G‘ayratbek Xoldarov | Blog

Sizni fikringiz muhimmi?

"Men katta bo'lsam kim bo'laman" nomli inshoni eng kamida 4 marta yozgan bo'lsam kerak )

"Men Vatanimni sevaman" , "Mening Oilam", "Mening Orzum" shu kabi insholar maktablardagi eng ommabop mavzular bizda.

Chet ellarda maktab bolalari dunyodagi Professor, Olimlar o'ylanib yurgan mavzularda esse yozishadi. "Global iqlimning isib ketishi qanday oqibatlarga olib keladi" v.h.k.

Shu tajribani men ham 8-sinflarda sinab ko'rdim. IELTS da speaking(gapirish) qismida dunyodagi global savollardan berishadi.

Barcha o'quvchilarni birma bir doskani oldiga stul qo'yib o'tirgizib savollar berishni boshladim.

Boshida qiynalishdi. Ee men bularni bilmayman, qiyin ekan... shu kabi javoblar. Asta-sekin fikrlashi o'zgara boshladi ularni.

Buni o'zgarish deya olmayman, ular shunchaki ichkaridagi qachonlardir gapiraman degandagi ovozni, tashqi muhitdagi odamlarning ta'siri bilan yo'q bo'lib ketgan fikrlashini qayta uyg'otishdi.

Bizni fikrimiz muhim ekan deb o'ylab qolishdi. Meni ham eshitarkan kimdir deb ko'nglidagi va miyyasidagi g'oyalarni aytishdi.

Bundan tashqari omma oldida gapirish ko'nikmasi shakillana boshladi. Introvert o'quvchilar, darsimda biror marta gapirmagan o'quvchilarning ichidagi hayollarini o'ylab hayron qoldim)

Biz eshtishni bilsak bas, ko'plab muammolarga yechim va g'oyalar soddagina ammo ichki ovozi o'lgan insonlardan ham topiladi.

Ho'sh, #Challange 4 - Kun ✅ ga kelsak. Bugun bazo'r tugatdim 30 betni 😄
Kitob " Effortless"

@gayratbek_xoldarov

Ilm olishda 3 ta daraja bo'ladi.

Boshida hech narsani bilmaymizda, o'rganishni boshlaymiz. Xoh u diniy bo'lsin, xoh u dunyoviy.

Ikkinchi daraja bu - biroz o'rganganimizdan so'ng, o'zimizni eng aqilli odamdek his qilamiz. Bilgan narsalarimizni barchaga o'rgatgimiz keladi.

Eng so'ngisi yetuklik davri. Bunda biz hech narsani bilmasligimizni chuqur anglab yetamiz.

Ammo ko'pchilik 2-darajada qolib ketadi. Manmanlik, kibr va xudbinlikning jamlanmasida.

Tezroq 3-darajaga chiqib olishimiz kerak. Yo'qsa ancha qiyin bo'ladi.

@gayratbek_xoldarov

#Challange 3 - Kun ✅

20 bet " Ego dushmaning"
10 bet " The productive Muslim"

"The productive Muslim" kitobini barcha o'qishi shart bo'lgan kitoblar turkumiga kirgizgan bo'lardim

Dinimizdagi juda ko'plab narsalarni "Zamonaviy" dunyoda qo'llashni o'rgatgan ekan. Atiga 10 bet o'qidim, ichidagi ma'lumotlar esa ancha vaqtga yetadi.

@gayratbek_xoldarov

Miyaga farqi yo‘q, tasavvuringizdagi narsani boricha qabul qilaveradi. Ilmiy tadqiqotlarga ko‘ra miya haqiqat bilan tasavvurni farqlay olmas ekan.

Kamroq orzularda yashashni tavsiya qilaman. Bo‘lmasa hali erishmagan natijangizga miya sizni dofamin (zavq) gormoni bilan mukofotlab qo‘yadi.

Pushta rang orzularingiz kechki payt kayfni beradi, ertalab esa o‘sha natijaga erishish uchun harakat qilgiz kelmaydi, chunki natija kayfini olib bo‘lgansiz.

Katta hayotga yoki yangi sohaga qadam qo'yyapsizmi?

