Eltuz portali

EP: "Qo‘qon shahridagi 8-umumta’lim maktabida olib borilayotgan qurilish ishlari tufayli, aytilishicha, ushbu hududdagi barcha daraxtlar yo‘q qilinadi. Chunki buzish ishlariga mas’ul bo‘lgan MChJ hamda maktab direktori shaxsan bu daraxtlarni olib tashlash kerakligini ta’kidlagan. Qo‘qon shahar Ekologiya bo‘limi rahbari, ya’ni Meliboyev Jahongir Bahodirovichga bu masala bo‘yicha topshiriq berilgan.

Aslida, prezident farmonlari va Vazirlar Mahkamasi qarorlariga ko‘ra, manzarali daraxtlar mavjud bo‘lgan hududlarda qurilish ishlari olib borish qat’iyan taqiqlangan. Hatto ushbu hudud uchun loyiha hujjatlarini tayyorlagan firma ham javobgarlikka tortilishi kerak. Biroq Qo‘qonda bu kabi qaror va farmonlarga e’tibor berilmaydi—shahar ekologiya rahbarlari pora evaziga barchasini e’tiborsiz qoldirib, daraxtlarni hech bir sababsiz kesib tashlashadi. Ular uchun na toza atmosfera, na ekologik muvozanat muhim. Ularning yagona maqsadi – moliyaviy manfaat bo‘lsa bas. Prokuratura bilan birgalikda ijtimoiy tarmoqlarda faqat ko‘zbo‘yamachilik qilish, aniq faktlarni yashirish va xalqni aldayotgani achinarli hol.

Bu ishlarga shahar hokimiyati va prokuratura vakillari bevosita aralashgan. Ular uchun daraxtlarni ko‘paytirish yoki ekologik muhitni saqlash mutlaqo ahamiyatsiz. Ularni faqat qurilishdan olinadigan daromad qiziqtiradi—tenderda kim qanday yutib oladi, qaysi firma qancha “otkat” beradi, shular muhim. Kelajak avlod uchun sof tabiat va toza iqlimni saqlash ularga mutlaqo qiziq emas.

Agar bu gaplarga ishonmasangiz, Qo‘qon shahrining atmosfera holatini o‘rganib ko‘ring. Havo sifati Toshkentdagi kabi yomonlashib ketgan, bu esa insonlar hayoti uchun ekologik xavf tug‘diradi. Shahar ekologiya bo‘limi bu borada qanday chora-tadbirlarni amalga oshirmoqda? Xususan, bo‘lim boshlig‘i bu muammoni bartaraf etish uchun nechog‘lik harakat qilyapti? Afsuski, hech qanday harakat sezilmaydi..."

@eltuzportali - muammolar yechimi!

"Toshkent shahar Yakkasaroy tumani 144-maktabning orqa tomoniga sinflar yetishmasligi bahonasi bilan yangi, 4 qavatli, 40 ta sinfga mo‘ljallangan bino 2024 yilda qurildi. Biroq, hozirgi kungacha ushbu yangi binoga o‘quvchilar ko‘chirilmagan.

Yangi binodan sinflar ajratilib, ota-onalardan pul yig‘ilib sinflar jihozlandi, stendlar o‘rnatildi. Hozirda esa o‘quvchilar eski binoda sinflar yetishmovchiligi sabab ikki smenada o‘qishga majbur bo‘lmoqda. Yangi binoga esa atigi 3 ta sinf ko‘chirilgan, ular oddiy sinflar emas, balki pullik (kommersiya) sinflar. Ya’ni, 40 ta sinfga mo‘ljallangan yangi binoda faqat pullik sinflar tahsil olmoqda.

Maktab direktoridan nima uchun barcha o‘quvchilar yangi binoga ko‘chirilmaganligi so‘ralganida, hokimiyat ruxsat bermaganligi vaj qilib ko‘rsatilmoqda. Oddiy sinflarga ruxsat yo‘q-u, pullik sinflarga ruxsat bor – bu nimani anglatadi?

Endi o‘rta maktablar ham sotilib, pullik bo‘ladimi? Nega vazirlik buni nazorat qilmaydi? Hokimiyatning bunga qanday aloqasi bor? Nega yosh avlod ongida "pullik" va "pulsiz" tushunchalari shakllantirilmoqda? Shu bizning ta’lim tizimimizmi?"

@eltuzportali - muammolar yechimi!

"Assalomu alaykum, hurmatli admin.

Biz, Namangan viloyati, Pop tumani "Pilol" MFY aholisi nomidan juda qattiq iltimos bilan murojaat qilmoqdamiz. Bizning MFY hududida 300 ta xonadon bor. Ochiq byudjet orqali yo‘lni ta’mirlashga hech qachon g‘olib bo‘lolmayapmiz, chunki aholisi juda oz.

Sizdan iltimos, hokimiyat tomonidan bizning yo‘llarimizni asfaltlab berishda yordam bering. Tumandagi ba’zi markaziy ko‘chalar tuman hokimining tashabbusi bilan byudjet hisobidan asfaltlanmoqda. Bizning qishloq mahalla ko‘chalari esa juda yomon ahvolda.

Qishda loy, yozda tuproq chang bo‘lib ketadi. Ko‘chalarda yurish keksalar va bolalar uchun juda qiyin bo‘lib qoldi. Shuning uchun sizlarga murojaat qilmoqdamiz – iltimos, Pilol MFY ko‘chasini asfaltlab berishsin!"

