Hikmatlar

Agar oshiqlig'im aytsam...

Agar oshiqlig‘im aytsam, kuyub jon-u jahon o‘rtar,
Bu ishq sirrin bayon qilsam taqi ul xonumon o‘rtar.

Kishiga ishq o‘tidin zarraye yetsa bo‘lur giryon,
Bo‘lub besabr-u betoqat, yurak-bag‘ri chunon o‘rtar.

Meni bexonumon tinmay kuyub-yondim firoqingda,
Oting tutsam, «Nigoro» debki, zavqidin zabon o‘rtar.

Qayu til birla, ey jono, seni vasfing bayon aylay,
Tilim lol-u ko‘zum giryon, so‘ngaklarim nihon o‘rtar.

Na qattiq kun ekan, jono, visolingdin judo bo‘lmoq,
Meni ohim tutunig‘a zamin-u osmon o‘rtar.

Bu dard ila xarob o‘ldum, kelib holimni so‘rmassan,
G‘aming boshqa, alam boshqa, yurakimni fig‘on o‘rtar.

Bu Mashrab dardini, jonoki, har kim boshig‘a solma,
Agar mahsharda oh ursam, behishti jovidon o‘rtar.

Boborahim Mashrab

@hikmatlarimiz

Siz haqsiz

Siz bilan bahslashmayman,
Donosiz shubha shaksiz,
Qasdim yo‘q, qasdlashmayman,
Xo‘p bo‘ladi, siz haqsiz.

Torting yoqamdan qo‘lni,
O‘zim topaman yo‘lni,
Siz bilasiz o‘ng-so‘lni,
Xo‘p bo‘ladi, siz haqsiz.

Bo‘ldi qo‘yvoring yoqam,
Sizga mosmas tabaqam,
Uchadi toshbaqa ham,
Xo‘p bo‘ladi, siz haqsiz.

Ko‘rmaysiz ko‘rolmaysiz,
Kuchlini tan olmaysiz,
Bilganizdan qolmaysiz,
Xo‘p bo‘ladi, siz haqsiz.

Bo‘ldi qiling iltimos,
Bahsga no‘noqman biroz,
Halimlik mo‘minga xos,
Xo‘p bo‘ladi, siz haqsiz.

Tushuntiray deb nuqul,
Og‘zim charchadi butkul.
O‘rganvoldim zo‘r usul:
Xo‘p bo‘ladi, siz haqsiz.

Do‘stlarim tuting quloq,
Yashay desangiz ko‘proq:
Deng nodonni ko‘rgan chog‘:
Xo‘p bo‘ladi, siz haqsiz.

O‘chib qolarkan sasi,
Ja ko‘p ekan foydasi,
Yaxshi yashash qoidasi —
Xo‘p bo‘ladi, siz haqsiz.

Bahodir Iskandarov

@hikmatlarimiz

💎Juma kuni sunnatlari:

▪️G'usl qilish
▪️Xushbo'ylik surish
▪️Misvok ishlatish
▪️Yangi kiyim bo'lsa kiyish
▪️Kahf surasini o'qish
▪️Jumaga barvaqt borish
▪️Ko'proq duo qilish, Payg'ambar alayhissalomga salovotlar aytish.

Juma ayyomi barchamizga muborak bo'lsin!

@hikmatlarimiz

Vaqt aytadi:
«Hamma narsani unut, menga ergash»!

Mol-dunyo aytadi:
«Hamma narsani unut, mendan foydalanib qol»!

Kelajak aytadi:
«Hamma narsani unut, men uchun kurash»!

Alloh taolo aytadi:
«Meni zikr qil, hamma narsani ato qilaman», deydi.

@hikmatlarimiz

Payg‘ambarimiz(s.a.v) Vatanni himoyasi haqida shunday deganlar:

“Ikki ko‘zni (ko‘z egalarini) do‘zax o‘ti kuydirmaydi. Biri Allohdan qo‘rqib yosh to‘kkan ko‘zni, ikkinchisi Vatan himoyasida uxlamay bedor bo‘lgan ko‘zni”.

P.S
14-yanvar - "Vatan himoyachilari kuni" muborak bo‘lsin!

@hikmatlarimiz

Kecha bir savolda aytilishicha, ayol onasinikiga borishda qaynonasidan ruxsat so‘ramay ketgan, qaytib kelganda "Nega ruxsat so‘ramay ketdingiz?" deyilsa, "Erdan ruxsat so‘ralsa, kifoya" degan. Keyingi gal qayergadir hech kimdan ruxsat so‘ramay ketgan, qaytib kelganda "Nega ruxsat so‘ramay ketdingiz?" deyilsa, "Mahr berilmagan bo‘lsa, ruxsat so‘rash shart emas" degan...

