*СЕЗМАЙ ҚОЛДИМ*

Болалигим пошшолигим ўтиб кетди,
Йиллар сувдек оққанини билмай қолдим.
Сочларига йиллар қиров солиб кетди,
Онам ёшин ўтганини сезмай қолдим,
Отам ёшин ўтганини сезмай қолдим.

Кўчадан хеч ортмабман-а, ризқим териб,
Ташвишларда ўзим билан, ўзим бўлиб,
Кўзда ёшим тинмас бугун холин кўриб,
Онам ёшин ўтганини сезмай қолдим,
Отам ёшин ўтганини сезмай қолдим.

Мол-у дунё орқасидан қувавериб,
Йиллаб келмай мусофирда юравериб,
Чўнтак тўлиб, кўзга шира тўлавериб,
Онам ёшин ўтганини сезмай қолдим,
Отам ёшин ўтганини сезмай қолдим.

Қўлим тутиб мени жондек авайлаган,
Эркалатиб елкасида опичлаган,
Фарзандини бировлардан кам қилмаган,
Онам ёшин ўтганини сезмай қолдим!
Отам ёшин ўтганини сезмай қолдим!

Аллоҳ берган бойлигимсиз, сиз неъматим,
Мехри дарё, ғамхўримсиз, беминнатим,
Дуолари асрар мени ғаниматим,
Онам ёшин ўтганини сезмай қолдим!
Отам ёшин ўтганини сезмай қолдим!

Сизга борим, сизга жоним фидо бўлсин,
Бағрингизда набиралар униб ўссин,
Қодир Эгам умрингизни узоқ қилсин!
Бўлинг доим бизларга бош Хожи Онам!
Бўлинг доим бизларга бош Хожи Отам!

Қўшиқ учун муаллиф рухсатини олинг!

✍Абдумуталиб Эргашалиев

@Sheriyat