🟦🟦🟦
Assalomu alaykum, qadrli yurtdoshlar! Aziz buxoroliklar!
Barchangizni xalqimizning anʼanaviy qutlugʻ ayyomi – Sharqona yangi yil bilan chin yurakdan samimiy muborakbod etaman.
Qalblarimiz bahor tarovatidan shodlik va quvonchga toʻlgan mana shu nurli lahzalarda barchangizga sihat-salomatlik, bayramona kayfiyat, xonadonlaringizga baxtu saodat va fayzu baraka tilayman.
Qadrli buxoroliklar!
Navroʻzi olam falsafasi xalqimizning orzu-intilishlari, amaliy ishlari bilan uzviy bogʻlanib ketganini bugun har qadamda yaqqol koʻrish mumkin. Mamlakatimizda, jumladan, viloyatimizda ham yangi-yangi zamonaviy korxonalar, shinam uy-joylar, ijtimoiy va madaniy obyektlar qad rostlamoqda, yoʻl va koʻpriklar qurilmoqda. Yurtimiz qiyofasi kundan-kunga obod va goʻzal boʻlib bormoqda.
Bu esa hurmatli Prezidentimiz rahbarliklarida olib borilayotgan inson qadrini ulugʻlash, uning hayotiy manfaatlari va ijtimoiy himoyasini taʼminlash, ehtiyojmand aholi qatlamlarini qoʻllab-quvvatlash kabi xalqchil islohotlarning Navroʻz qadriyatlariga qanchalik mos ekanligini koʻrsatmoqda.
Navroʻzi olam bizni butun borliqni, avvalambor, yer va suv, hayvonot va oʻsimlik dunyosini, sof havoni asrab-avaylab, ona tabiatga mehribon farzand boʻlib yashashga daʼvat etadi.Ana shunday ezgu chorlovga javoban bugungi kunda viloyatimizda ham Navroʻz hasharlari oʻtkazilmoqda. Jumladan, “Yashil makon” loyihasi doirasida millionlab mevali va manzarali koʻchatlar ekilmoqda, yangi bogʻu rogʻlar barpo etilmoqda.Oltinga teng tuproqlarimizda mirishkor dehqon va fermerlarimiz urugʻ qadab, bogʻbon va chorvadorlarimiz yangi mehnat mavsumini boshlamoqda.Shu oʻrinda rizq-roʻzimiz bunyodkorlari boʻlmish zahmatkash dehqonlarimizni, mirishkor fermer va tomorqachilarimizni Navroʻz ayyomi bilan qutlab, boshlagan ezgu ishlariga ulkan zafarlar, barakali hosil tilayman.
Qadrli doʻstlar!
Navroʻzning oʻlmas ruhi ayniqsa mahallalarimiz hayotida yaqqol namoyon boʻlmoqda.
Mahalla – bu mehr va ahillik qoʻrgʻonidir. Mahalla – oqkoʻngil, bunyodkor xalqimiz qalbining koʻzgusidir. Ayniqsa, hurmatli yurtboshimiz tashabbuslari bilan hamma soha va yoʻnalishlar boʻyicha “mahalla yettiligi” tizimi yoʻlga qoʻyilgani joylarda tadbirkorlikni rivojlantirish, aholi bandligi va daromadini oshirish, kambagʻallikni qisqartirishda muhim omil boʻlmoqda.
Natijada soʻnggi uch yilda viloyatimizda kambagʻallik darajasi 12 foizdan 7 foizga tushirildi. Albatta, bu oʻz-oʻzidan boʻlayotgani yoʻq. Shu davrda 19 mingga yaqin aholiga qariyb 614 mlrd.soʻm imtiyozli kredit, 5 ming dan ziyod fuqarolarga 28 mlrd. soʻm subsidiya, qariyb ming nafar oilaga esa dehqonchilik uchun 250 gektar yer ajratib berildi. Tabiiyki, ushbu ishlarda fuqarolik jamiyatining noyob namunasi boʻlgan mahalla tizimi vakillarining faolligini alohida qayd etish joiz.
Fursatdan foydalanib, viloyatimizdagi barcha mahalla faollarini 22-martda nishonlanadigan Mahalla tizimi xodimlari kuni bilan qizgʻin tabriklayman.
Aziz vatandoshlar!
Bu yilgi Navroʻz bayrami qutlugʻ va fazilatli oy - muqaddas Ramazoni sharif kunlarida nishonlanmoqda. Bugungi imkoniyatdan foydalanib, barchangizni qoʻshaloq ayyom bilan chin qalbimdan qizgʻin qutlayman. Ushbu muborak oyda ado etadigan xayrli amallarimiz qabul boʻlib, ezgu va pok niyatlarimiz ijobat topishini tilayman.
Barchamizning tilak va istagimiz - Navroʻz yurtimizga, har bir oila, har bir xonadonga ezgulik, baxtu saodat, toʻkinlik va farovonlik olib kirsin. Hayotimiz quvonchli kunlar, toʻyu tomoshalarga toʻliq boʻlsin. Har bir oila, har bir mahalla, har bir shahar va qishlogʻimiz, butun Oʻzbekistonimizni fayzu baraka tark etmasin! Yurtimiz tinch, xalqimiz omon boʻlsin!
Navroʻzi olam barchamizga muborak boʻlsin!