🌙 Tahmid.Uz

#ИШИНГИЗДАН АЛЛОҲ АЖАБЛАНДИ...

Бир киши Набий саллоллоҳу алайҳи ва салламнинг олдиларига келиб: "Мен қийналган кишиман", деди.
Яъни, оч эканлигини билдирмоқчи бўлди.
Набий саллоллоҳу алайҳи ва саллам аёлларининг бирига овқат сўраб одам жўнатдилар. Аёллари: "У зотни ҳақ ила жўнатган зотга қасам ичиб айтаманки, уйимда сувдан бошқа ҳеч нарса йўқ!", деди.
Худди шундай қилиб барча аёлларига овқат сўраб одам жўнатдилар. Уларнинг бари юқоридагидек жавоб беришди. Шунда Расулуллоҳ саллоллоҳу алайҳи ва саллам:
"Бу кеча буни ким меҳмон қилади, Аллоҳ унга раҳм қилсин?!", дедилар. Шунда Ансорлардан бир киши туриб: "Эй Аллоҳнинг Расули! Уни мен меҳмон қиламан", деди. Сўнгра уни уйига олиб бориб хотинига деди:
- Бу Расулуллоҳ саллоллоҳу алайҳи ва салламнинг меҳмонлари. Унга таом ҳозирла!
Унинг хотини деди:
- Болаларимизнинг овқатидан ўзга овқат йўқ.
Эр деди:
- Болаларингни ухлатиб овқатни олиб кел. Меҳмон овқатга қўл узатганида чироқни ўчир. Биз қоронғуда ўзимизни овқат еяётгандек кўрсатамиз. Аммо емаймиз. Меҳмон тўяди шунда.
Улар шундай қилиб оч ухлашди. Меҳмон тўйди. Эрталаб улар Расулуллоҳ саллоллоҳу алайҳи ва салламнинг ҳузурларига боришгач Расулуллоҳ саллоллоҳу алайҳи ва саллам унга дедилар:
"Аллоҳ таоло сизнинг ишингиздан ажабланди(маъно муташобиҳдир). Сиз ҳақингизда қуръон нозил қилди:
"Гарчи ўзларининг ҳожатлари бўлса ҳам (уларни) ўзларидан устун кўрадилар. Ким ўз нафсининг бахиллигидан сақланса ундай кишилар, ҳа ана ўшалар ютувчилардир".

#Дунё чархпалакдир. Замон айланиб туради. Бугун пулинг бор. Эртага ишинг орқага кетади. Бугун фақирсан, эртага бойиб кетишинг мумкин. Фақирлик айб эмас, бойлик фазилат эмас. Муҳими инсоннинг бойлик ва фақирлик пайтидаги ахлоқидир. Муҳими қалбидаги нарсадир, чўнтагидаги эмас.
#Тасаввур қилаяпсизми, Расулуллоҳ саллоллоҳу алайҳи ва салламнинг барча аёлларининг уйидан овқат топилмаяпти! У киши Аллоҳнинг Расули бўлиш билан бирга давлат раҳбари ҳам эдилар. Уйларида сувдан бошқа ҳеч нарса йўқ.
#Фақирликни уқубат, бойликни эса мукофот деб ўйлашдан эҳтиёт бўлинг. Дунё бор-йўғи имтиҳон холос. Имтиҳон саволлари қанчалар қийин бўлмасин, ўтириб қолманг.
#Ақлли инсон бошқалар эҳтиёжини қоплашга ҳаракат қилади. Уларни қийин аҳволга солиб қўймайди. Кишиларга эҳсон қилганингизда улар ўзини айбдор ва нуқсонли санашмасин!
#Бемор кишининг фақирлигини билиб қолсангиз у сўрашидан олдин унинг аҳволидан хабардор бўлишингиз оқилона ишдир. Баъзиларнинг иффати сўрашдан ман қилади. Атонинг энг афзали иффатни эҳтиром қилиб ва инсонларнинг юзидаги сувни муҳофаза қилиб қилинган атодир!
#Эҳсон қилишнинг ҳам ўз одоблари бор. Бир кишига кишиларнинг олдида садақа ва эҳсон қилиб уни хижолат қилганингиздан, ундаги иффатни жароҳатлагинингиздан, унга ожизлигини ҳис қилдирганингиздан кўра садақа ва эҳсон қилмаганингиз афзалдир!

#Ансорий р. а. нинг одобига боқинг. Овқатнинг озлигини билгани учун хотинига чироқни ўчиришни буюрди. Мақсади меҳмонни хижолат қилмаслик эди. Чироқ ёниб турганида меҳмон овқатнинг озлигини кўриб эҳтимол хижолат тортиб, овқат барчага етиши учун овқатдан ея олмас эди.
Кишилардан ҳаражни кўтариш ҳам уларни хотиржам қилишдир. Хотиржам қилиш эса ибодатдир!

@Tahmid_uz

#​​Ҳаммани чарчатдингиз..

