Shirin Xabarlari | RASMIY

BAYRAMINGIZ MUBORAK AZIZ ENERGETIKLAR!

Energetika sohasi jamiyat hayotida qanday katta ahamiyatga ega ekanini alohida taʼkidlashga hojat yo‘q. Uylarimizga issiqlik va yorug‘lik ulashadigan, ishlab chiqarish korxonalarida uskuna va dastgohlarini harakatga keltiradigan va umuman zamonaviy hayotning barcha-barcha sohasida asosiy o‘rin tutadigan jabha, shubhasiz, energetikadir!

Shirin shahar prokuraturasi barcha energetiklarni bayram bilan qutlaydi.

22-dekabr — Energetiklar kuni

Tunu kun olib borayotgan beminnat xizmatingiz doimo xalq nazarida ulug‘vor, jamiyat hayotida qadrli bo‘lsin, hurmatli energetiklar!

Bugungi kunda Davlatimiz va jamiyat rivoji uchun har biringiz o‘z hissangizni qo‘shib kelmoqdasiz.

Bayramingiz muborak bo‘lsin, Aziz energetiklar!

Shirin shahar Ichki ishlar bo‘limi

Shirin shahar hokimi Energetika sohasida mehnat qilayotgan fidoyi xodimlarga oʻz minnatdorchiligini bildirdi.

Assalomu alaykum, hurmatli hamshaharlar!

Fidoyi va azamat energetiklar!

Yurtimizda qutlug‘ sanalar, tantanalar, turli kasb bayramlari keng nishonlanadi. Shu qutlug‘ sanalar ichida Shirin shahriga xos bo‘lgan, shahrimizda o‘zgacha g‘urur, quvonch va ko‘tarinki kayfiyat bilan shodiyona qilinadigan yana bir alohida sana bor. Bu 22-dekabr – energetiklar kasb bayramidir.

Ushbu sananing shahrimizda o‘zgacha e’tibor, shukuh bilan nishonlanishi bejiz emas. Negaki, shahrimiz energetiklar shahri. Bu yerda mamlakatimiz elektr energiyasining uchdan bir qismini ishlab chiqaruvchi yirik elektrostansiya – “Sirdaryo IES”, O‘zbekistonning to‘ng‘ich nurxonalaridan hisoblanmish “Farhod GES” hamda “ACWA Power Sirdaryo” issiqlik elektrostansiyasi joylashgan. Shuningdek, shahrimiz yaqinida yana bir zamonaviy quvvati 1,573 MVt bo‘lgan “Sirdaryo-2” bug‘-gaz elektr stansiyasi investitsiya loyihasi amalga oshirilmoqda. Shu sabab ham bu sana shahrimiz ahli uchun qadrli va azizdir. Bu azim nurxonalar salobati bilan shahrimiz chiroyiga chiroy, ko‘rkiga ko‘rk qo‘shib turibdi va tom ma’noda Shirin shahrining g‘urur-iftixori, rizq-nasibasidir. Ushbu sanoat korxonalari va unda mehnat qilayotgan zabardast energetiklarimiz bilan har qancha faxrlansak arziydi.
Shahrimizning bu uch yirik korxonasi mehnat jamoalari ishlab chiqarishda munosib yutuqlarga erishish bilan birga Shirin shahri ravnaqi, bunyodkorligi, xalqimiz farovonligi, kam ta’minlangan va koʻmakka muhtoj oilalarga yordam berish yo‘lida har doim xizmatda. Shahrimizda bo‘layotgan ijobiy o‘zgarishlar, bunyodkorlik, obodonlashtirish ishlarida ham bu korxonalarning hissalari yuqori.

Hurmatli energetiklar!

Energetika – Respublikamiz iqtisodiyotining qon tomirlaridan hisoblanadi. Bugungi turmushimizni elektr energiyasiz tasavvur etish qiyin. Shu ma’noda bu soha xodimlarining yurtimiz ravnaqiga qo‘shayotgan hissalari beqiyosdir.

