Surxondaryo viloyati hokimligi

Davlatimiz rahbarining tashabbusi bilan ekologik toza hayot qurish, atrof-muhitni muhofaza qilish maqsadida har yili "Yashil makon" umummilliy loyihasi amalga oshirilib kelinmoqda. Mazkur loyiha doirasida viloyatimizda ham qator amaliy ishlar, turli bog‘lar, "yashil" belbog‘lar yaratilmoqda.

Bugun mazkur tashabbus doirasida Angor tumanida joylashgan "Farovon sifat Surxon" MCHJ tomonidan yaratilayotgan 3 gektarlik bog‘iga daraxt ko‘chatlari ekish ishlari amalga oshirildi. Tadbirda Surxondaryo viloyati hokimi Ulug‘bek Qosimov va mutasaddilar, shuningdek, onlayn formatda shahar va tumanlardagi 337 ta "zapravka"lar masʼullari hamda 724 ta mahalla fuqarolar yig‘inlari vakillari ishtirok etdi.

Viloyat rahbari mazkur tashabbus uchun tadbirkorlarga o‘z minnatdorchiligini bildirib, yaratilgan bog‘ kelgusida ularning o‘zlariga qolishini, bu ezgu ish bilan ekologiya musaffoligini asrashga bebaho hissa qo‘shayotganliklarini ta’kidladi.

Shuningdek, viloyatdagi har bir mahallaning "Mahalla byudjeti"da shakllangan mablag‘lari hisobidan kam ta’minlangan oila xonadonlarida ko‘chat ekish tadbirlariga ham start berildi. Bu ishlarni namunali tashkil etish maqsadida kelgusi haftada ushbu formatdagi keng ko‘lamli tadbir qayta o‘tkazilishi belgilandi. Viloyat rahbari hududdagi xonadonlarning birida yoshlar bilan mevali daraxt ko‘chatlari ekdi.

Shundan so‘ng, avtomobil yo‘llari bo‘yiga ekilgan daraxt ko‘chatlarini sug‘orish va parvarishlash ishlari bilan tanishdi. Mutasaddilar bilan Sherobod tumanida joylashgan Iso at-Termiziy majmuasidan M39 xalqaro avtomagistral yo‘li bo‘ylab, Sherobod, Muzrabot, Angor va Termiz tumanlari hamda Termiz shahrigacha bo‘lgan yo‘lbo‘yi hududlarida obodonlashtirish, ko‘kalamzorlashtirish, tashkil etilgan "yashil" belbog‘lar parvarishi, dalalarda qishloq xo‘jaligi ishlarining borishi ko‘zdan kechirildi.

Eslatib o‘tamiz, kuni-kecha viloyat rahbari Termiz shahridan Uzun tumanigacha poyezdda borib, temir yo‘l atrofida joylashgan mahallalar, qishloq xo‘jaligi maydonlarida amalga oshirilayotgan ishlar bilan tanishgan edi.

Surxondaryo.uz | Telegram | Facebook | Instagram | YouTube | X

26-yanvar — Davlat bojxona xizmati organlari xodimlari kuni

2018-yil 22-dekabrdagi Qonun bilan 26-yanvar – O‘zbekiston Respublikasi davlat bojxona xizmati organlari xodimlari kuni etib belgilangan.

Bojxona xizmati mamlakatimiz iqtisodiy xavfsizligi va barqarorligini ta’minlovchi muhim sohalardan biridir. Aynan bojxona xodimlarining fidoyi va jonkuyar mehnati tufayli yurtimizning eksport-import siyosati amalga oshiriladi, olib kirilayotgan tovarlar xavfsizligi nazorat qilinadi, mamlakat budjetiga halol mablag‘ tushumi va davlatimizning xalqaro obro‘si yuksakligi ta’minlanadi.

Davlat bojxona xizmati organlari xodimlari kuni munosabati bilan soha fidoyilarini samimiy muborakbod etib, sharafli va mashaqqatli faoliyatlarida ulkan muvaffaqiyatlar tilaymiz!

