ELTUZ

ТОШКЕНТ ДАВЛАТ СТОМАТОЛОГИЯ ИНСТИТУТИ КЛИНИКАСИДА КОРРУПЦИЯ

Ассалому алайкум!

Мен шифокорман ва ўзим ҳам бюджет ташкилотида фаолият юритаман. Аммо яқинда Тошкент давлат стоматология институти клиникасида гувоҳ бўлган ҳолатлар мени қаттиқ ташвишга солди. Бу ердаги шароитлар ва иш услуби нафақат ачинарли, балки жуда ҳам ҳайратланарли.

Клиникада антисанитария, коррупция, манманлик, кибр ва беморларга нисбатан менсимаслик ҳукм сурмоқда. Шифокорлар беморларни ҳисобга олмайди, асосий эътибор эса фақат пул ундиришга қаратилган. Хусусий клиникаларда ҳам бундай ҳолатни учратиш қийин. Лабораторияда ҳатто тезкор мурожаат қилган беморлар ҳам пул тўлашга мажбур. Пули камроқ бўлган беморлар эса навбатда ўтирганлардан қарз сўрашгача мажбур бўлмоқда.

Энг ажабланарлиси – чек берилмаслиги ва пластик карта орқали тўлов қабул қилинмаслиги. Фақат нақд пул талаб қилинади! Агар беморда нақд пул бўлмаса, стол устида ёзиб қўйилган пластик карта рақамига “ташлаш” таклиф қилинади. Рентгенологик текширувларда эса янада ачинарли ҳолат – бу бўлимда ишловчи шифокорлар ўзларини "хусусий" деб ҳисоблаб, бемалол пул ундиришмоқда. Ҳатто тезкор ҳолатдаги беморлардан ҳам қўшимча ҳақ олинмоқда.

Жарроҳлик амалиётига тайёрлаш учун боламни стоматолог кўригига олиб борганимизда, тўлов қилиш шартлиги дарров айтилди. Керакли маблағ йўқлигини айтганимизда, бизни шифохонанинг бошқа бир бурчагига йўналтиришди ва фақат шу ерда "бепул" даволаниш мумкинлиги маълум бўлди. Болалар тиш шифокорини топиб, маълум бир сумма эвазига келишиб, даволатдик. Барча тўловлар нақд амалга оширилди, бирор жойда рўйхатга олинмади, ҳатто боламнинг исми ҳам қайд этилмади – шифокор ишни битирди, пулни олди, холос!

Болалар юз-жағ жарроҳлиги бўлимида боламни ким операция қилишини сўраганимда, профессор тақсимлаб беради, эртага биласиз, деб жавоб беришди. Танлаш имкони бор ёки йўқлигини сўраганимда, “профессор билан гаплашинг” дейишди. Ҳуллас, операция ўтказилди. Кейин эса жарроҳ операция учун алоҳида, наркоз учун эса анестезиолог билан алоҳида "гаплашишим" кераклигини айтди.

Мен давлат ордери билан келганимни, барча тўловлар давлат томонидан қопланиши кераклигини тушунтирганимда, шифокорлар “бизга давлат ҳеч нарса бермайди, барча жиҳозларни ўзимиз сотиб оламиз” деб жавоб беришди. Натижада, наркоз учун 1 000 000 сўм, операция учун эса 5 000 000 сўм тўлашга мажбур бўлдик. Ҳатто, шифокорлар мен ҳамкасблигимни инобатга олиб, “бозордагидек келиштириб бердик” деб ҳам қўйишди!

Мен бу мурожаатни пул тўлашни хоҳламаганим учун ёзганим йўқ! Лекин давлат муассасасида пуллик хизмат шунчалик очиқчасига, ҳеч қандай назоратсиз амалга оширилаётгани ҳайратланарли! Бир марталик тиббий жиҳозлар клиника томонидан таъминланмаслигига ишониш қийин. Бу ерда давлат томонидан ажратилган маблағ қаёққа кетяпти?

