Sarvar Nazarbayev | Blog

O'tirib o'ylamaysiz, chunki vaqtingiz yo'q.

Vaqtingiz yo'q, chunki o'tirib o'ylamaysiz.

@Sarvar_Nazarboyev

Tashqi kuch emas, ichkisi muhim.

Ibn Xaldun "Muqaddimada" aytishicha, inson o'z ishiga o'zi hukmron bo'lishni istaydi. Ammo voqelikda kamchilik ko'pchilik ustidan hukmron bo'ladi. Demak, odatda inson kimningdir hukmi ostida bo'ladi.

O'sha hukm insonlarga mashaqqatsiz va adolatli bo'lsa, jamiyat botir va qo'rqmas bo'ladi. Zulm va qahr ustiga qurilgan bo'lsa, insonlarning ichki kuchi zavol topadi.

Agar jazo ta'lim ma'nosida yoshlikda berilsa ham, bolaga salbiy ta'sir qiladi. Ichini o'ldiradi. Doim nimadir qilishga qo'rqadigan bo'lib qoladi.

Unda, qanday qilib sahobalar shariatga bu darajada itoat qilishgan-u, shijoatlari oshgan sari oshib borgan?

Chunki ular dinni Rosulullohdan 23 yil davomida ta'lim olib, tabiatlariga singdirib borganlar. Ular shariatni majburiyat deb emas, insoniyatning shonli burchi deb qarashgan.

Demak, sulton hukmlarining jamiyat qudratini zaiflashtirishga sababi u tashqi motiv ekanligi bo'lsa, Islom ko'rsatmalarining aks ta'siri — uning ichki motiv ekanligidandir.

Shu yerda, Ibn Xaldunning g'oyasi — insonga ichki kuch kerak, tashqi bosim uni zaiflashtiradi. Shunda qudratli jamiyat barpo bo'ladi, deydi.

Demak bizga,

1. Xodimlarini ichki xohishi bilan ish qildiradigan liderlar,
2. O'quvchini ichidan ilmga istak uyg'otadigan muallimlar
3. Matnlari amal qilishga ichkaridan unday oladigan yozuvchilar
4. Farzandiga tarbiyani tashqi bosim bilan emas, axloqni uni ichki tabiatiga aylantira oladigan ota-onalar kerak.

@Sarvar_Nazarboyev

"Siyosatshunos chala olimlar"

Amerikada nima bo'layotganini biladi. Qo'shnisini hol-ahvolini bilmaydi.

Davlatni qanday boshqarish kerakligini o'rgatadi.
Eplab 2 ta farzandini tarbiyalay olmaydi.

Butun dunyodan xabari bor. Qarindoshlarini holidan bexabar.

Ulamolarni yomonlaydi. Haqni gapirmaydi deydi.
O'zi Kitobdan bir qator to'g'ri o'qib bera olmaydi.

Telefoni siyosiy yangilik kanallariga to'la.
Sohasidagi yangiliklardan bitta ham yo'q.

Tepadagi barcha muhokamalar befoyda – har kim o'zini va oilasini o'zgartirmaguncha.

@Sarvar_Nazarboyev

Inson xohishlari cheksiz. Dunyo matohidan qoniqqan birorta odamni ko'rmadim. Doim nimadir olgisi keladi. Lekin puli yetmaydi.

Zukko marketologlarimiz insonlarni yaxshi o'rgangan. Kredit, bo'lib to'lash xizmatlariga bozorni to'ldirishdi.

Taniganlarimning kamida 1/3 qismida kredit bor.

Bo'lib to'lash bu — og'ir yuk. O'sha matohdan olinadigan lazzat 1 oyga bormaydi. To'lovi sizni oylab, yillab qiynaydi. 2 baravar narxida.

BYD minib yuribdi. Hozirgi zamonda u boy degani emas. Bo'ynida 30.000$ qarzi bor degani. Yoki boyligidan shuncha kamaydi degani.

Housel aytganidek: Boylik sen ko'rayotgan narsalarda emas. Ular mol-mulk.

Boylik — ko'rinmaydi. Boylik — sotib olinmagan mashinalar, xarid qilinmagan matohlar, oyma-oy foyda olib keladigan aktivlardir. Saqlaganing — boylik.

Uni mohiyati — erkinlik berishi. Qanday erkinlik?