Xo'sh, oliy ma'lumotliman deng? Bu dunyo sizniki degani emas. Baribir odamlar sizga yomon muomala qilaveradi.

Sizda million dollar yoki devor to'la osig'liq mukofotlar bormi? Yangi sohaga qo'l urganda tirnoqchalik ahamiyati qolmaydi.

Qanchalik iqtidorli ekanligingiz, tanishlaringiz ko'pligi yoki qancha pulingiz borligi muhim emas. Agar siz katta, muhim va mazmunli nimadir qilmoqchi bo'lsangiz, sizga nisbatan munosabatda befarqlikdan tortib ochiq-oydin nafratgacha uchrashingiz mumkin. Buni hisobga oling.

Oldinda sizni hamma narsa kutib turibdi: e'tiborsizliklar, mazaxlar, so'kishlar, bir taraflama murosa. Sizga baqirishadi. Oson narsaga erishish uchun ham qora mehnat qilishingizga to'g'ri keladi.

Bularning barchasi sizni g'abalantiradi. Bu esa qarshilik ko'rsatishga va shunday deyishga undaydi: "Men bundan yaxshiroqman. Men yaxshirog'iga loyiqman".

Hammaga qichqirgimiziz keladi: "Mening kimligimni bilasizmi o'zi?!"
Buni qilishga sizni ego buyuradi.

Aksincha, hech narsa qilmaslik lozim. Shu vaziyatni qabul qiling. Shuni hazm qiling. Sabrli bo'ling. Bunga e'tibor bermang ko'p va aqlli harakat qiling.

O'zini tutish juda qiyin lekin ahamiyatli. Ba'zan turli vasvasalar sizni bezovta qilar, ehtimol, g'olib ham kelar. Hech kim mukammal emas, lekin doim harakat qilishimiz lozim.

Hayot shunday qurilgan, yangilar doim qariyalarning injiqliklariga chidashlari lozim. Vaqtlar o'tib harakatlaringiz o'z samarasini beradi. Ungacha siz bunday holatlarga reaksiya bildiravermasdan, to'g'ri qabul qilishni o'rganing.

@gayratbek_xoldarov

O'zgarish kerak

Ancha vaqtdan beri o'z ustimda ishlashim kerakligi va ko'proq kitob o'qishim kerakligi o'ylantirib kelgan edi.

Ammo, davomiylikni yo'lga qo'yishda biroz qiynaldim. O'tgan yili atiga 12 ta kitob tugatibman. Bu yil ham shunday qolib ketmasin deb o'zimga "Chellenj" boshlamoqchiman.

Har kuni eng kamida 30 bet kitob o'qish. 1 oy davomida #challenge heshtegi ostida postlar joylab boraman. O'qiy olsam postlar ko'payadi. O'qi olmasam biringizga konkurs qilib kitob sovg'a qilaman.

Siz ham qo'shilishingiz mumkin!

@gayratbek_xoldarov

Some days you just have to stay silent because no words can explain what is going on in your head and mind.

And then, melancholy takes over you.

Oyiga 2 mln pul topasiz. Ishlayapsiz. Harakat qilyapsiz. Negadir o'xshamayotkanday. Nimadir yetishmayotkanday.

Sheringingizga qaradingiz. U sizdan ko'proq, 5 mln topyapti. Uni hayoti zo'r deb o'ylaysiz. Havas qilasiz.

Men ham uni o'rnida bo'lganimda bu muammolarim bo'lmasdi, qiynalmasdim deya hayol qilasiz.

Qorningiz to'yyapti. Kiyimlaringiz but. Kunlar bir maromda davom etyapti. Lekin baribir sizda ko'proq pul topkanimda yaxshiroq yashardim degan g'alati tug'yon bor.

Sizni bugun nech pul topishingiz, ona qornida 120 kunlik bo'lganingizda yozilib qo'yilgani hayolingizga ham kelmaydi. Nolib yuraverasiz.

Do'stim, 10 mln pul topadigan insonni ham shu pulga yarasha muammosi bor. O'zingizni boshqalar bilan taqqoslashni bas qiling.

Men bu bilan bori shu ekan deb to'xtab qoling demoqchi emasman. Rivojlaning. Ko'proq va aqilliroq mehnat qiling.

