"МУШТУМ" журнали расмий канали 📰

“Ким олади-ё, шугинани-ё – 2025” танловига

"МЕҲРИБОН"ЛИК

Отам билан онамнинг,
Ҳолини сўрай бугун.
Анча бўлди бормадим
Бир бориб кўрай бугун.

Ахир мени ўстирди,
Ўқитди, уйлантирди,
Қанча елиб-югурди,
Бир суҳбат қурай бугун.

Не элтай-а, нонми ё
Олма, анорми, ҳолво,
Шашлик, балиқми, шўрво...
Сим қоқиб сўраймикин?!

Алло, алло, ассалом!
Бормисизлар соғ-омон?
Қандайсиз, жон онажон,
Сизларни кўрай дедим.

Ие, кимсан, дейсизми...
Танимай ўғлингизни,
Манти, шашлик ейсизми...
Ё, сомса олаймикин?

Оббо, нега емайсиз,
Таъминиям билмайсиз?..
Бир еб кўринг, яйрайсиз,
Роҳатижон, сўзим чин!

Нима? Ўзим борсам бас,
Кўринсам бас бир нафас?
Қуруқ бормоқ, менгамас,
Бозор келдим атайин!

Ҳа-я, йўқ-ку тишлари,
Гўшт билан йўқ ишлари,
Оғритмайин бошларин,
Қатиқ олиб ўтайин!..

Истам ҲАСАН,
Навоий вилояти, Қизилтепа тумани

➡️ Каналга обуна бўлинг 👇👇👇
https://t.me/mushtumjurnali

САҲАРХАНДА

Қуролли кучлар резервидаги десантчилар ҳарбий машғулот йиғинларига жалб этилибдилар. Йўриқчи улар билан машғулот ўтказиб, парашют билан сакрашга оид йўл-йўриқлар берибди:
— Аппарат бортидан сакраб чиққач, ҳалқани тортасиз. Бир оздан сўнг парашют гумбази очилади, ерга қўнасиз. Қўниш майдонида сизни автобус кутади. Автобусга чиқиб, яна шу ерга қайтиб келасизлар.
Резервдаги десантчилардан бири сакраб, айтилганидек ҳалқани тортибди. Парашют гумбази очилмабди. Тошдай тез пастга тушиб бораётган ҳарбий ўзига-ўзи жаврармиш:
— Хўш, парашют масаласида алдашди. Қани кўрайлик-чи, автобус кутиб туриши ростмикин?!

* * *
Бир куни шайтон болаларини айлантириб юрган экан, ёш шайтонча онасидан сўрабди:
— Ойижон, анави ўт еб юрган нарса нима?
— Бу сигир. У одамларга сут, гўшт беради, — дебди онаси.
Яна бироз юргач, шайтонча онасига дебди:
— Анави нима?
— У товуқ. У одамларга тухум беради. Гўшти ҳам ейилади, — дебди.
Узоқда юриб кетаётган одамларни кўриб қолган шайтон боласи:
— Анави-чи? – дебди.
Она шайтон:
— Тез кетдик бу ердан! Ҳозир бу одамзот бир балони бошлайди-да, “Ҳаммаси шайтонни иши”, “Мени шайтон йўлдан урди” деб ҳамма айбни бизга ағдаради, — дермиш.

⭕️ Каналга обуна бўлинг👇👇👇
https://t.me/mushtumjurnali

“Ким олади-ё, шугинани-ё – 2025” танловига

БЎРИВОЙНИНГ ШИКОЯТИ

Ёмон қарашар бизга,
Қўй-қўзини ейди деб.
"Тили йўқ экан", – дея,
Ёмонламанг-да ҳадеб.

Сизга ўхшаб, бўғзига
Ўткир пичоқ санчмаймиз,
Тиқиб темир оғзига,
Қийма қилиб янчмаймиз.

Ёғни обдон қиздириб,
Қовурмаймиз қозонда.
Минг бўрини чақириб,
Тўй бермаймиз азонда.

Тўқ қоринга эт тиқиб,
Шиширмаймиз қоринни.
Очиқсак, овга чиқиб,
Топиб еймиз борини.

Оғиздан ортса ташлаб,
Юбормаймиз аҳлатга.
Сўнгаккача қиртишлаб,
Кемирамиз хилватда.

Не қилайлик, ноилож,
Ишимиз зуруратдан.
Қани, бўлсайди илож,
Тўярдик зироатдан.

Аммо худойим бизни
Этхўр қилиб яратган.
Ризқ ила рўзимизни
Қўй-қўзига қаратган.

Биз – жонзотлар бўриси,
Сиз – дунёнинг зўрисиз.
Аммо гапнинг тўғриси:
Биздан баттар бўрисиз!

Худойберди КОМИЛОВ,
Самарқанд вилояти, Ургут тумани

⭕️ Каналга обуна бўлинг 👇👇👇
https://t.me/mushtumjurnali

“Ким олади-ё, шугинани-ё – 2025” танловига

Э ВОҲ...

Э воҳ, замон қизларининг
           дилни ӯртар нози йӯқ,
Сӯзлаётган сӯзларининг
           шарқона пардози йӯқ.

Бӯй йигитлар ажиб танбал,
           эрка, инжиқ, оқбилак,
Кураш тушмас, от кӯрмаган,
           чапдаст чавандози йӯқ.

Кӯп шоирлар маддоҳ бу кун,
          қай олимлар лӯттибоз,
Созанда танбур тутмаган,
          ҳофизнинг овози йӯқ.

Урчиб борар қашқир, тулки,
          бӯрибосар занжирбанд,
Беҳисоб лайчалар изғир,
          овга ярар този йӯқ.

Ӯзин уста деган кӯп, лек
         ҳар мақомга йӯрғалар,
Бундоқ сӯраб борсанг асли
         ҳеч бирин устози йӯқ.

Амал аҳли тужжор тараф,
        фақир харидор мазлум,
Бу дунё бир бозор, бунда
        шайни соз торози йӯқ.

Сув келтирган хору зору,
        кӯза синдирган азиз,
Ҳақни ҳаққа ажратгувчи
        холис, одил қози йӯқ.

Ҳашам замон мезонидур,
        ӯндан тӯққиз нафс қули,
Орифликнинг йӯлларида
        жон бермоққа рози йӯқ.

Хилватларда вайсаб нодон
        ким-кимларни айблагай,
Бу даврон дардига малҳам
        бӯлар танти, ғози йӯқ.

Рустам ҚУРБОНОВ,
Самарқанд вилояти

Telegram  |  Instagram |  Youtube |  Facebook