💐БЕГОЙИМ💐

ЎЗИМНИ  ДУО  ҚИЛАЙ.
🤲🤲🤲🤲🤲

Бир кунда неча бор қўлимни очиб.
Дуо қиламан мен бутун оламни.
Юртга тинчлик сўраб, сувга барака.
Ва дуо қиламан отам, онамни.

Жигарларим, оилам, фарзандларим.
Қўшнилар, қудалар, устозлар, дўстлар.
Ҳамманинг ҳақига дуо қиламан.
Лек бир бор қўймайман ўзимни эслаб.

Бугун ўзимни ҳам бир дуо қилай.
Аллоҳим, имоним саломат қилгин.
Танимни соғ қилгин,  бағримни бутун.
Ризқимга, умримга барака бергин.

Таҳоратга ғайрат, намозга куч бер.
Шукр ва зикрлар айтсин тилларим.
Хатмоналар қилай фурсат борида.
Эҳсонлар тарқатсин  сахий қўлларим.

Ғийбатлар чиқмасин асло тилимдан.
Кўзларим кўрмасин ҳаром, харишни.
Қулоғим тингласин азон, Қуръонни.
Қўл оёғим  бажарсин  хайрли ишни.

Аллохим! Байтингни яна бир кўрай.
Чақир, Лаббайкалар айтиб бораман.
Кўзларим қувнасин Каъбангни кўриб.
Уни кўзларимга муҳрлаб оламан.

Ҳасадгўй инсонга жой йўқ ёнимда.
Мунофиқ, душманлар  бўлсин узоқда.
Доимо ҳамроҳим бўлсин яхшилар.
Суйган инсонларим бўлсин қучоқда.

Паймонам тўлганда, вақт соат етса.
Жойнамозим бўлсин ўлим тўшагим.
Қўлимда тасбеҳим, Каломуллоҳим.
Аллоҳ, шудир менинг улуғ тилагим.

Елдек келиб, селдек  олдир жонимни.
Хатто суйганимга муҳтож қилмагин.
Сарғайиб ётмайин ўлимни кутиб.
Фарзандларимга ҳам термултирмагин.
Жон чиқар чоғида куфрга кетмай.

Шаҳодатни айттир  такрор ва такрор.
Яқинларим берган сувларни ичир.
Чиройли хотима бер, Парвардигор.
Енгил тупроқ бергин ва ёруғ қабр.

Номаи аъмолим ўнг томондан бер.
Яхши амалларим ҳамроҳим бўлсин.
Жаннатга қараган дарча очиб бер.
Савол  жавобларни енгил қил Аллоҳ.

Тилларим сўзласин бийрон ва бийрон.
Қабрим тепасида ўғлим, неварам.
Менга раҳмат сўраб  ўқишсин Қуръон.
Охират чанқоғи бўлсин  бегона.
Бошимда булутлар соябон бўлсин.

Сирот кўпригидан  ўтай тез, илдам.
Жаннатнинг  ҳурлари  қўлимдан тутсин.
Райён дарвозаси  очилсин менга.
Кавсар сувларидан баҳраманд бўлай.

Азиз авлиёлар маҳалласида.
Росули Акромга ён қўшни бўлай.
Дуоларим тингла,  ижобат айла.
Ўзинг меҳрибоним, ўзинг Роҳманим.
Маҳшар куни жон ато этганингда.
Ёнимда ҳамроҳим бўлсин имоним!

http://t.me/begoyim_kanalii

ДОКА РЎМОЛ

Эски суратларни тахлаб ўтириб,
Бувижоним суратин кўриб қолдим.
Файзли, фариштали бувимга қараб
Ўтмишларга қайтдим ва ўйга толдим.

Етмиш ёшда эканлар ўша вақтда,
Бошларида оппоқ рўмоллари бор.
Қандай рўмол экан? Синчиклаб боқсам
Ўраган эканлар оқ дока рўмол.

Кўп бўлмади, яқин кунлар ичида,
Беш, олтита тўйу йиғинга бордим,
Онахонлар билан суҳбат қурдиму,
Лек дока рўмолли аёл кўрмадим.

Кўчага чиққанда бир назар солиб,
Қарайман, рўмолли аёллар кўпки,
Рўмол, шарфлари тошли, мунчоқли,
Тоши оддий эмас - "Сваровский".

Жимжимали, шокилдали, гипюрли,
Эхеее, рўмолнинг ҳам тури кўп экан,
"Валентино", "Кашка", "Шариф" борку лек
"Дока рўмол" номли бренд йўқ экан.

Оҳ дока рўмолим, дока рўмолим,
Ўзбек ойимларнинг бошини ёпган.
Оқ дока рўмолим, дока рўмолим,
Кумушбибиларнинг сочини ўпган.

Ая рўмолига бир назар солинг,
Йўқ бирор тўғноғич, хатто қисқичи,
Ҳозирги сирпанчиқ рўмолу шарфни
Қисқичсиз, илгаксиз ўраб кўрингчи.

Аяжонлар! Дока рўмоллар ўранг,
Мерос қилиб беринг келин, қизларга,
Сепига ҳам қўшинг, совға ҳам қилинг,
Мушти бор турмушда керак бизларга.

Ҳар бир оилада бўлсин шу рўмол,
Урушса рўмолни ювсину ёйсин.
Рўмол қуригунча эру хотинлар
Араздан тушсину ярашиб олсин.

Дока рўмол сабаб кўнгиллар юмшаб,
Бир бирига маҳкам боғланиб қолсин.
Қўйди - чиқдилар ҳам йўқ бўлиб кетиб,
Оилалар аҳил, мустаҳкам бўлсин!

Менинг ҳам жудаям ўрагим келди,
Дока рўмол - рўмолларнинг сараси,
Дур тикилган ялтироқ шарф эмас,
Дока рўмол олиб беринг дадаси.

Мастура Хожи Она Шеьри.

http://t.me/begoyim_kanalii