𝘽𝙖𝙝𝙤𝙙𝙞𝙧 𝙄𝙨𝙠𝙖𝙣𝙙𝙖𝙧𝙤𝙫 ✍🏻

18+ БЎЛАЖАК ИМПЕРАТОР!

Ассалому алайкум, аслзода ўқирманлар. Ўзимизга ўхшаган аслзодалар мавзусидан узоқлашмаган ҳолда, сиз расмда кўриб турган бўлажак император, шахзода Ҳисаҳито ҳақида озгина гаплашамиз.

Шу десангиз, неча минг йиллик тарихга эга сулоланинг вакили, бўлажак император укамиз яқинда 18 ёшга тўлди. Шунинг учун постни 18+ деб белгиладик) Кейин, Тсукуба университетига ўқишга кирди. Ҳамма қатори имтиҳон топшириб, ўз кучи билан кирди.
Кеча, 5- апрел "Билимлар куни" ( Бизда 2-сентябрда ўқиш йили бошланса, Японияда апрел ойида бошланади) фестивалига қатнашди ва ўз таасуротлари билан ўртоқлашди.

"Мен бошлаётган янги ҳаётимда бироз хавотир ва ҳаяжондаман. Аммо, ҳозирдан бошлаб тўплайдиган билим ва тажрибаларимни қадрлайман. Университетга велосипедда қатнамоқчиман!" дейди.

Иби, маши жойи сал ўтиб тушди-да, бизнинг қишлоқдаги Мардан дамасчини ўғли ўқишга қора жентрада бориб келаман деб жанжал қилаётган бир пайтда, бўлажак император велосипедда бориб келадими, эээ бўмапти))

Бундан ҳам ўтиб тушган жойини айтайми? Бўлажак императоримиз ҳашоротларга қизиқар экан. Биология соҳасини пухта ўрганиб, табиатдаги ҳашоротларларни асрашга ҳам хиссасини қўшмоқчи экан. Камига, помидорлар ва гуручларни экиш, парваришлаш, хосилдорлигини ошириш бўйича ҳам илмий ишлар қилмоқчи экан. Қойилотун, қойилун. Нимага Марданни гапираверасан дейсизларку-я, қандай қилиб гапирмаслик мумкин?

Мардон дамасчи ҳам, Ўктам пайнетчи ҳам, ҳаттоки Руслан фермерни боласи ҳам "Сельхоз"га кирмайман деб, ҳамма ўзини юридик институти-ю, Дипломатия каби сохаларга урди. Қобиляти бор йўқлиги ҳисобга олинмади. Қишлоқ хўжалигида яхши мутахассис бўлиши мумкин бола Судя бўлиб, Судларни ҳам дала қилиб юборди. Ёки, яхши Судя бўлиши мумкин бўлган бола фермер бўлиб, далани узил-кесил 9 йилга хосил бермайдиган қилиб қўйди)) Ҳозирги даврга келиб ҳамма ўзини "Инглиз тили ва АЙТИга урди".

Мени ўзимни ҳам қаранг. Мендан бир яхши чўпон чиқарди. Ким қаердаги Социология, Филология, Педагогикаларни ўрганибман. Ҳа, каллам қурсин. Булли тамом. Бўлажак императордан руҳланиб, бугундан мен ҳам Капалакларни, помидорларни ўрганаман. Лекин, борку император оиласида туғилиб, император бўлишингни билиб капалакларни ўрганиш бошқача бўлса керак-да. Бизга ўхшаб қашшоқ бўлиб, камига капалакларни ўрганаман десанг, ҳозиргиданда қашшоқлашиб кетишимиз аниқ-да) Ҳа, азизлар, адолат йўқ бу дунёда))

Баҳодир Ниппоний- Императорлар тавсия этади)

ОНА, САКУРАЛАР ГУЛЛАДИ, ТАКРОР!

Ассалому алайкум, аслзода ўқирманлар. Бир-иккита жойда қуйидаги шеър менинг номимдан улашилибди. Муаллифнинг ҳаққига хиёнат бўлиб қолмасин.

Она, сакуралар гуллабди бугун,
Сакура дегани биздаги гилос!

Бу шеърни мен ёзмаганман. Мен бунчалик чиройли ёзолмайман) Бу шеър Мақсуд Саломовга тегишли.

Мен сакурани олдида бугунгидек чиройли қилиб расмга тушиб, мана бунақа чиройли бўлмаган шиғир ёзишим мумкин) Ўқиб кўринг-да)

Она, сакуралар гуллади, такрор,
Япония пуштига бўянди, яна,
Ўғлингиз қўлидан келгани ашъор,
Ёзган шеърларига суянди, яна.

Она, сакуралар гуллади, ҳамма,
Айниқса, Японлар боғларда тўп-тўп,
Японлар жудаям самимий, аммо,
Хушомад қилади керагидан кўп!

Она, сакуралар гуллабди, қаранг,
Қалбда сир қолмади, очиқламаган,
Йигитман, кўз ёшим тутарман, аранг,
Онасин соғиниб ким йиғламаган?

Она, сакуралар гуллади, кўркам,
Боқсангиз, зерикиш билмайсиз сира,
Биздачи, келгандир кўкламой-кўклам,
Бизда ҳам гилослар гуллагандир а?

Она, сакуранинг чиройли ранги,
Қанийди меҳрингиз ўрнин босолса,
Менга қадрлироқ болаликдаги,
Сиз тандирда ёпган, иссиқ кўк сомса.

Она, сакуралар гуллади роса,
Тақдирнинг ишлари экан ажойиб,
Кеча юришни ҳам билмаган бола,
Одам бўлиб қобман бугун улғайиб.

Она, сакуралар гуллади, гўзал,
Сокинлик беради, қалбга ёқимли,
Домига тортса-да, мени кенг шахар,
Бемеҳр ўғлингиз сизни соғинди.

Эй, нафис сакура кўкка етказ бўй,
Гўзаллик улашгин олам, одамга,
Бугун бахтлилигим сендан-да, хушрўй,
Жоним омонлигин етказ онамга.