Xudodan ko'p pul topishni so'rayvermasdan, topayotgan pulingizga baraka so'rab duo qiling.

Boriga qanoat qilish kerakligini mohiyatini tushuning. Albatta, to'xtab qolmaslik sharti bilan!

@gayratbek_xoldarov

Oldinlari tanqid qilishsa yoqmas edi. Xato fikrlaganimni yoki aybimni aytishsa ularni yomon ko'rib qolardim.

Jirraki bola bo'lganman, urushqoq, faqat o'zinikini haq deydigan. O'zidan, aqilli kimnidir yasab olgan bola edim.

Vaqtlar o'tdi, hozir tanqid qilsa o'sha odamga hurmatim oshyapti. Xato qilganimni tan olishni o'rgandim. Ularni to'g'irlash uchun, o'sha yo'lni bosib o'tgan insonlardan yordam so'rashga uyalmayapman.

Bu qandaydir hotirjamlik berdi. Barcha narsaga aqlim yetadi, o'zim hal qila olaman degan ma'suliyatni mazmunini anglashni boshladim.

O'zimga o'xshagan o'smirlarga duch kelsam, kulib qo'yaman. Ular ham hozir shunday o'ylashmoqda, go'yoki ular hech qachon adashishmaydi.

Yoshlikdaku mayli, bu xatolar asta sekin bizni tarbiyala boshlaydi. Ammo, 40 yoshda ham bola bo'lib qolganlarga, buning badali og'irroq keladi.

Notog'ri fikrlayotganingizni sizga kimdir isbotlab bera oldimi, demak xatoingizni tan olish vaqti kelibdi.

@gayratbek_xoldarov

Yolg'izlik bu ozodlik?

Seni ko'p tanishlaring, qarindoshlaring odamga qo'shilmaydi bu, yovvoyi muomalasi yo'q, odam bo'lmaydi bu deb o'ylashadimi? Haa... bu tanish holat.

Aslida sen shunchaki ulardan boshqachasan. Senga ularning qo'shnisi qanchaga mashina olgani umuman qiziqmas. Seni butun boshli yer sayyorasi, koinotdagi rasmlarda zarracha nuqta bo'lib ko'ringan yerdan boshqa joyda ham ongli mavjudotlar bo'lishi mumkinligi qiziqtiradi.

Do'stlar bilan yig'ilganda osh pishishini kutib o'tirganingda, hayolingda odamlar mol sutini iste'mol qilishni qachon o'ylab topishgan ekan deb o'ylab o'tirasan.

Qarindoshlarnikiga to'y yoki maraka bo'lsa borging kelmaydi. Chunki borganda sun'iy tirjaygan yuz bilan hamma bilan ko'rishib chiqishing kerak...(f** idiot)

Bugun to'yi bo'lgan kelin-kuyov uchun aytilgan "Ikki yosh baxtli bo'lsin".. O'g'il to'ylar bo'lsin" kabi tilaklar aytging kelmaydi. Chunki 1 yildan keyin uyidagi qaynona-kelin muammosi sabab ajrashgan yigitning keyingi to'yida ham xuddi shu tilaklar aytilaverishini guvohi bo'lgansan.

Senga yolg'izlik yoqsa bu yomon narsa emas. Yolg'izlikni yaxshi ko'rgan insonlar kuchli insonlar bo'ladi. Chunki ular qanday zerikmaslikni biladi.

Oqibatimiz yo'qolmasin deydigan do'stlaring, bir kun kelib foydang tegmay qolganida, umuman boshqa yuz bilan senga munosabat qilganida, vaqtingni bekor sarflaganingni tushunib yetasan.

Inson so'zlari bilan bir tiynga qimmat aslida. Xarakat barcha narsani hal qiladi. Insonni qilayotgan ishlariga qarab baho berish kerak, gapirayotgan gaplariga qarab emas.

Ba'zi odamlar bor, gaplashmasa turolmaydi. Farqi yo'q kimnidir g'iybat qiladimi, siyosatni gapiradimi, qo'shnisini sigiri tuqqanidan keyin o'zini qanday tutayotganimi...suhbatga muhtoj.

Sen esa kitob bilan ham suhbatlasha olasan. Ularni hayotida o'zingni his qila olasan. Yozuvchilar bilan, qahramonlar bilan gaplashasan.

