Birburchak

@zabarjadmedia nashriyoti mana shu to‘plamni chiqarishini eshitganimizda ishxonamdagilar bilan rosa bir soat muhokama qilganmiz. Asosiy mavzu sifatida "kitoblar va to‘plamning zo‘rligi, chiroyli ekani, ammo bundan foyda olish mumkinmikan?" degan savolni muhokama qilgandik.

Nashriyot o‘z ishini qildi. Va’dasida turdi. 15 ta kitobdan iborat xalq og‘zaki ijodini saralab nashr etdi. Nashr etganda ham O‘zbek tili, adabiyoti va folklor institutining Folklor bo‘limi bilan hamkorlikda doston va ertaklarning eng mukammal, to‘ldirilgan versiyasini chop etdi.

Bu to‘plam ortidan nashriyot qanchalik moliyaviy foyda ko‘rgan yoki ko‘rmaganini bilmayman, ammo katta ma’naviy yutuqqa erishdi deb o‘ylayman. Bu narsani nashriyotning dardi bor, millat oldida mas’uliyati bor deyish mumkin.

Bu to‘plam ko‘p nusxada nashr etilmagan. Sotuvda tugab ketgach, izlanadigan kitoblardan bo‘lsa kerak. Kitoblar o‘rtacha 250-300 betdan. ➡️ 15 ta kitob 365 ming so‘m ekan. Hisoblab ko‘rsam bittasi 24 ming so‘mdan tusharkan. Hozirgi narx-navo uchun juda arzon.

Imkoningiz bo‘lsa, to‘plam shaklida, bo‘lmasa donalab bo‘lsa ham olib qo‘yishni tavsiya qilaman. Menga kitobning sifati va darajasi juda yoqdi.

➡️@qora_yigit

Kitob, non va gugurt 👀

2017-yilning kuzi. Ertalab tursam xonadoshlarim roltonimni yeb ketibdi (abituriyent davrida bu juda oddiy hol). Kechasi dars qilib charchaganim uchun kechroq uyg‘ondim. Qornim tasavvur qilish qiyin darajada och. 5-qavatda turamiz, lift yo‘q.

Shoshilib pastga tushdim. 4-5 ta tuxum olib chiqaman. Tez pishadi, tezda yeyman. Xayolimda faqat shu o‘y aylanadi. Kassa oldiga kelganda esa pul olib tushmaganim ma’lum bo‘ldi. Obbo, och qoringa 5-qavatga qaytib chiqdim. Pulni olib ming mashaqqat bilan yana qaytib tushdim.

Do‘kondan tuxumga qo‘shib non ham ovoldim. Issiqqina. Oh-oh, hidlarini qarang. Mendek kitobxon odamning kallasi ishlaydi-ku axir. Non tugab qolgan bo‘lishi mumkin. Yana qaytib 5-qavatdan do‘konga kelib-ketib yurmaslik uchun aslida juda katta aql ham kerakmas. Ha, non ovolganim yaxshi bo‘ldi, dedim o‘zimga-o‘zim.

Amallab 5-qavatga chiqdim. Qorin bo‘lsa, tatalab ketdi. Oshqozon allaqachon o‘zini-o‘zi hazm qilishni boshlagan bo‘lsa ham ajabmas. Uyga kiriboq nonni tekshirdim va daholigimga amin bo‘ldim. O‘zimdan mamnun bo‘lib, o‘z sha’nimga uzoq maqtovlar yog‘dirdim. Qorni och odam nimalarni aljiramaydi deysiz. Haqiqatdan ham non tugagan ekan.

Bunaqa dohiyona yurishni oxirgi marta o‘zbeklar ichida buyuk shaxmat grossmeysteri Rustam Qosimjonov qilgan bo‘lsa kerak. Ana endi gazni yoqib choy qo‘ysam va tuxum qovursam bas. Gazni yoqish uchun gugurt izladim, gugurt yo‘q. Ko‘z oldimda 5-qavat, pastgacha 93 ta zina, do‘kongacha masofa bir-bir o‘tdi…

Oxirgi kuchimni jamlab yugurib pastga tushdim. Gugurt olib kassa yoniga borganda esa pulni oshxonadagi stol ustida qoldirganimni esladim…

Ana shundan beri ertalab yeyiladigan narsalarni bir kun oldin olib kelib qoʻyishga odatlanganman. Har ehtimolga qarshi bir dona gugurt ham qo‘shib olaman. Toping-chi, hozir uyimizda kitob ko‘proqmi yoki gugurt?)))