Tanlov kelganda pul faktorisiz tanlay olish erkinligi. Xohlagan ishini tanlash, istagan mashg'ulotlariga vaqt ajratish, ertalab turib pul uchun biror ish qilishga majbur bo'lmaslik erkinligi.

Oylik to'lovlar kam ko'rinadi. Lekin erkinlikdan bo'g'adi.

Xohishlarni boshqarmagan – boy bo'la olmaydi.

Tavsiya: "Pul psixologiyasi" kitobi.

@Sarvar_Nazarboyev

Parkinson qonuni

Kitobning 12 bobini o'qib, taqdimot qilib berishim kerak edi. 2 hafta vaqtim bor edi.

O'qimay yurdim. Oxirgi kun 4 soat ichida bitirib qo'ydim.

Xuddi, it quvganda super tezlikda qochganimiz kabi, deadlaynlar bo'lganda miyamiz tez ishlaydi.

Bir ishga qancha vaqt ajratsak u o'shancha vaqt oladi. 2 kun ajratsak ham, 4 soat ajratsak ham, qilib tugatsa bo'ladi.

Kennedyning "Жесткий тайм-менеджмент" kitobining mohiyati ham shu:

Istalgan 10 minutlik, 1,2,3,4 soatlik ishlarni bitta o'tirishda, hamma narsani yig'ishtirib bajarda qo'y.

@Sarvar_Nazarboyev

Ikkinchilardan bo'ling

Bloglarini kuzatadiganlarim doim yaxshi odatlar qurishga, kitob o'qish, vaqtni to'g'ri boshqarish, sportga targ'ib qilishadi.

Yozganlarini o'qiganimda 2 xil ta'sir qiladi.

1. Zo'r odat topadi. Foydali ekan deb ulashadi. Lekin hali o'zi 3 kun ham qilmagan bo'ladi.

Temirni qizmasdan uryapti. Ta'sirsiz.

Misol:

[ Har kuni kechqurun yozing. Miyani bo'shatadi. O'zingizni tahlil qiling.] deydi.

Hayotda pachog'i chiqib yurgan bo'ladi.

2. Yaxshi odat o'rganadi. O'zi amal qiladi. Kundalik hayotiga aylantiradi. Tanganing boshqa tomonlarini ko'rishga ham ulguradi.

Endi u nima deydi?

[ 40 kundan beri har kechqurun yozaman. O'zgarish katta. Miyam bo'shadi. Kam energiya sarflay boshladim.

O'zimni tahlil qilish orqali behuda vaqt sarflashni kamaytirdim. Ba'zan yozishga erinasiz. O'sha paytlari bir qator bo'lsa ham yozing. Daftar, Notion, obsidian, farqi yo'q. Murakkablashtirmang. Miyaga nima kelsa yozing.]

Buniki real chiqdi. Oradagi muammolarni ham ko'rsatdi va yechim berdi.

Ular hayotda ham yaxshi natijaga erishgan bo'ladi.

Ikkinchilardan bo'ling.

@Sarvar_Nazarboyev

Yo'qotishdan qo'rqadigan narsalaringiz qadar kuchlisiz.

Uy, mashina, obro', do'stlar, sog'lik, kasb va h.z larimiz bor.

Ularni yaxshi ko'ramiz. Yo'qotishdan qo'rqamiz.

10 mln so'm pulingiz bor. Yo'qotishdan qo'rqasizmi? Kuchingiz atigi 10 millonlik ekan.

Qo'rquvimiz qancha kamaysa – biz shuncha kuchlimiz degani.

Bu prinsipni g'arblik bir olimdan eshitdim. Asli o'zimizniki.

Abdulloh ibn Umar r.a sotib olgan narsasi o'ziga yoqib qolsa, darhol uni ehson qilib yuborar ekan.

Eng yoqtirgan tuyasini ehson qilib yuborgani, eng yaxshi qulini shundoqligicha ozod qilib yuborgani bunga yaqqol dalil.

"O'zingiz suygan narsalardan infoq qilmaguningizcha, hargiz yaxshilikka erisha olmassiz" (Oli Imron, 92)

Yo'qotishdan qo'rqadigan yagona narsasi – iymon bo'lgan kishigina eng kuchlidir.

