БУГУНГИ ГАПЛАР
Замон келди ҳўп ажиб. Бунда уйдурмалар палак ёзиб ҳосилга кирди, оломон-да уни ўзгача иштаҳа билан паққос тушираётир. Кимса йўқки зараркунанда иллатнинг томирини қуритиб, кулини кўкка совургани. Кифтларга минган Азозил бозорига солди бори кимсани. "Ҳақ" дебон ёқасини чок этаётган муллолар ҳалқумлари истагидан бери келмай авомни сарсон этаётир, халқнинг кўзига парда тутмоқдан шод, кўнгли таскинга қовушган. Ажаб, Тангрининг қули, Муҳаммад (с.а. в.)нинг умматлари қачондан ўқиб уққанига эмас, балки кўр-кўрона тинглаганига эътиқод этмоқдин ўзни овутишга маҳкум этилди?! Ахир илк нидо "ИҚРО" эмасмиди? Роббул оламийн-у пайғамбарлар бандани илмга даъват этмадими?
Бир замонлар Абдулла Қодирий бундоқ нафсининг қули, ботилга маҳбуб кимсалар ҳақинда "ЙИҒИНДИ ГАПЛАР"ида аччиқ-тиззиқ сўз деб эдики, бундайин ғафлатга кетган кишиларнинг ҳолидан куйиб. "Ўпса нетар, ювса кетар" дея миллатининг ҳолидан воқиф эса-да, бир туки қилт этса кошки! Истибдод қамчиси бош узра туриб, элининг шўри қурибдики ўзагига болта уришдан бери келмайдиган инсонлар замондош-у Ватандош эканлигидан надомат чекади. Бунда юрт бошига келган валломатлар-да шундоқ бепарво, фақат жони ҳузури учун "Катта оға"си не деса кўнаверадиган, яғрини ялашдан таптортмайдиган одамларга нафратини ҳеч иккиланмай, ҳайиқмай изҳор этиб, даврида замонасозлик қилган Йўлдош Оҳунбобоевни-да қаттиқ танқид остига олади.
Дарҳақиқат, миллатнинг миллат, халқнинг халқ, давлатнинг давлат бўлишида таълимнинг ўрни бўлакча. Айтинг, қай тараққий топган юрт борки, негизида маорифнинг ҳиссаси бўлмаган? Энди Й.Оҳунбобоевнинг ўтган асрнинг 30-йилларидаги "жумҳуриятимизда ҳар 200 мурасса чақирим ерта ёхуд хар 4909 одамға битта мактаб бор. Ёки ўқиш ёшида бўлған болаларнинг хар 979 тасига бир мактаб тўғри келадир", деган ҳисоботига қулоқ тутиб, айни аҳволимиз билан таққослаб кўрингчи мундоқ... Ҳа, ўлманг! Шунда ҳам тилингизни тишлаб тураберишга тоқат топдингизми?Мен-да йўқ. А.Қодирий "Саккиз чақирим бир тош" бўлиб, уни яхши отда бир соатда ўтиши мумкинлигини айтаркан 200 чақирим 24 тошлигини, "уйида энасини зериктирган гўдак" бу масофани босиб ўтишига ишонмайди. Бу, турган гапки, аён ҳақиқат!
Бугунги кун биргина бизнинг қишлоқдаги мактаб биноси 750 болага мўлжалланган, бироқ унда 1350 дан зиёд қоракўз таҳсилга ташна ё ҳафсаласи пир бўлиб мардикорликни касб этган. Хўш, инсоф ила айтинг, билимсиз ким камол топган? Ҳеч ким! Ачинарлиси шуки, бундан бир аср илгари ҳам шу ҳол элимизни элакдан ўтказиб, табиатини қулликка мойил қилиб қўйган, афсуски.
А.Қодирий ўзининг "ҳар куни худоға тўққуз маротаба осий бўлиб, ўн саккиз мартаба тавба ва изтиғфор" этиб эса-да, исёнсиз лаҳзаларига куяди ва "Акмал" (Икромов — изоҳ М. Б.дан)ларнинг босқинчига ён босганига ғазаб қилиб, киноялик сўзини очиқ ошкораламоқдан қўрмас.
А.Қодирий сўзи сўнгида "аёлларга жабру зулм" деб гап учириб кетишидан фахмладимки, ўзбек қизларининг, оналарининг ҳоли унда ҳаваслик бўлмаган. Ўйлайман, жадид йўлини тутган зиёли аждодларимиз эскиликдан қолган ҳам нафс амри қоришган, имомлар тарифидан дин ўлароқ ташвиқ этилмиш Яратган ҳукмидан йироқ ақийдалар урчиган даврда бекорга аёлни илм олмоққа чақирмаган. Онанинг билимли бўлиши — миллатнинг, халқнинг, давлатнинг қудратли бўлишига ишонишган. Асли-да шундоқ!
Билмадим. Билганим, агар Абдулла Қодирий ҳақ бўлса, биз онгли тараққий этмабмиз. Боисики, мустақил бўлиб ҳали ҳам юз йил наридаги муаммолар билан ўралашарканмиз ҳаливери ривожланмаймиз, буни хаёл қилмасак ҳам бўлаверади, минг афсус...