➡️@qora_yigit

Siz yomg‘irsiz, yog‘ing, azizam
Yuvingiz peshonam sho‘rtoblarini
Yog‘ing taqdirimga, yog‘ing qalbimga
Simiray muhabbat xalqoblarini.

Yuragimga toming tomchi-tomchilab...
Ishq emib ulg‘aysin go‘dak hislarim.
Yog‘ing, yog‘avering meni eting mavh
Dimog‘imni tutsin yomg‘ir islari!..

Siz yomg‘irsiz, yog‘ing...

©️Muhiddin Nido

➡️@qora_yigit

Izohda yangi obunachilardan biri qiziq bir savol beribdi: "Shu paytgacha qancha kitob tarqatdingiz?" deb. O‘ylab qoldim, rostdan ham qancha kitob tarqatdik? Hech o‘ylab ko‘rmagan ekanman. Keling, shular haqida suhbatlashamiz.

Tanlovlar orqali va yoki shunchaki kanaldagi qaysidir aktiv insonlarga kitob berayotganimga 6 oydan oshibdi. Bu muddatda 250 tadan ko‘proq kitob berilibdi. Bu o‘rtacha 13-15 million so‘m bo‘larkan. Balki bundan ko‘proq bo‘lishi ham mumkin.

Chunki sovg‘alar ichida "Mamlakatlar tanazzuli sabablari", "Talaba", "Yashamoq", "Kirka", "Sarmoyador", "Katta o‘yin", Remarkning 4-5 talik to‘plamlaridan tortib Fotih Dumanning 8-9 talik to‘plamlari ham bor. Bu kitoblar 70-100 ming atrofida, to‘plamlar esa 250-900 ming atrofida turadi. Men esa tepadagi 13-15 million deb taxminan aytgan raqamda hamma kitob o‘rtacha 40-50 mingdan hisoblangan.

Raqamlar odamni zeriktiradi. Yozarkanman, o‘zimga ham erish tuyildi. Ammo 5-6 oyda bir hisobot o‘laroq yozib qo‘yish yomon ish emas nazarimda.

"Endi, shuncha puling, vaqting va kitobing ketibdi, ammo o‘z manfaatingni o‘ylab qilgansan-ku, obunachi ko‘paysa o‘zingga foyda-da" dersiz balki. Ha, siz haqsiz, shunday. Lekin foydadan nima ko‘zlanganiga ham bir e’tiboringizni qaratmoqchiman.

Shu 13-15 millionga umuman boshqa uslubda, kitoblar ulashmasdan hozirgidan ko‘proq yoki ayni shuncha obunachi yig‘ish mumkin edi. Lekin mening to‘liq maqsadim faqatgina ko‘p obunachi va reklama qo‘yib pul topish emas. Buni kanalda anchadan beri borlar biladi. Oyiga 1-2 ta reklama ham qo‘ymasam kerak. Shularning ham aksari tekin.

Maqsadim kitoblar tarqatish va kitoblar orqali maqsadli auditoriya yig‘ish. Ularni aqlim yetganicha kitoblarga qiziqtirish. Albatta, manfaatlarim ham yo‘q emas. Ammo uni eng oldingi qatorga emas, yuqorida sanagan maqsadlarimdan keyingi o‘ringa qo‘yganman.

Kitobli tanlovlarning odamlarga kitob ulashishdan boshqa yana bir yaxshi tomoni obunachilarni filtrlash. Bunday tanlovlarda odatda kitobga oz bo‘lsa ham qiziquvchilargina qatnashadi. Va kanaldagi boshqa postlar orqali ularni ko‘p kitoblar o‘qiydigan kitobxon qilish niyatim bor.

Alloh qodir qilsa, bu ishlarni hali uzoq davom ettirmoqchiman. Kitob yutib olsangiz, 1 xursand bo‘laman, kanaldagi qaysidir kitob haqidagi post sabab biror kitobni o‘qib chiqsangiz 100 xursand bo‘laman. Bu kanalda ekansiz eng kamida foydadasiz ya’ni. 😅

Bu ishlar davomli bo‘lishida qo‘ldan kelgancha qo‘llab-quvvatlang, kitobga qiziquvchi yaqinlarni taklif eting. Nasib etsa har safar, har narsada darajani oshirib boraveramiz. Zero kitob o‘qigan odam endi kechagi odam bo‘lmaydi.

