BASTION

Имтиҳон топшириш нархи 3 йилда 10 баробар ошган

Шўрпешона Ўзбекистон халқи булар учун бойишнинг бирдан-бир манбаи. Фарқи йўқ, бу фин-сомали дарслигими, скутер учун мажбурий номерми ё имтиҳон топширишми.

Ягона имтиҳон маркази битта куф-суф билан рақобатчиларидан тозаланган майдонни эгаллагач, 2022 йилдан 2025 йилгача, тўлиқ бўлмаган 3 йилда нархларни 10 карра оширган.

Бирон бир масъул идора шу пайтгача на бу конторани монополист деб топган. На маъмурий ресурслар ва ваколатларнинг суистеъмоли бўйича суриштирув ва тафтиш ўтказган.

Йирик ОАВларнинг овози ўчирилган, жамоатчилик фикри ва эътирозларига нисбатан рефлексия сўниб бўлган, ташқи дунё учун ҳам пиар ёлғонлар воситасида легитимизация ясашга зарурият қолмаган. Шунинг учун “халқни ижарага олгандек ўлпон ва тўловлар гирдобига тиқишда” давом этаверишади.

Халқ чунки улар учун талаш учун битмас-туганмас ресурс.

“Ҳимоямдаги шахс тиз чўктирилган ҳолатда эди”

Туман ИИБ бошлиғи ўринбосари гумонланувчини ҳимоячи иштирокисиз сўроқ қилган ва адвокатини ҳайдаб чиқарган

“Advokat Yakubov” адвокатлик бюроси адвокати Даврон Якубов кеча, 19 январь куни Тошкент шаҳар Янгиҳаёт тумани ИИБга ўз ҳимоясидаги шахснинг терговида иштирок этиш учун борганида туман ИИБ бошлиғининг биринчи ўринбосари уни ҳайдаб чиқарган, адвокат унинг хизмат хонасига кирганида ҳимоясидаги шахс тиз чўктирилган ҳолатда ўтирганини кўрган. Бу ҳақда Даврон Якубов ижтимоий тармоқлардаги саҳифасида видеомурожаат қолдирди.

Адвокатнинг сўзларига кўра, ҳимоясидаги шахсга нисбатан жиноят иши қўзғатилиб, иш терговга оширилганини эшитгач, Тошкент шаҳар Янгиҳаёт тумани ИИО ФМБга борган. Дастлаб уни терговчи ҳузурига йўллашган, аммо терговчи жиноят иши ҳали унга келмаганини айтиб, жиноят-қидирув бўлимига учрашишни маслаҳат берган.

“Жиноят-қидирув бўлимига бориб, бир эшикни очдим. Бу ИИБ бошлиғи биринчи ўринбосарининг хизмат хонаси экан. Қарасам, ҳимоямдаги шахс тиз чўктирилган ҳолатда, биринчи ўринбосар эса у билан қўпол муомала қилиб турибди. Буни мен ўз кўзим билан кўрдим”,

дейди адвокат.

Даврон Якубов айтишича, ордер ва гувоҳномасини кўрсатганида бошлиқ ўринбосари “ҳозир мен гаплашяпман, сиз терговда қатнашасиз”, дея уни чиқариб юбормоқчи бўлган.

“Мен ундан: “Сиз ўзингиз кимсиз? Нега гумонланувчи билан ҳимоячи иштирокисиз суҳбат қиляпсиз? Нега менинг адвокатлик фаолиятимга тўсқинлик қиляпсиз?” деб сўрадим. Гапимга қулоқ солмай, мени хонасидан ҳайдаб чиқарди. Бошқарма биноси ичида, йўлакларда камералар бор эди. Агар ўчириб ташлашмаган бўлса, ҳолат ёзиб олинган бўлиши керак”, давом этади адвокат.

Даврон Якубов ташқарига чиққач Ички ишлар вазирлигининг ишонч телефони (1002)га қўнғироқ қилиб, Янгиҳаёт тумани ИИО ФМБ бошлиғининг биринчи ўринбосари устидан шикоят қилганини билдирди (шикоят натижаси ҳозирча маълум эмас).

Адвокат мазкур ҳолатда биринчидан, шахснинг Конституцияда кафолатланган ҳимоя ҳуқуқи бузилганини, иккинчидан мансабдор шахс томонидан адвокатлик фаолиятига тўсқинлик қилинганини таъкидлайди.

“Шахснинг ҳимоя ҳуқуқига риоя қилишингиз шунчалик қийин бўлаётган экан, келинг, Конституция ва қонунларга ўзгартириш киритиб адвокатурани тугатиб қўяқолайлик”, дея аччиқ киноя қилади адвокат.

"BASTION" каналига аъзо бўлинг ва дўстларингизга улашинг!👇

@bastiongr