#маданият
#халқаро_тадбир
Халқаро Туркий ташкилоти(Турксой)га аъзо давлатлар Маданият вазирлари доимий кенгашининг 39-йиғилиши якунида Туркманистоннинг Анау шаҳрини 2024 йилда туркий дунёнинг маданий пойтахти деб эълон қилиш тўғрисидаги қарор қабул қилинган эди. Шу муносабат билан 26-27 март кунлари Ашхободда Анау шаҳрининг 2024 йилда туркий дунёнинг маданий пойтахти деб эълон қилиниши билан боғлиқ маданий тадбирлар бўлиб ўтди.
Анаунинг фахрий мақомини эълон қилиш тадбирларида Ўзбекистон Республикаси номидан Бухоро вилояти ижодий жамоаси фаол иштирок этди.
Хусусан, Ўзбекистон Республикаси учун ажратилган павильон миллий ҳунармадчилик маҳсулотлари билан безатилди. Шунингдек, мазкур павильонда Бухоронинг қадимий қўшиқлари янгради. Бу эса хорижий меҳмонларни ўзига мафтун этди.
Шунингдек, анжуман доирасида Ашхобод шаҳрида туркман шоири Махтумқули Фироғий таваллудининг 300 йиллигига бағишланган “Туркман замини – қадимий маданиятлар маркази” мавзусида халқаро матбуот анжумани ҳам ўтказилди.
Эслатиб ўтамиз, туркий дунёнинг маданий пойтахтини ҳар йили сайлаш тўғрисидаги қарор 2010 йилда туркий тилли давлатлар раҳбарларининг Х саммитида қабул қилинган эди.
2019 йил 30 ноябрь куни Қирғизистон Республикасининг Ўш шаҳрида ўтказилган ХХХVI навбатдаги қурултойда Турксой томонидан 2020 йилда Хива шаҳри Турк дунёси маданияти пойтахти деб расман эълон қилинди. Ўтган йиллар давомида бу шарафли мақом Астана, Эскишеҳир, Қозон, Мари, Шеки, Туркистон, Кастамон, Ош, Бурса, Шуша шаҳарларига берилган.
Buxoro.uz |
Facebook |
Instagram |
YouTube