❄️ ҚОР

Янги йил кунига ярашиғинг бор,
Ўшанда тўзғоқлаб ёғмайсанми, қор?

Тўғри, аямажуз, балки ҳақинг бор,
Оқкўнгил боғларга боқмайсанми, қор?

Тақвимга қарамас, бу бевош баҳор,
Ёким бир-бирингга ёқмайсанми, қор?

Ёғсанг, ана, Орол ётар интизор,
Ўшангга сел бўлиб оқмайсанми, қор?

Нобуд бўлмасмикин ўрик, олчазор?
Кўрпа бўлиб ўзинг сақлайсанми, қор?

Ҳосилга кўз тиккан қанча умидвор-
ларни оқ аридек чақмайсанми, қор?

Мендек бесабрсан, мендек беқарор...
Сен яна ўзингни оқлайсанми, қор?

✍️ Иқбол МИРЗО