Она, сакуралар гуллади, яна...

Баҳодир ИСКАНДАРОВ

18+ ЯПОНИЯДА ЧАҚАЛОҚЛАРНИ ТАШЛАЙДИГАН ҚУТИ.

Ассалому алайкум, аслзода ўқирманлар. Узр, бугун таъбингизни бироз хира қиламан. Болачаларга "Сени лайлак ташлаб кетган деган" ажойиб иборамиз бор а? Энди тасаввур қилиб кўринг. Бегуноҳ, мурғаккина, энди тили чиқаётган фариштадек болачага "Сени лайлак эмас, ота-онанг ташлаб кетган" десак, қанчалик оғриқли. Қалбни ларзага солади...

Сиз расмда кўриб турган қути- Чақалоқлар солинадиган қути. Энг ачинарлиси, ота-онасига керак бўлмаган чақалоқларнинг қутиси. Бу қутининг вазифаси нима десангиз, кимдир фарзандли бўлди. У болани боқа олмайман, бола керакмас каби бахоналар билан боладан воз кечмоқчи, шунда ана шу САНИКУКАИ шифохонасига боради ва ана шу қутига солиб кўздан ғойиб бўлади.

У қутига ўрнатилган сенсор шифохонадагиларга хабар беради ва шифокорлар келиб болани кўздан кечиради. Кейин, болани ё болалар уйига ёки қайсидир оилага бериб юборади. Туғиб ташлаб кетган ота-она ҳеч қандай жавобгарликка тортилмайди. Ҳеч қандай ҳужжатбозликларга жалб қилинмайди. Шунчаки, ҳаммаси махфий бўлади.

Бу лойиҳага қўл урган САНИКУКАИ шифохонасининг бошлиғи, ҲИТОШИ КАТО "Бу болаларнинг ҳаётини сақлаб қолиш учун ОХИРГИ ИМКОНИЯТ бўлиши мумкин. Ҳозир, жуда кўпчилик болани туғиб, уни боқа олмаслиги, ортиқча бошоғриқ бўлиши, карерасига халақит беришини рўкач қилиб, чақалоқларни ахлатга ташлаш, сувга ташлаш, болаларга зуғум ўтказиш кабилар билан жиноятга қўл ураябди. Ўшалар учун бу қутини ташкил қилдик. Бола керакмасми, марҳамат бизнинг қутига ташлаб кетинг. Зеро, бу лойиҳа жуда кўплаб болаларнинг ҳаётини сақлаб қолади деган умиддамиз" дейди.

Умуман олганда, бу "Болалар қутиси" Японияда биринчи эмас, 2007 йилда Кумамото вилоятида ҳам Жикеи шифохонасида ташкил этилган ва ҳозиргача 179 тадан ошиқ бола ташлаб кетилган.

Токёдаги САНИКУКАИ шифохонаси, "Болалар қутиси билан бирга "Ишончли туғруқ" деган лойиҳани ҳам йўлга қўйди. Бунда она ҳеч қандай маълумотларни шифохонага бермайди. Шифохона политсияцга ҳам, маҳаллага ҳам, қизнинг яқинларига ҳам хабар бермайди. Туғилади ва бола ўша қутига ташланади.

Шунақа гаплар, азизлар. Бундай воқеаларга гувоҳ бўлиб, Япон жамиятидаги аҳоли инқирозининг сабаби тушунгандек бўласан киши. Японлар унақа эмас эдилар. Ҳақиқий Японлар оилани, фарзандни, ўз миллатини биринчи ўринга қўядиган миллат эдилар. Ҳозир ҳам ўзлигини йўқотмаган, оилани, қадриятларини сақлаб қолган Японлар бор. Аммо, бир Япон ўқитувчимизнинг таъбири билан айтганда: Ўхшамаган Американизм жамиятнинг емиришилига сабаб бўлган!
"Бизда ҳам фалон бўлди, бизда ҳам фустон бўлди" дейдиганлар бўлса, "Тўйдан олдин туғиб қўйиш, юриб қўйиш, туғилган болани ташлаб қочиш, аборт қилдириш" каби масалаларда биз-ку, биз. Бутун Марказий Осиё бирлашиб ҳам ета олмаймиз. Қўшни маҳалладаги пистачи хотинлардан эшитган гапингиз билан хулоса қилмасликни тавсия этаман.

Ҳар доимги гап: Ривожлансак ривожланайлик, фақат қадриятларимиз, динимиз, миллийлигимиз билан биргаликда! Бу дунёда ҳеч бир болани "Лайлак" ташласа ташласин-у, ота-онаси ташлаб кетмасин, Илоҳим!

Баҳодир ИСКАНДАРОВ!

ВОЙДООД, ЯПОНИЯНИНГ ҚУЛУПНАЙИГА ҚАРАНГ)

Ассалому алайкум, Японшунос , аслзода ўқирманлар. Яхшимисизлар? Чаччамай? Японшунос дейишимга сабаб, мана бир неча йилдирки, сиз билан бирга Япон жамиятининг миридан-сиригача ўрганиб келаябмиз.

