Qator-qator masjid soling bari bekor,
Qimmatbaho gilam soling bari bekor,
Joynamozda uxlab qoling bari bekor,
Mahallada bitta yetim yig‘lab tursa!

Garchi beksiz,oshig‘ingiz doim olchi,
Dunyo degan, bilmaysizmi yolg‘on folchi?;
Arshni larzon qilar ekan bitta tomchi,
Mahallada bitta yetim yig‘lab tursa!

Mol topasiz, ko‘z tutmaysiz ertasiga,
Shariatda ruxsat bor deb to‘rttasiga,
Uy qurasiz,jahannamning o‘rtasiga,
Mahallada bitta yetim yig‘lab tursa!

Hoyu-havas, molu davlat,dunyo foniy,
Ojizaning so‘rog‘lari hukmi oliy,
Ko‘zidagi jola emas,azob oniy,
Mahallada yetim ayol yig‘lab tursa!

Gʻanim bo‘ldi ikki qarog‘ bir-biriga,
Ko‘milmang-yey,o‘tar ketar kun siriga,
Qadam bosmang Baytullohday pok yeriga,
Mahallada bitta yetim yig‘lab tursa!

Kun sanamang,shoyon o‘tgan kuningizni,
Yo‘qlamasdan, nochor yashar iningizni,
Islom demang,amal qilgan diningizni,
Mahallada bitta yetim yig‘lab tursa!