O'zingni ayama,
Beshafqat bo'lgin,
Joningga solib tur gohida burov.
Shunda
Topiladi
Xoin bo'laging,
Unga rahm qilma,
Qatl qil darrov...

O'zingni ayama.
Beshafqat bo'lgin,
Jang qil
Bilaturib
Mag'lubiyatni.
Shunda
Chekinadi
Xoin bo'laging, —
Mavh et sharmandani,
Mavh et uyatni.
Mayda-mayda bo'lma,
Mudom butun bo'l.
O'zingga o'zingni qilmagin talosh.
Bir tan bo'l,
Bir so'z bo'l,
Bitta tugun bo'l,
Faqat bitta yurak,
Faqat bitta tosh.
Ammo kurashlarda qurbonlik rasm,
Seni tashlab ketsa,
Sen sevgan hayot,
Ming bitta tobutda taning yotmasin,
Do'stlaring ko'targan
Bir tobutda yot.

Usmon Azim