Умар ибн Хаттоб розияллоҳу анҳу бомдод намозидан кейин халифа Абу Бакр розияллоҳу анҳуни кузатардилар.

Билганлари, Мадина атрофидаги бир уйга кириб узоқ вақт қолиб кетишлари бўлди. Кунлар ўтар, халифа шу жажжигина уйни зиёрат қилишни қўймасдилар.

Сир нимада эканини билиш учун Умар, Абу Бакр чиққанларидан кейин уйга киришга қарор қилдилар. Кирсалар, ҳаракатланишга мадори йўқ ногирон ва кўр бир кампир ўтирибди. Ундан: "Бу одам олдингизда ҳар кун нима қилади?" деб сўрадилар.

Кампир: "Аллоҳга қасамки, мен уни танимайман. Лекин ҳар кун келиб уйни тозалайди, супуради ва менга таом тайёрлайди, сўнг қайтиб кетади" дея жавоб қилди.

Умар буни эшитиб тиззалаб қолдилар ва кўзлари жиққа ёшга тўлди. Кейин ўзларининг қуйидаги машҳур сўзларини айтдилар:
ЎЗИНГИЗДАН КЕЙИНГИ ХАЛИФАЛАРНИ ЧАРЧАТДИНГИЗ, ЭЙ АБУ БАКР!!
---
#Нафақат халифаларни, балки ҳаммамизни чарчатдингиз эй Абу Бакр! Сизнинг нотаниш кампирга кўргузган бу яхшилигингизнинг лоақал бир қисмини, лоақал ота-онамизга ёки бирор яқинимизга қила олдикми?! Ҳа чарчатдингиз.. жуда чартадингиз, уялтирдингиз, шарманда қилдингиз!!

@Tahmid_uz

#УНДАЙ БЎЛСА ҒАМИНГ КЕТАДИ...

Расулуллоҳ саллоллоҳу алайҳи ва салламнинг ҳузурларига Убай ибн Каъб розиёллоҳу анҳу келиб деди:
- Эй Аллоҳнинг Расули! Мен сизга кўп саловот айтаман. Қанчасини сиз учун қилай?
Расулуллоҳ саллоллоҳу алайҳи ва саллам дедилар:
- Истаганингни.
Убай ибн Каъб деди:
- Тўртдан бирини қилайми?
Расулуллоҳ саллоллоҳу алайҳи ва саллам дедилар:
- Истаганингни. Аммо зиёда қилсанг ўзинг учун яхши бўлар эди.
Убай ибн Каъб деди:
- Ярминими?
Расулуллоҳ саллоллоҳу алайҳи ва саллам дедилар:
- Истаганингни. Аммо зиёда қилсанг ўзингга яхши бўлар эди.
Убай ибн Каъб деди:
- Учдан иккисиними?
Расулуллоҳ саллоллоҳу алайҳи ва саллам дедилар:
- Истаганингни. Аммо зиёда қилсанг ўзингга яхши бўлар эди.
Убай ибн Каъб шунда деди:
- Барча саловотларимни сиз учун қиламан.
Расулуллоҳ саллоллоҳу алайҳи ва саллам дедилар:
- Ундай бўлса ғамларингга Аллоҳ кифоя қилади, гуноҳларинг мағфират қилинади!

#Мусулмон инсон икки мақсад билан ҳаракат қилади. Бири охират ташвиши, иккинчиси дунё ташвиши.
Дунёдаги ташвиши шуки, мусулмон киши ғам-ташвишсиз яшасам дейди. Охиратдаги ташвиш эса Аллоҳ унинг гуноҳларини мағфират қилишидир. Ана шу икки буюк ғоянинг рўёбига Расулуллоҳ саллоллоҳу алайҳи ва салламга саловот айтиш кафил бўлмоқда.
#Ибн Атоуллоҳ Сакандарий роҳимаҳуллоҳ айтганлар:
"Кимки кўп намоз ўқий олмаса, кўп рўза тута олмаса Расулуллоҳ саллоллоҳу алайҳи ва салламга кўп саловот айтсин. Агар инсон бир умр ибодат қилса-ю, сўнгра Аллоҳ таоло унга биргина саловот айтса ана шу саловот унинг бир умр қилган тоатларидан оғир келади. Чунки банда тоқатига яраша саловот айтади. Аллоҳ таоло эса рубубийятига мос саловот айтади".

