Солиқ бўйича шикоят бериш ва уни кўриб чиқиш тартиби: муҳим 6 қоида
Солиқ органининг шикоят қилинаётган қарори ёки ҳаракатини ижро этиш якуний қарор қабул қилингунга қадар тўхтатиб турилади.
1. Солиқ органи қарори устидан судга ёки юқори солиқ органига шикоят бериш мумкин
Ҳар бир шахс солиқ органларининг ҳужжатлари, улар мансабдор шахсларининг ҳаракатлари (ҳаракатсизлиги) устидан, мазкур ҳужжатлар ва ҳаракатлар унинг ҳуқуқларини бузса, шикоят бериш ҳуқуқига эга.
Сайёр солиқ текшируви ёки солиқ аудити бўйича қарор бекор қилинганда, мазкур қарор бўйича ундирилган сумма қайта молиялаштириш ставкаси асосида фоизлар билан қайтарилади.
Солиқ органи қарорлари, мансабдор шахсларининг ҳаракатлари (ҳаракатсизлиги) устидан юқори солиқ органига ёки судга шикоят қилиш мумкин.
2. Солиқ қўмитаси ҳужжатлари устидан суд тартибида шикоят қилинади
Солиқ органининг шикоят қилинаётган қарори ёки ҳаракатини ижро этиш якуний қарор қабул қилингунга қадар тўхтатиб турилади. Солиқ тўловчи қайси солиқ органининг қарори ёки мансабдор шахсининг ҳаракатлари (ҳаракатсизлиги) устидан шикоят қилаётган бўлса, ўша органни солиқ органининг юқори турувчи органига ёки судга шикоят берганлиги тўғрисида тегишли тасдиқловчи ҳужжатларни илова қилган ҳолда хабардор қилиши шарт.
Туман (шаҳар) солиқ инспекциялари, ҳудудий солиқ бошқармаларининг шикоятларни кўриб чиқиш якунлари бўйича қабул қилинган ҳужжатлари устидан Солиқ қўмитасига ҳам шикоят қилиниши мумкин.
Солиқ қўмитасининг ҳужжатлари, мансабдор шахсларининг ҳаракатлари (ҳаракатсизлиги) устидан суд тартибида шикоят қилинади.
3. Шикоят қарорни қабул қилган солиқ органи орқали берилади
Сайёр солиқ текширувлари ва солиқ аудити бўйича қарорлар устидан шикоят юқори турувчи солиқ органига қарори устидан шикоят қилинаётган солиқ органи орқали берилади.
Қарорлари устидан шикоят қилинаётган солиқ органи бундай ариза келиб тушган кундан эътиборан уч кун ичида уни юқори турувчи солиқ органига барча материаллар билан бирга юбориши шарт.
Сайёр солиқ текширувлари ва солиқ аудити натижалари бўйича шикоят 1 ой ичида берилиши мумкин.
4. Шикоят ёзма ёки электрон берилиши мумкин
Шикоят ва унга илова қилинадиган ҳужжатлар солиқ органига ёзма ёки электрон шаклда юборилиши мумкин.
Шикоят уни берган шахс ёки унинг вакили томонидан имзоланади.
Шикоятда телефон рақамлари, электрон почта манзиллари ва шикоятни ўз вақтида кўриб чиқиш учун зарур бўлган бошқа маълумотлар кўрсатилиши мумкин.
5. Шикоят имзоланмаган бўлса, у кўрмасдан қолдирилади
Қуйидагилар аниқлаганда шикоят тўлиқ ёки қисман кўрмасдан қолдирилади:
— шикоят имзоланмаган бўлса;
— шикоят бериш муддати тугаганидан кейин берилган бўлса;
— икоятни тўлиқ ёки қисман чақириб олиш тўғрисидаги ариза келиб бўлса;
— илгари айнан ўша асослар бўйича шикоят берилган бўлса;
— шикоят солиқ органининг илгари шикоят қилинган қарори устидан берилган бўлса;
— шикоят тартиб бузилган ҳолда берилган бўлса;
— шикоят белгиланган талабга мувофиқ расмийлаштирилмаган бўлса;
— шикоят қўзғатилган жиноят иши доирасида ёки солиқ тўловчи судга шикоят масаласи бўйича мурожаат қилганда берилган бўлса.
6. Шикоят берилганидан сўнг ҳам қўшимча далил тақдим қилиш мумкин
Шикоятни кўриб чиқишда шахс ўз далилларини тасдиқловчи қўшимча ҳужжатларни шикоят бўйича қарор қабул қилингунига қадар тақдим этишга ҳақли.
Шикоятни кўриб чиқувчи солиқ органи ўз ташаббусига кўра ёки мурожаат қилувчининг илтимосига кўра шикоятни эшитишни ташкил этиши мумкин.
Юқори турувчи солиқ органи шикоятни кўриб чиқиш якунлари бўйича қуйидаги қарорлардан бирини қабул қилади:
— шикоятни қаноатлантирмасдан қолдиради;
— солиқ органининг ҳужжатини бекор қилади;
— солиқ органининг қарорини тўлиқ ёки қисман бекор қилади;
— солиқ органининг қарорини тўлиқ бекор қилади ва иш юзасидан янги қарор қабул қилади;
— солиқ органлари мансабдор шахсларининг ҳаракатларини (ҳаракатсизлигини) ноқонуний деб эътироф этади ва ишнинг моҳияти бўйича қарор чиқаради.
Каналга обуна бўлиш
👉 https://t.me/huquq_olami