Siz azizlarga chuqur hurmat bilan Muhiddin

➡️@qora_yigit

Bayram hali ham davom etyapti🙂

Ishxonadagi qadrdonlardan “Saodat asri qissalari” toʻplami va tunda kitob oʻqish uchun maxsus chiroqli xatchoʻp.

❤️Bunday sovgʻalardan bir xursand boʻlsang, aynan senda yoʻq kitoblarni topib sovgʻa qiladigan darajada yaqinlaring borligidan oʻn xursand boʻlasan.

➡️@qora_yigit

"Aks"dan navbat "Shakl"ga keldi. Nomiga qarab o'qishdan oldin lineykalarni ham tayyorlab qo'ydim Uyog'idan, buyog'idan o'lchab o'qiymiz-da endi "Shakl"ni))😅

Kitob haqida turlicha fikrlar, qarashlar eshitdim. Oramizda bu kitobni o'qiganlar yoki o'qiyotganlar bormi? Qaniy, sizning o'chamlaringiz qanaqa chiqdi, chiqyapti?)) Izohlarda fikrlaringizni kutaman.

➡️@qora_yigit

#xarid

Yangi kelgan mehmonlarimiz bilan tanishing. Abduqayum Yoʻldoshevning “Puankare”si yoqib qolib 2-3 asarini oʻqib chiqqandim. Ammo “Puankare”dek maza qildiradigan darajada emasdek tuyilgandi. “Kasofat raqamlar”ni esa endi koʻramiz-da.

“Frankenshteyn” nomi juda koʻpchilikka tanish. Kinosini koʻrgandirsizlar. Oʻqib koʻramiz. Doimo kino va kitob oʻrtasida katta farq boʻladi…

“Men Qoʻrqaman”da esa juda kuchli dunyo yozarmanlarining esselari jamlangan ekan. Oxirgi marta “Qora suyaklar” kitobida oʻqigandim esse.

Menda bu haftadagi kitoblar xaridi shular. Kim qanday kitob sotib oldi? Izohlarda maqtanishingiz uchun keng maydonni rasman ochiq deb e’lon qilaman 😅

➡️@qora_yigit

E’lonlarda mening ismimdan foydalanib piar qilishmoqda ekan 😠

Aytib qoʻyay, men Xalqsevardan ham kiyinmayman, Shaxzodning qizining boshini ham aylantirmaganman. Men birburchakda tinchgina kitob oʻqib yuribman. Oʻxshashliklar mutlaqo tasodifiydir, ayasi.

Hurmat bilan odobli va kitobdan boshqasiga qayrilib ham qaramaydigan kanal admini Muhiddin 💀😂

➡️@qora_yigit

#finished

Tolstoyni tanish uchun kitbxon boʻlish shartmas. U tuyg‘ularni shunday tasvirlaydiki, voqealarni shunday kesishtiradiki, katta-katta asarlarining ichida yashashga o‘rganib, mixlanib qolasiz. Men ham ana shu uslubiga, asarlariga o‘rgangan edim Tolstoyning.

Ammo "İnsan neyle yaşar" kitobi biz bilgan "Urush va tinchlik", "Tirilish" yoki "Anna Karenina"dan ancha farqli ekan. Kitobdan ikki qissa va ikki hikoya joy olgan.

"İnsan neyle yaşar"(Inson nima bilan yashaydi yoki Inson qanday yashaydi) qissasida farishtalar, gunoh, inson qismati, Xudo haqida bizning o‘lchovlarimizga juda yaqin fikrlar bor. Balki menga shunday tuyilgandir…

Asarda jazolangan farishtaning Yerga surgun qilinishi, odamlarning qanday yashashi, ularning munosabati qaysi o‘lchovlar ustiga qurilgani haqida hikoya qilinadi. Farishta esa bu o‘lchovlarning mohiyatini anglash asnosida xulosalar chiqaradi. Umuman olganda, qiziq syujet va o‘yga toldiradigan asar.

Kitobdagi "Insonga qancha yer(tuproq) kerak?" ham menga yoqqanlaridan biri bo‘ldi. Unda kambag‘al dehqonning shayton bilan jangi haqida hikoya qilinadi. Dehqon shayton nayrangida yeri va boyligi qancha ortsa ham ko‘prog‘ini istayveradi. Bu ochko‘zlik esa o‘lim bilan tugaydi.

