ERKIN BOZOROV | RASMIY

QUVNOQ GURUHIMIZ HAQIDA HIKOYA
(o’ydim-chuqur fikrlar)

(1-son)

Guruhga muttasil ravishda she’rlar yuborib turishadi. She’r mualliflarining ism-shariflariga kunora ko’zimiz tushadi. Bu ismlar bizga yod bo’lib ketdi. Ba’zida ular yuborgan qaysidir she’rning qulog’i qiziydi, qaysi bir she’r esa e’tibor kuta-kuta o’zidan keyingi bitiklar ostida qolib ketadi. Qanday holat bo’lmasin ular guruhimizga doim she’r yuborishadi. She’riyatning ixlosmandlari jam bo’lgan bu guruhda ular she’rga tizilgan tuyg’ularini, har bir yangi ijodiy ishlarini ulashadilar. Har bir she’rni o’qiyman. Sizlar ham o’qing va albatta fikr bildiring bu ijodiy ishlarga. Xalq e’tibori, mehri ijodjorga qanot.

Keling endi tanishamiz.

Shaxzodbek Ermatov. Uning har bir yuborgan she’rini o’qiyman. O’quvchi sifatida aytishim mumkinki, she’rlari shoirning so’z boyligi biroz kamligini ifodalab turadi. Ammo oylar sayin qalami o’tkirlashib boryapti shoir yigitimizning. Charchamang, g’ayratingiz so’nmasin hech Shaxzodbek.

Sarvar Mirzoning she’rlarida ko’proq tushkun kayfiyat kuzatiladi. So’z boyligi va mahorati oshaversa she’rlari ham sayqallanib boraveradi hali. Masalan Sarvarbekning she’rlaridagi kinoyalar, qochirimlar ba’zan juda ajoyib jaranglaydi.

Nargiza Mahamatqulovna, Zilol Malak - ular ham shu guruhda men kashf qilgan qalamkash ijodkorlar. Kasb sohalari boshqa, ammo barchalari adabiyotga, she’riyatga oshufta. Ularning she’rlari menga ham yangi she’rlarga go’ya, turtki beradi ba’zida.

Sardorbek Norqulov (43-maktab) bu shoirimiz adashmasam maktabda o’qituvchi bo’lib ishlaydilar. She’rlari ajoyib. Shunday o’qituvchilar o’quvchilarga ham adabiyotni sevdirib katta-katta shoirlarni yetkazib berishadi kelajakda. Qolaversa Sardorbekni o’zlarining qalamlari ham ancha dadil. Bolalik haqidagi bir she’rlari o’zgacha samimiy beg’ubor yozilgan. Yaqinda yod olib taqdim etaman. Telegram kanallariga ham a’zo bo’ldim. Sizlarga ham tavsiya qilaman.

Sohibjon Avaz ismli shoir yigitimiz ham doim she’rlar yuboradi. Iqbol Mirzo shoirimizni yo’liga tortib ketadi she’rlari. Balki menga shunday tuyular, balki g’oyibona ustoz tutgandirlar. Bu ajoyib. Biz hammamiz o’z yo’limizni izlab o’zimizdan oldingilar yaratib ketgan yo’ldan yuramiz. She’rlarida tushkun kayfiyat zohir. Boshqa kayfiyat va janrlarda ham ijodiy ishlar kutib qolamiz.

Temurmalik. Bu yigit she’r yozmaydi. Ammo yosh shoirlarimizga iltimos qilardimki, she’rlaringiz haqida albatta bu insondan fikr olinglar. U ro’y-rost haqiqatni aytadi. Shaxsan men uchun Temurmalikning fikrlari, tanqidlari qimmatli. Guruhda har bir insonning fikri men uchun qadrli. Ammo bu yigit adabiyotning mutaxassisi sifatida har bir ijodiy ishni aniq taroziga tortib go’shtini go’shtga, suyagini suyakka ajratib bera oladi. 🔪

Hali boshqa qalamkashlar ham bor. Ular haqida keyingi sonlarda😉

Bu ijodkorlarimizning ijodidan bahra olib, fikrlar bildirib, izohlar berib ularni qo’llashingizga ishonaman va guruhdagi shoirlarimizga tashakkur aytib, ijodiy parvozlar tilab qolaman.

Hurmat ila Erkin Bozorov