Surxondaryo.uz | Telegram | Facebook | Instagram | YouTube | X

Surxondaryo viloyati hokimi Ulug‘bek Qosimov Uzun tumaniga tashrifini davom ettirib, 2-sonli politexnikum faoliyati bilan tanishdi. Ta’lim maskanida chilangarlik, mexanik, qandolatchilik, tikuvchilik kabi kasblarga o‘rgatish yo‘lga qo‘yilgan. Viloyat rahbari ta’lim maskanining mavjud imkoniyatlaridan unumli foydalanish, o‘quvchilar, shuningdek, ishsiz aholini talab yuqori bo‘lgan kasblarga o‘qitishni samarali tashkil etish lozimligini ta’kidladi.

Shundan so‘ng, "Yangi ro‘zg‘or" mahallasida aholi xonadonlarida yo‘lga qo‘yilgan tadbirkorlik loyihalari, xususan, chilangarlik, qandolatchilik, tomorqadan samarali foydalanish, uzumchilikni rivojlantirish, zovurlarda o‘rdakchilikni yo‘lga qo‘yish bo‘yicha amalga oshirilayotgan ishlar hamda kelgusidagi rejalar bilan tanishildi.

Mutasaddilar shu yerning o‘zida tumandagi 8 ta mahallada "Yangi ro‘zg‘or" tajribasi asosida voish usulida uzum yetishtirish hamda 20 ta o‘rdakchilikni yo‘lga qo‘yish loyihalarini taqdimot qildi.

Shuningdek, tumanning "Yangi kuch" mahallasida 22 ta xizmat turini ko‘rsatuvchi "Yangi kuch" mahalla servis kompaniyasining tantanali ochilish marosimi o‘tkazildi. Umumiy qiymati 350 mln so‘m bo‘lgan MSK 11 turdagi zaruriy jihozlar bilan ta’minlangan bo‘lib, hududdagi mavjud infratuzilma muammolarini hal etish va kommunal servis xizmatlari ko‘rsatish faoliyatini amalga oshiradi.

Tashrif yanunida "Nurafshon" mahallasida joylashgan bir kunlik aralash hamda chorva mollari bozorini zamonaviy savdo kompleksiga aylantirish orqali rekonstruksiya qilish loyiha taqdimoti bilan tanishildi.

Surxondaryo.uz | Telegram | Facebook | Instagram | YouTube | X

Bugun Surxondaryo viloyati hokimi Ulug‘bek Qosimov tadbirkorlarni qiynab kelayotgan muammolarni o‘rganish, yangi taklif va tashabbuslarni ko‘rib chiqish hamda tegishli chora-tadbirlarni belgilash maqsadida onlayn formatda hududiy studiyalar orqali navbatdagi "Tadbirkorlar qabuli"ni o‘tkazdi.

Dastlab, avvalgi qabullar hamda hududlarga tashriflar davomida tadbirkorlar tomonidan ko‘tarilgan masalalarning hal etilishi tahlil qilindi. O‘tgan 2024-yil davomida o‘tkazilgan tadbirkorlar qabullari daomida kelib tushgan murojaatlarning 83,8 foizi ijobiy hal etilganligi, biroq, qator mutasaddilarning bu boradagi faoliyati qoniqarsiz ekanligi ko‘rsatib o‘tildi. Viloyat rahbari ayrim mas’uliyatsiz rahbarlar tadbirkorning masalasini yechilishiga yordam bermagani yetmaganday uning faoliyatiga to‘sqinlik qilishi holatlari aniqlanganini qayd etib, bu borada barchani qat’iy ogohlantirdi.

Tadbirkorning qonuniy faoliyatiga to‘sqinlik qilgan, uning muammo va masalalarini tegishliligi bo‘yicha hal etmayotgan rahbarlarga nisbatan keskin choralar ko‘rilishi ta’kidlandi.

Shundan so‘ng, viloyat rahbari Termiz shahri va tumanlar studiyalari orqali tadbirkorlarning murojaatlarini tingladi. Qabul yakunida 532 nafar tadbirkorning 579 ta murojaati 40 dan ortiq mutasaddi rahbarlarga ijro uchun biriktirilib, ijrosini to‘liq nazoratga olish yuzasidan vazifalar topshirildi.

Surxondaryo.uz | Telegram | Facebook | Instagram | YouTube | X