JIZZAXLIKLAR🇺🇿

Uchrashuv avvalida Jizzax viloyati Yoshlar ishlari boshqarmasi rahbari 2024-yilda amalga oshirilgan ishlar va 2025-yil rejalari yuzasidan taqdimot qildi.

Shundan so‘ng, viloyat hokimi va yoshlar o‘rtasida ochiq va samimiy muloqot bo‘lib o‘tdi.

Uchrashuv davomida yoshlar ta’lim, bandlik, tadbirkorlik, sport va ijodiy loyihalarga oid o‘zlarini qiziqtirgan savollarga javob oldilar.

Tadbirda yoshlarning dolzarb muammolari va ularni hal etish bo‘yicha takliflari tinglandi.

Ishga joylashish, startaplarni qo‘llab-quvvatlash, sport infratuzilmasini rivojlantirish va ijtimoiy loyihalarga ko‘mak berish kabi masalalar muhokama markazida bo‘ldi.

Hokim yoshlarning takliflarini qo‘llab-quvvatlab, ayrim muammolarni joyida hal qilishga va’da berdi. Shuningdek, yangi tashabbuslarni amalga oshirish uchun maxsus ishchi guruh tuzilishi belgilandi.

So‘nggi yillarda davlat rahbari tashabbusi bilan yoshlar siyosati yangi tizim asosida shakllantirilmoqda. Joriy yil boshida mahalla yoshlar yetakchilari orqali 14-30 yoshdagi 341 793 nafar yoshlarni qamrab olgan "Yoshlar balansi" shakllantirildi.

Unga asosan, yoshlarning mavjud muammolari, qiziqishlari va iqtidorlaridan kelib chiqib, quyidagi yo‘nalishlar bo‘yicha tizimli ishlar olib boriladi:
Bandlik: 2025-yilda 11 912 nafar ishsiz yoshlar va mehnat bozoriga kirib kelayotgan bitiruvchilarning bandligini ta’minlash maqsadida "Yoshlar bandlik dasturlari" ishlab chiqiladi.
Xorijdagi yoshlar: Xatlov natijasida 9 011 nafar xorijdagi yoshlar ro‘yxati shakllantirildi, shundan 8 089 nafari ishlash uchun, 853 nafari o‘qish uchun, 69 nafari esa davolanish va boshqa sabablarga ko‘ra chet elda bo‘lib turibdi. Yil yakuniga qadar 1 509 nafar yoshning Vatanga qaytishi va bandligi ta’minlanishi rejalashtirilgan.

2024-yilda "Besh tashabbus olimpiadasi" doirasida 500 mingdan ortiq yoshlar ishtirok etgan bo‘lsa, joriy yilda bu raqamni 750 mingga yetkazish ko‘zda tutilgan. Shuningdek, "Ibrat Academy", "UzChess", "Mutola" platformalari va boshqa ta’limiy loyihalar orqali 264 162 nafar yosh qamrab olinadi.

2024-yilda xalqaro imtihon xarajatlari uchun 997 nafar yoshga kompensatsiya to‘lab berilgan. Joriy yilda esa mahallalarda ijtimoiy himoyaga muhtoj bo‘lgan 1 200 nafar yoshga bepul xorijiy tillar o‘rgatish rejalashtirilgan.

"Jizzax tajribasi" sifatida tashkil etilgan "Jasorat maktabi" loyihasiga 500 nafar, "Shunqorlar" harbiy-vatanparvarlik spartakiadasiga 53 ming nafar, huquqiy va siyosiy savodxonlikni oshirish bo‘yicha tadbirlarga 94 ming nafar yosh jalb etiladi.

Shuningdek, viloyat hokimi xorijda tahsil olayotgan Jizzaxlik yoshlar bilan onlayn muloqot o‘tkazdi. Suhbat davomida ularning ta’lim va faoliyatga oid savollari tinglanib, takliflarini amalga oshirish yuzasidan takliflar berildi.

Bunday uchrashuvlar yoshlarning faolligi va tashabbuskorligini oshirish, shuningdek, muammolarni tezkor va samarali hal etishda muhim ahamiyat kasb etadi.