O'zbek tiliga tarjima qilingan ilmiy kitoblarni o'qigim kelmaydi. Chunki odatda asarning hech o'zgartirishsiz, kesib tashlashlarsiz tarjima qilinganiga ishonmayman.

Ko'p asarlarning eng burilish nuqtalari, fikr shakllantiradigan jihatlari turli vajlar bilan oldirib tashlanadi, o'zgartiriladi yoki o'tmaslashtiriladi.

Natijada siz kitobdan to'g'ri va to'liq xulosa chiqarolmaysiz. Muallifning yetkazayotgan xabarini noto'g'ri yoki chala anglaysiz. Kitobni o'qishingizdan maqsad hosil bo'lmaydi.

Yaqinda tarjima qilingan "Muqaddima" kitobi atrofida ham shunday gaplar yurganini o'qidim. Kesa-kelmasa, har narsaga burun suqaveradigan ba'zi qo'mitalarimizning senzurasidan qochib, kitobdagi hadislar kesib tashlangan emish.

Shunday bo'lsa ham, baribir "qo'mita tasdig'idan o'tmagan" so'rovi bilan kitob sotuvdan yig'ishtirib olinibdi, deyishmoqda.

Bu – millatning intellektual imkoniyatlarini bo'g'uvchi qoloqlikdan boshqa narsa emas.

Qaysidir "tegishli organlar" o'quvchining o'rniga fikrlashi, uning nimani bilib, nimani bilmasligi kerakligini belgilashi nafaqat hurmatsizlik, balki jamiyatni to'g'ri qarorlar qabul qilishdan mahrum qilishdir.

Bu kabi ahmoqgarchiliklar to'xtamas ekan, o'zbek farzandi yana uzoq yillar chetga "qora ishchi" sifatida ketaveradi. Yana uzoq yillar "buyuk kelajak"ni kutib yashaydi.