunyoga kelgan. Professional faoliyati davomida asosan -100 kg vaznda yurtimiz sharafini himoya qilgan. Rio-2016 Olimpiadasi ishtirokchisi, jamoaviy bellashuvlarda 2014 yilgi Inchxon Osiyo o‘yinlari sovrindori, 2016 yil Toshkentda o‘tgan Osiyo chempionatida kumush, shu yili Toshkent Gran-prisida oltin medalni qo‘lga kiritgan. 2015 yilgi Toshkent Gran-prisida ham kumush medalga sazovor bo‘lgan. Bugungi kunda hakamlik bilan bir qatorda murabbiylik faoliyatini ham olib boryapti.

O‘zbekiston dzyudo federatsiyasi shukrona kunini nishonlayotgan Soib Qurbonovni bugungi unutilmas kun bilan muborakbod etadi. Unga uzoq umr, sihat-salomatlik, oilaviy baxt, hakamlik faoliyatida omad tilaymiz.

✍️O‘zbekiston dzyudo federatsiyasi matbuot xizmati

Obuna bo`ling👉 Telegram

🎁🎂O‘tkir Qurbonovni tabriklaymiz!

🇺🇿🥋Bugun Toyloq olimpiya va paralimpiya sport turlariga tayyorlash markazi direktori lavozimida faoliyat yuritayotgan O‘tkir Qurbonov o‘z tavallud ayyomini nishonlamoqda.

O‘tkir Qurbonov 1983 yil 3 fevral kuni Surxondaryo viloyatining Jarqo‘rg‘on tumanida dunyoga kelgan. Professional faoliyati davomida xalqaro musobaqalarda asosan -100 kg vazn toifasida yurtimiz sharafini himoya qilgan. Pekin-2008 Olimpiadasi ishtirokchisi, Butunjahon Harbiylar o‘yinlari va Jahon Kubogi g‘olibi, Osiyo o‘yinlari hamda Osiyo chempionati sovrindori, Gran-pri turkumiga kiruvchi musobaqalar g‘olib va sovrindori hisoblanadi.

O`zbekiston dzyudo federatsiyasi O‘tkir Qurbonovni bugungi unutilmas kun bilan muborakbod etadi. Unga uzoq umr, sihat-salomatlik, oilaviy baxt, omad tilaymiz.

✍️O‘zbekiston dzyudo federatsiyasi matbuot xizmati

Obuna bo`ling👉 Telegram

🇺🇿🥋🥇🥉Uch dzyudochimiz qatnashgan Parij “Katta Dubulgʻa” turnirini 2 ta medal bilan 7-oʻrinda yakunladik

🇫🇷Ikki kun davomida Fransiya poytaxti Xalqaro dzyudo federatsiyasining 2025-yilgi mavsum taqvim rejasidan oʻrin olgan ilk musobaqa - Parij“Katta Dubulgʻa” turniriga mezbonlik qildi.

Musobaqaning soʻnggi kuni oʻrta va ogʻir vazn toifalarida gʻolib hamda sovrindorlar aniqlandi. Kechagi kun dasturidan birgina dzyudochimizning chiqishi oʻrin olgandi. +100 kg vazn toifasida bahslarga kirishgan Oʻtkirbek Toʻraboyev ilk davrada fransiyalik raqibi Amadu Meytegani ippon bahosi evaziga magʻlubiyatga uchratdi. Ammo chorak finalda tajribali Toma Nikiforovga imkoniyatni boy berib qoʻydi. Oʻn daqiqa davom etgan oʻtish bahsida esa omad yaponiyalik dzyudochiga kulib boqdi.

Shu tariqa, uch nafar dzyudochi bilan qatnashgan Iskandar Rasulov murabbiyligidagi Oʻzbekiston terma jamoasi 1 ta oltin va 1 ta bronza medali bilan 50 davlat orasida 7-oʻrinni egalladi. Shahram Ahadov turnir oltin medali hamda jahon reytingi uchun qimmatli 1000 ochkoga ega boʻldi. Bronza medali sohibi Bahrom Boturov esa 500 reyting ochkosini oʻz hisobiga yozib qoʻydi.

Musobaqa yakunlariga koʻra, medallar jamgʻarish boʻyicha Fransiya terma jamoasi 3 ta oltin, 3 ta kumush, 9 ta bronza medali bilan 1-oʻrinni egalladi. Birinchi kungi bahslardan keyin peshqadamlikni qoʻlga olgan Yaponiya terma jamoasi 3 ta oltin, 3 ta kumush, 5 ta bronza medali bilan 2-oʻrinni band etdi.

Koreya Respublikasi 1 ta oltin, 2 ta kumush medal bilan kuchli uchlikka yakun yasab berdi. BAA, Ozarbayjon, Ispaniya, Oʻzbekiston, Portugaliya va Kanada terma jamoalari safida ham bir nafardan musobaqa chempion boʻldi. Jami 17 davlat Parij “Katta Dubulgʻa” turnirining kamida 1 ta bronza medalini qoʻlga kiritdi.

✍️O'zbekiston dzyudo federatsiyasi matbuot xizmati!

Obuna bo`ling👉 Telegram

🇺🇿🥋👏Kechagi kun qahramonlari - IJF tomonidan "Yil voqeyligi" nominatsiyasi g'olibi Olimpiada chempioni Diyora Keldiyorova, uning ustozi, "Yilning eng yaxshi ayollar terma jamoasi murabbiyi" nominatsiyasi g'olibi Marko Spittka hamda ushbu yutuqlarning asosiy sababchilaridan O`zbekiston dzyudo federatsiyasi raisi Azizjon Kamilov. Xursandchiligimizga Xalqaro dzyudo federatsiyasi (IJF) prezidenti janob Marius Vizer ham sherik bo`ldi...

Obuna bo`ling👉 Telegram