"Войдооод Германиянинг қулупнайига қаранг, бизда бўлганда бизникилар расво қилиб ташлашарди", "Вой-вой-вой ҳозир ўлиб қоламан. Япониядаги мана бу бинони зўрлиги қаранг", "Мана, Америкалик эрим Марк билан Шарк егани кетвомиз. Ўзбеклар қолоқ" деган руҳдаги гапларни гапирадиган монолит, қулупнайчи блоггерлардан фарқли равишда, жамиятнинг ютуқ ва камчиликларини ўрганаябмиз. Монолит фикрлаш дегани- бир хил фикрлаш дегани. Зўр бўлса ҳаммаси зўр. Ёмон бўлса ҳаммаси ёмон деганга ўхшаш. Қисқача қилиб айтганда, бизнинг қишлоқдаги фақат ўзиникини маъқуллайдиган Мардонбойнинг диктатор қайнонаси)
Мени қадримга етинг, дўстлар) эртага асфалт кўчалардан ҳам излаб тополмай қолманг. Баҳодир Ниппоний қайдасан деб))

Хуллас, бугун сизлар билан Японларнинг эгилишини ўрганамиз. Японларнинг саломлашиши деганда кўпчилик "Японлар калласини миндей-миндей қилиб қўяди, бўлди" деб ўйлашади. Йўқ, ана шу миндей-миндейнинг ҳам қонун-қоидалари, даражалари бор. Японлар оддий эгилишни ҳам фан даражасига чиқариб, боғча-мактабдан ўргатишади. Қайси пайтда неччи градусгача эгилишдан тортиб, эгилганда неччи сония эгилиб туришгача ўргатишади. Буни Японча тартиб-интизом деса бўлади.

Хуллас, сиз расмда кўриб турган ўнг тарафдаги биринчи туриш-одамга ўхшаб туриш дейилади.
Иккинчи туриш эса- "ЭШАКУ" дейилади. Яъни 15 градусгача эгилиш керак дегани. Бу 15 градусгача эгилиш- Ҳамкасблар, дўстлар, таниш-билишлар ўртасидаги саломлашиш деса ҳам бўлади.

Учинчи, 30 градусга эгилиш эса, "КЕИРЕИ" дейилади. Бу шунчаки саломлашиш эмас, саломни ичига озгина хурмат-иззатдан ҳам қўшиш дегани. Биздаги қўлни кўксига қўйиб мулозамат қиламиз-ку, шунақа. Буни одатда бизнесс учрашувларда, расмий учрашувларда қўллашади.

Ана энди, охирги расмдаги 45 градусга эгилиш энг эгилишлардан. Бу эгилиш 45 градусдан бошланиб 90 градусгача бўлиши мумкин. Бу эгилишни ўтаааа хурмат қилиб юборганда, хурматни ичига 1-2 тонна пахта ҳам қўшиб юборганда ва чин қалб-у, юрак-у, бутун вужуд билан кечирим сўралганда ишлатилади.

Шунақа гаплар, азизлар. Мен Японияда бўлсамда, бунақа эгилишларни ҳеч қайсини қилмайман. Бошимни сал қимирлатиб саломлашаман) Постимиз шу жойда тугади.
Лайк босинг, коммент ёзинг, дўстларингизга улашинг дейдиганларни эшитсам, "Берганинг тешик кулча, сўраганинг эрталабгача" деган мақол эсимга келаверади-да) Шундай экан, мен сизлардан ҳеч нарса сўрамайман. Саломат бўлсангиз бўлди.

"Қулупнай"чиларга қарши курашиш агентлиги раиси, Баҳодир Ниппоний)

ЯПОНИЯДА 9 БАЛЛИК ЗИЛЗИЛА!

Ассалому алайкум, аслзода, самимий ўқирманлар.
Шу десангиз, охирги икки-уч кун "ЯПОНИЯДА 9 БАЛЛИК зилзила бўларкан, Японияни ер ютиб кетаркан" деган хабар Ўзбек интернет сегментида шу даражада тарқадики, асти қўяверасиз. Шахсан менга 100 дан ошиқ "Хавотир хатлари" келди. Хавотир олганлар чин қалбимдан раҳмат, сизларга.

Энди, шу хабарни тарқатаётган телеграм каналларга мурожаатим: "Унақа қўрқитавермангларе битта қора жентра оволай, ҳеч бўлмаса")) Ҳазилдан ташқари, ўша тарқаётган хабарлар ҳақида, Япония ҳақида гапирадиган бўлсам: "Японияда шунақа катта зилзила бўлар экан" деган гап бундан 100 йил олдин ҳам бор эди. 200 йил олдин ҳам бор эди, бундан кейин ҳам бўлади. "Дахшатли зилзила бўлармиш" деган гап биздаги "Фалон ҳудудларда қор кўчиш хавфи бор" деганга ўхшаган гап. Японлар пинагини ҳам бузишгани йўқ.

У мутахассислар бу гапларини биринчи марта айтаётгани ҳам йўқ. Ҳар доим айтишади. У зилзила ҳолва, шу асрда "Фужи тоғидан вулқон отилиб, бутун атроф-муҳит оловнинг ичида қолиб кетади" деган гап ҳам бор. Уни ҳам тез-тез айтиб туришади. Худди бизда "Қачондир қиёмат бўлади!" деганимиздек, Японларда ҳам "Қачондир қиёматли зилзилалар бўлади!" деган гап бор.

Энг қизиғи, на Япон олимлари, на бошқа олимлар қачон ва қаерда зилзила бўлишини олдиндан айтиб бера оладиган илмий ишларни қила олишгани йўқ. Ҳаммаси тахмин! Буни фақат АЛЛОҲ БИЛАДИ!

Япониядаги мутахассисларнинг асосий мақсади: Халқни тонусда ушлаб туриш, ҳар доим огоҳликка чақириш, табиий офатларга олдиндан тайёргарликка ўргатиш!

Шундай экан, хурматли телеграм каналлар, сизлар Япония ҳақида тўлиқ маълумотга эга бўлмасдан туриб "Войдооооддд" деб хабар тарқатмасаларингиз яхши бўларди. Онониб кетай сизлардан, сизлар бу ишингиз билан бизнинг қишлоқдаги Мардон ичиқорага ўхшаган одамларни оловига ёғ пуркаябсиз. Бу хабарни ўқиган Мардон кўмирқалб "Тўхта, фалончи ўғлим Японияда деб мақтаниб юрганди. Камига янги жентра ҳам олибди. Шу хабарни жўнатиб бир хуморимдан чиқай" деб фарзанди Япониядаги отага жўнатади. Камига, Мардон кўмирқалбнинг хотини ҳам "Фалончихон ўғлини Японияга жўнатиб, бўйнига қалин тилла тросс тақиб олибди. Мени бўйнимда кўзмунчоқдан бошқаси йўқ. Тўхта, бир боплай анави фалончихонни" деб онага жўнатади.
Ота-она уёқда эрталабгача ухламай, хавотир олиб касал ҳам бўлиб қолади. Шу керакми сизларга. Асоссиз гапни ваҳима билан тарқатиб гуноҳга ботманг, дейман-да.

