Ёмоннинг кучи япалоққа етибди...
Бахти Ташкентский маҳкамасига раислик қилаётган судья Обидов “
Daryo.uz” нашри мухбири Отабек Қўлдошевнинг устидан ҳуқуқни муҳофаза қилиш органларига шикоят қилибди: суд мажлиси тафсилотларини матбуотда ошкор қилгани учун.
Катта эҳтимол билан Отабекка нимадир чора кўришса керак. Судья аризасида маҳкама жараёнларида Бахтиёр Қудратуллаевнинг ўз “фаолият”ини амалга оширишини, яъни кўчани назорат қилишни давлат ташкилотларидан бири илтимос қилгани ҳақидаги кўрсатмани матбуотга чиқарганинини важ сифатида кўрсатади.
Аввало, мамлакатимиз ҳуқуқий демократик ўлка бўлганида “Судья нега Ташкентскийнинг кўрсатмасига аниқлик киритишга ҳаракат қилмади? Унинг кўрсатмасидан келиб чиқиб, нега ўша давлат ташкилотини аниқламади” деган савол билан бошлардим постни. Бундай савол айни пайтда ортиқча, айтолмасак ҳам нималар бўлаётганини кўриб турибмиз. Қолаверса, судьяларимизда бунақанги жасоратнинг ўзи йўқ ёки ўғрининг нима демоқчилигини билишади улар.
Бироқ бу ўринда бир муҳим жиҳатга эътибор қаратайлик. Миллий судлов тизимимиз ўзига хос ўйин қоидалари, яъни ахборот сиёсати яратиб олди: истаган пайтда айбсизлик презумпцияларига тупуради, истаса шахсга оид маълумотларга оид қонунчиликни ҳам бузаверади. Ўзларига манфаатли бўлган суд мажлисларига журналистларни тўп-тўп қилиб олиб киришади, ҳатто суд мажлисларини онлайн режимда эфирга беришади, истамаса тескариси. Бундай манипулациядан мақсад аён, ҳар ҳолда, бу мамлакатда бугун яшаётганимиз йўқ.
Бу ғирром ўйин қоидалари мустаҳкамланиб бораркан, матбуот давлатнинг ўзига хос пропагандасига айланиб боради, сўз эркинлиги аста-секин барҳам топади. Йўқса, эътибор беринг, нега судья Обидов Ташкентский ўдағайлаган куннинг ўзида ажрим чиқариб, журналистларга бундай “нозик кўрсатмалар”ни чиқармаслик мажбуриятини юкламади? Нега судни очиқ қилиб, ҳаммага тасвир учун рухсат берди-ю, сўнг ўзи чангаллаб қолди. Чунки жамоатчиликда “ўғри қайси шеригини тилга оляпти”, деган саволлар, пичир-пичирлар кўпайиб кетди.
Журналистларга қийин замонлар келяпти. Етти ўлчаб бир кесмоқ, интиргалардан узоқ туриш даври. Бу жараёнда АОКА, Журналистлар союзи, аллақандай масс-медиаларнинг кўмагига умид боғламанг, улар ҳам Сиз каби ночор одамлар... фақат халқанинг бошқа бир бўғинида. Лекин кўнгилга таскин берадиган яна бир жиҳат бор — жамоатчиликнинг вазиятга таъсири ортмоқда. Аксинча, бечора судья бундай кулгили ҳолатга тушмасди.
Абдурроҳман ТАШАНОВ