Koʻngil ozodadur...

​​#табрик
ОТАБЕК ТУРСУНҚУЛОВГА

Кимлар учун олти ҳарфнинг жамланмаси,
Кимларгадир Қодирийни эслатар у.
Кимларнингдир энсасини қотирар ва
Кимларнингдир нафасини тезлатар у.

Ким нима деса десину, барибир исмда кўп гап бор. Улуғ адиб Абдулла Қодирий шоҳ асарининг бош қаҳрамонига бежиз Отабек исмини танламагандир.

Аммо бу дунёда исмга мос бўлиш деган тушунчалар ҳам бор. Отабек Турсунқулов бу шариф исм шарафини оқлаб келмоқда. Ҳар ҳолда доғ туширгани ҳақидаги хабарлар менга етиб келмаган.

Отабек Турсунқулов республикада андозаси бўлмаган "Ёшлар кундалиги" лойиҳасининг медиа бўлими раҳбари.

Ўзбекистон Журналистика ва оммавий коммуникациялар университети талабаси. Зиёли.

Ўзи Олмалиқдан. Етмиш ҳунар қўлидан келади дейишади-ю, бизга 10-15 таси маълум. Қолганини вақт кўрсатади.

Энди тасвирга олиш дейсизми, суратга олиш ва тушиш дейсизми, монтаж ишлари-ю ташкилий масалаларда номер биринчи. Агар рулга ўтирса машина деганимиз қанот чиқариб учаман дейди, учаман.

Шунга яраша диди ҳам баланд. Либос ва таом танлашда унча-мунча француз ресторани бош ошпази ҳеч гап бўлмай қолади.

Юзида доим табассум. Ҳазил-ҳузулга ўч. Ҳозиржавоб.

Шунча сифатлари билан бирон қиз уни уйланган, икки ўғилнинг отаси демайди.

Яна муҳими будирки, у менинг адашим. Қайсидир маънода бу ҳам бир устунлик. "Кундалик"чилар яхши билишадики, тор доирада тез-тез #Бизнинг_Отабеклар , #Отабеклар_Куч , #Яшасин_Отабеклар ҳештеклари такрорланиб туради. Энди нима десам экан, ишга яраша-да. Хуллас, #Отабеклар_Куч

Агар сизга адашдим ҳақида "чепе" гап етиб борса ишонманг. Туҳмат, ҳасадчиларнинг иғвоси, массонлар фитнаси. Шунақа.
Юқоридаги фикрлардан сўнг қадрли Отабек Турсунқуловни таваллуди куни билан табриклайман! Қадрли акамиз, дўстимиз ва ҳамкасбимизга Аллоҳ таолодан баракали умр, тинчлик-хотиржамлик, сиҳат-саломатлик, оилавий бахт, ишларида улкан ютуқлар тилайман!

Туғилган кунингиз муборак бўлсин!

Ҳурмат билан Отабек Бакиров

​​НИГОРА ШОФАЙЗИЕВА (тахаллуси Нигора Жалолиддин қизи)

Нигора Шофайзиева – шоира, ёзувчи, журналист, таржимон, педагог.

1967 йил 16 февралда Тошкент вилояти Ангрен шаҳрининг Дукент қўрғонида туғилган. 1985-1990 йилда Тошкент давлат университети (ҳозирги ЎзМУ) журналистика факультетида таҳсил олган.

Фаолияти давомида “Ангрен” шаҳар радиосида мухбир (1990-1991), “Ангрен ҳақиқати” газетасида мухбир (1991-1992), масъул котиб (2001-2003), бош муҳаррир ўринбосари (2012-2013), “Паркент тонги” газетасида адабий ходим (1998-2001), “Туркистон” газетасида бўлим бошлиғи (2005-2006), “Экология хабарномаси” журналида масъул котиб (2010-2012), “Улуғ йўл” газетасида бош муҳаррир (2013-2015) бўлиб ишлаган.
Шунингдек, Ангрен шаҳридаги 41-мактабда (1994-1998), Ўзбекистон давлат жаҳон тиллари университети халқаро журналистика факултетида (2003-2005) ёшларга таълим берган.

2021 йилдан бошлаб Ўзбекистон Ёзувчилар уюшмаси Тошкент вилояти бўлими муассислигидаги “Адабиёт зиёси” газетаси бўлим бошлиғи сифатида ишлаб келмоқда.

Илк шеъри 1981 йилда “Ленин учқуни” (ҳозирги “Тонг юлдузи”) газетасида босилган. Биринчи китоби 2004 йилда Эшқобил Шукур сўзбошиси билан “Умидли дунё” номи остида чоп этилган. Шундан кейин “Ўзлигини топган эл” (публицистик мақолалар), “Кўзи очиқ кетганлар” (қисса ва ҳикоялар) китоблари ўқувчилар қўлига етиб борди.

Таржимон сифатида Болтиқбўйи болалар шоирларининг шеърлари тўплами – “Кулиб чиққан чечаклар”, Марта Гудменнинг “Келишилган никоҳ”, Аҳмад Лутфий Қозончининг “Хадичаи Кубро”, Невзат Тарханнинг “Оила – нажот”, Исмоил Хакки Улучинарнинг “Имом Ғаззолийнинг “Тавба китоби” шарҳи” ва бошқа асарларни ўзбек тилига таржима қилган. Ўзининг асарлари ҳам рус ва турк тилларида чоп этилган.

Нигора Шофайзиева 2012 йилда “Йилнинг энг фаол журналисти” кўрик-танлови ғолиби бўлди. 2015 йилда журналистика соҳасида “Олтин қалам” Х миллий мукофоти халқаро танловида ЮНЕСКО ташкилотининг соврини билан тақдирланган.

2022 йилда Ўзбекистн Ёзувчилар уюшмаси, 2024 йилда Ўзбекистон Журналистлар уюшмаси аъзослигига қабул қилинди.