Бу ҳақда клиника бош шифокори С.П. Ахмедовга мурожаат қилмоқчи бўлдим. Лекин қабулхона олдида турган бош шифокор ўринбосари, Фаррух исмли шахс, “дардингиз бўлса, бўлим мудирига айтинг, бу ерда муҳокама қилинадиган масала йўқ” деб, мени кабинетдан чиқариб юборди.

Тошкент давлат стоматология институти клиникасида коррупция гуллаб-яшнаяпти! Мен ижтимоий тармоқларда бу муассаса ҳақида кўплаб шикоятлар ёзилганидан хабардор эдим. Энди эса уларнинг барчаси ҳақиқат эканига ўзим гувоҳ бўлдим. Афсуски, ҳали-ҳануз ҳеч қандай ўзгариш йўқ, бу клиникада тартиб ва назорат мутлақо йўқ! Худди давлат қонунчилиги бу ерга тааллуқли эмасдек!

Муҳтарам Президентимиз олиб бораётган ислоҳотларга бундай ҳолат мутлақо тўғри келмайди! Мен Президентимиз сиёсатини қўллаб-қувватловчи фуқаро сифатида масалани ҳал қилишни сўрайман! Илтимос, бу бепарволик ва коррупцияга барҳам бериш учун чора кўринг!


💬Telegram |📱Facebook |
🐦Twitter |📱Instagram | ▶️YouTube

ИШ ҲАҚИМИЗ ҚАЧОН ТЎЛИҚ ТЎЛАНАДИ?

Фарғона вилояти, Учкўприк тумани "Агро-Риштон таъмир сервис" ишчилари мурожаати

Ассалому алайкум, ҳурматли Элтуз жамоаси!
Биз, Фарғона вилояти Учкўприк туманидаги "Агро-Риштон таъмир сервис" ишчилари, сизларга яна бир бор мурожаат қилишга мажбурмиз. Чунки ойлик маошларимиз ҳали ҳам тўлиқ тўланмаган ва бу муаммога мутасадди ташкилотлар етарлича эътибор қаратмаяпти.

Муаммо:

— Илгари сизларга мурожаат қилганимиздан сўнг бизга маълум миқдорда маош берилди. Бир қисм ходимлар 1 миллион сўмдан ойлик олди, бироқ ҳали ҳам 10-15 миллион сўмгача қолдиқ маошларимиз тўланмаган.

— Биз ўз ҳақ-ҳуқуқларимизни талаб қилганимиз учун раҳбарлар босим ўтказмоқда. Учкўприк тумани "Агро-Риштон" филиали бошлиғи Достон мажлис ўтказиб, "Ким Элтуз каналига мурожаат қилса, ишдан бўшатамиз," деб таҳдид қилди.

— Унинг сўзларига кўра, бу буйруқ Фарғона вилояти бошлиғи Нурматов Мирзаолим томонидан берилган. Агар ростдан ҳам шундай бўлса, ишчиларнинг ҳақ-ҳуқуқини поймол қилиш, уларни таҳқирлаш ва қўрқитиш қай даражада қонуний?

Масъул идораларнинг лоқайдлиги:

— Учкўприк тумани прокуратураси бу муаммога жиддий ёндашмаяпти.

— Нурматов Мирзаолим томонидан тақдим этилган ёлғон ҳисоботлар асосида ҳеч қандай чора кўрилмаяпти.

— Мутасадди ташкилотлар реал ҳолатни ўрганиш ўрнига, ҳалигача сохта маълумотларга ишонмоқда.

Бизнинг талабимиз:

Биз, "Агро-Риштон таъмир сервис" ишчилари, қонуний ҳақ-ҳуқуқларимиз таъминланишини талаб қиламиз. Биз нафақат ўз маошларимизни ўз вақтида олишни, балки ишчиларга нисбатан босим ўтказган раҳбарларга нисбатан қонуний чоралар кўришни сўраймиз.

