Ибратдир дунё 🌙

Аёл йиғласа — оғзига қўлини қўяди. Эркак йиғласа — кўзига қўлини қўяди. Гуноҳ кўпроқ қайси аъзодан содир бўлса, ўша ерни яширгандек...

🌗🌘🌑🌒🌓
Ибрат излаганга — ибратдир дунё
🌗🌘🌑🌒🌓

Олимлар тажриба ўтказган. У иккита қўзичоқни алоҳида қафасларга жойлаштирган. Қўзичоқлар бир хил ёшда ва бир хил вазнда эди. Уларга бир хил овқат берилган, барча шароитлар ҳам бир хил эди. Аммо, шу билан бир вақтда, учинчи қафасда бир бўри бор эди. Фақат битта қўзичоқ бўрини кўра оларди, иккинчиси эса уни кўрмас эди.

Ойлар ўтиб, бўрини кўрган қўзичоқ безовта, асабий, суст ўсаётган эди. Гарчи бўри қўзичоқни ҳеч нарса қилмаган бўлса ҳам, қўрқинч ва стресс унга ўлимни яқинлаштирди. Аммо бўрини кўрмаган қўзичоқ тинч эди, яхши ривожланиб, соғлом вазн орттирган эди.

Бу тажрибаси орқали олимлар руҳий ҳолатнинг жисмоний саломатликка таъсирини ва унинг ижобий ҳамда салбий натижаларини исботлаб берди. Кераксиз ташвиш ва стрессдан бошқа ҳеч нарса инсонга зарар келтира олмайди.

🌗🌘🌑🌒🌓
Ибрат излаганга — ибратдир дунё
🌗🌘🌑🌒🌓

Нью-Йоркдаги метролардан бирида, ғижжакчи (скрипкачи) ўз созида 45 дақиқа давомида куй чалади. Бир-икки қарсакдан ташқари, у бор йўғи 25-30 доллар чой-чақа тўплайди.

Аслида бу скрипкачи дунёдаги энг яхши мусиқачилардан бири саналган Жошуа Белл эди.

Ушбу метрода Жошуа ғижжак (скрипка) учун ёзилган 3,5 миллион долларлик энг мураккаб асарлардан бирини ижро этади.

Метрода ғижжак чалишидан икки кун олдин Жошуа Белл Бостон театрида чиқиш қилади ва ҳар бир ўриндиқлар учун чипта нархи ўртача 100 доллар атрофида бўлади...

Тадқиқот шуни кўрсатдики, ғайриоддий нарса оддий муҳитда порламайди ва кўпинча эътибордан четда қолади ва ҳатто паст баҳоланади.

Сен мукаммал бўлишинг мумкин, лекин агар сенга муносиб баҳо беришмаса, хотиржамликни йўқотма ва ўзингга тегишли бўлган тарафга, истеъдодинг қадрланадиган, керакли бўладиган жойга ҳаракатланишда давом эт!

🌗🌘🌑🌒🌓
Ибрат излаганга — ибратдир дунё
🌗🌘🌑🌒🌓

• Халқ кўп нарсани билса, уни бошқариш қийин бўлади
• Ким сизни ғазаблантирса, ўша сизни бошқаради.
• Ўзгаларни бошқарадиган одам кучли, ўзини бошқара оладиган одам ундан-да кучлироқ.
• Кўп нарсани билатуриб, ўзини билмаганга солган – доно.
Илмсиз бўлатуриб, билағонлик қилган – нодон.
• Одамлар сенга қандай муносабатда бўлаётганига эмас, одамларга ўз муносабатингга эътиборли бўл.
• Ғанимини енганнинг кучи кўпаяди, ўзини енганнинг – жасорати.
• Фикрларингизга эътиборли бўлинг, фикрларингиз фаолиятингизнинг доясидир.
• Ютуқларингизни кўпчиликнинг олқиши билан баҳоласангиз, қалбингиздан хавотир аримайди.
• Мен ҳамиша мени ҳақорат қилганлардан баланд тура оламан.
Уларни кечириб...
• Қонунлар ва буйруқлар кўпайса, қароқчи ва ўғрилар кўпаяди.
• Табиат ҳеқ қачон ошиқмайди. Лекин ҳамма нарсага улгуради.
• Олганнинг ҳовучи тўлади, берганнинг — қалби.
• Ҳамма нарсага эришдим деган, ҳеч нарсага эриша олмайди.

