“Doʻngalagim”

Poyezdingni jildirgan
Oʻtxonasi bilan doʻngalagi.
Dvinska ketdi Andijonning
Mard yigitining bir boʻlagi.

Dvinska ketmas edi
Mard yigitning bir boʻlagi,
Dvinska ketkizgan
Nikolay zolim zambaragi.

Dvinska yoʻl boʻlsin,
Qaragʻayzoring kul boʻlsin,
Yigitlarni qiynagan
Nikolaying yoʻq boʻlsin.

Toshkentingizdan minib,
Toʻp ostidan chiqdilar.
Onalari: “Voy, bolam!” deb,
Kafan toʻnin bichdilar.

Oʻtxonasini qichqirtib
Istansaga yurgizdi.
Koʻkterakka yetmasdan
Soz dutorimni sindirdi.

Suv oshini ichmayman,
Etigimni yechmayman.
Qorda qaragʻay kesganman,
Hech haqimdan kechmayman.

Olib oʻtib Odesga,
Imoratiga yaratdi.
Tizzamizdan qon soʻrib,
Oʻz foydasiga qaratdi.

Oʻng qoʻlinda bir qassob
Choʻchqani soʻyadi behisob.
Bizni toʻqqiz oy ishlatdi
Nikolay degan qon jallob.

Bizni toʻqqiz oy ishlatdi
Sizran degan oʻrmonda.
Ketolmaymiz Andijon,
Bir chaqa yoʻq karmonda.

Taxta koʻprik bitdimi,
Poyezd kelib oʻtdimi?
Mardikor olgan Nikolay
Oʻz taxtidan ketdimi?