@Sarvar_Nazarboyev

Bugun 20 yoshga to'ldim.
Anglaganlarimdan 8 tasi:

1. Eng og'ir jang nafs bilan ekan. Yutdim deganingda yutqazgan bo'lasan. Ustoz, solih do'st, tasavvuf kitoblari unga qarshi qo'shinim bo'ldi.

2. Atrofda poyga ketyapti. Komfort hayot, qimmat mashina, uy-joy, kiyim-kechak. Unda g'olib bo'lishni yagona yo'li — poygada qatnashmaslik ekan.

3. Nima yoqmasligini aniqlab ol. Yoqadigani o'zi chiqib keladi. Kasb, buyum, turmush o'rtoq tanlashda yaxshi qoida.

4. Hayot tasodiflarga boy. Umuman kutmaganingda katta omad keladi. Umuman kutmaganingda katta xavf keladi. Omad va risk egizak. Ikkisiga ham tayyor tur.

5. Kompaniya, do'stlar, odamlarga "Bulardan menga nima foyda deb emas — mendan bunga nima foyda" qabilida fikr yurit. O'zingga yaxshi bo'ladi.

6. Muhitingda eng zo'ri bo'lma. Sekinlashib qolasan. Bitta kuchlirog'i bo'lsin. Doim harakatda bo'lasan.

7. O'zini-o'zi majburlash qiyin masala. Doim mas'uliyat yuklaydigan ustoz yoki rahbar bo'lgani foydaliroq ekan.

8. Boshqalardan kutuvni minimum qo'ying. Aslida, kutuvni umuman yo'qoting. Baxtli bo'lasiz.

@Sarvar_Nazarboyev

Eng zo'r ixtiro: "Будильник"

Chunki u boshqa ixtirolarga sababchi bo'lgan ixtirodir.

© Aziz Rahimov

@Sarvar_Nazarboyev

1000 litrlik idishni suvga to'ldirishingiz kerak.

Muddat belgilangan.

Kuniga 100 litr tashiy olasiz.

Agar bugun 50 litr bo'lib qolsa, ertasi kuni 150 litr tashishingizga to'g'ri keladi.

1000 litrlik idishni to'ldirish – bu sizni maqsadingiz.

Maqsadga erishish uchun har kuni u tomon borasiz.

Yurmagan kuningizni yuki, kelajakka tushadi.

Kelajakdan qarz olgan bo'lasiz.

"Vaqtida ingliz tilini o'rganmabman, endi kerak bo'lyapti" – deydi.

Bugun qilishingiz kerak ishlarni qilmasangiz, kelajakka yuki tushadi. Ko'p hissa qiynalasiz.

Shuncha yuklar yig'ilib qoldi, ertaga ko'tara olarmikinmiz?

Yoki tinchgina maqsaddan kechamizmi?

@Sarvar_Nazarboyev

Majburlovchi kuch kerak

Ochlikdan o'lmayapsiz. Ko'chada qolmadingiz.

100 yil oldin insonlarning asosiy g'ami bo'lgan bu ikki tashvish sizda yo'q.

Deyarli ishlamasangiz ham tirik qolsa bo'ladi.

Endi tanlov boshlanadi:

a) Yengil, mas'uliyatlarsiz, oson hayot. O'rtacha 3-4 yil shu temp. Natija — qolgan umr afsus, stress, qiyinchilikda o'tadi.

b) Og'ir, vazifalarga boy, mas'uliyat olingan hayot. Bu ham o'rtacha 5 yil. Qolgani osonmi? Yo'q. Undan ham qiyin. Lekin yoqimli. "a" dagi holatdan ko'ra ruhiy, moliyaviy holat ancha yaxshi.

"O'zingni boshqar, rag'batlantir. Har kuni ertalab orzularingni o'zingga ayt. Sen kuchlisan. Sen uddalaysan". Juda quruq gaplar.

Dastlabki bosqichda ba'zi videolar ko'rib, o'ziga ishonchi kuchli bo'ladi. 1-2 yil goho yonib, goho so'lib yuradi.

Keyin insonga baribir majburlovchi kuch kerak ekanini anglab yetadi. Rahbar, ustoz, muhit...

Majburlovchi kuch bo'lishi shart. Inson mas'uliyat olishi shart.

Supermarketimiz uchun sabzavot mahsulotlariga ertalab buyurtma berish mas'uliyatim meni har kuni sahar 4:00 da uyg'otadi.

