Jami1ov

Nega har kuni bir post yozaman, bundan maqsad nima?

(Maqolani o'qish davomiyligi - 2 daqiqa)

Avvalo o'zimda intizomni shakllantirish, chunki blogim orqali o'z fikrlarimni yoritib bormoqchiman, yil yakuniga qadar 43 kun qoldi va bu bir odatni shakllantirish uchun yetarlicha vaqt hisoblanadi.

Blogdan odamlar chiqib ketishsa-chi? Bunisi ahamiyatsiz, blogni kundalik sifatida yuritaman va maqsad auditoriya to'plash emas, maqsad ko'proq kuzatuvchi yig'ish bo'lganda boshqa yo'llardan foydalanishim mumkin edi. Masalan, reklamalar berish, biror sovg'a yoki o'yinlar orqali. Ammo bu menga keraksiz bo'lgan auditoriyani yig'ib qo'yadi

Davomiy yozilgan postlar orqali dunyoqarashim fikrlarim qanchalik o'zgarishini o'z ko'zlarim bilan kuzatib bormoqchiman, xayolotim, fikrlarim, maqsadlarim haqida yozib, ularga erishish jarayoni qanday kechayotganini ko'rishni istayman

Siz ham blog yuritishingizni istayman, blog insonning asl yuzi maqsadlari va dunyoqarashini ko'rsatadi. Instagramdagi videolarimiz va rasmlarimiz ko'zlarni aldaydi xolos

Shu uchun yozish kerak, ko'proq yozish kerak. Nima haqida yozaman? Bugungi kuningiz, maqsadlaringiz, rejalaringiz, kechinmalaringizni yozib boring muhimi men avvallari qilgan xatoni qilmang, kayfiyatga qarab yozmang, davomiy intizom bilan yozing, natijasini esa yil yakunida sezasiz. Istasangiz blogingizdagi maqolalarni menga yuboring o'qib o'z fikrlarimni bildiraman, birga rivojlanamiz :)

Balki qiziq tuyular, ammo shu kichik blogim orqali meni turli loyiha rahbarlari ham kuzatib fikrlarim to'g'ri kelgani uchun o'z loyihalariga ham taklif qilishgan, blogim orqali 30 dan ortiq insonlarni media va marketing sohasidagi boshlang'ich bilim olishlariga sabab bo'ldim.

Tushunib ulgurganingizdek blogim bilan bog'liq maqsadlarim ko'p

Endi esa men ishga boray, siz ega blogimni nima maqsadda kuzatishingizni, undan foyda olganmisiz yoki yo'q yozib qoldiring, barchaga javob beraman, nasib bugun suhbatlashamiz

@Jami1ov

Bir vaqtning o'zida ham eng yaxshi va eng yomon hikoya...

Odatda audio kitoblar tinglamayman, fikrim bo'linadi deb yurardim, bugun shuni rost yoki yolg'on ekanini o'zim uchun sinab ko'rdim. Audio hikoya esa "Hellados" bo'ldi. Sababi maktab davrida meni eng ta'sirlantirgan 3 hikoyani biri aynan u edi.

Hikoya 35 daqiqa ekan, sayr qilib ketayotgan edim, boshida menga tushunarsizdek tuyildi biroq 5 daqiqa o'tmay moslashdim, yana o'sha eski ismlar eski hislar menga sherik bo'ldi...

"Jamol va Yanguli ismli yigitchalar... Biri tibilisilik biri esa suxumida yashagan asli grek yigitcha haqida ta'sirli hikoya. Bu hikoyadagi holatlar menga yod bo'lsada lekin bilmadim xuddi shu ikki insonning uchinchisidek o'zimni his qildim.

Hikoyani Mutolaa dasturida audio formatda tinglab mazza qildim, ta'sirlandim.

Quyida esa ushbu hikoyadan menga yoqqan iqtiboslarni qoldiraman, o'qib ko'ring albatta sizga yoqadi!

1. Ayni paytda, men ham o‘zimni na Yanguli, na uning o‘rtoqlari zig‘ircha ham qiziqtirmaydiganday tutardim. Aslida esa hoziroq bolalarga qo‘shilib ketgim kelib turar — ularga o‘zimning nimalarga qodirligimni ko‘rsatib qo‘yishni istardim. Biroq mahallada yangi odam edim...

2. Nima bo‘lganda ham bugungi olishuvning yakuni ma’lum: men yutqazdim. Yanguli bir oz kutib turdi, mushtlashishni davom ettirish niyatim yo‘qligiga ishonch hosil qilgach, shoshmasdan ko‘ylagini kiya boshladi. Nigohim yana ko‘ksidagi g‘alati so‘zga tushdi: «Hellados».