Хурматли, фарзандини Японияга жўнатган ота-оналар Японияда ҳаммаси жойида. Вопшим хавотирга ўрин йўқ. Бемалол, ухлайверинг. Фарзандингизни ҳаққига дуо қилиб турсангиз бас. Насиб этса, кўзлаган мақсадларга эришиб, соғ-саломат қайтамиз, ҳаммамиз!

Биринчи бизда бир-икки ҳафтадан кейин бошқаларда) Баҳодир Ниппоний- Сейсмологлар тавсия этади)

Баҳодир ИСКАНДАРОВ✅

🌐Telegram🌐Facebook
🌐Instagram🌐You tube

СИЧҚОН СОЛИНГАН ШЎРВА!

Ассалому алайкум, палаги тоза, аслзода ўқирманлар. Авваламбор иштаҳани бузадиган мавзу учун кечириб қўясиз))

Шу десангиз, Японияда тармоқли бизнеслар жуда зўр йўлга қўйилганда. Битта нимадир ошхона бўлса, Япониянинг у бошидан тортиб бу бошигача бор. Масалан, "Мардонбой шилпилдоқлари" деган ошхона очилса, Қорақалпоғистонга борсангиз ҳам, Сурхондарёга борсангиз ҳам, Водийга борсангиз ҳам бор. Кичкинагина бизнес бошлаган одам филлиалларни кўпайтириб ташлайди. Бунинг эвазига миллионлаб одамлар ишли, миллионлаб харидорлар маҳсулотли, давлат солиқлардан пулли бўлиб қолади. Натижада ҳамма томон ютади.

Хуллас, Японияда, сиз расмда кўриб турган ана шундай тармоқли ошхоналарнинг энг машхурларидан биттаси- СУКИЯ. Бу СУКИЯ гуручнинг устига гўшт солинган овқати билан машхур. Овқатлари ҳаммабоп ва арзон. Нон чой, салати ичида дегандек гуруч, шўрва, сув ва ҳашиси( 🥢) ичида. Бутун Япония бўйлаб 2000 дан ошиқ филлиали бор. Худди биздаги ДОРИХОНА брендига ўхшаб, Ҳар бир бурчакда кўзингиз тушади.

Энди, шу машхур СУКИЯ ошхонасида ўтган ҳафта ажиб бир воқеа бўлди. Бутун ОАВ, Журналистлар СУКИЯНИ пўстагини чиқариб, момосини мойкалтаги билан савалагандек велдириб юборишди. Сабаб: Бир хўранда иштаҳа билан овқатлангани киради. Овқат буюртма қилади. Овқатнинг ёнида пиёладек идишда шўрвача ҳам келтиришади. Бояги хўранда не кўз билан кўрсинки шўрванинг ичида каттааааа, хунуккккк сичқон ўлиб ётибди-ку. Бояги хўранда "Вляқ" дейди-да, тегишли жойларга арз қилади. Бу гап ва сичқон солинган шўрванинг расми бутун Япония бўйлаб тарқалади.

Бу воқеадан кейин, СУКИЯ компанияси "Биз миллардер компаниямиз битта ялангоёқни бир деганда йўқ қилиб юборамиз. Одамларга рақибларимиз бизни компанияни синдириш учун ўйлаб чиқарди деймизу қутуламиз. Тегишли ташкилотларга 4-5 сум отсак, ёпиқлик қозон ёпиқлигича қолади" деган стратегия билан ҳаракат қилишмади. Шартта, "Ишчи кучи етишмаслиги учун назоратни қила олмадик. Бу бизнинг айбимиз. Барча харидорлардан узр сўраймиз. 1 апрелдан 4 апрелгача 2000 га яқин барча филиалларимизни ёпиб, тизимда тубдан ўзгариш қиламиз. Барча ошхоналарни тозалаймиз. Бизни кечиринг" деб узр сўраб чиқишди. Ана сизга сичқон шўрва-ю, мана сизга харидорнинг хурмати!

Шунақа гаплар, азизлар. Ишонаверинг, Япония ҳақидаги теша тегмаган мавзулар фақат бизда. Баҳодир Ниппоний яхши кунларда сиз билан бирга. Дорихоналардан сўранг)

🌐Telegram🌐Facebook
🌐Instagram🌐You tube

18+ ЯПОН АЁЛЛАРИДАН СЎРОВНОМА!

Ассалому алайкум, палаги тоза, аслзода туғарманлар. Саломатмисиз?
Туғарманлар деб гапни бошлашимдан кўпчилигингиз сезиб улгурдингизки, бугун 18+ гаплардан гаплашамиз) Жа унақа, 18+ вачач гаплар эмас-у, шунга яқинроқ.

Шу десангиз, ўтган ҳафта "日本大学" Япон университети дахшатли тадқиқот натижаларини эълон қилди. Университет тадқиқотчилари 15 ёшдан 39 ёшгача бўлган аёллардан "Фарзандли бўлишни хоҳлайсизми?" мавсузида 4000 дан ошиқ, турли соҳалардаги аёллардан сўровнома ўтказишибди. Сўровнома натижаларига кўра 52% аёл "Бола туғишни хоҳламайман. Бир ўзим яшаб ўтишни хоҳлайман" мазмунида жавоб беришибди. 52% узил-кесил "Қўлингдан келганини қил. Туғмайман" деб жавоб берган бўлса, "Бола туғсам, иш ва шахсий ҳаётдаги балансни эплай олмайман" деб "Катта эҳтимол билан туғмасам керагов" қабилида жавоб берган аёллар 26% ни ташкил этган.

