АЁЛ КЎНГЛИ
🍃🌺
Меҳрингиздан зиё олиб ойдек тўлар,
Меҳр, эъзоз бўлмаса гар гул ҳам сўлар,
Уни севинг доим қайноқ юрак билан,
Жони қирқта аёл, кўнгли битта бўлар.
🍃🌺
Ойларни лол этар ҳусни малоҳати,
Тоғларни ҳам чўктирар дил матонати,
Тошдан гиёҳ ундиради садоқати,
Жони қирқта аёл, кўнгли битта бўлар.
🍃🌺
Тунлар бардош бермас ўтли ноласига,
Жондан кечиб жон тутар жон боласига,
Гоҳ дунёлар арзимас соч толасига,
Жони қирқта аёл, кўнгли битта бўлар.
🍃🌺
Тўфонлар бор унинг сабр-у, саботида,
Олам яшар кўнгил деган баётида,
Аёл бир бор севар асли ҳаётида,
Жони қирқта аёл,кўнгли битта бўлар.
🍃🌺
Лола мисол ёниб турар яноқлари,
Зимистонни ёритар нур,чироқлари,
Хиёнатни кўрмасин кўз қароқлари,
Жони қирқта аёл,кўнгли битта бўлар.
🍃🌺
Дил берганга чиндан кўнгил бериш керак,
Гулзоридан гул, райҳонлар териш керак,
Севиш керак уни фақат севиш керак,
Жони қирқта аёл,кўнгли битта бўлар.
🍃🌺
✍Хуршид Карим
✨
𝐓𝐞𝐥𝐞𝐠𝐫𝐚𝐦 | 💝Хуршид Карим шеърлари💝