3. Bisotimdagi haqoratbop so‘zlar tugadi. Yanguli kutib turardi — navbat meniki edi.
— Bo‘laqol, yutqazasan! — deb turtkiladi Koka.
— Menda boshqa yo‘q!
— Onasiga o‘t!
— Yo‘q, onani aralashtirib bo‘lmaydi!
— Sheni deda vatire, degin! Uyat joyi yo‘q buni!
— O‘rischasiga nima degani?
— Sen gruzinchasiga aytaver! U baribir tushunmaydi! — Koka hol-jonimga qo‘ymasdi.
— Yanguli, sheni deda vatire! — gruzinchalab shunday dedimu javobini jon hovuchlab kutib turardim.
— Imana su ine prostikasa ineka, Jamol!
Sezdimki, Yanguli ham onamga til tekkizdi, ammo bu so‘zlar shu qadar xushohang, shu qadar yoqimli eshitildiki, go‘yo u go‘zal bir qo‘shiqni boshlaganday bo‘ldi nazarimda.

4. — Yanguli, sheni deda vatire! — deya o‘zg‘irlik qildim men.
U to‘xtab, ma’yus nigoh bilan uzoq tikilib turdi.
— Sheni deda vatire, Yanguli! — deb takrorladim yana.
Yanguli boshini egdi, keyin burilib, asta... uyi tomon keta boshladi. Men dong qotib qoldim.
— Ko‘rdingmi quyon bo‘lganini?! Endi xo‘jayinlik qilolmaydi! — dedim Kokaga.
— Yo‘q, endi boshlandi! — Koka miyigida kulib qo‘ydi.
— Qanaqasiga?
— Shunaqasiga-da. U seni yengdi, Jamol!
— Nega so‘kinmadi bo‘lmasa!
— Kecha oyingni surishtirgan edi: kim, qaerda... Men nima deyin... Shunaqa, shunaqa... haligi... Yo‘q... o‘lgan, dedim. Shuning uchun ham so‘kmadi-da seni...
G‘alati bo‘lib ketdim.
— Ahmoq, ovsar! Nega kecha shuni menga aytmading?
— Qaydam...
— Yanguli! — deb qichqirdim orqasidan. Ammo u ancha uzoqlashib ketgan, ovozimni eshitmasdi. Yo eshitsa ham, eshitmaganga oldimi...

5. A’zoyi badanim jimirlashib ketdi. Bunaqa so‘zlarni umrimda birinchi marta eshitayotgan edim.
— Bu nima bo‘lmasa? — Men Yangulining ko‘kragini ochib, baland ovozda o‘qidim: — Hellados.
— Bu — naqsh, Jamol. Vatan — ichkariroqda, naqd yurakning o‘zida! — Yanguli qo‘lini ko‘ksiga qo‘ydi.
O‘pkam to‘lib, tomog‘imga achchiq bir narsa qadaldi, unga yana bir nimalar demoqchi edim-u, ammo Yanguli eshagini no‘xtasidan yetaklab, hovlidan chiqib ketdi.

@Jami1ov

Nega SMM bo‘yicha shogirdlarimga marketing haqidagi kitoblarni emas, badiiy kitoblarni o‘qishni tavsiya qilaman?

(Maqolani o'qish davomiyligi - 1,5 daqiqa)

Buning asosiy sababi, media va marketing sohasida yaxshi natijaga erishish uchun nafaqat texnik bilim, balki ijodkorlik va keng vizual tasavvur ham zarur. Media sohasida ishlaydigan mutaxassis uchun tasavvur qilish qobiliyati yaxshi bo'lishi talab etiladi.

Marketing kitoblari - o‘quvchiga aniq strategiyalar, muammolarni hal qilish usullari va yangi texnikalarni o‘rgatadi. Bu, albatta, foydali. Lekin sohada endi faoliyat boshlayotgan insonlar uchun texnik bilimlardan ko‘ra, ijodiy fikrlash va hissiy yetkazish qobiliyati ko‘proq asqatadi desam adashmagan bo'laman.

Nega badiiy kitoblar muhimroq?

Badiiy kitoblarni o‘qish insonning tasavvur doirasini kengaytiradi. Tasavvur qilish qobiliyati esa marketingda qiziqarli va kreativ g‘oyalarni yaratishda katta rol o‘ynaydi. Bundan tashqari mana shunday foydali tomonlarini ham sezganman:

1. Fikrni aniq va to‘liq ifodalash: Badiiy kitoblar o‘quvchini so‘z boyligini oshirishga, fikrini ta’sirli va tushunarli ifodalashga o‘rgatadi.

