Hidoyat.uz

#савол_жавоблар

🖐БАРМОҚЛАРНИ ҚИРСИЛЛАТИШ

❓CАВОЛ: Шариатимизга кўра бармоқларни қирсиллатиш ёмон одатми?

💬 ЖАВОБ: Бисмиллаҳир Роҳманир Роҳим.
Намозда бармоқларни қирсиллатиш макруҳ амал. Намоздан ташқарида эса одобсизликдир. Валлоҳу аълам.

✅Ўзбекистон мусулмонлари идораси
Фатво маркази.

✈️ @HidoyatUz

خير العمل ما اثر مجدا و خير الطلب ما حصل حمدا.

Амалларнинг яхшиси – улуғлик бахш этадигани, истакларнинг яхшиси олқиш қозонтирадигани.

Изоҳ. «Тожул арус» изоҳли луғатида «мажд» сўзи – «мурувват, саховат, карам, шараф» маъноларини ўз ичига олиши айтилган. Шунингдек, мажд сифати ота-боболар туфайли юзага чиқиши ҳам таъкидланган. Биз бу маъноларнинг барчасини «улуғлик» деган сўз билан ифодалашга ҳаракат қилдик. Демак инсонни мард ва сахий қиладиган, ҳурмат ва шарафга лойиқ этадиган ҳар қандай феъл амалларнинг яхшисидир. Улуғлик ота-боболардан ўтиши ҳам ҳақ. Бас, шундай экан, кейинги авлоднинг айнимаслиги бизга, бизнинг наслни пок сақлашимизга боғлиқ.
Истакларимизнинг аксари дунёга боғланган. Шунинг учун уларни яхши истак деёлмаймиз. Аслида истакларнинг яхшиси Охиратга боғланганидир. Агар қалбингизни титиб битта шундай истак тополсангиз, сизга олқишлар бўлсин!

“Унвонул баён” дан.

✈️ @HidoyatUz

📚 Китоб ўқи, ўғлим...

Қуёш мудом ёнар ва нур сочади,
Китоб илм, барака йўлин очади,
Унда юрган мурод-мақсадини қучади,
Китоб ўқи, ўғлим, илмни қуролинг қил.

Ҳар доим бўлай десанг иззатли,
Сўзларим бўлсин десанг ҳикматли,
Ишларим бўлсин десанг баракотли,
Китоб ўқи, ўғлим, илмни қуролинг қил.

Китобдир илмнинг асл булоғи,
Илмдир ҳаётнинг ўчмас маёғи,
Илмсизларнинг йўқ турқи-сиёғи,
Китоб ўқи, ўғлим, илмни қуролинг қил.

📚"Ислом нури" газетасидан

✈️ @HidoyatUz

#фарзанд_тарбияси

Фарзандингизнинг сочини тарасангиз, «Набий соллаллоҳу алайҳи васаллам «Кимнинг сочи бўлса, уни парвариш қилсин», деганлар, ўша ҳадисга мувофиқ тараб қўйяпман» деб айтинг.

Ўғилчангизга атир суртсангиз, Набий соллаллоҳу алайҳи васаллам «Менга бу дунёдан хушбўйлик аёллар маҳбуб қилинди. Намоз эса кўз қувончим қилинди», деганлар, ўша ҳадисга мувофиқ атир суртяпман» деб айтинг.

Фарзандингиз мактабга кетаётганда «Набий соллаллоҳу алайҳи васалламнинг «Ким илм талабида йўлга тушса, Аллоҳ унга жаннат йўлини осон қилиб қўяди», деган ҳадисларини эслатинг.

Фарзандингизга кулиб қараганингизда Набий соллаллоҳу алайҳи васалламнинг «Биродарингнинг юзига табассум билан боқишинг ҳам садақадир», деган ҳадисларини эслатинг.

Фарзандингизни мақтасангиз, Набий соллаллоҳу алайҳи васаллам: «Яхши сўз ҳам садақадир», деганларини эслатинг.

Фарзандингизга овқат берганда Набий соллаллоҳу алайҳи васалламнинг «Челагингдан биродарингнинг челагига сув қуйишинг ҳам садақа», деган ҳадисларидан олганингизни айтинг.

Бирор йиғинда кексалар ҳам ўтирган бўлса, фарзандингизга уларни ҳурмат қилишни ўргатиб, Набий соллаллоҳу алайҳи васаллам: «Кичикларимизга раҳм-шафқат қилмаган, кексаларимизни эъзозламаганлар биздан эмас», деганларини айтинг.