Муҳаммаджон Бегматов
Замон келди ҳўп ажиб. Бунда уйдурмалар палак ёзиб ҳосилга кирди, оломон-да уни ўзгача иштаҳа билан паққос тушираётир. Кимса йўқки зараркунанда иллатнинг томирини қуритиб, кулини кўкка совургани. Кифтларга минган Азозил бозорига солди бори кимсани. "Ҳақ" дебон ёқасини чок этаётган муллолар ҳалқумлари истагидан бери келмай авомни сарсон этаётир, халқнинг кўзига парда тутмоқдан шод, кўнгли таскинга қовушган. Ажаб, Тангрининг қули, Муҳаммад (с.а. в.)нинг умматлари қачондан ўқиб уққанига эмас, балки кўр-кўрона тинглаганига эътиқод этмоқдин ўзни овутишга маҳкум этилди?! Ахир илк нидо "ИҚРО" эмасмиди? Роббул оламийн-у пайғамбарлар бандани илмга даъват этмадими?
Бир замонлар Абдулла Қодирий бундоқ нафсининг қули, ботилга маҳбуб кимсалар ҳақинда "ЙИҒИНДИ ГАПЛАР"ида аччиқ-тиззиқ сўз деб эдики, бундайин ғафлатга кетган кишиларнинг ҳолидан куйиб. "Ўпса нетар, ювса кетар" дея миллатининг ҳолидан воқиф эса-да, бир туки қилт этса кошки! Истибдод қамчиси бош узра туриб, элининг шўри қурибдики ўзагига болта уришдан бери келмайдиган инсонлар замондош-у Ватандош эканлигидан надомат чекади. Бунда юрт бошига келган валломатлар-да шундоқ бепарво, фақат жони ҳузури учун "Катта оға"си не деса кўнаверадиган, яғрини ялашдан таптортмайдиган одамларга нафратини ҳеч иккиланмай, ҳайиқмай изҳор этиб, даврида замонасозлик қилган Йўлдош Оҳунбобоевни-да қаттиқ танқид остига олади.
Дарҳақиқат, миллатнинг миллат, халқнинг халқ, давлатнинг давлат бўлишида таълимнинг ўрни бўлакча. Айтинг, қай тараққий топган юрт борки, негизида маорифнинг ҳиссаси бўлмаган? Энди Й.Оҳунбобоевнинг ўтган асрнинг 30-йилларидаги "жумҳуриятимизда ҳар 200 мурасса чақирим ерта ёхуд хар 4909 одамға битта мактаб бор. Ёки ўқиш ёшида бўлған болаларнинг хар 979 тасига бир мактаб тўғри келадир", деган ҳисоботига қулоқ тутиб, айни аҳволимиз билан таққослаб кўрингчи мундоқ... Ҳа, ўлманг! Шунда ҳам тилингизни тишлаб тураберишга тоқат топдингизми?Мен-да йўқ. А.Қодирий "Саккиз чақирим бир тош" бўлиб, уни яхши отда бир соатда ўтиши мумкинлигини айтаркан 200 чақирим 24 тошлигини, "уйида энасини зериктирган гўдак" бу масофани босиб ўтишига ишонмайди. Бу, турган гапки, аён ҳақиқат!
Бугунги кун биргина бизнинг қишлоқдаги мактаб биноси 750 болага мўлжалланган, бироқ унда 1350 дан зиёд қоракўз таҳсилга ташна ё ҳафсаласи пир бўлиб мардикорликни касб этган. Хўш, инсоф ила айтинг, билимсиз ким камол топган? Ҳеч ким! Ачинарлиси шуки, бундан бир аср илгари ҳам шу ҳол элимизни элакдан ўтказиб, табиатини қулликка мойил қилиб қўйган, афсуски.
А.Қодирий ўзининг "ҳар куни худоға тўққуз маротаба осий бўлиб, ўн саккиз мартаба тавба ва изтиғфор" этиб эса-да, исёнсиз лаҳзаларига куяди ва "Акмал" (Икромов — изоҳ М. Б.дан)ларнинг босқинчига ён босганига ғазаб қилиб, киноялик сўзини очиқ ошкораламоқдан қўрмас.
А.Қодирий сўзи сўнгида "аёлларга жабру зулм" деб гап учириб кетишидан фахмладимки, ўзбек қизларининг, оналарининг ҳоли унда ҳаваслик бўлмаган. Ўйлайман, жадид йўлини тутган зиёли аждодларимиз эскиликдан қолган ҳам нафс амри қоришган, имомлар тарифидан дин ўлароқ ташвиқ этилмиш Яратган ҳукмидан йироқ ақийдалар урчиган даврда бекорга аёлни илм олмоққа чақирмаган. Онанинг билимли бўлиши — миллатнинг, халқнинг, давлатнинг қудратли бўлишига ишонишган. Асли-да шундоқ!
Билмадим. Билганим, агар Абдулла Қодирий ҳақ бўлса, биз онгли тараққий этмабмиз. Боисики, мустақил бўлиб ҳали ҳам юз йил наридаги муаммолар билан ўралашарканмиз ҳаливери ривожланмаймиз, буни хаёл қилмасак ҳам бўлаверади, минг афсус...
Муҳаммаджон Бегматов