2. Muammolarni turli rakurslardan ko‘rish: Har bir yaxshi badiiy kitobda bir-biriga qarama-qarshi fikrlar, murakkab vaziyatlar va turli xil qarorlar aks etadi. Bu esa insonda kengroq fikrlash ko‘nikmasini rivojlantiradi. Bu ko'nikmani keyinchali ssenariylar yozishda ham ancha foydasi tegadi

Marketing kitoblari o‘z o‘rnida foydali, lekin…

Marketing kitoblari ko‘proq texnik yondashuvga ega bo‘lib, amaliyotga tayyor mutaxassislar uchun ideal. Ammo SMM sohasida yangi boshlayotgan shogirdlar uchun birinchi navbatda ijodkorlik va keng dunyoqarashni shakllantirish lozim!

Qaysi badiiy kitoblarni o'qish kerak degan savolni hayolingizga keltirgan bo'lsangiz, javobim: - istalgan badiiy kitobni o'qing, muhimi davomiy bo'lsin :)

Har ehtimolga qarshi kanalimda o'zim o'qigan kitoblar haqida ham bir jadval qilgan edim shu yerdan o'zingizga yoqqan kitobni tanlab o'qish zarar qilmaydi :)

Shaxsiy rivojlanish, foydali maslahatlar va biroz marketing haqida - @Jami1ov

Bu bot manziliga kelgan xabar 😁

Ha azizlar men
shunday odamman 🌝

Jarimaga tushishni istamayapman😁

Media — eng xavfli qurol bo‘lib qoldi...

(Maqolani o'qish davomiyligi - 2 daqiqa)

Kecha taxiga chiqqan edim. Haydovchi aka (yoshlari 25-30 atrofida) meni "Impact"dan chiqib kelayotganimni ko‘rib: "IT sohasida ishlaysizmi?" deb so‘radilar. Sohamni tushuntirdim, so'ngra so‘zimni bo‘lmay, "5 000$ pul topasizmi?" deb savol berdilar.

Bir zum o‘ylanib qoldim. Nega bugungi qarichlarimiz shunchalik o‘zgarib ketti? Asosiy sabab, shubhasiz, media. Biz ijtimoiy tarmoqlarda faqat odamlarning natijalarini va daromadlarini ko‘rib, turli "qahramon" blogerlarning reklama narxlarini hisoblashdan nariga o‘tolmay qoldik. Hayotimiz faqat katta summalar va muvaffaqiyatlardan iboratdek tuyuladi.

Bir tasavvur qilib ko‘ring: 5 000$ o‘zbek so‘mida qancha bo'lishini hisoblab ko'rdingiz-a?! Eng yomoni, biz "boshqalar"ning daromadlarini o‘zimiznikiga taqqoslaymiz. Lekin aslida, kimning qancha daromad topayotgani hech qachon muhim bo‘lmagan. Hatto bu mavzuni so‘rashning o‘zi ham odobdan emas.

Haqiqiy xavf nima? Biz boshqalar bilan taqqoslashni boshlaganimizda, ruhiyatimiz tushib ketadi. Hamma omadli, hamma boy, hamma chiroyli, faqat sizgagina taqdir kulmagandek tuyuladi. Lekin bu haqiqat emas. Ijtimoiy tarmoqlarda ko‘rayotganingiz hayotning faqat bir tomoni, ya'ni "filtrlangan" qismi xalos.

Xulosa qilib aytganda, biz o‘z hayotimizni boshqalarnikiga taqqoslashdan voz kechishni o‘rganishimiz kerak. Har bir insonning muvaffaqiyati, tajribasi va yo‘li o‘ziga xos. Shunday ekan, asosiy e'tiborni boshqalarning yutuqlariga emas, balki o‘zimizning maqsadlarimizga e'tibor qaratsak, o'z oldimizga qo'ygan maqsadlarimizga tezroq yetamiz. O'zimizni solishtirishimiz bo'lgan yagona inson bu kechagi o'zimiz.

Ushbu postni o'qiganingizdan keyin qilishingiz kerak bo'lgan asosiy ish, tarmoqlarga sarflaydigan vaqtingizni 10 daqiqaga qisqartish va shu vaqtga endi kuningiz qanday o'tganini bir kundalikka yozib borish, umid qilamanki foydasini 1 haftaga qolmay sezasiz

O'zi uchun foydali deb bilganlarini doimo ulashib boruvchi do'stingiz - @Jami1ov

O‘tgan 4 yil vaqtim va to‘langan 10 000$ kontrakt uchun afsuslanamanmi?