Шу тариқа фарзанд тарбиясини суннат ва сийратга боғлаб, ҳадислар асосида таълим-тарбия беринг.

✈️ @HidoyatUz 🌐Instagram

Буроқ

Нубувватнинг 10 йили Макка мушрикларининг тазйиқлари кучайди. Шу йили Хадича розийаллоҳу анҳо, у кишидан аввал Абу Толиб оламдан ўтди. Мусулмонлар ҳам суянчиқлари, ҳам ҳимоячиларидан айрилишди. Ғам-ғуссанинг кўплигидан ўша йилни қайғу йили деб аташди.
Аллоҳ таоло Ҳабибининг қайғусини аритиш мақсадида Исро ва Меърож ҳодисасини туҳфа этди. Набий алайҳиссалом Жаброил алайҳиссалом ҳамроҳлигида Буроққа миниб, бутун коинотни, балки ундан ҳам олисроқ масофаларни босиб ўтдилар.
Буроқ Аллоҳ таоло яратган ҳайвон бўлиб, Пайғамбаримиз алайҳиссалом Исро ва Меърож кечасида уни минганлар. “Саҳиҳи Бухорий”­да Буроқ оқ рангли, жуссаси хачирдан кичик, эшакдан каттароқ ҳайвон экани айтилади. Имом Нававий раҳимаҳуллоҳ бундай дейди: «Тилшунослар: “Буроқ – Набий алайҳиссалом Исро кечаси минган маркабнинг исмидир”, дейишган. Ибн Дурайд раҳимаҳуллоҳ: “Буроқ – тезлиги сабаб “чақмоқ” сўзидан олинган исмдир”, деган. Бир ўринда “Ранги оқ бўлгани учун”, дейилади» (“Шарҳу Нававий ъала Муслим” 2/210). Манбаларда Буроқ назари тушган энг узоқ масофани ҳам бир қадамда босиб ўта олиши айтилади.
Имом Муслим раҳимаҳуллоҳ ривоят қилади: «Пайғамбаримиз алайҳиссалом: “Менга буроқ келтирилди. У оқ рангли ҳайвондир. Эшакдан баланд, хачирдан паст. Қадамини кўзи етадиган ерга (кўз илғайдиган даражадаги узоқ масофага) қўяди. Мен уни минган ҳолимда Байтул Мақдисга бордим. Кейин уни пайғамбарлар боғлаган ҳалқага боғладим”, деб марҳамат қилганлар. Ибн Хузайманинг ривоятида: “Назари тушган энг узоқ ерга туёғини қўя олади”, дейилган.
Ҳадиси шарифдаги “кейин уни пайғамбарлар боғлаган ҳалқага боғладим” жумласидан Набий соллаллоҳу алайҳи ва салламдан олдин ўтган барча пайғамбарлар Буроққа минишгани маълум бўлади. Имом Насоий ва Ибн Мардавайҳ Язид ибн Абу Молик, у киши Анас розийаллоҳу анҳудан қилган ривоятида: “(Буроқ) Набий алайҳиссаломдан олдин ўтган пайғамбарларга бўйсундирилган эди”, дейилган.
Ибн Масъуд розийаллоҳу анҳунинг ривоятида: “Пайғамбаримиз алайҳиссаломга Буроқ келтирилди. У зот ва Жаброил алайҳиссалом унга минишди. Кейин (Буроқ) иккисини (миндириб) сайрни бошлади”, дейилади.
Ривоятларда келишича, Буроқ – Аллоҳ таоло Иброҳим алайҳиссаломга бўйсундириб берган ҳайвоннинг айнан ўзидир. Уни миниб, Ҳожар онамиз ва ўғли Исмоилни зиёрат қилган. Ўшанда Иброҳим алайҳиссалом Сора онамиз билан Фаластинда яшар эди. Буроқ Иброҳим алайҳиссаломни Маккага, оиласини зиёрат қилиб келиши учун олиб борган. Ибн Ҳажар Асқалонийнинг “Фатҳул Борий” асарида бундай келади: “Иброҳим алайҳиссалом Ҳожар онамизни ҳар ойда бир бор зиёрат қилган. Буроқда эрта тонгда бориб, сўнг шомда қайтиб келарди”.
Уламолар Буроқнинг қанотлари бор ёки йўқлиги борасида ихтилоф қилишади. Бир гуруҳ уламолар қанотлари мавжуд деса, бошқа гуруҳ уламолари буни инкор этишмаса-да, унга ишора ҳам қилишмайди.
Уламолар Буроқнинг жаннат мевалари билан озиқланишига иттифоқ қилишган.

