Қалблар сакинати, ойлар дилбари,
Мўмин юракларнинг жондан суйгани.
Гўё ёмғир кутган майса сингари,
Рамазон, биз сенга интизор бўлдик,
Кела қол, куттирма, жуда соғиндик!
Ўртанмоқ дардининг қўлидан тутиб,
Ҳижрон чашмасидан бир қултум ютиб,
Шайтонлар занжирбанд бўлишин кутиб,
Рамазон, биз сенга интизор бўлдик,
Кела қол, куттирма, жуда соғиндик!
Ҳилолга мунтазир бўлди осмоним.
Ойларнинг ичида ўзинг султоним.
Қалби хасталарга ширин дармоним,
Рамазон, биз сенга интизор бўлдик,
Кела қол, куттирма, жуда соғиндик!
Диллар ҳаловатни ҳис этсин учун,
Сакинатга тўлиб тонг отсин учун,
Жисмлар лаззатга юз тутсин учун,
Рамазон, биз сенга интизор бўлдик,
Кела қол, куттирма, жуда соғиндик!
Раббим раҳматига ғарқ қилар бизни.
Тонглар ибодат-ла очамиз кўзни.
Имон нури равшан айлабон юзни,
Рамазон, биз сенга интизор бўлдик,
Кела қол, куттирма, жуда соғиндик!
Сенда безатилар ёруғ осмонлар.
Қалбларни зийнатлар хатми Қуръонлар.
Йилда бир бор бўлар бу ширин онлар,
Рамазон, биз сенга интизор бўлдик,
Кела қол, куттирма, жуда соғиндик!
Мўминлар қўлларин дуога чўзган,
Қадр кечалари уйқусин бузган.
Расул саховатда шамолдан ўзган,
Рамазон, биз сенга интизор бўлдик,
Кела қол, куттирма, жуда соғиндик!
Кунларимиз соғинч билан ўтмоқда,
Лекин дийдор они эмас йироқда.
Мўминлар ўртаниб, йиғлаб кутмоқда,
Рамазон, биз сенга интизор бўлдик,
Кела қол, куттирма, жуда соғиндик!
Хонзодабегим Дониёрова
Тошкент ислом институти 2-курс талабаси