Lekin ular seni o'ziga o'xshatmoqchi bo'ladi. Ularni gapini eshtishingni xohlashadi. Eng yomoni shuki o'zlari hayotda baxtsiz insonlar senga baxt formulasini chizib berishadi. Ular xohlaganday yashashing kerakligini istashadi.

Kuching boricha tupur. O'z yo'lingdan qolma. Sen tanlagan yo'l eng to'g'risi. Mutlaqo to'g'risi.

Keyinchalik xato qilib, o'sha xatolardan xulosa chiqara olganingni sezsang, davom etaver.

Sen uchun baxt boshqalarnikidan farq qilishi mumkin. Kim uchundir ko'zining ko'rishi baxt bo'lsa, kim uchundir kuni bo'yi sigaret chekmay, kechga borganda sigaretni qoniqib tortish baxt.

Shu uchun senga nima kerakligini sendan boshqa hech kim bilmaydi. Sen baxtli bo'lasan. Davom etaver.

Baxtingni asra, so'z bilan ifoda etma, seni baxtli ekanligingni bir zamonlar senga formula tuzib berganlar shundoq ham sezishadi. Baxtli bo'lma, baxtni yarat do'stim!

@gayratbek_xoldarov

"Elon Musk" kitobini o'qiyapman. U yozgan emas. U haqida yozishgan.

G'ayritabiiy inson ekan, hech narsadan qaytmaydigan, kitobdan boshini ko'tarmaydigan, qilaman dedimi oxirigacha boradigan xarakteri bor ekan.

Ya'ni o'ylagan narsasi haqiqatda xato yoki umuman amalga oshirib bo'lmasligini o'z ko'zi bilan ko'rmaguncha to'xtamaydigan.

U boyda, hamma narsaga puli yetadi deb o'ylardim. Yo'q u yoshlikdan shunday. Odamovi, do'stlari kam bola bo'lgan.

Qo'pol qilib aytganda, sen buni qila olmaysan degan insonlarga tupurib, hech kim ishonmasa ham harakatda davom etadigan kuchli xarakter egasi ekan.

Kitob va uning hayoti juda ham ruhlantirarkan. Oldingizga kattaroq maqsadlar qo'yishga undarkan.

Kitoblar holatingizga kuchli ta'sir qiladi. Shu sababli hadeb "psixologik travma" oladigan kitoblarni o'qiyvermasdan, positiv kitoblarni ham o'qib turing.

400 bet atrofida ekan, men esa endi 60 bet o'qidim) Tugatganda bu kitobga yana qaytamiz Xudo xohlasa.

Xo'sh, sizchi qanday kitob o'qiyapsiz?(o'qisangiz albatta)

@gayratbek_xoldarov

Butun umrlik motivatsiya

- Dada,
- Ha, og'lim.
- Tarix o'qimoqchiman. Yurist bo'laman.
- Aqling yetyaptimi, qiziqyapsanmi gazini bos!

- Dada, ingiliz tili o'rganmoqchiman. Hozir til o'rganish ko'p sohalarga eshik ochar ekan.

- Aqling yetyaptimi? Qiziqyapsanmi? Gazini bos!

- Dada, telegramda kanal ochib yuritmoqchiman. Online daromadni oshirish uchun.

- Aqling yetyaptimi? Qiziqyapsanmi? Gazini bos!

- Dada, kopirayterlikni o'rganmoqchiman... biroz pul ketib qolarkan...

Qiziqyapsanmi? Gazini bos! Pulidan o'ylanma, sen yaxshi o'qisang bo'ldi.

Biror narsa qilmoqchi bo'lsam hech narsaga to'sqinlik qilmagan shu vaqtgacha. Natijasi noma'lum desam ham, o'rganganing qoladi deydi.

Onam ham doim fikrimni ma'qullaganlar.

Mana hozir o'rgangan barcha narsam asqotyapti. Asta-sekin o'z yo'nalishimni topa boshlayapman.

Bilmadim nega ko'p ota-onalar o'z farzandlarini, ular xohlamagan sohaga yo'naltirib qo'yishadi. So'rasangiz hatto farzandi nimani xohlayotganini ham bilishmaydi.