🔴 Манбалар асосида
Юлдуз КОМИЛОВА тайёрлади.

📚"Ислом нури" газетасидан

✈️ @HidoyatUz

Уламоларга ёмонлик қилувчи ҳар бир кишига ибрат

Нима учун биз Имом Аҳмад ибн Ҳанбал ҳаётларидан ибрат олмаймиз?
Имом Аҳмадга азият етказмоқчи бўлган кишилар кўп бўлган. Имом Аҳмад озор топдилар. У киши қамоққа олиниб калтакландилар. Ҳа, шундай улуғ инсон ҳам калтакланди.

Агар сиз Имом Аҳмаднинг бошига тушган азоб-уқубатлар тафсилотини ўқиб ўргансангиз, ғалати ишлар бўлганини биласиз. Лекин, шунга қарамай, халифа Мутаваккил даврида бу машаққатлар Имом Аҳмаддан кўтарилганда ҳам у киши ёмон дуо қилмадилар. Халифа Маъмун, Мўътасим – буларнинг барчаси мўътазилийлар билан бирга бўлишган. Мутаваккил даврига келиб Имом Аҳмаддан бу қийинчиликлар кўтарилди. Бу машаққатлар ўрнини ҳурмат-эҳтиром эгаллади. Яъни у кишига эҳтиром кўрсатиш Мутаваккил халифалиги даврида бошланди. Ўша вақтда бир киши Имом Аҳмад ибн Ҳанбалнинг олдига келиб: «Аҳмад ибн Абу Дуот ва Бишрул Марисийларни дуои бад қилиб, уларга Аллоҳдан ёмонлик сўранг» – деди. Чунки Имом Аҳмадга етган азиятларга шулар сабабчи бўлган эдилар.
Ҳалиги одам: «Уларнинг зарари учун Аллоҳга дуо қилинг» – деди. Имом Аҳмаднинг жавоби нима бўлди, биласизларми? У киши: «Сен туфайли дўстинг дўзахда азобланса, сенга бунинг нима фойдаси бор? Сен ундан нима манфаат оласан?» - деди ва улар ҳаққига яхшилик сўраб дуо қилдилар.
Биз салафларимизнинг ҳаёт тарзлари олдида тўхталадиган бўлсак, ўтган солиҳ кишилар ва уларга ўхшаш рижоллардан ибрат олишимиз лозим.
Янглишган, адашган одамлар Набий соллаллоҳу алайҳи ва саллам даврларида ҳам бўлган. Ҳа, шундай, у пайтларда ҳам мунофиқлар бўлган. Раббимиз субҳонаҳу ва таоло Ўзи хоҳлаган кишисидан ўч олади. Ўзи хоҳлаган кишисини кечириб афв этади.
Хавотир олманг, Раббингизни Ўзи ҳар ишнинг тадбирини қилгувчи Зотдир. Имом Аҳмад Аҳмад ибн Ҳанбал Абу Дуотга ҳеч қачон ёмон дуо қилмадилар. Лекин Абу Дуот умрининг охирида фалаж бўлиб, танаси буткул шол бўлиб қолди. У узоқ вақт шу ҳолатда ётди. Бир куни Абдул Азиз Киноний унинг олдига кирди ва Бишрул Марисийнинг аҳволига қараб унга: «Мен сени кўргани келганим йўқ. Лекин сен тананг остида қандай қамалиб ётганингни кўргани келдим», деди.

Кўрдингизми, мана ибрат!!

Имом Бутий.

✈️ @HidoyatUz 🌐Instagram

Қиймат

Ҳаётда математика ечолмайдиган нарсалар бор. Масалан, ҳалол бир сўм ҳаром беш сўмдан кўп бўлади.

