* Шеърий лаҳза

ТАСАДДУҚ

“Бобурнома” мутолаасидан сўнг...

Хаста Ҳумоюннинг пойида — ўлим,
Бошида Бобуршоҳ — кафтда тутар жон:
“Қанча дардинг бўлса, кўтардим, ўғлим,
Қанча дардинг бўлса, кўтардим, ўғлон!”

Бадахшон баҳридан ўтиб Ҳумоюн,
Ота дийдоридан кечмаган билга —
Бўйла ўғил берсанг, барҳақ Худойим,
Жонни фидо қилгум ундай ўғилга.

Дард берса, дармонлик падар учун тан,
Ғам берса, ғамлари муборак ғамдир —
Ўғлига жонини тасаддуқ қилган
Заҳириддин Мирзо Бобур — оғамдир.

Сенга ҳам бир дардкаш шартми, эй гулшан,
Сенга ҳам тасаддуқ керакдир балким:
Қанча дардинг бўлса, кўтардим, Ватан,
Қанча дардинг бўлса, кўтардим, Халқим!

Мансур ЖУМАЕВ

Уланиш учун: https://t.me/ijod_bustoni