Ана энди, бисотимизда 22% гина фарзанд кўришни хоҳлайдиган хотин-қизлар қолишди. Улар ҳам "Агар, тутуруқли моддий томондан таъминлай оладиган эр бўлса" деган жойини қистириб кетишган. 4000 га яқин хотин-қизлар фарзанд кўришни хоҳлашмаётганига асосий сабабни : "Фарзанд катта қилишдаги харажатларни қоплай олмаслиги", "Ишдаги карьерасини давом эттира олмаслиги" ва "Эркин, бемалол яшашга бола халақит қилиши" деб кўрсатишган.

Мен эринмасдан у тадқиқотга нисбатан Японларнинг фикрларини, изоҳларини ҳам ўрганиб чиқдим. "Кўпчилик ҳукуматнинг ижтимоий қўллови камлиги, одамларнинг худбин бўлиб кетаётганлиги, олдинги Японлардек оилага муносабаатнинг йўқолиб кетаётганлиги ва аёлларнинг жамиятдаги кучини керагидан ошириб юборганлиги" тўғрисида гапиришибди.

Шунақа гаплар, азизлар. Мардонавор Япон халқининг бошқа соҳалардаги ютуқлари қанчалик ҳавас қиларли бўлса, оила институтидаги муаммолари шунчалик ачинарли. (Сиз кўриб турган расмда, болаларсиз ҳувиллаб қолган Япониянинг чекка ҳудудидаги мактабда, болаларнинг ўрнига қўғирчоқ ясаб, дарсхонани безатишгани акс этган)

Биз булардан хулоса чиқаришимиз керак. Қадриятларимизни, оила институмизни сақлаб қолишимиз керак. "Қачон уйланасан?", "Қачон туғасан?" фалон-қил, фустон қил деб ётоқхонагача аралашадиганларимизни қоралаган ҳолда, жамиятимиздаги мавжуд "Оила қуришга тарғиб" жуда муҳимлигини эслатиб ўтишимга ижозат бергайсиз. Ўша гап бизнинг жамиятни туғарманлигимиз қутқаради) Постни ўқишингиз биланоқ, ёқтирмани босинг-да, навбатдасига ҳаракатни бошланг. Ишондим а?)

Айтмоқчи, "Тўй қачон?"

Баҳодир ИСКАНДАРОВ✅

🌐Telegram🌐Facebook
🌐Instagram🌐You tube

БИР ҚИЗ: СИЗНИ СИЗНИ ИСТАДИМ ДЕЙДИ!

Ассалому алайкум, аслзода, ўқирманлар. Саломатмисиз?
Ўтган сафар қўйган постимда сиз расмда кўриб турган Японни кўпчилик ғолиб деб топибди. "Тепакал" дейишибди) Энди сизларга бу расмни ички оламини тушунтириб кетай: Сиз расмда кўиб турган одам шунчаки тепакал эмас, бу одам соч турмагини ФУЖИ тоғига ўхшатишга ҳаракат қилган. Яхшилаб қаранг-да, ўхшашликни топасиз. Фужи тоғи Японлар учун шу даражада ижтимоий таъсирга эгаки, ҳаттоки соч турмагини ҳам Фужига ўхшатишга ҳаракат қилишаябди. Албатта, ҳамма Япон унақа эмас, бу расмдаги Япон, битта-иккита учраб турадиган "Оға қақир-қақирқаларидан")

Хуллас, ўша мақоламнинг изоҳлар қисмида бир қиз: "Дахшат-ку. Қаердан истаб топасиз бунақа қизиқ мавзуларни?" деб изоҳ ёзибди. У қизнинг изоҳи менга бир воқеани эслатиб юборди. Шуни сизларга ҳам улашмоқ истаяжак, бу суюқ кангул)

Шу десангиз, бундан анча йиллар олдин, ўзимиздаги бир телевиденияда журналистча бўлиб фаолият юритганман. Самарқанддаги Мароқанд тепаликларида бир кўрсатув тайёрлаябмиз. Биз билан бирга ишлайдиган Андижонлик бир қиз ҳам бор эди. Жуда одобли, яхши қиз эди. Бировга ортиқча гапирмас эди. Ўша қиз сёмка бўлаётган жойга жахл билан югуриб келди-да, 15 га яқин одамнинг ичида операторга қараб: " Кечадан бери ИСТАЙМАН сизни. Телефонга ҳам жавоб бермайсиз. Мен сизни қачонгача истаб юраман" деди-ку.

Бечора операторнинг тили каловланиб, аввал кўкаришни бошлади. Кейин тандирдан узилган нондек қизаришни бошлади. Кўпчиликнинг ичида уялиб кетди. Негаки, "ИСТАМОҚ" сўзининг "ИЗЛАМОҚ" эканлигини фақатгина водийликлар ва водийликлар билан алоқа қилганларгина тушунса керак. Водийдан бошқа жойларда ИСТАМОҚ ХОҲЛАМОҚ билан бир хил маънони билдиради-ку. Шунга бояги оператор "Менга бир қиз сизни кечадан бери истаябман деди" деб томи кетиб қолган.

Шунда ҳижолатли вазиятдан чиқиб кетиш учун, операторга қарадим-да: " Ака, ёшингизга қаранг. Туришингизга қаранг. Бу туришингиз билан ёш қизлар уёқда турсин, янгам ҳам ИСТАМАЙ қўйгандир сизни" дедим. Ҳамма кулди. Кейин, Анжанча ИСТАМОҚ дегани ИЗЛАМОҚ, ҚИДИРМОҚ дегани деб тушунтириб қўйгандим. Шу билан ҳамма ўз ишини давом эттирган эди.

