Bugun Kun.uz tahririyati oldidan o‘tgan yoshlarning namoyishiga men ham guvoh bo‘ldim. Taxminan 100-150ga yaqin maktab o‘quvchilari “Aslan – kuch!” (Aslan - sila) deb o‘tib ketishdi. Boshida ongim nima bo‘layotganini anglamadi. Keyin, atrofdagilardan nima bo‘layotganini so‘radim. Menga tushuntirishdi. Aslida, bu – ikki avlod tafakkuridagi to‘qnashuv edi. Katta avlod tafakkuri qo‘rquvga to‘lgan bo‘lsa, yoshlar – bemalol emin-erkin o‘z qarashlarini bildirar edi.
*
Biz – yoshi katta avlod, yo‘qotilgan avlodmiz. Bizning zehniyatimiz – yangiliklar yaratishga, buyuk o‘zgarishlar qilishga qodir emas. Lekin, mana shu namoyish qilib o‘tgan yoshlardan umid bor. Naqadar chiroyli manzara! Ongi hech qanday qo‘rquvlarga taslim bo‘lmagan, bemalol o‘ylaganini ayta oladigan yoshlar! Ular hech narsani buzmay, hech kimni haqorat qilmay, tartib bilan o‘tib ketishdi. Ular o‘zlari uchun qadrli bo‘lgan shaxsning ozodligi uchun, ezgulik uchun namoyish qilishdi...
*
Davlat mulozimlariga murojaat qilib aytar edimki, iltimos, shu avlodni ham majruh qilmaylik! Ularni ham tafakkurini qo‘rquv bilan to‘ldirmaylik! Axir, faqat erkin va mag‘rur insonlargina Hur va chinakkam Mustaqil davlat qura olishadi! Iltimos, biz o‘zimizni kelajagimizni sindirmaylik! Yoshlarimizni qo‘rqitib, davlatimiz kelajagiga bolta urmaylik!

Kamoliddin Rabbimov, siyosiy tahlilchi.

➡️@fakultetFilologiya