🇰🇷 Koreyaga borib shartnoma shartlarini bajarmasdan qochib ketaman, desangiz yana bir bor o‘ylab ko‘ring!

Yana 100 nafar yurtdoshimiz Migratsiya agentligi orqali Koreya Respublikasida E-9-vizasi asosida ishlash uchun jo‘nab ketdi.

❗️Ularga qo‘yilayotgan birlamchi talab, o‘zi mehnat qilayotgan davlatning qonunlari va urf-odatlarini hurmat qilish, ish joyini hech qanday sababsiz tashlab ketmaslik, ish beruvchi bilan konstruktiv faoliyat olib borishdan iborat.

Qoidalar qattiqlashmoqda!

Koreyaga ketish oldidan uch tomonlama shartnoma qilingan holda ishlovchilardan tilxat va ularning yaqinlaridan birining kafilligi olinmoqda.

Agarda fuqarolarimiz ish joylarini asossiz va ushbu davlatdagi vakolatxonamiz bilan kelishmagan holda tashlab ketib, norasmiy faoliyat olib borishni boshlasa, shartnoma bandlari buzilgan bo‘ladi va o‘sha kundan boshlab har bir oy uchun 2 000 (ikki ming) AQSH dollari miqdorida jarima qo‘llanadi.

Chunki, bunday harakat xorijlik ish beruvchilarda o‘zbekistonlik ishchilarga nisbatan salbiy fikr uyg‘otish barobarida qonun buzilish holati hisoblanadi.

Mana shunday holat joriy yilning 11-noyabr kuni jo‘nab ketgan yurtdoshlarimiz bilan sodir bo‘ldi. Ikki nafar yurtdoshimiz Koreyada ish boshlaganining birinchi haftasida o‘z ish joyini tashlab ketgan.

❗️Nomzodlar shartnoma bandlari bilan O‘zbekistonning o‘zida tanish bo‘ladi. Nima ish qilishi, qaysi korxona yoki fermada ishlashi, qancha maosh olishini aniq bilgan holda shartnomaga imzo chekadi.

O‘zlariga bildirilgan ishonchni oqlamasdan, shartnoma shartlarini qo‘pol tarzda buzgan ikki yurtdoshimizning mahallalariga masʼullar bordi va ularning ota-onalari, mahalla ahli ishtirokida holat muhokama qilindi. Hozirda ularga jarima qo‘llash va kerak bo‘lsa O‘zbekistonga qaytarish choralari ko‘rilmoqda.

🔻 Axborot kanallarimizni kuzatib boring

uzmigration|Facebook|Youtube|Instagram|X|Veb-sayt|Xorijda ish