Allaev Uz

Menejerning vazifalaridan biri uning qo'lining ostidagilar ko'zlangan natijaga erishishidir.
Maqsadga erishish bo'lsa har doim ham qattiqqo'llik yoki jazo bilan bo'lavermaydi. Bu muloqot, nazorat, motivatsiya, tanqid, qo'llab-quvvatlash, mukofotlash kabi juda ko'p detallarni o'z ichiga oladi.


Kundalik hayotda ancha oldin bo'lgan voqealardan bittasini berib o'taman:

Tajribali xodimga bir ishni topshirdik. Ishni bitirib yakunda hisobotni qilib berishi kerak. Man u bitirgan ishga asoslanib katta bir kompaniya bilan shartnoma qilaman. Xodim tajribali bo'lgani uchun to'liq ishonch bilan ora-orada ish qanday ketyapti deb so'rab turdim. Hammasi yaxshi, vaqtida ulguramiz degan javobni oldim.
Xodim tajribali, mas'uliyatli, demak muammo yo'q.
Kompaniya bilan uchrashuvdan bir kun oldin loyiha va hisobot keldi. Ne ko'z bilan ko'rayki, butunlay boshqa loyiha va boshqa hisobot tayyorlangan. Man boshqa narsani aytganman, xodim boshqa narsani tushungan. Yana u oldingi ish joyidagi tajribasidan kelib chiqib man aytgan narsani tayyorlagan. Ikkalamiz ikki xil tilda gapirganmiz.

Klassik holatda xodim - rahbarni xato tushungani va xato ish qilgani uchun jazolanadi. Lekin, aslida bu vaziyatda ayb manda edi. Birinchidan xodimga tushuntirganda, nimani tushunganligini savol berib aniqlashtirib olishim kerak edi. Ikkinchidan jarayonda hech bo'lmasa bir marta ko'z tashlaganimda xato yo'nalishda ish ketayotganini payqab, vaziyatni to'g'rilash imkoni bor edi. Xodim bo'lsa o'z bilganicha va mani tushunganicha ishlagan.

Bu dars bo'ldi. Doim fikrni tiniqroq ifodalash, xodim to'g'ri tushunganini tekshirish va jarayonda ishga ko'z tashlab turish rahbarning vazifasi. Yakuniy natijani kutib turish xato.


PS: Ertasi kuni uchrashuvga hisobotsiz va loyihasiz borishga to'g'ri keldi. Bir kunda dabdala loyiha qilgandan, qilmagan yaxshi edi.

Shartnoma baribir imzolandi chunki narigi kompaniya rahbariyati mani bilishardi va manga ishonishdi. Man ham turli xil bahona o'ylab topmasdan vaziyatni boricha tushuntirdim.

#menejment #boshqaruv
@allaevuzb

Talabalar juda ko'p ish so'rab kelishadi. Ayniqsa kitobga bog'liq bo'lganimiz uchun ham. Ko'pchilikda kitob do'konlarida ishlash orzusi ham bor. Lekin, muammo tomoni, o'qish sabab to'liq stavkada ishlasholmaydi.

Shundan kelib chiqib, do'konlarda asta-sekinlik bilan ish tizimini va grafigini o'zgartirib bordik. Hozirda aksar kitob do'konlarda 5 soatlik ish rejimini test qilmoqdamiz. Endi bemalol talabalar kitob do'konlarimizda ishlashlari mumkin bo'ladi.

Kimlar kerak bo'ladi?

Majburiyatlar;
-Mijozlarga maslahat berish, kitob tavsiya qilish va xizmat ko‘rsatish
-Kitoblar va boshqa mahsulotlarni joylashtirish, vitrinani tartibga keltirish
-Kassa amaliyotlarini bajarish

Talablar;
-O‘zbek va rus tillarini yaxshi bilish (B2+)
-Kitoblarga qiziqish va ular haqida bilimga ega bo‘lish
-Chaqqon va kirishimli bo'lish
-Ishga mas’uliyatli yondashish, o‘rganishga va rivojlanishga intilish

Biz esa;
-Rasmiy ish haqi
-Katta kompaniyada tajriba
-Sotuvdan bonuslar
-Do‘stona va professional jamoa
-Xodimlar uchun maxsus chegirmalar
-Karyera imkoniyati

Ish grafigi:
-6/1

CV'ingizni @asaxiyhr telegram profiliga yuborishingiz mumkin!