Hikoya deyarli an’anaviy ma’noni, ya’ni odam baribir ikki metr yerga ko‘milishi, shu tuproqdan ortig‘iga ega chiqolmasligini anglatsa-da, syujet va hislar, jarayon Tolstoycha daholik bilan ochib berilgan.

Umuman olganda, Tolstoyning bu uslubdagi asarlari ham menga yoqdi va yangilik bo‘ldi. Bu kitobni yaqinda o‘zbek tilida ham nashr etiladi deb eshitdim. Agar rost bo‘lsa, bundan o‘zbek kitobxoni faqat yutadi.

➡️@qora_yigit

#tanishuv

🆕 Yangi ruknni yo‘lga qo‘ymoqchiman. Haftada kamida ikki yozuvchi yoki shoir bilan qisqacha tanishtirib boraman.

🖥 Rasmdagi inson yapon yozuvchisi Kobo Abe. U 1924-yilda Tokio shahrida tug‘ilgan va Ikkinchi jahon urushi davrida Manchuriyaning Mukden shahrida voyaga yetgan. 1948-yilda Tokio Imperatorlik Universitetida tibbiyot bo‘yicha tahsil olib, shifokorlik darajasini olgan bo‘lsa-da, u hech qachon tibbiyot bilan shug‘ullanmagan.

Yaponiya adabiyotining eng nufuzli yozuvchilaridan biri hisoblangan Abe "Boshqa bir yuz", "Yashik odam", "Maxfiy uchrashuv", "Qumdagi ayol" va "Sakura Arkasi" kabi romanlari bilan tanilgan.

📌

Uning barcha kitoblari Yaponiyada bestsellerga aylangan bo‘lib, u bir qancha yirik adabiy mukofotlarga sazovor bo‘lgan. Kobo Abe taniqli kinorejissyor Hiroshi Tesigahara bilan hamkorlik qilib, o‘zining to‘rtta romaniga, jumladan, "Qumdagi ayol" asariga ham film tasvirga oldirgan. Kobo Abe 1993-yilda vafot etgan.

Bilishimcha, Kobo Abening ikki romani o‘zbek tiliga tarjima qilingan. Va men bu ikki asarni ham katta qiziqish bilan 2 martadan o‘qib chiqqanman. Bu asarlar haqidagi fikrlarimni o‘qib ko‘rishingiz mumkin:

▪️"Yashik odam" romani haqida

▪️"Qumdagi ayol" romani haqida

🤫 Yana bir qiziq eslatma, "Qumdagi xotin" va "Qumdagi ayol" asarlari bitta kitob. Turli nashriyotlarda uning nomi biroz farqli nashr etilgan xolos. Xo‘sh, siz Kobo Abe haqida qanchalik bilasiz? Bu post orqali qanday yangi ma'lumotlar oldingiz? Izohlarda fikringizni qoldiring.

➡️@qora_yigit

Bayram oʻz yoʻliga, ammo davomiylik buzilmasligi kerak. Erkin A’zamning yangi kitobini oʻqishni boshladim. Nomi va muqovasi juda qiziq. “Bayramdan boshqa kunlar”. Muqovada esa shimilgan qandlar…

Yaqinda yozuvchining “Gonoluluga elchi” kitobini oʻqib chiqqandim. Yoqqanidan unga video ham tayyorlaganman.
📚“Gonoluluga elchi” - Erkin A’zam

📖Taqrizni oʻqish

📺Videoni koʻrish

“Bayramdan boshqa kunlar” ham ajoyib tuyilmoqda. Oʻqib chiqib fikrlarimni sizlar bilan albatta boʻlishaman.

➡️@qora_yigit

Tanlov!

🔥 Gʻolib 4 kishi boʻladi va har biriga “Yashamoq” kitobi sovgʻa qilinadi.

Shartlar juda oddiy:
✅ Birburchak va Paradise kanallariga a'zo bo'lasiz;
✅Va shunchaki pastdagi "QATNASHAMAN" tugmasini bosasiz. G'oliblarni telegramning o'zi random orqali aniqlab beradi.
❗️E’tiborli boʻling, kanallarga a’zo boʻlmasangiz, gʻolib boʻla olmaysiz.

Natijalar 6-fevral kuni 20:00 da e'lon qilinadi.

🔜Xabarni kitobxon tanishlaringizga ham yuborib qo'yishni unutmang. Barchaga omad tilayman!