Ustozimning kitob taqdimoti uchun qo'ygan deadlaynlari meni kechalari kitob o'qib chiqishga majbur qiladi.

Mas'uliyat oling. Qiyin, yoqimsiz bo'ladi. Lekin o'stiradi.

@Sarvar_Nazarboyev

Ustoz qo'lini ochadi. O'quvchilar har biri shokolad beradi.

Yaxshi trend. Ko'rdingizmi?

Maktab, universitetlarda yil sayin ustozlarga hurmat tushib bormoqda.

Hatto salom bermaydi. Qo'pol gapiradi. Qarsillatib yopib chiqib ketadi

Ustoz hatto, doskani o'zi tozalaydi. Yomon holat.

Hurmat qiladiganlar – baho uchun. Samimiylari - noyob.

Ilm faqat kitoblar, darslar, videolar orqali olinmaydi. Ilm yuqadi. Ustoz nazari bilan, deyishardi kattalarimiz.

Ustoz nazar qilishi uchun oldin siz nazariga tushishingiz kerak.

"Menga bir dona harf o’rgatgan kishining quliman. Xohlasa meni sotsin, xohlasa meni qul qilib ishlatsin".

Ali roziyallohu anhu.

Xorun ar-Rashid o'g'li ustozining oyog'iga suv quyayotganini ko'rdi. Jahli chiqdi va:

Ey Shayx! Faqat quymasin. Bir qo'li bilan quysin, bir qo'li bilan yuvsin ham!

Ustozlarga hurmat ana shunday bo'lgan. Ilm yuqqan. Yuksak marralarni zabt etishgan.

@Sarvar_Nazarboyev

Eng qiyini:

Uning xatosini aytdim.

Niyat — uning xatosini to'g'rilashmi yo o'zingni aqlli ko'rsatishmidi?

Yozdim.

1. Bu jumlalaringni go'zal qilishdan murod – o'zingni adabiyotchi ko'rsatish bo'lib qolmadimi?

2. Haqiqatda foyda berishmi yo aqlli ko'rinish?

3. Yo ko'proq tarqalishimi?

O'zi bu postdan maqsad — niyating unday emas ekanligini bildirish emasmi?

Eng qiyini bajarish emas. Yozish emas. O'rganish emas ekan.

Niyatni to'g'irlash ekan. U qalbni tub-tubida bo'larkan

@Sarvar_Nazarboyev

⏱ Vaqt juda tez o'tyaptimi?
Sabablar & Yechimlar

1. Har kun bir xillik. Bir xil ish. Bir xil odamlar. Miya yangi narsa ko'rmaydi. Vaqt o'tganini his qildiradigan yangi narsa bo'lmadi

2. Ijtimoiy tarmoqlarga bog'lanib qolish. Telegramda sang'ish, videolar ko'rish sizni "avtopilot" holatiga solib qo'yadi. Vaqt "yo'q" bo'lib qoladi.

3. Stress va haddan tashqari ko'p vazifalar. Doim shoshilib yurasiz. Vaqtni his qilishga vaqt bo'lmaydi

4. O'tmish yoki kelajak bilan ongni band qilasiz. Hoziringizni yashamaysiz. Vaqtni his qilmaysiz

Yechim nima?

1. Yangi joylar, yangi do'stlar, yangi kurslar, yangi kitoblar, hobbi, yangi mashg'ulotlar va h.z larni hayotingizga qo'shing. Yangi xotiralar — vaqtni "sekinlashtiradi"

2. Hozirgi lahzani his qiling. Ibodat vaqti faqat shuni o'ylang. Ovqatlanganda faqat ovqatlaning. Oddiy quyosh chiqishi yoki kofe ichishdan zavqlaning.

3. Mediaga cheklovlar qo'ying. Qachon kirishingizni rejalang.

4. Tafakkur qiling. Tanaffus olib turing.

5. 20/80 qoidasi. Qiladigan ishlarimizning 20% qismi 80% natija beradi. O'shani toping. Qolganini choping.

6. Baxtimizga bizda baraka tushunchasi bor. Taqvo, Qur'on, sahar vaqtida uyg'oqlik, qarindoshlar bilan aloqa — uning topilishiga sabablardir.

@Sarvar_Nazarboyev