ЭЪТИРОЗ

Осмондаги ой бўлганим йўқ,
Ҳали жўшқин сой бўлганим йўқ.
Ортимдан гап қилган одамлар,
Сиз туфайли бой бўлганим йўқ!

Ютуқларим заҳматим билан,
Заҳмат ҳамроҳ шуҳратим билан. 
Пул топдим ўз меҳнатим билан,
Сиз туфайли бой бўлганим йўқ!

Ғалат туюлмасин сўзларим,
Бу дилдаги оҳу-бўзларим. 
Биз қарашдик деган дўстларим,
Сиз туфайли бой бўлганим йўқ!

Энди келиб ғамим едингиз,
Жигаримсан — дўстим дедингиз.
Йиқилганда қайда эдингиз?
Сиз туфайли бой бўлганим йўқ!

Онам дуо қилди тонглари,
Отам бўлди соғликдан нари.
Бу уларнинг илтижолари,
Сиз туфайли бой бўлганим йўқ!

Жим қолганда тинди деганлар,
Тамом бўлди энди деганлар. 
Соямизда унди деганлар,
Сиз туфайли бой бўлганим йўқ!

Тиланмадим шоҳдан-гадодан,
Хулосалар қилдим хатодан.
Бари Ҳақдан — бари Худодан,
Сиз туфайли бой бўлганим йўқ!

Камолиддин ШУКУР

@kamoliddinshukur1