#vakansiya
@allaevuzb

Bizda universitet diplomi malaka yoki professionalizm isboti emas, balki ijtimoiy signalni bildiradi.

Xohlagan ish beruvchi bugun universitetdan kelgan kadr tayyor kadr emasligini, universitet real maydon bilan bogʻliq bilim bermasligini biladi.

Lekin, tugatgan universitetga qarab shaxs qanaqa shakllanganini, qanaqa ijtimoiy integratsiya qilganini, muomala madaniyati va etikani qanaqa oʻrganganini tahmin qilish mumkin. Shaxsning qanchalik intiluvchanligi, tashabbuskorligi, kirishuvchanligi, risklarga tayyorligi ham universitetga qarab farq qilishi mumkin.Bu boʻlsa aynan shaxs haqida ijtimoiy signaldir.

Oʻz xulosamda qolaman, universitetda taʼlim olish muhim. Lekin, bu koʻproq shaxs sifatida shakllanaman, sohamga qarab yoʻnalish olaman deb boʻlishi kerak. Professional boʻlish uchun inson oʻzi oʻqishi, oʻzi intilishi va real ishda tajriba toʻplashi kerak.

#mulohazalarim
@allaevuzb

Korzinka supermarketlar tarmog'i navbatdagi 110 mln $ investitsiyani jalb qilibdi.

Abu Dhabi Uzbek Investment, Oman Investment Authority va UzOman birgalikda Korzinka rivoji uchun 110 million dollar sarmoya kiritishga qaror qilishgan.

Rasmiy xabarda bu investitsiya supermarketlar sonini 1000taga yetkazish rejasini osonlashtirishi haqida aytilgan.


#business
@allaevuzb

Har bir erkak bilishi foydali boʻlgan baʼzi haqiqatlar:

1. Hayotingiz qanchalik qiyin ekani aslida hech kimga qiziq emas. Atrof faqat natijalarni koʻradi va undan kelib chiqib hurmat qiladi. Yig‘lashingiz mumkin, ammo harakatdan to‘xtamang.

2. Do‘stlaringiz o‘zgaradi. Ular bilan doʻstlik abadiy emas. Yangi doʻstlar paydo boʻladi, eskilari oʻz muammolari bilan ketadi. Ba’zilari uzoqlashadi, ba’zilari yaqinroq boʻladi . Geografik yaqinlik doʻstlikda muhim faktorga aylanadi. Aloqani ushlab qolish, eslab turish yaxshi. Bu muhim xotiralar. Lekin, qabul qiling butun umr doʻstlar oʻzgarib boradi.

3. Uylanish sizni muammolardan qutqarmaydi. Avval oila masʼuliyatini koʻtarib biladigan darajaga chiqing. Daromadingiz oilaning ehtimoliy bazaviy xarajatlatiga yetmasdan turmush qurishni oʻylamang. Muammolarimga yechim boʻladi deb bir oila avaylab oʻstirgan qizni ham boshini muammoga koʻmmang. Oʻzingizni muammolaringizni boʻlsa 2x koʻpaytirmang. Oʻzingizni eplolmagan holatda ikki yoki undan ortiq kishini eplayman deb o'ylamang.

4. Muammo emas, xotirjamlik keltiruvchi insonni toping. Bir dasturxon atrofida maza qilib hazillashib suhbat qilolmaydigan insoningizdan hayotda sizga eng yaqin inson boʻlishni kutmang.

5. Vaqt afsuski tez o‘tadi. Har bir "keyinroq" "hech qachon"ga aylanadi.

6. Ota-onangiz abadiy emas. Ularga qo‘ng‘iroq qiling, birga sayohat qiling, birga vaqt oʻtkazing. Ziyorat qiling. Bir kun kelib, shunday qilganimda edi deb orzu qilasiz.

7. Treninglarda nimalar deyishmasin, intizom va davomiylik uzoq muddatda muvaffaqiyatning asoslaridan. Intizom zerikarli, lekin 40 yoshda kambag‘al yoki baxtsiz boʻlish undan ham zerikarli.

8. Choyxonadan koʻra sport zalida koʻproq vatq oʻtkazing. Bu sizga nafaqat bugun yosh, koʻrkam, stressdan holi boʻlish imkonini beradi, shuningdek 50 yoshdan oshganda hayot sifatiga keskin taʼsir qiladi.


Davomi bor.

#erkakchilik
@allaevuzb

Rahbar xohladi degani hali amalga oshdi degani emas.

