Асланов билан футбол

Яқинда Муҳрим бир подкастда Хайрулла акага савол берганди:

- Сизлар Илёс Зайтуллаевнинг «Ювентус»га ўтганини кўргансизлар, ўшандаям шунақа ажиотаж бўлганмиди?

Албатта, у даврлар бошқа, ҳамма ўз уйида хурсанд бўлган, ижтимоий тармоқлар умуман йўқ. Аммо яна бир катта фарқ бор. Зайтуллаев «Ювентус»нинг ёшлар таркибида эди, яъни яна бошқа ўнлаб йигитлар сингари қандайдир имкониятга эга бўлади, ўхшаса, яхши, ўхшамаслиги ҳам мумкинлигини билиб турардик.

Абдуқодир Хусановнинг ҳолати бошқа. Клуб у учун 40 миллион тўлаяпти. Ҳа, «Манчестер Сити»да пул кўп, аммо ҳозирги даврда fair play деган чеклов бор, клублар ўн йил олдингидек пулни истаганча совура олмайди - демак клуб билиб туриб, катта пул беряпти. Гвардиолага ҳам ўнта футболчи олиб бера олишмайди, унда ҳам чекланган, Пеп мана шу 3-4 ўриндан бирига Абдуқодирни оляпти. Бу худди олтин балиқча учта тилак сўраганда бирига Хусановни айтгандек гап, чексиз имконият бўлса-да, тилаклар сони чекланган.

Демак, муносабат ҳам шунга мос бўлади. Хусанов синов учун келиб қолган эмас, қирқ миллионлик активга айланди энди. Унда имконият етарлича бўлади. Абдуқодир ўзига берилган имкониятдан қандай фойдаланишини жуда яхши биламиз - худди подкатлари каби - тез, ишончли ва кескин.

@aslanov_futbol

«Манчестер Сити»нинг АПЛдаги кейинги ўйинлари:

ЧЕЛСИ - уйда
АРСЕНАЛ - сафарда
НЮКАСЛ - уйда
ЛИВЕРПУЛ - уйда
ТОТТЕНҲЭМ - сафарда
НОТТИНГЕМ - сафарда
БРАЙТОН - уйда

@aslanov_futbol

Аморим давридаги «МЮ»да иккита асосий муаммо бор ҳозирча: юқори прессинг ва олдинги чизиқда самарали ўйнаш.

«Ливерпул» ва «Арсенал» билан ўйинларда жамоа кучли кўринганининг сабаби ҳам шу - «МЮ»да ҳар иккисигаям эҳтиёж йўқ эди. Жамоа юқори прессинг қилмасдан кутиб олиши мумкин ва кўп ҳужум қилиш ҳам шарт эмас, ҳисобни сақлаб туриш етарли. Ҳеч ким «МЮ»дан прессинг ёки ғалаба кутмаганда, ўша ҳали ишламаётган ишлардан воз кечиш ҳам мумкин, омад келса, ютиш имконияти бор, ҳеч бўлмаса, кичик ҳисобдаги мағлубият ҳам тўғри тушунилади. Жамоа «Сити» билан яхши ўйнаб ҳам, кейин «Борнмут» ва «Нюкасл»га умуман имконсиз ютқазганига мантиқий изоҳ шу.

Шунинг учун ҳам ҳақиқий баҳо кейинги ўйинларда берилади, деганда ҳам Аморим ҳақ эди. «Саутҳэмптон» билан ўйин ёмонроқ чиқди, бу синовдан жамоа ўтолмади. Бугунги рақиб янада кучлироқ, шаклланганроқ. Қийин бўлиши шубҳасиз. Айни пайтда «МЮ» нафақат турнир жадвалида, балки ростан ҳам, ҳар томонлама Англияда ўнталикда эмас ва «Брайтон» тепада.

Энг ноқулай ҳолат шу. Ҳеч ким манчестерликларнинг ўртамиёна эканини қабул қилмайди ва ютқазиши воқеа ўлароқ тақдим этилаверади. Иккинчидан, рақиблар ҳам «МЮ» билан топ-клубга қарши тайёрланиб, энг яхши ўйинини кўрсатаверади.

@aslanov_futbol

«Барселона» охирги 15 ўйиннинг 8 тасида ғалаба қозонган. Аммо бу ғалабаларнинг фақат биттаси Ла Лига доирасида холос. Яъни жамоа бошқа мусобақаларда, кубок, суперкубок, Чемпионлар Лигасида охирги 7 ўйиннинг ҳаммасида ютди, лекин Ла Лигадаги охирги 8 ўйиндан атиги биттасида ғалаба қозонди.

Ростанам қизиқ. Ахир кубокларда ҳам «Реал», «Боруссия», «Атлетик» каби кучли рақиблар бўлди, аммо омадсизлик фақат Ла Лигада рўй беряпти. 21 зарба, фойдаланилмаган 5 та яққол хавфли вазият, тушунарсиз.

Ямал учун ҳам жуда муваффақиятсиз ўйин. У етти марта дарвозага зарба ижро этди, олтитаси жарима майдони ташқарисидан. Фақат биттаси аниқ етиб борди холос.

@aslanov_futbol

Турли пайтда бўлди-ю, лекин параллел тасаввур қилсак, жуда қизиқ, «Ливерпул» сўнгги дақиқада Брентфордда дуранг ўйнаётганди, «Арсенал» эса иккинчи таймда анча ишонч билан 2:0 ҳисобида олдинда бораётганди. Бу дегани, фарқ икки очкогача қисқарар, чемпионлик пойгаси энг қизғин паллага кирарди.