Фарғона вилояти прокурори ва ҳокимига мурожаат қиламиз:

1. Учкўприк туманидаги ишчилар маошининг кечикиши сабабларини текшириб, муаммони ҳал қилиш.
2. Нурматов Мирзаолим ва унинг раҳбарлигидаги масъул шахсларнинг фаолиятини назоратга олиш.
3. Элтуз каналига мурожаат қилган ишчиларни ишдан бўшатиш таҳдидига ҳуқуқий баҳо бериш.

Биз ўз ҳақ-ҳуқуқимизни қонуний йўллар билан ҳимоя қилишга тайёрмиз ва маошларимиз тўлиқ тўланмагунча Элтуз каналига мурожаат қилишда давом этамиз.

Ҳурмат билан,

Фарғона вилояти, Учкўприк тумани "Агро-Риштон таъмир сервис" ишчилари


💬Telegram |📱Facebook |
🐦Twitter |📱Instagram | ▶️YouTube

ҲАЗИЛНИНГ ТАГИ ЗИЛ – ТАСОДИФИЙ ҚОТИЛЛИК

Қорақалпоғистоннинг Амударё туманида фермер хўжалиги иш юритувчиси ўзи билмаган ҳолда дўстининг қотилига айланди.

Элтузга етиб келган суд ҳужжатларида исм-шарифлар яширилган.

Хўжаликнинг иш юритувчиси 2024 йил 1 ноябрь куни шоли даласи олдида қадрдон дўстини кўриб қолади.

Дўсти билан қучоқлашиб кўришди – икковлон ҳазиллашиб кураш тушди.

Шунда иш юритувчининг дўсти қалтис йиқилиб бўйин соҳасидаги умуртқа суяги синди.

Жароҳатдан кейин ҳаракатланолмай қолган бемор зудлик билан касалхонага олиб келинди, бироқ умуртқа операцияси пайтида жони узилди.

Суд мажлисида жавобгар ўлган дўсти билан 7-8 йилдан бери қадрдонлиги, ораларида ҳеч қандай адоват бўлмаганини айтди.

Бу сўзларни марҳумнинг яқинлари ҳам тасдиқлади. Томонлар ўзаро келишишди.


Амударё туман суди жавобгар шахсга 1 йил аҳлоқ тузатиш ишлари жазосини тайинлаб, шу муддат давомида даромадининг 20 фоизини ушлаб қолиш ҳукмини чиқарди.


💬Telegram |📱Facebook |
🐦Twitter |📱Instagram | ▶️YouTube

ТОШЛОҚДАГИ МАКТАБДА ТУБЕРКУЛЁЗГА ЧАЛИНГАН ЎҚУВЧИЛАР СОНИ ОРТМОҚДА

Олдинроқ Фарғона вилояти Тошлоқ туманидаги 42-мактабда туберкулёз тарқалгани ҳақида хабар берган эдик.

Ҳозирга қадар касалланган ўқувчилар сони 12 нафарга етди. Бу вазиятда мактаб карантинга ёпилиши ва дарслар масофавий ўтилиши шарт.

Шунингдек, мактаб жамоаси ва ўқувчилар тўлиқ текширувдан ўтказилиши керак. Бироқ ҳеч қандай чора кўрилмаяпти. Мактабда карантин эълон қилинмади, дарслар оффлайн давом этмоқда.

«Мактабда Бўриевлар оиласи ҳукмрон. Дипломсиз шахсларни ўқитувчи қилиб олгани майли, лекин ҳозир мактаб ҳатто санитария талабларига жавоб бермаяпти. Болалар ва жамоанинг соғлиги хавф остида», дейди ота-оналар.

Туберкулёз урчиган Тошлоқнинг 42-мактаби карантинга олиниши керак. Мактаб ва мактабгача таълим вазирлиги, Санитария-эпидемиология станциясидан зудлик билан вазиятни назоратга олиш сўралади.