Шунақа гаплар, азизлар. Юртимизнинг ҳамма гўшасини бир-биридан ажойиб шевалари бор. Эшитиб мазза қилиб юборасиз! Шева- миллатнинг руҳи, она тилимизнинг таянчи ҳисобланади. Ҳар бир шевамизни қадрлаб, ўрганиб қўйишимиз шарт. Фақат бошқа ҳудуддаги одамлар билан гаплашганда фақатгина ўзингизнинг ҳудудингиз ишлатадиган сўзлардан ҳам қочинг-да, онониб кетай сизлардан)

Хурмат билан, сизларни ҳамиша истаб қолувчи- Баҳодир Ниппоний)

ЯПОНЛАРНИНГ 80% ДАН ОШИҒИ ПАССПОРТ ОЛМАГАН!

Ассалому алайкум, аслзода ўқирманлар. Саломатмисиз?Хабарингиз бор Япониянинг пасспорти дунёдаги энг кучли пасспортлардан. Бутун ер куррасининг 190 дан ошиқ давлатига визасиз борса бўлади.
Аммо, шу жойида сизга бир пучина-пучун маълумотни айтиб кетай-да. Бутун Япон ахолисининг 17 фоизида пасспорт бор, холос! Қолган 83 фоизи пасспорт-масспорт олмаган. Ота-бобоси ҳам олмаган, ўзи ҳам олмайди)) Зўр а? Сизда дунёнинг энг кучли пасспортини олиш имконияти бору, олмайсиз.

Келинг, Японларнинг нега пасспорт олмаслигининг 4 та асосий сабаблари ҳақида гаплашамиз. Биринчи сабаби- Японларга пасспорт фақатгина четга чиқиш учун керак. Табиийки, четга чиққиси келмаган одамга пасспорт ҳам керакмас. Иккинчи катта сабаби: "Шахш-шахш-тақш" дермиди, шу сўзга ҳеч тилим келишмайди-да) Хуллас, Шахсни тасдиқловчи ҳужжат вазифасини "Ҳайдовчилик гувоҳномаси" ёки "Суғурта картаси" бажаради.

Учинчи катта сабаби эса- Японлар иккинчи жахон урушидан кейин ўз шахсий маълумотларини ўз ҳукуматига беришни хоҳлашмайди. Яъни ҳукумат мен ҳақимдаги ҳамма маълумотни билиши шарт эмас деган ишончсизлик борлиги.

Тўртинчи сабаби эса, бизнинг қишлоқдаги ўзининг қачон туғилганини қовун пишиғи билан ҳисоблайдиган, фарзанди туғилганини картошкани қурт еб кетган йил билан ҳисоблайдиган, метркаси ҳам йўқ Мардон лоқайдга ўхшаган, лоқайд Японлар ҳам пасспорт олишмаган экан)

Шунақа гаплар, азизлар. Япония ҳукумати суғуртани ҳам, правани ҳам, ID картани ҳам ҳаммасини битта картага йиғишга ҳаракат қилишаябди. Миндей ўйлаб қарасангиз жуда ҳам қулай нарса. Жуда кўп ишларни битта картада ҳал қила оласиз, ажойиб тизим. Аммо, кўпчилик аҳоли шуни ҳам хоҳлашмаябди экан. Хуллас, Японларда шахсни тасдиқловчи энг муҳим ва энг оммабоп ҳужжат бу сиз расмда кўриб турган - ҲАЙДОВЧИЛИК ГУВОҲНОМАСИ.

Ана энди, расмларни бирма бир ўтказиб қаранг-да. Ўз ҳаётидаги ягона ва энг муҳим ҳужжатга тушган расмларини қаранг) Ҳеч ким соқолингиз ўсиб қолибдими, рўмолингиз тўсиб қолибдими, костюм-шим кийинг демаябди. Чунки, замонавий дунёда ҳар қандай одамни кўз ва бармоқ изидан топиш мумкинлигини яхши билишади-да, Японлар!

Ҳа, майли барчаларингизга яхши кайфият тилайман. Мана шу расмдаги "Оға қақир қақирқалар"дан қайси бирининг расмига "Одамларга нима бўлаябди вей?" деган номинацияни берган бўлар эдингиз?

Баҳодир ИСКАНДАРОВ✅

🌐Telegram🌐Facebook
🌐Instagram🌐You tube

ЯПОНИЯ ҲАҚИДАГИ ТОП 4 ЁЛҒОН!

Ассалому алайкум, аслзода ўқирманлар. Саломатмисиз? Майлими, бугун Япония ҳақидаги тасаввурларингизга озгина тегажоғлик қилсак) Постларим остида, изоҳлар қисмида "Эшитдингизми Мардонтепа қишлоғига учар ликопча қўнибди" га ўхшаган, Япония ҳақидаги уйдирмаларни ёзиб қолишади. Келинг, бугун мен ЯПОНИЯ ҳақида ўзим эшитган энг машхур 4 та ёлғонни фош этамиз. Хит парадга ўхшатиб, 4- ўриндан 1- ўрингача айтиб ўтамиз. Демак, Хит парадимизнинг тўртинчи ўринида ОЙПОПУК ЭШОНХОНОВАНИНГ "Тошканни кўчаси тор деб йиғлайми?" қўшиғи деб қолишарди-ку. Ҳаққаттанаме, шунақа қўшиқларни ҳам эшиттиришган а бизга? Эсмералда-ю, Гвадалупени кўрсатишгани етмагандек, "Акажоним акам, ўзингиз бўлас" деб Ойпопук опанинг қўшиқларини эшитибмиз. Шу кунларни ҳам кўрибмизее))

Ҳа, майли ўзимизнинг хит парадга қайтайлик. Хуллас, тўртинчи ўринда "ЯПОНЛАР ЎҚИТУВЧИНИ МЕТРОДА КЎРИБ ҚОЛИШСА, ДАРҲОЛ ЖОЙ БЕРАРМИШ". Бу гап уйдирма. Ўқитувчи-ку, ўқитувчи ўтиб кетган бобоси тирилиб келса ҳам жой бермайдиганлари кўп. Бунинг устига метронинг ичида ким ўқитувчи, ким тракторчи билиб бўлмайди.

