O‘zsuvta'minot

Mamlakatimizda aholini toza ichimlik suvi bilan ta’minlashga har qachongidan ham ko‘ra, ko‘proq e’tibor qaratilmoqda. Xususan, aholini markazlashgan suv bilan ta’minlash bo‘yicha ishlab chiqilgan dasturlar doirasida qator ishlar amalga oshirilmoqda. Ana shu islohotlarning uzviy davomi sifatida Termiz shahridagi matbuot uyida “O‘zsuvta’minot” AJ boshqaruvi raisi ishtirokida sayyor qabul o‘tkazildi. Unda aholi vakillarining ichimlik suvi ta’minoti va oqova suv xizmatlariga oid masalalar yuzasidan murojaatlari tinglandi.

Misol uchun, Yulduz Sodiqova Muzrabot tumanidagi “Obod turmush” MFYga qarashli Terakzor ko‘chasida bir necha yillardan beri obihayot ta’minoti yo‘qligidan ham o‘zining, ham qo‘shnilarining yashash sharoiti biroz qiyinlashganligi, 4 yildan beri mutassadilarga qilgan murojaatlari esa natijasiz qolganligini aytdi. Mazkur o‘tkazilgan sayyor qabulda uning murojaatlari tinglandi va ijobiy hal qilinadigan bo‘ldi.

Shuningdek, Boysun tumani Chilonzor mahallasida yashovchi Norxon bobo Mardonov ichimlik suvi masalasida murojaat qilib, mahallasida 2 ta qishloqqa suv yetib borishida amaliy yordam so‘radi. Bu murojaat ham ijobiy hal qilinadigan bo‘ldi.

Shu kabi murojaatlar aholi vakillaridan 52 ta kelib tushdi. Shulardan 12 tasi joyida hal qilindi. Bajarilishi muddat talab etadigan murojaatlarga esa ma’sullar biriktirilib, uning ijrosi nazoratga olindi.

Telegram | Facebook | Instagram | YouTube | Web-site | Twitter