Jamol Bobo

Бугунги финал ҳақида фикр билдирар экан, жуда кўпчилик мазахнамо ёндашяпти, икки муаммоли клубнинг баҳси, гўёки финалга лойиқ бўлмаган жамоалар чиқиб қолгандек тасаввур пайдо қилишяпти.

Ҳа, иккиси ҳам бу мавсумда жуда муаммоли, инкор этмайман, лекин ҳар иккиси ҳам ўзига яраша рақобатбардош эканини, бекорга бу ергача етиб келмаганини ҳам айтиш керак. Хўш, унда нега АПЛ да 16-17 ўринда боришмоқда?

Тўғри, сўнгги натижаларга қарасак ҳам аҳвол яхши эмас, лекин бир нарсани эътиборга олиш керак, “Тоттенҳэм”, айниқса “МЮ” каби клублар, футболчиларидан тортиб, мухлислар менталитетигача ўртамиёналардан фарқ қилади. Дод десак ҳам, вой десак ҳам шунчаки, кучли ўнлик ёки 12-ўрин учун бор куч билан ҳаракат қилиш жуда қийин. “Кристал Пэлас” ёки “Брентфорд” бутун умр шунақа шартларда яшайди, чунки у ерда тўп сураётган футболчиларнинг мотивацияси бошқа: ўзини кўрсатиш, топ клубларга ўтиш, ўсиш... Бу жамоалар мухлислари ҳам ҳар қандай ўринда юрса ҳам алоҳида ғалабалардан, голлардан баҳра олишни билишади. Шунинг учун сўнгги ойлардаги “МЮ” ва “Тоттенҳэм”ни 10-ўрин эмас, 16-ўринни олганини, тасодифий бир ўйинда “Вест Ҳэм”ни юта олмаганидан маломат қилиш қийин. Ҳа, маломат остида яшашяпти, лекин объектив сабаблар бор демоқчиман.

Таққослаш учун бу клубларнинг Европа Лигасидаги ўйинларига қаранг. Агар чинданам тузатиб бўлмас муаммоли бўлганида, финалгача етиб келиш мумкинмиди? “Атлетик”,”Сосьедад” “Айнтрахт” каби жамоалар кубок форматини сув қилиб ичиб юборган, “Реал” ва “Барселона” билан ташлашиб юришибди-ку?

Ёки шу клубларнинг АПЛ юқори ўринлардаги жамоаларга қарши ўйинларини эсланг. Масалан, ўтган жума куни “Челси” ва “МЮ” ўйнади? Орада фарқ сезилдими? Бири 5-ўринда, иккинчиси 16.
Лекин менга бу фарқ сезилмади, гўёки тенг жамоалар ўйнаётгандек туюлди. Мойес даврида “МЮ” жуда ёмон ўйнагандек тасаввур сақланиб қолган. Лекин ўша жамоа 7-ўринни олган, ҳозиргидан 20 очко кўп тўплаганди. Лекин масалан топ ўйинлар билан солиштирсак, яъни “МЮ”нинг бу йилги “Арсенал” , “Ливерпул”, “Сити”га қарши ўйинлари билан ўша Мойеснинг “МЮ”си топ рақибларга қарши ўйнаган учрашувларни таққосласак, ҳозиргиси кучлироқ кўринади. Нега?

Чунки ҳозир ўртамиёналар кучайган. Мойеснинг “МЮ”си минг пасайса-да, индивидуал футболчилар билан ўртамиёна ё аутсайдерларни бемалол ютиб очко тўпларди. Ҳозир қаршилик даражаси ошган, агар инқирозга тушсангиз, осон чиқиб кетмайсиз. Ҳар бир жамоада индивидуал кучли футболчилар, тактик кучли мураббийлар бор, ҳар ҳафта оғир синов кутади. Ҳар ҳафта ютиш учун эса мотивация керак. Айни дамда “МЮ”да ҳам, “Тоттенҳэм”да ҳам йўқ.

Айтмоқчиманки, барибир диққатни бир жойга тўплаганда “МЮ” ҳам, “Тоттенҳэм” ҳам кучли жамоа. Бугун эса финал.

@aslanov_futbol