Aziz va fidoyi energetiklar!

Sizlarning salmoqli mehnatingiz samarasi o‘laroq ishlab chiqarilayotgan elektr energiyasi bilan mamlakatimizning ko‘plab sanoat korxonalari ishlamoqda, xonadonlar nurafshon bo‘lmoqda. Bu kasbning nechog‘lik zahmatli, mas’uliyatli va ayni damda sharafli ekanligini barchamiz his etamiz. Buning uchun metin irodali Siz fidoyi kasb egalariga samimiy minnatdorchiligimizni bildiramiz.
Siz azizlarni bu qutlug‘ sana bilan muborakbod etib, barchangizga sihat-salomatlik, oilaviy baxt, ish faoliyatingizda muvaffaqiyatlar tilayman.

Hurmat bilan,
Shirin shahar hokimi
Xazratkulov Niyoz Namazbayevich

Shirin energetika kollejida tashkil etilgan navbatdagi seminar ishtirokchilari Toshkent viloyatidagi kasbiy ta’lim tashkilotlari rahbarlari bo‘ldi

Yuqori malakali kadrlar tayyorlash hamda namunaviy ta’lim jarayonlarini tashkil etish bo‘yicha Shirin energetika kollejida to‘plangan tajribalarni o‘rganish maqsadida ushbu ta’lim maskanida amaliy seminar tashkil etildi.

Seminarda shahar hokimligi, Sirdaryo hamda Toshkent viloyati oliy ta’lim, fan va innovatsiyalar boshqarmalari vakillari, shuningdek, Toshkent viloyatining kasbiy ta’lim tashkilotlari rahbarlari ishtirok etdi.

Tadbirni shahar hokimining o‘rinbosari Farruh Alimov ochib, Shirin energetika kollejida erishilgan yutuqlar avvalo davlatimiz rahbarining tashabbuslari natijasi ekanligini ta’kidladi. Shundan so‘ng, ishtirokchilarga kollejda yaratilgan sharoitlar, dual ta’lim tizimi asosida raqobatbardosh va yetuk kadrlar tayyorlash bo‘yicha amalga oshirilayotgan ishlar haqida kollej direktori Alfarobi Xusanov hamda “ACWA Power” kompaniyasining loyiha direktori Abdulmajid Azouz tomonidan batafsil maʼlumotlar berildi.

Ta’kidlash joizki, Shirin energetika kollejida “ACWA Power” kompaniyasining buyurtmasiga binoan malakali kadrlar tayyorlanmoqda. Ta’lim jarayonlari zamonaviy texnologiyalar asosida tashkil etilgan bo‘lib, matematika, fizika, kimyo, informatika va ingliz tili fanlari xalqaro dasturlar asosida chuqurlashtirilgan holda o‘qitilmoqda. Kompaniyaning 2,8 million dollarlik homiyligi hisobiga zamonaviy ustaxona, laboratoriya va yotoqxona barpo etilgan. Shuningdek, kollej Belorus Respublikasining Mogilyov davlat energetika kolleji bilan hamkorlikni yo‘lga qo‘ygan. Ushbu hamkorlik doirasida elektromontyor, elektrogazpayvandchi hamda avtomobillarni ta‘mirlash va ularga xizmat ko‘rsatish bo‘yicha o‘quv dasturlari amalga oshirilmoqda.

Seminar davomida ishtirokchilar Sirdaryo IES filiali va yangi ish boshlagan “ACWA Power Sirdaryo” elektr stansiyasi faoliyati bilan yaqindan tanishdi. Shuningdek, bu yerda dual ta’lim tizimi asosida ta’lim olayotgan o‘quvchilar uchun yaratilgan sharoitlar ko‘zdan kechirildi.

Yakunda Shirin energetika kollejining namunaviy taʼlim tajribasini Toshkent viloyatidagi kasbiy taʼlim tashkilotlarida qo‘llash bo‘yicha hamkorlik qilishga kelishib olindi.

➡️ Telegram |Instagram | Facebook | Youtube