U bola katta bo'lgunigacha ota-onasini fikri va ularning qarorlari bilan yashagan.

Va yana kamiga 18 ga to'lganda "katta bo'la bo'lib qolding, o'zing qaror qabul qila olmaysanmi? Shunga ham aqling yetmaydimi?" Deb koyib ham qo'yishadi.

Yosh paytingizda qiziqayotgan narsalaringizni sinab ko'ring. O'xshamasa ham hech narsa yutqazmaysiz.

Yoshingiz ulg'ayganda tavakkal qilsangizu, o'xshamasa, vaqt va pul yo'qotasiz.

Bu postni men ham qachondir dada bo'lganimda, o'zimga eslatma bo'lishi uchun yozdim)

Ungacha esa sizga ham dadamning gaplari:

Aqlingiz yetyaptimi? Qiziqyapsizmi? Gazini bosing!

@gayratbek_xoldarov

2 yil oldin ochgan kanalimni topib oldim. Muhabbat, haqida rosa yozgan ekanman)

O'qib, o'zim hayron qoldim nahotki shu postlarni men joylaganman deb.

Ancha o'zgardimmi? Yoki o'zimni o'zgargandek tutyapmanmi? Bilmay qoldim.

Ammo hozir barchasi boshqacha nazarimda. Tuyg'ular, fikrlar...

Balki yana 2 yildan keyin bu yozganlarim ham o'zimga g'alati tuyular. Shunday bo'lishini umid qilaman.

Sodiq bo'lmoq kerak: so'zga, majburiyatlarga, boshqalarga, o'ziga sodiqlik. Shunday boʻlish lozimki, sizni eslaganda gʻazablanishmasin...

Rad etilishdan qo'rqasizmi?

Tog'am bilan mashina bozorga chiqdik. Ish bor yordam berasan degandi, ho'p dedim.

Ijtimoiy tarmoqlar va xizmatlarini jamlagan leaflet(varaqa) tarqatishim kerak edi.

Qo'limga 400-700 atrofida varaqa tutqazdi. Bozordagi barcha odamga berib chiqasan dedi, ha oson ekanku deb o'yladim.

Bozorga kirdim. O'rtada turibman. Barchasi begona. Qotib qoldim. Hech nima qila olmadim.

Nimaga? Chunki qo'rqdim. Nimadan? Rad etilishdan. Har bir insonga gapirib aka buni oling deb chiqishim kerak edi. Pullik emas, oddiy narsaku berib qo'yish deb o'ylashingiz mumkin.

Ammo, odamlar har-hil. Oddiy bir bola bilan ishi yo'q. Tabiiyki qo'lida katta pul aylanadi ularni.

Bor boshqa ish qil, menga kerakmas, boshqa odamga bor. Shu kabi gaplar bo'lishi ehtimoli yuqori.

Ota-onam harakatlari va Xudo bergan rizq bilan, hech nimadan kamchilik yo'q katta bo'ldim.

Hech kimga yalinmasdim. Chunki, bunga ehtiyoj yo'q edi.

O'sha kuni o'zimdan qattiq ranjidim. Nahotki shu darajada zaif bo'lsam... tarqatishni boshladim.

Odamlar qiziqyapti. Nima tarqatyapsiz deb o'zlari so'rab kelishdi. Hayron qoldim. Rad etganlari ham bo'ldi. Qo'rquvimga qarshi turishni o'rgandim. Ishimda davom etdim...

Biz doim rad etilishdan qo'rqamiz. Shu sababli qilmoqchi bo'lgan ishlarimizni ayta olmaymiz.

Kimnidir yaxshi ko'rasan o'ziga aytolmaysan, rad etilishdan qo'rqasan. Muammoying bor hech kimga aytolmaysan, hatto yaqinlaringa ham, chunki rad etilishdan qo'rqasan.

Ba'zida hech nimani o'ylamasdan, boricha harakat qilib ko'rish kerak. Chunki, haqiqiy hayot biz o'ylagandaka qo'rquvlarga to'la emas.

@gayratbek_xoldarov

Bu hayotda baxtli bo'lishning yo'li undan ko'p narsa kutmaslikdir. Bo'lmasa qanotlari sindirilgan qushga aylanib qolasan.