Хит парадимизнинг учинчи ўринида эса, "ЯПОН КОМПАНИЯЛАРИДА УХЛАБ ҚОЛСАНГИЗ, ҚАТТИҚ ИШЛАЁТГАН ИШЧИ ДЕБ ХУРМАТ ҚИЛИШАРМИШ" бу ҳам уйдирма. Япон компанияларида ухлаш-ку, ухлаш қулоғингизни қимирлатишга ҳам қўйишмайди. Японлар (Гун) Армия тизимини компанияларида ўрнатишган. Хориж билан қўшма корхоналарида эркинлик бор. Аммо, улар ҳам сизни "Онониб кетай, ухлаб олинг" деб ухлатиб қўйишмайди. Тушликда 1 соат танаффус беришади. Ўша пайтда, ухлайсизми, бошқа қиласизми ўзингиз билас, юрагимда дардим фақат сиз билас)

Хит парадимизнинг иккинчи ўринида эса энг машхур ёлғонлардан бири - "ЯПОНИЯДА ОЙИГА 5 МИНГ ДОЛЛАР ТОПСА БЎЛАРКАН" Бу гап ёлғон эмас, қуп-қуруқ тухмат. Ҳаттоки, Японларнинг ўзи ҳам шунча пулни орзу қилишади. Аниқ факт: Японларнинг жуда кўпчилик қисми у ойликдан бу ойликкача яшашади. Аксарият қисмининг ойлиги 2 минг доллар атрофида. Бу 2 минг доллар ҳам яшашнинг ўзига кетиб қолади.

Ана энди азизлар диққат қилинг. Экранни қаршисига яхшилаб ўтириб олинг. Хит парадимизнинг 1-ўрини ва ёлғонларнинг мутлақ ғолиби: "ЯПОН КОМПАНИЯЛАРИГА КИРИШДАН ОЛДИН, СИЗ ҚЎШИМЧА ВИТАМИНЛАР, ДОРИЛАР ИЧАСИЗМИ? деб сўрашар эмиш. Ўша қўшимча витаминларни ичмасангиз ишга олишмас эмиш" дахшат а? Исириқ тутатиб турасизми? десангиз-у, "Ҳа" деса, "Қизим, ўшаники" деб қолсангиз)) Бу гапни ўша "ИСИРИҚ" сотадиганлар ўйлаб топгани аниқ. Аммо, ёлғонлиги унданам аниқ-да. Чунки, ўзим бир кунда 10 та ортиқ Японлар билан интервью қилганман бирортасидан "Қўшимча биологик витаминлар ичасизми?" деб сўрамабманее)

Хуллас, шунақа гаплар, азизлар. Ҳа, Японлардан анча-бунча нарсани ўрганишимиз керак. Аммо, бу даражада уйдирмаларга ҳам ишонмаслигимиз керак-да. Бизда чет-эл деганда "У ерлар Сусамбил" деган фикр пайдо бўлиб қолган. Аслида унақа эмас! Келиб, кўзингиз билан кўрсангиз амин бўласиз. Барчаларингизни Токио қишлоғида кутиб қоламан) Токиони кўчаси тор деб йиғлайми))

Баҳодир ИСКАНДАРОВ✅

🌐Telegram🌐Facebook
🌐Instagram🌐You tube

ИШХОНАДА ШАРМАНДА БЎЛДИМ🤦

Ассалому алайкум, палаги тоза, самимий, аслзода ўқирманлар. Саломатмисиз? Интернет, дунё кирликларга тўлиб кетиб, кайфиятни ҳам велдириб юбораябди а? Кўнгилни чўктирманг. Келинг, яхшиси бир дилдан гаплашамиз.

Рўзаман деб бутун атрофидагиларга халақит берадиган, ишни ҳам пачағини чиқарадиганлар бўлади-ку, ўшалардан биттаси менман-да)
"Нега ундай деябсан?" десангиз, ҳозир тушунтириб бераман. Анча йиллар олдин, айни Рамазон ойи эди. Кечаси кеч ухлашга ётиб, соатга қарасам сахарликка яқинлашиб қолибди. Бирдан сахарлик қилиб ухлайман дедим-да, сахарликкача ухламадим. Сахарликни қилиб, овқатларни еб, "малинивий компотларни" ичиб, соатга қарасам эрталабки 5 га яқинлашиб қолибди. Эрталаб 8:00 да ишга кетишим керак, энди ухладим нима, ухламадим нима деб ухламай шу туриш ишга кетиб юбордим.

Ишга бориб олганман компютерга қарасам, компютер менга қараб алла айтаётгандек уйқум келади-да. Амаллаб, 12:00 гача етиб олдим. 12:00 да ҳамма тушликка чиқиб кетди. Мен танаффус хонасидаги юмшоқ кроватга бориб 1 соатгина ухлаб олай деб уқучани бердим. Шу пайт денг, бир пучина-пучун Япон қиз ёнимга келиб:

"Баҳодир ака, сизга анчадан бери бир гапни айтаман деб айта олмай юрган эдим. Мен сизни яхши кўраман. Сизга турмушга чиқмоқчиман" дейди. Мен ҳам дарҳол: "Ие, ўйлаб гапираябсизми? Мен уйланганман. Фарзандларим бор. Буни устига, сиз бошқа диндансиз. Бошқа бунақа гапирманг, менга" дедим.

У пучина-пучун қиз : "Майли, уйланган бўлсангиз ҳам. Иккинчи бўлишга розиман. Сизни динингизни ҳам қабул қиламан. Токиодаги уйим, машинам, дадамнинг бизнесларини ҳам сизга ўтказиб бераман. Фақат менга уйлансангиз бўлди" деса бўладими?