ШОВОТНИНГ МОДДИЙ ЁРДАМГА “МУҲТОЖ”ЛАРИ

Хоразм вилояти Шовот туманида яшайман. Эътирозим шуки, давлат томонидан аҳволи оғир хонадонлар учун ажратилаётган моддий ёрдам учун интилаётган соғлом, ишлаш лаёқати бор, лекин меҳнат қилиш истаги йўқ айрим шахслар ҳақида айтмоқчиман.

Бировнинг камчилигини айтиш осон. Гуруҳлар очиб, дарахтларни бундоқ қилиш керак, бундай парваришлаш зарур, деб, битта кўчат ўтқазмаганларни қандай номлаймиз?

Сен аслида шундай иш қилгинки, сенга одамларнинг ҳаваси келиб, ўрнак олсин.

Моддий ёрдам, темир дафтар, болалар нафақаси, аёллар дафтарию, бошқаларига киришдан ўзингни сақла.


💬Telegram |📱Facebook |
🐦Twitter |📱Instagram | ▶️YouTube

ПРЕЗИДЕНТ СИЁСАТИГА ЭЪТИБОРСИЗЛИК ЁХУД АГРОБАНКДАГИ БАҲСЛИ ТАЙИНЛОВ

Ўзбекистонда иқтисодий ислоҳотлар ва камбағалликни қисқартириш йўлида жуда катта ишлар бажарилмоқда. Президент Шавкат Мирзиёев раҳбарлигида давлат аҳоли бандлигини таъминлаш ва камбағалликни қисқартириш мақсадида янги ташаббусларни жорий қилмоқда. Бундай ташаббусларнинг амалий ижроси биринчи навбатда маҳаллий раҳбарлар ва масъул ташкилотларга боғлиқ. Бироқ, баъзи ҳолларда давлат сиёсатига масъулиятсиз ёндашиш ҳолатлари ҳам кузатилмоқда.

Бош вазир ўринбосари қарори ва ижроси

2025 йил 3 феврал куни Ўзбекистон Республикаси Бош вазир ўринбосари – Иқтисодиёт ва молия вазири Жамшид Кучкаров раҳбарлигидаги йиғилишда 25 нафар банк раҳбарлари лавозимига нолойиқ деб топилди. Сабаб – улар аҳоли бандлигини таъминлаш, камбағалликни қисқартириш ва давлат томонидан белгиланган иқтисодий вазифаларни бажаришда етарлича фаоллик кўрсатмаган.

Йиғилиш қароридан сўнг, Хоразм вилояти Янгиарик туманидаги Агробанк АТБ филиали раҳбари Каримов Элмурод Сапарбоевич лавозимидан озод қилинди. Бу қарор банк тизимидаги масъулиятни ошириш ва давлат сиёсатини амалга оширишни таъминлашга қаратилган эди.

Бироқ, орадан бир ҳафта ўтар-ўтмас, Каримов Элмурод Сапарбоевич яна Агробанк Янгиарик филиали раҳбариятига қайтарилди – бу сафар бошқарувчи ўринбосари сифатида. Яъни, у амалда яна раҳбарлик лавозимига эга бўлди.

Бу қарор қанчалик адолатли?

Ҳукумат юқори поғоналарда турган раҳбарларнинг масъулиятини ошириш учун жиддий чоралар кўраётган бир пайтда, банк тизимида бундай баҳсли тайинловлар қандай юз бермоқда? Агар бир раҳбар давлат сиёсатига эътиборсизлик қилгани учун ишдан олинган бўлса, уни яна ўша ташкилот раҳбариятига қайтариш қанчалик тўғри?

Қизиғи шундаки, Каримов Элмурод Сапарбоевич қисқа муддат ичида бир нечта қимматбаҳо мулкларга эга бўлган. Жумладан:

✅ Янгиарик туманида уй
✅ Тошкент шаҳрида уй
✅ Иккита “Isuzu” русумли автомобил (920 млн сўмдан)

Бу мулклар қандай маблағлар ҳисобига сотиб олинган? Агар банк раҳбари ҳақиқатан ҳам фидойилик билан ишлаган бўлса, нега у ҳукумат қарорига зид равишда қайта тайинланди?