Ko‘pchilik rahbarning buyrug‘i yoki istagi avtomatik tarzda bajariladi deb o‘ylaydi. Lekin haqiqiy hayotda bu reallikdan juda uzoq holat!

Agar menejment va ijro tizimi yaxshi yo‘lga qo‘yilmasa, rahbarning eng yaxshi niyatli ko‘rsatmasi ham amalga oshmay qolishi mumkin. Bundan ham yomoni – noto‘g‘ri shakllantirilgan jamoa va zaif menejment sababli, rahbar kutgan natija butunlay aksi bo‘lib chiqishi mumkin. Foyda uchun qilingan qaror oxir-oqibat zarar keltirishi mumkin!

Xulosa oddiy: rahbar buyruq berishi kifoya emas. Yaxshi menejment, aniq ijro mexanizmlari, to'g'ri nazorat va to‘g‘ri shakllantirilgan jamoa kerak.

Aytib berishgandi, bir idorada rahbar byurokratiyani kamaytirish haqida buyruq beradi. Amalda kamaytirish o'rniga xodimlar byurokratiya kamayganligi haqida qog'ozlar to'ldirishga kirishib ketishadi.

To'g'ri ijro tizimi yo'lga qo'yish menejmentning ustuvor vazifalaridan bo'lishi kerak.


#menejment
@allaevuzb

Oxirgi vaqtda kuzatib, oʻzim uchun yana bir bor tasdiqlagan narsam, koʻplab insonlar nima xohlashini bilmaydi.
"Siz nima xohlaysiz?" degan savol odamlarni shoshirib qoʻyadi. Shu savol berilganda koʻpincha turli xil mujmal javoblar boshlanadi. "Yoʻq, aslida nima xohlaysiz" degan savol boʻlsa juda koʻp insonni qotirib qoʻyadi.
Juda koʻpchilik hayotda haqiqatdan nima xohlashini bilmaydi. Nima uchun xohlashi u keyingi daraja. Xohlagani unga nima berishi ham.

Xulosam shuki, koʻpchilik hayotda umumiy ham, koʻplab epizodlarda ham nima xohlashini bilmaydi. Bilganlar ham uni aniq va tiniq ifoda etishga qiynaladi.


#psixologiya
@allaevuzb

“Nega odamlarga muammo emas, shou kerak?”

Eski Rimda “panem et circenses” — “non va tomosha” degan ibora bor edi. Xalq och qolmasin va zerikmasin, qolganini siyosatchilar hal qiladi degan yondashuv. Ular uchun eng muhimi: xalq chalg‘igan bo‘lsa bo‘ldi.

Oradan 2000 yil o‘tdi. Lekin hech narsa o'zgarmadi. Bir vaqtlar gladiatorlar jangini maza qilib ko'rgan insonlar kabi bugun odamlar reels yoki futbol ko'rishda, shou biznes vakillari va influenserlar hayotini muhokama qilishda davom etishmoqda.
Bugun ham odamlar o‘z hayotidagi real muammolar – qarz, sog‘liq, maqsadsizlik, oila, jamiyat muammolari – haqida emas, balki kim kim bilan ajrashdi, qaysi futbolchi qaysi klubga o‘tdi, Abduqodir nima uchun eng past bal oldi, Botir Qodirov masalasi nima bo'ldi yoki qaysi bloger qayerga sayohat qildi, shuni muhokama qilishni afzal ko‘radi.

Chunki bu yengil, miyani oson band qilish. Bu o‘z muammolaringga tik qarashdan, ularni tan olib mas'uliyat bilan harakat qilishdan, komfort zonadan chiqishdan ko‘ra osonroq. Lekin, bu “tomoshalar” bizning hayotimizni o‘zgartirmaydi.

O‘zingizdan so‘rab ko‘ring: siz bugun atrofdagilar bilan yoki ijtimoiy tarmoqda nimani muhokama qildingiz – shaxsiy hayotingizdagi muhim qarorlarnimi yoki begonalarning sarguzashtlarini? Muhim jarayonnimi yoki sizga bir tiyinlik foydasi yo'q mavzunimi?

Agar har bir inson o‘z vaqtining 10%ini tomosha emas, shaxsiy taraqqiyotga, hayotidagi muhim masalalarga sarflasa edi – jamiyat butunlay boshqacha bo‘lardi.


#mulohaza
@allaevuzb