Бермасанг берма, йигитнинг кўкрагидан итарма! (Меҳрни айтаябман) деганларидек, у қошиқчадек қизга ётиғи билан тушунтираман деб турган эдим. Бир нарса тақ этди-ку. Чўчиб уйғониб кетдим) Тушим экан))

Ҳазилдан ташқари, соат 12:00 да бир соатгина ухлайман деб, қотиб ухлаб қолибман-да. Уйғониб соатга қарасам 18:00 бўлиб кетибди-да. Иш тугайдиган вақт. Нима қилишимни билмай югуриб офисга кирдим. "Узр, ухлаб қолибман" дедим. Ҳамма ҳамкасблар кулиб юборди. Мен минг ҳижолатдаман. Кейин, билишимча бир шеригимиз мени уйғотмоқчи бўлса, бошлиғимиз: "Қўявер Данжики ( Рўза) тутаябди. Ухлайверсин!" деган экан. Японларнинг бу хислатига қойил қолиб, худди қойиллатиб ишлагандек ҳамма билан бирга ишдан қайтган эдим.

Шунақа гаплар, азизлар. Гапимиз сўнгида, сизларга бир яхши усул ўргатиб кетай : Ким биландир бахслашиб қолдингиз, ёки овсин-повсин билан урушиб қолдингиз. Ҳамма гапни айтиб бўлдингиз-у, гап тугаб қолди. Шундай пайтда: "Сиз ва сизнинг паст оилангиз, Баҳодир Ниппонийнинг постларини ўқиганмисиз? Ўқимагансиз. Ҳар кимга эмас, унинг постларини ўқиш" деб кўринг-да, тили каловланиб, бирдан ўчади)

Барчаларингизга яхши кайфият тилайман. Рамазонни яхши ўтказиб олишингизга тилакдошман!

Баҳодир ИСКАНДАРОВ✅

🌐Telegram🌐Facebook
🌐Instagram🌐You tube

ЯПОНЛАРНИНГ УЗОҚ ЯШАШ СИРИНИ ТОПДИМ!

Ассалому алайкум, аслзода ўқирманлар. Шу десангиз, Японларнинг узоқ яшаши мени ҳар доим таажубга солади. Биздаги 50 ёш одам билан Японлардаги 70 ёш одам ҳатти-ҳаракатлари, ташқи кўриниши бир хилдек туюлаверади. Аёлларнинг ҳам эркакларнинг ёш кўринишига қойил қолмасдан илож йўқ. Бирорта "пучина-пучун" Япон қизга гап отишга ҳам қўрқасиз) Миндей пасспортини очиб қарасангиз, 58 га кирган аёл 25 ёшли қизга ўхшаб кўриниб тураверади-да)

Бунинг сабабларини ўрганишга кўп ҳаракат қилиб кўрганман. Об-ҳавоси, маиший муаммоларнинг камлиги, тиббиёт илғорлиги ва шунга ўхшаган кўп гапларни гаплашганмиз. Аммо, мен бугун сизларга топиб келганим- ЯПОНЧА ШИЛДИР ШЎРВА. Бир нечта докторнинг ва кўплаб Японларнинг айтишига қараганда, ана шу шилдир шўрвалар Японларнинг узоқ умр кўришининг асосий сабабларидан экан. Япон шифокорларининг айтишича, овқат билан ичиладиган шўрва- ичак, ошқозонга фойдали бўлиб, кўп касалликларни олди олинармуш)

Келинг, ана шу шилдир шўрвалар ҳақида сизга айтиб берай. Японлар эрталаб ҳам, тушликда ҳам, кечки овқатда ҳам шўрва ичишади. Шўрва ичганда ҳам биздаги шўрваларга ўхшаб ичи тўла гўшт-у, картошка-ю, сабзавотлар солинган, КАТТА КОСАГА СОЛИНГАН уни ҳам патирлар билан патирлатиб еб, нафас олишга қийналиб шу туриш ухлаб юборадиган шўрва эмас))

Кичкинагина, биздаги пиёладек келадиган идишга солинган шўрвача. Бу шўрвачаларнинг тури жуда ҳам кўп. Энг машхури- МИСО ШИРУ ( Денгиз ўтларидан солиб қайнатилган шўрва). Ичида 5-6 та денгиз ўти ва суюқ шўрвадан бошқа ҳеч нарса йўқ. Расмга қаранг-да, чап ва ўнг қулоғимнинг ёнида турган шилдир шўрва- "Мисо" дейилади. Эрталаб, туш, кечки овқатда шу шўрвадан бир пиёла ичиб бошқа овқатларни ейишади.

"Уларда денгиз бор экан, биз қаердан топамиз?" дейишга шошилманг. Японларнинг шўрвалари фақат денгиз ўтининг шўрваси эмас. Карам шўрва, сабзавот шўрва, қўзиқорин шўрва, маккажўхори шўрва ва шунга ўхшаган минглаган шўрвалар. Менга энг ёққани- Маккажўхори шўрва. Расмда ўнг қўлим томонда турибди) Маккажўхорини майдалаб, қайнатилиб пиширилади. Ҳар овқатдан олдин бир пиёлачани урасиз ва менга ўхшаб- ОЗҒИН, ЧИРОЙЛИ, СОҒЛОМ ВА ЧЕРЕЧЧУР КЕЛИШГАН БЎЛИБ ЮРАВЕРАСИЗ.

Шунақа гаплар. Бир социолог устозим бор. Ўша устоз билан "Японларнинг узоқ яшаши" ҳақида кичик мустақил тадқиқот қилмоқчиман десам, "Назарий эмас, амалий қилиб кўришинг керак. Шунда ишончли чиқади" дейди. Маслаҳатингиздан ўргилай деб қўйдим ичимда. Негаки, бу мавзуни амалиётда синаб кўришим учун ўзим 100 йил яшаб кўрсатиб беришим керакми? ) Майли, устознинг сазаси ўлмасин. Амалиётда синаб кўрамиз. Мен сизлар учун 100 га кириб бераман. Сизлар ҳам мен юзга киргунимча яшаб берасизлар. Натижасини бирга муҳокама қиламиз) Барчаларингизга узоқ умр тилайман. Мен 100 га киргунимча кетиб қолишлар бўлмасин а?

Баҳодир Ниппоний - Яхши кунларда сиз билан бирга. Дорихоналардан сўранг)

🌐Telegram🌐Facebook
🌐Instagram🌐You tube