(Maqolani o'qish davomiyligi - 2 daqiqa)

Universitetni tamomlaganim haqida post joylaganim esingizdami, unda menga diplom berishmagan edi, sababi esa oddiy, bir fandan kechiktirib topshirilgan imtihon diplom oladigan o‘quvchilar ro‘yxatidan qolishimga sabab bo‘lgandi

Kuni kecha diplomimni berishdi. Xulosalarimni bugun yozish nasib qilgan ekan. O‘tgan vaqtim va ta’lim uchun ajratilgan pullarning hech biriga, 1 foiz ham aslo afsuslanmayman. Nega? Universitet menga tramplin vazifasini o‘tadi. Universitetda o‘qish davrimda kontrakt summasi katta edi, bu esa "talabalik oltin davrim" deb dam olib yurishga imkon bermasdi, maqsad soha bo‘yicha ishlash va mutaxassis bo‘lish, shunday qilib o‘z oldimga kattaroq maqsadlar qo‘yishni boshladim

Universitetda o‘qish baribir ijtimoiy darajaga ta’sir qiladi, buni ham tan olish kerak. To‘g‘ri, atrofimizda ziyoli insonlar ko‘p, lekin universitetda o‘qigan inson baribir fikrlarida dunyo qarashida nisbatan farq qilib turadi. (Agar rostdan o‘qigan bo‘lsa)

Universitet paytida oila a’zolaringiz sizdan hech narsa kutishmaydi va sizga nisbatan bosim kamroq bo‘ladi. Uy qil to‘y qil, uyga nimadir olib kel. Sizdan yaxshi o‘qish talab qilinadi. Siz esa fokusingizni bir joyga qaratib o‘qishni qoyillatishingiz talab etiladi.

Universitet sizga muhit taqdim qiladi. Siz kabi fikrlaydigan insonlar bilan ko‘proq vaqt o‘tkazasiz, orzu va maqsadlaringizni yana bir bor filtr qilasiz. Yaqin do‘stlar orttirasiz

Universitet sizga hech narsani kafolatlamaydi, na bilim na kasbni. Shu uchun universitetga kirib sizga sifatli dars berishlari, kasb o‘rgatishlari yoki ishga joylashlarini kutsangiz, tabriklayman katta ehtimol bilan bu kun hech qachon kelmaydi. Hammasi uchun o‘zingiz harakat qilasiz, sizga taklif qilingani esa muhit. (Muhit ham yaxshi bo‘lmasligi mumkin, uni o‘zgartirish ham o‘zingizga bog‘liq bo‘ladi)

Universitetga kirish kerakmi degan savolga qanday javob berishimni fikrimcha taxmin qildingiz?) Bilaman, bu post universitetga kirish natijalari chiqish paytida joylanishi kerak edi, afsuski, diplomim kech qo‘limga tegdi.

Agar siz universitetda o‘qisangiz, bilingki hayotingizning ta’limga aloqador eng muhim qismini bosib o‘tyapsiz, hech qachon universitetda o‘qiyotganingizdan uyalmang, va universitet kerak emas deganlar fikriga qo‘shilib ketmang, sizda imkoniyatlar ko‘proq!

Ta'lim yo'lingizdagi har bir kun mazmunli va barakali bo'lishini samimiy tilab qoluvchi - @Jami1ov

Bugun yil yakunini sarhisob qilish, dam olish uchun kun qilib belgiladim o'zim uchun...

Shu yil davomida qilingan ishlarni tahlil qilaman

The boysni amazonda 5-mavsumi chiqqan edi, sotib olgandim ko'rishga ulgurmagandim bugun biror qism ko'raman

Naruto animesini ham tugata olmagandim 373-qismdaman (adashmasam) uni ham ozroq ko'raman

Yangi kitob o'qishni boshladim. Nomi: Pul psixologiyasi. Pulni boshqarish bo'yicha muammolarim ko'p edi, ancha saboq olishimga ishonib turibman

Sayr qilaman 3-4km. Yolg'iz, quloqchinlarsiz, uzoq uzoqlarga borib ko'raman, fikrlarni jamlash uchun, tafakkur qilish uchun

P.s 2024-yilni tugashiga ham atigi 52 kun qolibdi

Press book nashriyotidan sovg'a 🔥

Qiziq kitobga o'xshaydi, albatta o'qib ko'ramiz nasib