@eltuzportali - muammolar yechimi!

EP: Andijon viloyati Jalaquduq tumani aholisi murojaati

"Assalomu alaykum, Eltuz portali.

Biz, Andijon viloyati Jalaquduq tumani Qilichmozor mahalla fuqarolar yig‘ini aholisi, muhim masalada murojaat qilmoqchimiz. Sizlar orqali tegishli tashkilotlarga yetib borishiga umid qilamiz.

Mahallamiz Andijon Tezkor Tozalik MCHJ bilan qattiq chiqindilarni olib chiqib ketish bo‘yicha shartnoma tuzgan ekan. Biroq hech bir xonadonda ushbu shartnomaning nusxasi mavjud emas. Shunga qaramay, bizga qarzdorlik yozib kelinadi va uni to‘lashga majbur bo‘lamiz.

Shuningdek, ko‘rsatilayotgan xizmat sifati juda yomon. Chiqindilarni olib ketish muddati noaniq — ba’zan oylar davomida umuman kelishmaydi, ba’zan esa faqat bizning murojaatlarimizdan so‘ng harakat qilishadi. Shunga qaramay, qarzdorlik to‘liq oy uchun hisoblanadi. Masalan, mart oyida ayrim ko‘chalarga umuman chiqindilarni olib ketish uchun kelishmadi.

Yangi qonunga ko‘ra, chiqindidan qarzdorlik mavjud bo‘lsa, elektr energiyasi uchun to‘lov qabul qilinmaydi. Bu esa aholining katta qismini elektrsiz qoldirishi yoki majburan nohaq qarzni to‘lashga majbur qilishi mumkin.

Shu sababli, biz Bosh prokuraturadan va Iste’molchilar huquqlarini himoya qilish tashkilotidan ushbu muammoni nazoratga olishlarini, aholi manfaatlarini himoya qilishlarini so‘rab qolamiz."

@eltuzportali - muammolar yechimi!

EP: "Mahallamizdagi chiqindi va infratuzilma muammolari"

"Assalomu alaykum, Eltuz!

Men Toshkent viloyati, Zangiota tumani, Nihol mahallasidan yozmoqdaman. Bizning mahallamizda chiqindi masalasi juda og‘ir ahvolda, odamlar qayerga murojaat qilishni ham bilmaydi.

Ikki yil oldin chiqindi xizmati bir yil davomida ko‘rsatilmagan bo‘lsa-da, hisob yopilmagani sababli qarzdorlik yozilib, aholiga to‘latilgan. Bu muammo bo‘yicha harakat qildik, lekin sudga yo‘naltirishdi va oxir-oqibat oddiy xalqning o‘ziga bu qarz to‘latildi.

2024-yilning oktyabr, noyabr, dekabr va yanvar oylarida xizmat ko‘rsatilmagan. Shu bois, mahalla aholisi o‘z hisobidan maxsus mashina chaqirtirib, chiqindini pul evaziga olib ketishga majbur bo‘ldi. Fevral oyidan esa chiqindi xizmati qayta paydo bo‘ldi, ammo to‘rt oy davomida ko‘rsatilmagan xizmat uchun ham qarzdorlik hisobga qo‘shilgan. Bunga e’tiroz bildirsak, "qaytariladi" deyishdi, biroq kecha MIB orqali majburiy undirish boshlangani haqida xabar keldi.

Bu xizmat bizga kerak emas edi, agar yo‘lga qo‘yilgan bo‘lsa, uning nazorati ham tashkil etilishi kerak emasmi? Mahalla raisiga murojaat qilsak, bizni eshitmaydi, muammolarni hal qilish o‘rniga e’tibor bermaydi.

Hozirgi kunda chiqindi uchun Toshkent viloyatida har bir kishidan 6 700 yoki 7 700 so‘m olinmoqda. Lekin biz qayerga murojaat qilishni ham bilmaymiz. Viloyat rahbari, bosh vazir, tegishli vazirliklar qayerda? Nega xalq ustidan kulib, chiqindi masalasini hal qilmasdan turib, bizdan pul undirmoqdasizlar? MIBga topshirilgan ushbu qarzlar qaytarilsin, xizmat ko‘rsatilmagan oylar uchun to‘lovni talab qilish adolatsizlikdir.

Bundan tashqari, mahallamizdagi trotuarlar ikki yil oldin suv quvuri yotqizish maqsadida buzib tashlangan. Ammo na suv keldi, na trotuarlar tiklandi. Hech kimning bu masalaga ishi yo‘q. Nahotki biz bunchalik beparvo bo‘lib qoldik? Yoki yuqoridagi amaldorlar bunga ko‘z yumishyaptimi? Kimdir davlat mablag‘ini olib, "suv quvuri o‘tkazamiz" deb yo‘llarni buzdi-yu, hech narsa qilmasdan ketdi. Natijada esa yana oddiy xalq loy kechib yurishga majbur bo‘ldi. Oldingi holati bundan yaxshiroq edi!

Tegishli idoralar bu masalaga jiddiy e’tibor qaratib, chiqindi va infratuzilma muammolarini hal qilishi shart!"

@eltuzportali - muammolar yechimi!