Президент сиёсатига қарши ҳаракат эмасми?

Давлат раҳбари ўз чиқишларида коррупцияга қарши курашни устувор вазифа қилиб қўйган. Лекин ҳудудий банклар раҳбарияти ҳукумат қарорига зид равишда шахсий манфаатларини биринчи ўринга қўяётган бўлиши мумкин. Агар бу ҳолатга етарлича эътибор берилмаса, келажакда бундай ҳолатлар яна такрорланиши мумкин.
Шу боис жамоатчилик бунга бефарқ бўлмаслиги керак. Масъул ташкилотлар ушбу масалани жиддий ўрганиб, одилона қарор чиқариши лозим. Чунки "Янги Ўзбекистон" фақат адолатли тизим асосида барпо этилиши мумкин.

💬Telegram |📱Facebook |
🐦Twitter |📱Instagram | ▶️YouTube

БОШ ПРОКУРОРНИНГ ТОПШИРИҒИ БАЖАРИЛМАЯПТИ!

Ҳурматли Элтуз таҳририяти!

Сизга Қоракўл туманидан мурожаат қилмоқдаман. Мен ўз муаммоларимни қонуний тарзда ҳал қилиш учун бир неча марта расмий идораларга мурожаат қилдим. Ҳатто 2025 йил 11 февраль куни Ўзбекистон Республикаси Бош прокурори Негматулло Йўлдошовнинг сайёр қабулларига ҳам бордим. У киши шахсан менинг ишимни кўриб чиқиб, вилоят кадастр агентлиги раҳбарига "Бу ишни ҳал қилиб бер!" деб қатъий топшириқ бердилар.

Бироқ шу кунгача бу топшириқ бажарилмади. Мутасаддилар ишни бир-бирига юклаб, ҳал қилиш ўрнига турли баҳоналар билан вақтни чўзмоқда.

✅ 12 февраль – Қоракўл туман прокуратурасидан бир аёл қўнғироқ қилиб, менинг ишимни ўзи кўраётганини ва эртаси куни кадастр ходими уйга келиб ҳужжатларни расмийлаштиришини ваъда қилди. Лекин ҳеч ким келмади.

✅ 15 февраль – Вилоят прокуратурасидан менга қўнғироқ қилиб, суд қарори қачон чиққанини сўрашди.

✅ 21-22 февраль – Прокуратура вакили эканлигини айтаётган яна бир шахс менга қўнғироқ қилиб, агар мен судга мурожаат қилмасам, 2025 йил 11 декабрдаги 1 800 000 сўмлик суд буйруғини тўлашим керак бўлишини айтди. Шунингдек, агар прокуратура бу ишни кўриб чиқса, биров ишдан бўшатилишига тўғри келишини маълум қилди.

Саволларим мутасаддиларга:


🔹 Бош прокурорнинг шахсан берган топшириғи нега ҳалигача бажарилмади?

🔹 Қоракўлдаги мутасаддилар нега ўз вазифаларини бажармаяпти?

🔹 Фуқаролар ўз ҳақ-ҳуқуқини ҳимоя қилиш учун ҳали ҳам юқори идораларга югуриши керакми?

Ҳурматли "Элтуз", мен қонун доирасида ҳаққимни талаб қиляпман, лекин ҳеч қандай натижага эришолмаяпман. Агар Бош прокурорнинг топшириғи ҳам бажарилмаса, демак, ҳудудий мутасаддилар ҳали ҳам ўз билганича иш тутмоқда.

Менинг мурожаатимни оммавий эълон қилишингизни ва бу масалага жамоатчилик эътиборини қаратишингизни сўрайман!