✈️ @HidoyatUz 🌐Instagram

ҒАЗАБНИНГ КАФФОРАТИ

Абу Масъуд Бадрий қўл остидаги қулини қамчи билан аямай урди. Шунчалик жаҳли чиққан эдики, ҳар урган сари ўзини тўхтата олмай яна савалар эди. Қул дод солиб ёрдам сўрар, лекин ҳеч ким унга ёрдам бера олмас эди. Шу маҳал орқа томонидан:
– Эй Абу Масъуд, билиб қўй!
У шунчалик ғазаб отига минганидан кимнинг овози эканини ажрата оладиган аҳволда эмас эди. Овоз яна ҳам яқинроқдан, баландроқ эшитилди:
– Эй Абу Масъуд, билиб қўй!
Ниҳоят орқасига ўгирилиб қаради-ю, ҳайбат ва қўрқинчдан қалтираб қолди. Қўлидан қамчиси ҳам тушиб кетди. Бошини эгиб мункайиб қолди. Қараса – Расулуллоҳ соллаллоҳу алайҳи ва саллам турибдилар!
– Эй Абу Масъуд, билиб қўй! Билгинки, Аллоҳ сенга бу қулга қодир бўлганингдан кўра қодирроқдир!
Абу Масъуд қилган ишидан уялиб кетди. Гуноҳига каффорат тўлашни ирода қилиб:
– Эй Аллоҳнинг Расули, уни Аллоҳнинг розилиги учун озод қилдим! – деди.
– Агар шундай қилмасанг эди, дўзах эшигини очган бўлур эдинг, – дедилар Сарвар коинот.

📚“Расулуллоҳ соллаллоҳу алайҳи ва саллам ҳаётидан лавҳалар” китобидан.

✈️ @HidoyatUz 🌐Instagram

#савол_жавоблар

🌺ЖАННАТНИНГ ЭНГ АФЗАЛ АЁЛЛАРИ

❓CАВОЛ: Эшитишимча, тўртта аёл мукаммал аёл дейилган экан. Ўша аёллар ким?

💬 ЖАВОБ: Бисмиллаҳир Роҳманир Роҳим.
Абдуллоҳ ибн Аббос разияллоҳу анҳудан ривоят қилинган ҳадиси шарифда Расулуллоҳ саллаллоҳу алайҳи васаллам: «Жаннатнинг энг афзал аёллари — Хадича бинти Ҳувайлид, Фотима бинти Муҳаммад, Марям бинти Имрон ва Фиръавннинг аёли Осиё бинти Мазоҳимдир» , – деганлар (Имом Аҳмад ривоятлари). Валлоҳу аълам.

✅Ўзбекистон мусулмонлари идораси
Фатво маркази.

✈️ @HidoyatUz 🌐Instagram

Ростгўйлик

Доим рост гапиринг, шунда кўп нарсани эслаб юришингизга ҳожат қолмайди.

✈️ @HidoyatUz 🌐Instagram

Таҳоратнинг ажиб ҳикматлари

а) вужудга бириккан электронлар чиқариб ташланади ва улар таъсирида бўлаётган жисмоний оғирлашув йўқолади;
б) тананинг қариши секинлашади;
в) лимфа (қон билан тўқималараро модда алмашинувини таъминловчи суюқлик) айланиши энг яхши савияда бўлади.
Набий соллаллоҳу алайҳи ва саллам дедилар: «Ким таҳорат олиб ухласа, унинг бошида бир фаришта тунайди. У кечаси уйғонса: Аллоҳим, унинг гуноҳларини кечир, чунки у, таҳоратли ухлади, дейди» (Табароний ривояти).

✈️ @HidoyatUz 🌐Instagram

#савол_жавоблар

🧕АЁЛЛАРНИНГ ҚИБЛАГА ЮЗЛАНИБ ДУО ҚИЛИШИ ҲАЁСИЗЛИККА КИРАДИМИ?

❓CАВОЛ: Дуони қиблага юзланиб, қўлларни кўтарган ҳолда қилинади, деб эшитгандим. Aёлларга шу ҳолатда дуо қилиш ҳаёсизликка кирадими?

💬 ЖАВОБ: Бисмиллаҳир Роҳманир Роҳим.
Аёлларнинг қиблага юзланиб, қўл кўтариб дуо қилишлари ҳаёсизликка кирмайди. Аксинча, шундай ҳолда дуо қилиш мустаҳабдир. Дуода қиблага юзланиш афзал, лекин Қиблага қарамасдан дуо қилса ҳам, дуруст. Валлоҳу аълам.

✅Ўзбекистон мусулмонлари идораси
Фатво маркази.

✈️ @HidoyatUz 🌐Instagram

🌺 АЛЛОҲ РОЗИЛИГИ

Аллоҳга ризқ илинжида ибодат қилма, Аллоҳга мансаб илинжида ибодат қилма, Аллоҳга дунёдаги насибанг илинжида ибодат қилма! Аллоҳга шундай ибодат қилгинки, бу ибодат сени У Зотнинг розилиги томон олиб борсин. Сенинг ғоянг Аллоҳнинг розилиги бўлсин, шунда унинг ортидан барча истаган нарсаларинг ҳозир бўлади.
Шайх Шаъровий роҳимаҳуллоҳнинг сўзларидан.

"Ҳикматлар саодатга етаклар" китобидан.

✈️ @HidoyatUz 🌐Instagram