To‘rtta narsani chala o‘rganib olib, haq-huquq talashadigan mana shunaqa ayollarni deb ayrim erkaklar ilmli ayolga uylanmaslik kerak degan tushunchada bo‘lib qoldi! Oila faqat haq-huquq asosiga qurilmaydi! Oilada haq-huquq ham kerak, muhabbat ham kerak, hurmat ham kerak, itoat ham kerak...

Yuqoridagi holatda kuyov imkon qadar mahrni tezroq qilib berishi kerak, albatta. Lekin mahrni bermagani sababli ayol ko‘chaga ruxsat so‘ramay chiqib ketishi mumkin degan joyi yo‘q,  eri safarga olib chiqaman desa, rad qilsa bo‘ladi. Shunda ham yaxshi gap bilan uzr aytadi.

Shuningdek, onasinikiga borishda eridan ruxsat so‘ragach, erning hurmati yuzasidan qaynonani ogohlantirib qo‘ysa, yaxshi bo‘ladi. Ko‘ngil uchun ruxsat so‘rab qo‘ysa ham bo‘ladi. "Oyijon, ota-onamni ko‘rib kelmoqchi edim, o‘g‘lingiz ruxsat berdilar, borsam maylimi? O‘zingiz ham yuring, birga borib kelamiz" desa, shu qaynona ham xursand bo‘lib, "Yo‘q, rahmat, qizim, siz bemalol borib kelavering!" deb yuboradi.

Haq-huquq talashgan ayol bilan oxirigacha haq-huquq talashaman desangiz, chiday olmaydi. Masalan, "Bo‘pti, shu sening haqqing ekan, ustingga uylanishga men ham haqliman" desangiz, chiday olmaydi. Shunday ekan, murosayu madora bilan yashab yuravering, andishaning otini qo‘rqoq bilmang! Bir inson havas qilib ilmli ayolga uylanibdi, ilmdan faqat o‘z manfaatingiz uchun foydalanib, uni ilmdan sovutmang!

G'iyosiddin Yusuf

@hikmatlarimiz

Achinarli holat

Ilm, amaldan o'zib ketsa, bu qanday achinarli?

@hikmatlarimiz

Osmondan nima yog'sa, Yer shuni ko'taradi.

O‘zbek xalq so‘zidan

@hikmatlarimiz

Abu Iso Termiziy rivoyat qilgan hadislar:

▪️Alloh, Uning farishtalari, osmon va yer ahllari, hatto inidagi chumoli va dengizdagi baliqlar ham odamlarga yaxshilik o'rgatuvchi olimlarni duo qilishadi.

▪️Kim sukut saqlasa, najot topadi.

▪️Albatta Alloh go‘zaldir va go‘zallikni sevadi.

▪️Alloh yoqimlidir, yoqimlilikni sevadi, pokizadir, pokizalikni sevadi, karamlidir, karamlilikni sevadi, o'ta saxiydir, saxiylikni sevadi.

▪️Kim Allohga va oxirat kuniga iymon keltirgan bo'lsa, yaxshi gap aytsin yoki jim tursin.

▪️Odamlarga shukr qilmagan Allohga shukr qilmaydi.

@hikmatlarimiz

Uchta bekorchi bilan tursang, to'rtinchisi sen bo'lasan.

@hikmatlarimiz

EGIL, O‘ZNI PANA QIL

Egil, o‘zni pana qil,
Borligingni bildirma.
Yo‘talganga o‘n besh yil,
Aksirganga yigirma.

Kar bo‘l, ko‘r bo‘l, tishla til,
Boshga balo keltirma.
Gapirganga o‘n besh yil,
Eshitganga yigirma.

Qalamingni dushman bil,
Qog‘oz uzra jildirma,
Roman yozsang – o‘n besh yil,
Doston yozsang – yigirma...

Erkin Vohidov

@hikmatlarimiz

Mingan avtobusingiz shopiri kimligini bilmasangiz ham xotirjam ketasiz.

Mingan samolyotingiz piloti kimligini bilmasangiz ham xotirjam uchasiz.

Mingan kemangiz kapitani kimligini bilmasangiz ham xotirjam suzasiz.

Endi, butun hayotingiz boshqaruvi Allohning izmida ekanini bilgan holda nega xotirjam yashamaysiz?

Anasxon Mahmud

@hikmatlarimiz