💬Telegram |📱Facebook |
🐦Twitter |📱Instagram | ▶️YouTube

ОЙЛИК КАМАЙИБ, НАРХЛАР ОШАР ЭКАН…

Бугун сув таъминоти идорасидан ходим келиб: “Сув учун тўлов қилинг, ҳозир арзонроқ, апрелдан яна ошади”, – деди. Ҳисоб-китобимга етказиш учун 500 минг сўм пулим бор эди. Шунинг 300 мингини олиб кетди.

Орқасидан телефонимга SMS келди. Очиб қарасам, “Свет учун бир кунлик тўловингиз қолди” деган ёзув. Қолган 200 минг сўмни шу заҳоти электр энергияси учун тўладим.

Энди эса ой охиригача етиб олиш учун қарз сўрашга мажбурман.

Мактабда икки баҳога ўқиган, лекин ёшлигидан чорвачилик билан шуғулланган синфдошимга қўнғироқ қилдим. “Давлат ишида ишлайсан-ку, ойлигинг кўп эмасми?” – деб сўради у. Мен эса нима дейишни билмай, ич-ичимдан йиғлагим келди.

Ҳа, мен Президент ҳузуридаги Ижтимоий ҳимоя миллий агентлиги ходимиман. Бир қарашда ишончли, яхши маош бериладиган жойдек туюлади. Аммо ойлигим ўтган йилга нисбатан камайган, бир ойга ҳам етмаяпти.

Ота-онам билан бирга яшайман. Уларнинг саломатлиги ёмон, доимий дори-дармонга муҳтож. 750 минг сўм пенсия олишади, лекин бу маблағ уларнинг 7 кунлик дорисига ҳам зўрға етади.

Орзу-ҳавас ҳақида гапиришга ҳожат йўқ. Ҳозирча тирикчилик қилишнинг ўзи катта муаммо.

Апрел яқинлашмоқда. Бу ой билан бирга яна нарх ошиши кутилмоқда. Қандай кун кўтамиз?

Бундан ташқари, давлат томонидан мажбуран ўрнатилган қуёш панеллари қишда ишламаётгани яна бир оғриқли муаммо. Ҳар ой кредит тўлаш шарт, чунки бошқа чора йўқ. Уларга ишониб, ёқилғи учун тезак ҳам жамғармаган эдик.

Чунки бизда газ йўқ – трубаларни кесиб, сотиб юборишган.

Шу шароитда давлат хизматчисининг ҳаёти қандай ўтаётганини ўзингиз тасаввур қилинг.

Таклиф:

👉 Туман ва вазирликда ишлайдиган раҳбарларнинг ойлигини қуйи давлат хизматчилари ойлигига тенглаштиринг!

👉 Агар бизникини ошириш имкони бўлмаса, уларникини камайтиринг – шунда бу ҳаёт қанчалик қийинлигини ўзлари ҳис қилишади.


💬Telegram |📱Facebook |
🐦Twitter |📱Instagram | ▶️YouTube

ТЕАТРЛАРГА ЭЪТИБОР БЕРИШ ВАҚТИ КЕЛМАДИМИ?

Маданият вазирлигининг расмий ижтимоий тармоқларига бир назар солсангиз, вазир жаноблари, унинг ўринбосарларини тадбирларда қатнашгани, мажлислар ўтказгани, учрашувлари ёритилади. Бу яхши.

Ҳар ҳолда шу орқали ўзларини жон олиб, жон бериб ишлаётганини намойиш этишади. Аслида хеч нарсани қойил қилишаётгани йўқ. Қачон қарасанг, онлайн мажлис, умумий мажлис ўтказишдан нарига ўтишмайди.

Маданият уйлари, театрларга, мусиқа мактаблартга келиб, оддий ходимлар билан гаплашиш зарур. Улар раҳбарлари ҳақида қандай фикрда, нима шикоятлари бор, қандай иш олиб бораётганини ўрганиш керак.