Ғамларнинг кетиши...
Гуноҳларнинг мағфират қилиниши..
Қалбларнинг юмшаши...
Қалбда роҳат пайдо бўлиши...
Дуоларнинг ижобат бўлиши...
Касалликларга шифо бўлиши...
Шафоатдан насибадор бўлиш...
Фақирликни қувиш...
Руҳнинг пок бўлиши...
Жон беришдаги енгиллик...
Қабрдаги роҳат ва нур...
Сиротдан осон ўтиш...
#Булар саловотнинг фойдаларидандир. Асосийси кенглиги осмонлар-у ер қадар бўлмиш жаннат ҳам саловотнинг фойдаси ҳисобланади.
#Аллома Валади Дедунинг айтишича, Расулуллоҳ саллоллоҳу алайҳи ва салламга саловот айтиш ота-онага ҳам яхшилик қилиш ҳисобланар экан.
Қандай яхшилик бўлмасин?! Ахир Расулуллоҳ саллоллоҳу алайҳи ва салламга: "Фалончининг ўғли пистончи сизга саловот айтди", дейилади. Яъни, у зот саллоллоҳу алайҳи ва салламнинг ҳузурларида отангизнинг исми ҳам зикр қилинар экан...

@Tahmid_uz

#ҲАҚИҚИЙ МАШҲУРЛИК...

Расулуллоҳ саллоллоҳу алайҳи ва саллам бир куни саҳобалар билан суҳбатлашиб ўтириб дедилар:
“Бир киши саҳрода ўтирганида булутнинг ичидан овоз эшитди. У овоз булутга: “Фалончининг боғини суғор”, деб бир кишининг исмини айтди. Булут ўз йўналишини ўзгартириб барча сувини бир ерга бўшатди. У киши сув тушган ерга борди. У ерда бир киши белкураги билан сувни уёқдан буёққа йўналтириб турар эди. Ҳалиги киши унга деди:
-Эй Аллоҳнинг бандаси! Исминг нима?
У менинг исмим фалон деб булутга хитоб қилинган исмни айтди ва сўради:
-Нега исмимни сўраяпсан?
У киши деди:
-Мен булутга хитоб қилиниб “фалончининг боғини суғор” деган гапни эшитдим. Унда сенинг исминг айтилди. Сен бу ерда нима билан шуғулланасан?
У киши деди:
-Мен бу ерда деҳқончилик қилиб бу ердан чиққан ҳосилнинг учдан бирини садақа қиламан. Учдан бирини аҳлим ва фарзандларим билан ейман. Қолган учдан бирини яшириб қўяман. Унга уруғ, ўғит ва ерга лозим бўлган нарсаларни сотиб оламан”.

#Ҳақиқий машҳурлик ана шу. Сени ерда ҳеч ким танимасада самода танишади. Қанча-қанча машҳурлар бор. Уларни ерда кўпчилик танийди. Аммо Аллоҳ унга эътибор бермайди, илтифот қилмайди. У яхшиликда тонг оттирдими ёки ёмонликда тонг оттирдими Аллоҳ унга парво қилмайди.
#Ҳақиқий машҳурлик Аллоҳ сени яхши кўриб Жаброил алайҳис саломга: “Эй Жаброил! Мен фалончини яхши кўрдим. Сен ҳам уни яхши кўр”, дейиши ва Жаброил алайҳис салом ҳам фаришталарга нидо қилиб: “Аллоҳ таоло фалончини яхши кўрди, сиз ҳам уни яхши кўринг”, демоғидир.
#Ҳақиқий машҳурлик қўлингни дуога очганингда фаришталар: “Эй Аллоҳ! Таниқли бандангдан таниқли дуо келди”, дейишларидир
#Ҳақиқий машҳурлик бошингга бало келганида фаришталар шовқин солиб худди Иброҳим алайҳис салом оловга ташланганларида қилганлари каби сенинг ҳаққингда дуо қилиши ва сен учун барчаси сафарбар бўлишидир.
#Ҳақиқий машҳурлик бу Аллоҳ таоло қалбингга боқиб унда Ўзидан бошқани кўрмаслиги, сени Ундан бошқани истамаслигингни билиши ва сени Ўзига муқарраб бандалар сафида ёзиб қўйишидир.
#Ҳақиқий машҳурлик Аллоҳ таоло сендан рози бўлиб сени Ўзининг ибодатига мусаххар қилиши, сенга тоат эшикларини бир-бир очишидир. Агар У бир бандасини яхши кўрса уни Ўзи томон бошлайди.
#Ҳақиқий машҳурлик мискинлар сени ўз боқувчилари деб билишлари, синган кишилар сени юпатувчи деб билишлари ҳамда фақирлар сени ўзларига ёрдамчи деб билишларидир.
#Ҳақиқий машҳурлик масжидларнинг йўллари сени таниши, бомдод намози сени соғиниб кутиб олиши, қуръон сенинг қўлларингни эслаб қолиши, унда бармоқ изларинг қолиши, саждагоҳинг сен бўлмаганингда сени соғинишидир.
#Булардан бошқаси ичи бўш, алдоқчи ва қалбаки машҳурликдир. Иш эргашувчи(подписчик)ларнинг кўплиги билан эмас, ёқди(лайк)ларнинг кўплиги билан эмас, улашиш(поделиться)ларнинг сони билан эмас, кўрувчилар ва ажабланувчиларнинг кўплиги билан эмас. Булар барчаси баландпарвозлик ва безак холос!

#Ҳақиқий машҳурлик самодаги машҳурликдир!

@Tahmid_uz