Лао ЦЗИ, хитой файласуфи

🌗🌘🌑🌒🌓
Ибрат излаганга — ибратдир дунё
🌗🌘🌑🌒🌓

Йил оғир келиб, Басрада буғдой яхши бўлмади, халқ жуда қийналди. Бағдодлик бир савдогар басралик савдогар дўстига бир кемада буғдой билан хат жўнатди. Хатда «Аллоҳ йўлидаги азиз биродарим! Басрада буғдой кам бўлиб, халқнинг оғир кунда қолганидан хабардормиз. Сизга бир кемада буғдой жўнатдим, шуни икки тангадан сотиб, пулини жўнатарсиз деб умид қиламан. Харажатларингизни фойда ичидан олинг. Барчамизнинг ишимизда Жаноби ҳақ мададкор бўлиб, Ўзи адашишдан сақлаб, савдомизга баракот ато этсин! Биродарингиз!» деб ёзди.

Басралик савдогар буғдойларни жуда яхши баҳога сотди ва пулларни биродарини хурсанд қилувчи мактуб билан бирга жўнатди. Мактубда шундай сўзлар бор эди: «Азиз дўстим! Юборган буғдойларингизни бекаму-кўст олдим. Икки ҳафта кутгандим, бозорда буғдой нархи жуда яхши кўтарилгач, икки тангадан эмас, тўрт тангадан сотдим. Пулларни жўнатдим, эҳтиром ила дўстингиз».

Бу мактуб ва пулларни олгач, бағдодлик савдогарнинг кайфияти бузилди ва басралик дўстига мактуб битди: «Ассалому алайкум ва раҳматуллоҳу ва баракотуҳ! Мактубингизни олиб, жуда қаттиқ хафа бўлдим. Бу буғдойларни басралик биродарларимиз турмушини енгиллатиш учун юборгандим. Икки баробар нархга сотиб, мени Аллоҳ олдида катта гуноҳкор қилиб қўйдингиз. Бу гуноҳимни қандай қилиб юваман? Сиз юборган пулларни қайтариб жўнатяпман, уларни басралик бева-бечораларга тарқатинг. Мен эса тавба қилиш учун Маккага кетяпман. Сиз насибамга ҳаром аралаштириб, мени гуноҳга қолдириб, қаттиқ оғринтирдингиз. Шу боисдан сиз билан дўстлигимиз ришталари узилди. Сиз ҳам тавба қилинг, шояд гуноҳларимиз мағфират этилса...»

🌗🌘🌑🌒🌓
Ибрат излаганга — ибратдир дунё
🌗🌘🌑🌒🌓

ПОРАНИНГ ЗАМОНАВИЙ СИНОНИМЛАРИ:

Туғруқхонада — “Суюнчи”
Боғчада — “Падарка”
Мактабда — “Парда пули”
Бозорда — “Патта пули”
“ГАИ”ларда — “Иштарап”
Ўқишга киришда — “Ҳўкиз”
Ишга киришда — “Йўтал”
Божхонада — “Чўтал”
Қассобларда — “Пичоқ учи”
Мухбирларда — “Қалам учи”
Машина олишда — “Шапка”
Мансаб ошишида — “Папка”
Ер беришда — “Қозиқ тортиш”
Кадастрда — “Чизиқ тортиш”
Ҳокимликда — “Ҳужжат”
Қозиларда — “Муддат”
Банкда — “Бонус”
Умумий номи — “Левый”!..

🌗🌘🌑🌒🌓
Ибрат излаганга — ибратдир дунё
🌗🌘🌑🌒🌓

Бир куни подшоҳ вазирларни йиғиб, ўртага шундай савол ташлабди:
— Салтанатимда солиқлар кун сайин ошиб борса ҳам, хазинада пуллар кўпаймаяпти?! Бунинг боиси недир?

Йиғилганлар орасида доно бир вазир катта муз бўлагини олибди-да, “Шоҳимга узатиб юборинглар!” дебди. Ҳалиги муз бўлаги қўлма-қўл бўлиб подшоҳга етиб келгунча кичкина томчига айланиб қолибди. Шунда подшоҳ вазирнинг ақлига таҳсинлар айтиб, барча қўл остида ишлаётган амалдорларни ва хазинага келадиган пулларни қаттиқ назоратга олган экан.

🌗🌘🌑🌒🌓
Ибрат излаганга — ибратдир дунё
🌗🌘🌑🌒🌓