Йўқ, булар келади, ейди, ичади, раҳбарларни юзма-юзаки мақтов гапларига учиб яна поездига ўтириб кетади. Ходимлар яна ўша золим бошлиқлар билан оғзини очиб қолаверади. Бу тарзда кетса, умуман ривожланиш бўлмайди.

Ҳатто театр группасида ҳам "Мажлис билан театрни ривожлантириб бўлмайди", деган жумлани келтириб ўтишди. Бу жуда ҳам тўғри.

Аввало маданият тизимида ақлли, фаросатли, виждонли, адолат билан иш юритадиганлар бўлиши керак. Шахсан ўзим бир икки марта вазирликка мурожаат билан бордим ва кўрдимки, у ерда фақат қарсакпарастлар, лаббайчилар, тили ўткир, юзи қоралар ўтираркан. Муомала деган тушунчанинг ўзи йўқ.

Қўполдан қўпол, бефаросат зомбилар борлигига амин бўлдим. Яхшилари ҳам йўқ эмас, албатта. Тили ширин, югуриб-елиб ишлайдигани бор. Аммо улар саноқли. Танганинг иккинчи тарафи ҳам бор-да.

Республикамизда 41 та давлат театри мавжуд бўлиб, вазирликнинг расмий сайтларида уларнинг фаолияти, янги спектакллар, қайноқ премьера ва намойишлар, театр ижодкорлари, республика ва халқаро фестиваллардаги иштироки, умуман, театр фаолиятига оид янгиликлар деярли ёритилмайди.

Ҳозир театрларга онлайн платформа яратиш бўйича топшириқлар тушган. Бу яхши лойиҳадир балки, аммо томошабин театр ҳақидаги маълумотларни платформалардан кўра кўпроқ кунлик янгиликлардан, ижтимоий тармоқлардан излайди-ку.

Сўзнинг бошига қайтсак. Балки бу оғриқларнинг сабаби вазирлик тизимида номутахассис кадрлар ишлаётганидандир. Нима бўлганда ҳам театрларимиз ҳақидаги қайноқ янгиликлар ҳақида қаердан маълумот олишни билмайдиганлар кўп.

💬Telegram |📱Facebook |
🐦Twitter |📱Instagram | ▶️YouTube

⚡️⚡️⚡️Тошкентда бир ойлик умри қолган СПИДга чалинган эркакка соғлом қизни оберишган. Куëв бугун ўлибди. Келин СПИДга чалинган.

💬Telegram |📱Facebook |
🐦Twitter |📱Instagram | ▶️YouTube

ТОШЛОҚДАГИ МАКТАБДА УЧ НАФАР ЎҚУВЧИ ТУБЕРКУЛЁЗГА ЧАЛИНДИ

Фарғона вилояти, Тошлоқ туманидаги 42-мактабда бешинчи синф ўқувчилари орасида уч нафар болада туберкулёз аниқланган. Шунга қарамай, мактаб ўз фаолиятини оддий тарзда давом эттирмоқда.

Элтуз таҳририятига ўқувчиларнинг ота-оналаридан бири мурожаат қилиб, болаларининг соғлиғидан хавотирда эканини билдирди.

Мактабда касаллик аниқланди, лекин ҳеч қандай чора кўрилмаяпти. Болаларимизни мактабга юборишдан қўрқаяпмиз. Агар шундай давом этса, барчага юқиб кетиши мумкин. Балки карантин жорий қилиниши керакдир. Ҳатто қизамиқ (корь) касаллиги ҳам бор, дейишмоқда. Мактаб санитария талабларига жавоб бермайди

, — дейди у.

Ота-оналар мактабнинг ёпиқ ҳолда, ҳеч кимга маълумот бермасдан фаолият юритаётганидан норози. Улар соғлиқни сақлаш муассасалари ва маҳаллий ҳокимиятдан бу масалага жиддий ёндашишни талаб қилмоқда.

💬Telegram |📱Facebook |
🐦Twitter |📱Instagram | ▶️YouTube