Қаторасига уч дуранг ўйнаган «Ливерпул» асабийлаша бошлаб, икки кучли рақиб устидан ғалаба туфайли «Арсенал» қаҳрамонларча рақобатга киришарди.

Йўқ, Дарвин чиқиб икки гол урди, буёқда «Вилла» ҳисобни тенглаштирди, натижада ҳаммаси тескари, фарқ 6 очко, «Ливерпул»да бир ўйин захираси ҳам бор, «Арсенал»да Жезус ва Сака жароҳатланган. Ҳа, муаммолар муваффақиятсиз ўйинларга сабаб бўлганидек, муваффақиятсиз ўйинлар ҳам муаммоларни бўрттириб кўрсатади.

Менимча, бугун Англияда чемпионлик масаласи ҳал бўлди.

Энг қизиғи, бир пайтлар «Арсенал»дан кетган Эмери ўрнига келган Артетани чемпион бўлмаслиги учун қўлидан келганини қилмоқда. Ўтган йили ҳам айнан «Астон Вилла»дан 33-турдаги мағлубиятдан сўнг «Арсенал» иккинчи ўринга тушиб қолиб, қайтиб чиқа олмаганди.

@aslanov_futbol

1992 йилда ўзбек футболи мустақил бўлди, 1994 йил октябрда Хиросимада терма жамоамиз чемпион бўлди, 2025 йил январда Абдуқодир Хусанов «Манчестер Сити» футболчисига айланди.

@aslanov_futbol

Ҳакамнинг жамоа зиёнига хатоси фойда бўлиб чиқиши камдан кам бўлади.

Тўп «Нюкасл» футболчисидан чиқиб кетаётганда ҳимоячи бурчак тўпи тепилмаслиги учун ҳаракат қилиб, тўпни тепиб юборди. Аммо тўп «Борнмут»га бориб тушди ва гол урилди.

VAR да қарашса, аслида тўп майдон ташқарисига чиқиб кетган экан. Бурчак тўпи белгиланди.

Умуман олганда, «Борнмут» маладес, топ-7дан «Сити», «Арсенал», «Тоттенҳэм» ва «МЮ»ни ютди, «Челси» билан дуранг ўйнади, мана ««Нюкасл»ни ютяпти.

@aslanov_futbol

Футболчи собиқ жамоасига гол урса, нишонламайди. Бу қанақадир ёзилмаган анъанага айланиб қолган ва ҳатто мабодо нишонлаб қўйса, мухлислар томонидан ҳурматсизлик сифатида баҳоланади.

Бошқа томондан қараганда, ўша гол урган футболчи ичида голдан севинадими? Менимча, албатта. Шунчаки, ўзини анъанага айланиб қолган шаклда тутишга ҳаракат қилади, бўлди. Ортиқча гап керакмаслигидан. Шунинг учун футболчининг ўша пайтдаги аниқ ҳиссиётини билолмайсиз. Балким сокин тана ичида ирғишлаётган руҳият бордир? Ўзини тутиш жуда қийин палла.

Ўйлаб қоласиз, бу иш, яъни нишонламаслик илк содир бўлганида, аниқ, у футболчи одатга амал қилиб эмас, аксинча, одатга хилоф равишда шу ишни қилган бўлади, тўғрими? Демак, ўша футболчи ростан ҳам голидан севинмаган бўлиш керакки, ростан ҳам нишонлашни истамаган. Мантиқан шунақа.

Хуллас, ҳаммага маълум ҳолатлар ичида илк бор собиқ жамоасига голни нишонламаган футболчи Деннис Лоу бўлган. У узоқ вақт «МЮ»да ўйнаб, «Олтин тўп» олиб, кейин аввалги жамоаси «Сити»га қайтгач, 1973/74 мавсумининг сўнгги турида «МЮ»га қарши тушади. «Шаҳарликлар»га очко керак эмас, ўртада, «МЮ» эса худди ҳозиргидек лигадан тушиб кетмаслик учун курашарди. Айнан Лоунинг голи «Сити»га ғалаба келтирган, аммо футболчи уни нишонлашни истамаган, ҳатто кайфияти тушиб кетиб, дарҳол захирага олинганди. Кейинчалик, эски жамоасидан қасос олгани ҳақидаги баландпарвоз сарлавҳаларга жавоб берар экан, Лоу, аслида «МЮ»ни унинг голи эмас, бошқа ўйин натижаси тушириб юборгани, шундай бўлса-да, фаолиятидаги энг қайғули гол бўлганини тан олганди. Лоу кейин Англия чемпионатида майдонга тушмади.

Паненка зарбасини кейинчалик Паненка номи билан атай бошлашди. Аммо голни нишонламасликка Лоу исмини қўйишмади. Бу тўғри ҳам. Сабаби, Паненка дарвозабонни чалғитиш, мухлисларга завқ бериш, балким рақиб кайфиятини тушириш учун шундай услубни ўйлаб топган. Ҳозирги «паненка» тепувчилар ҳам айнан шу ниятда амалга оширадилар. Аммо Лоунинг ҳолатини бугунги гол нишонламайдиганларга ўхшатиш қийин. Бутунлай бошқача вазият.

Деннис Лоу кеча, 85 ёшида вафот этибди.

@aslanov_futbol

Бу орада Оле Гуннар Сулшер «Бешиктош» мураббийи этиб тайинланибди.

Жозе Моуриньо аллақачон «Фанербахче»да, агар «Галатасарай» эгаси бўлганимда, Эрик тен Хагни олиб келардим. Истанбулда «МЮ»нинг уч собиқ мураббийи ким зўрлигини аниқлаши мумкин бўларди. Баъзида учрашиб, дардлашишлари ҳам мумкин :)

@aslanov_futbol